¿Nirei kukwe ne raba nemen tuin ütiäte?
1. ¿Täräkwata Ni Mikaka Mokre bätä ¡Despertad! yebätä nita ñäke angwane drebätä nikwe töbikadre, aune ñobätä?
1 Täräkwata Ni Mikaka Mokre bätä ¡Despertad! ye sribeta nitre kä jökräbiti tibien kräke. Ye medenbätä, kukwe keta kabre tä ükanintebätä. Nikwe ñäkädrebätä ye ngwane, kukwe keteitire keteitire ye raba nemen tuin ütiäte nirei yebätä nikwe töbikadre, biti nikwe täräkwata ye driedre ni yei.
2. ¿Kukwe meden meden kädrieta täräkwatabätä abokän raba nemen tuin ütiäte nitre madai?
2 ¿Kukwe Bibliabätä kädrieta täräkwata Ni Mikaka Mokre yebätä ye erere nikwe kädriebarera sribi muko ruäre nikwe yebe? ¿Kukwe tä blite ni ja mräkärebätä ye kwanina nie abokän raba ni mräkä ruäre dimike? ¿¡Despertad! yebätä kä ruäre kädrieta yekänti nire tö näin ye gare nie? ¿Kukwe drieta nikwe yekänti jondron rürübäin käi o obisina gobrankwe tä abokän känti ni raba täräkwata ruäre ye driere? Ñodre, kukwe ruäre ben nitre umbre tä ja tuin ye kädrie tärä täräkwatabätä angwane, ni raba driere nitre umbre ngüba käi yekänti. Kukwe käme nuainta ye kädrie tärä täräkwata keteitibätä angwane, drie raba obisina kukwe ükatekäre o obisina guardiakwe yete.
3. Täräkwata meden raba nemen tuin ütiäte nitre ie yebätä töbikadre ye kwin krubäte abokän kukwe namani bare tä bämike ño ye mä raba niere.
3 Kukwe tä nemen bare. Täräkwata ¡Despertad! octubre 2011 kädekata “Cómo criar hijos responsables” ye namani nitre gure nünanka Sudáfrica kisete, ye bitikäre konkrekasion kwetre tä kukwe driere yekänti kwela 25 yete blitabare kwetre teléfono yebiti. Ye köböire, kwela 22 yete täräkwata ye kani ngäbiti aune döräibare monsotre nänkä kwelate yebiti. Nitre gure mada nünanka juta ye arabe känti käkwe ye erere nuainbare arato aune tätre kukwe driere yekänti täräkwata ye mikaninte kwetre kwela jene jene yete. Kwela ye keteiti känti, täräkwata yebiti nitre ruäre dirikä kwelate käkwe diribare aune monsotre mikani ñäkebätä kwetre bämän kratire kratire. Nitre gure kukwe nuainbare ye mikani gare kwetre ni ni tuabitikä konkrekasionte yei, aune ni ni tuabitikä konkrekasionte yekwe konkrekasion mada mada nübaibare ye erere nuainne. Mrä mada, täräkwata ye ribebare bäri sukursal yei yebätä mada imprimibare bobukäre.
4. ¿Ñobätä ni törba täräkwata ye tuai nemen nitre jökrä kisete?
4 Täräkwata Ni Mikaka Mokre bätä ¡Despertad! tä kukwe keta kabre nemen bare käbiti tibien ye mike gare metre bätä tä nitre ñäkäkä täräbätä ye töi mike Bibliabätä aune Gobran Ngöbökwe yebätä. Ne madakäre, täräkwata ye aibe tä “ni diaintari ye kukwei mik[e] gare” (Is. 52:7). Ye medenbätä, nitre kwati käkwe ñäkädrebätä yei ni tö. Ye erere rabadre bare, yekäre ni rabadre ngwentari jai: “¿Nirei kukwe ne raba nemen tuin ütiäte?”.