Sribita ja dibiti köböire kukwe kwin tä nemen bare ye käi juto nibätä
1. ¿Dre raba kä mike ñaka juto nibätä kukwe driekäre?
1 Ngöbökwe ni kä tibienbätä sribebare ne kwe rabadre “sribi[re] ja dibiti, ye köböire [...] jondron kwin” rabadre kwetre (Ecl. 2:24). Ye medenbätä, kukwe kwin ñaka tä nemen nikwe kukwe driekänti ye ngwane, nita nemen di nekä aune kä ñaka tä nemen juto nibätä. ¿Ño ni raba ja töi mike jankunu kwin metre?
2. ¿Ñobätä nikwe töbikadre kwin metre?
2 Töbikadre kwin metre. Nitre braibe käkwe Jesús kukwe nuabare, akwa kukwe kwin ñaka namani niarakwe ye ni ñakare jire iti raba niere (Juan 17:4). Jesukwe ni nura nökaka bämikani ye ngwane, niebare kwe kukwe Gobran Ngöbö yebätä driedi ye ñaka ririai jire nitre kwati krubäte brukwäte (Mat. 13:3-8, 18-22). Akwa nita ja di ngwen sribire ye köböire dre kwin tä nemen bare ye ani mike gare jai.
3. ¿Nitre ñaka tä ni kukwe nuin akwa nita sribi kwin ye nuainne ño?
3 Nita sribi kwin ye nuainne ño. Ni nura nökaka bämikani ye tä mike gare kukwe kwin Gobran Ngöbökwe yebätä drieta ye nire nire käkwe kai ngäbiti angwane “ngwä” rabai nura ye kwrere (Mat. 13:23, Kukwe Kuin Ngöbökwe [WBT]). Trigo bükün ye ngokwä tä nemen aune tä nemen tän angwane, bükün mada mrä ñaka tä nemen, ñakare aune ngokwä mrä tä nemen. Ye erere arato, ni kristiano tä sribi kwin nuainne ye ñaka tä ni mada tötike aibe, ñakare aune tä kukwe kwin nura kwrere ye mike nirien bäri, ye abokän kukwe kwin Gobran Ngöbökwe yebätä tä blite käre. Nitre ñaka tä kukwe drieta nikwe ye kain ngäbiti, akwa kukwe “kwin” tä nemen nikwe ye kätä kä mike juto nibätä. Nita kukwe driere ye ngwane, nita Jehová kä ye mike deme arato (Is. 43:10-12; Mat. 6:9). Aune nita sribire Ngöböbe ye ütiäte ni kräke (1 Cor. 3:9). Ne madakäre, Jehová “käikitadrekä nikwe ja kadabti” ye nemen kwin kräke (Heb. 13:15, 16, WBT).
4. ¿Sribi meden kwin ni raba nuainne abokän ñaka gare jabätä nie?
4 Nita sribire ja dibiti akwa ye köböire dre rabai bare ye nikwe ñaka tuai käre ye nikwe ngwandre törö jai arato. Nitre ruäre käkwe Jesús kukwe nuabare ye käkwe ñaka ja mikani ja tötikaka niarabe nämene Kä tibienbätä ye ngwane. Ye erere arato, kukwe kwin Gobran Ngöbökwe yebätä nura kwrere nökata nikwe ni ruäre brukwäte ye ñaka ngätrie tä nemen jötrö ngwarbe aune nirien, akwa ye bitikäre ni ye tä ja mike Testiko ñaka tä nemen gare nie. Erametre nita kukwe driere ye köböire kukwe kwin tä nemen bare. Ye medenbätä, nikwe “sribi kuinkuin nuend[re]” jankunu aune ni ja tötikaka Jesube ye nikwe bämikadre (Juan 15:8, WBT).