Kukwe ngwantarita

◼ Gätäte aune kukwe driekänti ni tädre jondron nuainne celular yebiti angwane, ¿kukwe meden Bibliabätä ja jie ngwankäre abokän mikadre täte?

“Kä tärä kukwe jökrä nuainkäre.” (Ecl. 3:1.) Celular yebiti ni raba kukwe tike aune juen ni madai o ni raba blite ni madabe kä jökrä ngwane. Akwa, kä ruäre känti ni kristiano ñaka rabadre ja näkwite celular yebätä. Ñodre, gätäte nita Jehová mike täte, kukwe ja üaire kan ngäbitita nikwe aune nita ja dimike kwärikwäri (Deut. 31:12; Sal. 22:22; Rom. 1:11, 12). ¿Ni raba celular ötöte gätä ye näire aune kukwe tikata nie ye ni raba mike ñärärä ni rikadreta ja gwirete ye ngwane? Blitadre nibe celular yebiti ye ni tädre ngübare aune ñaka rabadre nuäre celular ye ötadrete ni kräke angwane, ni raba ükete ne kwe ngö ñaka rabadre ni mada töi nike.

Ni rabadre jondron jökrä nuainne “Ngöbö kukwei kuin Jesubtä kräke” (1 Cor. 9:23, Kukwe Kuin Ngöbökwe). Ruäre ngwane ni raba blite celular yebiti ni tädre kä kukwe driekäre yekänti ngwane. Ñodre, ja mräkä nitre kukwe driekä jie ngwanka raba celular yebiti blite ja mräkätre tä kukwe driere kä madakänti yebe. Aune ni kukwe driekä raba celular yebiti blite nitre ja tötikaka o ni tuabitidre kwe yebe, jämi niken ye känenkri, metrere tä nüne mente ye ngwane raba nuainne. Akwa, ni tädre kukwe driere ni madai ye ngwane ni raba ja ngübarebiti ne kwe celular ye ñaka rabadre ni töi nike (2 Cor. 6:3). Ne madakäre, ni tädre nitre mada kukwe driekä ye ngübare angwane, ni ñaka rabadre blite celular yebiti ja ketamuko nikwe yebe o kukwe juen ie. Bäri kwin nikwe ja töi mikadre kukwe drieta yebätä aune ni tädre ja ngwen mokre nitre kukwe driekä tädre nibe yebe.

Nikwe töbikadre ni mada yebätä (1 Cor. 10:24; Filip. 2:4). Kukwe driedre känenkri gätä nuainta yebätä ni ñaka rabadre, akwa ye bitikäre ni ñaka raba nütüre ni raba blite celular yebiti o kukwe juen nitre ruäre tä kukwe driere yei kä medenkänti kukwe drieta ye ngwantarikäre ietre. Nita nemen kä rairebiti ye ngwane, nitre kukwe driekä braibe ye ükateta bobukäre. Kukwe ruäre raba ni mike nemen kä rairebiti. Akwa nikwe ja di ngwain nemen ora ükaninte ye näre te angwane, nikwe bämikai nita Ngöbö, ja mräkä nitre kukwe driekä jie ngwanka aune ja mräkätre mada ye mike ütiäte jai.