Täräkwata kia mrä sribebare bä nuäre
1. ¿Dre sribebare mrä bä jene aune bä nuäre kukwe driekäre?
1 Gätä Kri Köbömä “Ngöbö kukwei ye metre” nuainbare kä 2013 yete ye ngwane täräkwata kia kärike mrä mikani tuare. Ne madakäre, täräkwata kia mada Gobran Ngöbökwe Kukwei número 38, kädekata ¿Erametre nitre krütanina ye rükaita nire? ye tä mikani täräkwata kia kärike mrä yebe arato. Täräkwata kia kä ti ye sribebare mrä bä jene aune bä nuäre. ¿Ñobätä sribebare mrä bä jene? ¿Nikwe driedre ju ju te ye ngwane sribebare jene yebiti ni raba dirire ño kwin?
2. ¿Täräkwata kia mrä bä jene yekwe ni dimikai kukwe meden meden nuainne?
2 Ñobätä sribebare mrä bä jene. Nikwe kukwe ketabokä nieta nete ne nuaindre kukwe driekäre bäri kwin ju ju te: 1) nikwe kukwe ngwandretari nitre mikakäre töbike blita kömikakäre, 2) dre nieta Bibliakwe ye mikadre gare, 3) tärä o täräkwata ruäre driedre nitre ie ne kwe niaratre ñäkädrebätä aune 4) kukwe ngwandretari kädriekäre ben köbö mada ngwane aune köbö ükadrete jai tuabitikäreta. Täräkwata kia mrä bä jene yekwe ni dimikai kukwe ketabokä ye nuainne nuäre.
3. ¿Täräkwata kia mrä ye nikwe driedre ño kukwe driekänti?
3 Driedre ño. Nikwe köbö kwin niedre ni gwi ie ye bitikäre, 1) täräkwata kia yebätä página kena yekänti kukwe ütiäte ngwantarita abokän mika raba gare kukwe keta kabrebiti ye nikwe mikadre tuare ie aune kukwe yebätä tä töbike ño ye nikwe niemanandre ie, 2) täräkwata kia ye metadrete aune blitadre kukwe kädekata “Biblia tä niere” yebätä. Biti nikwe ñäkädre bersikulo yebätä Bibliabätä, raba angwane, o kä tärä blitakäre ni yei angwane, subtítulo kädekata “Rabadre gare nie ye ñobätä kwin krubäte” ye ni raba kädriere ben, 3) nikwe täräkwata kia ye driedre ie aune raba ñäke kukwe mada yebätä angwane nuaindre kwe nikwe niedre ie, 4) ni jämi nikenta ye känenkri, subtítulo kädekata “Mäkwe ngwantari jai” yekänti kukwe ngwantarita página mrä yebätä ye nikwe mikadre tuare ie, aune köbö ükadrete jai tuabitikäreta bätä Biblia tä kukwe meden mike gare ye kädriedre ben.
4. ¿Ni rikadreta ni gwi tuinbitita ye ngwane blitadre ño täräkwata kia mrä yebätä?
4 Nitre tuadrebiti ye ngwane nuäre blitadrebätä arato. Kukwe ngwantarita abokän nikwe mikaninte kädriedre ye mikakäre gare nikwe ñäkädre texto tä página mrä yebätä aune täräkwata Kukwe kwin üai tä täräkwata kia yebätä ye mikadre tuare ie. Biti, nikwe täräkwata ye mikadre tuare ie aune nikwe kukwe medenbätä blitabare ben ye mikata gare bäri kukwe ja tötikara medenkänti ye mikadre tuare ie aune täräkwata ye driedre ie. Kadre ngäbiti kwe angwane, nikwe köbö ükadrete ñäkäkärebätä ben ni rikadreta känti ye ngwane. Ye köböire nikwe ja tötika Bibliabätä kömikai. Ñaka täräkwata ye aibe driedre, ñakare aune ni raba täräkwata kia mada bien ie aune köbö ükadrete jai blitakärebätä ben ni rikadreta känti ye ngwane.
5. ¿Ñobätä täräkwata kia ye kwin krubäte kukwe driekäre?
5 Kä nikanina 130 biti bäri ta yete nita kukwe driere täräkwata kia yebiti. Sribebarera jene jene akwa kwin krubäte kukwe driekäre. Sribebare mrä bä jene yebiti nikwe kukwe Bibliabätä ye mikadre gare jankunu Kä jökräbiti tibien (Prov. 15:7a).