Kukwe ngwantarita

◼ Meri kukwe driekä tädre ni iti tötike Bibliabätä jukwebätä ni brare kukwe driekä ben ye ngwane, ¿rabadre ja dokwä juemike?

Meri kukwe driekä tä ni mada tötike Bibliabätä bämän kratire kratire yebe ni brare kukwe driekä rikadre angwane, rabadre ja dokwä juemike (1 Cor. 11:3-10). La Atalaya 15 julio 2002 página 27 yekänti nieta: “Ni mada tötika niena Bibliabätä ye ngwane, nire tä ni ye tötike yekwe tötikadre, ñobätä ñan aune ni mada tötika niena ye abokän dirita konkrekasionte ye kwrere. Meri ja ngökabarera ñöte tädre ni mada tötike Bibliabätä ni brare ja ngökabarera ñöte okwäbiti angwane, rabadre ja dokwä juemike”. Ni mada tötikadre gwi, jukwebätä o kä meden erere känti, akwa käre nuaindre ye erere.

Akwa krire blita jatadre ni madabe tötikakäre ye ngwane, ¿dre nuaindre? Ye erere ngwane meri kukwe driekä ñaka rabadre ja dokwä juemike, aune tädre nire tuinbiti ja tötika Bibliabätä nuainta ño ye aibe driekäre ie o tärä sribebare ni mada tötikakäre Bibliabätä yebätä blitadre kwe ben ye ngwane ñaka ja dokwä jue mikadre kwe arato. Ni mada tötikata jukwebätä ye nuainta kiakia jatäri aune tuabitita bä kabre, ye medenbätä nitre kukwe driekä rabadre töbike kwin ja käne aune meri rabadre ja dokwä juemike ñongwane yebätä töbikadre kwetre.