“¡Ñaka tä käre gwi!”

Nitre tö namani kukwe mikai gare jai yekänti nita nikenta akwa ñaka kwen gwi nie ye ngwane ni tärä kukwe ye erere niere. Nita ja di ngwen nikenta nitre känti akwa kukwe metre nura kwrere nökata nikwe yebiti ñaka tä nemen nuäre ñö metakakäre nie (1 Cor. 3:6). ¿Nikwe dre nuaindre? Nitre kukwe driekä ruäre ie kukwe gare tä tärä tike o tä kukwe tike biti tä mikete jukwebätä nitre kräke. Nitre kukwe driekä mada ie nitre ñaka kwainta gwi gare ietre, yebätä tätre número celular kwetre ye kärere ietre. Biti tätre niere krörö: “¿Ti raba kukwe juin celularte mäi?”. Batire batire nikwe tärä tikadre ni gwi kräke, kukwe juandre correo electrónico yete ie o celular yete ie, kukwe tikadre biti mikadrete jukwebätä kräke o ñäkädre celularte ie ye ngwane ni tuabitita ye täin raba iti. Ye köböire, nitre ñaka tä käre gwi akwa nikwe töi mikai bäri kukwe metre ye mikabätä gare jai.