Nitre kräke nita niken täräkwata ngwena käre yebiti ja tötika Bibliabätä kömikadre
1. ¿Ni rabadre niken täräkwata ngwena käre nitre kräke ye ñobätä juta Jehovakwe tä niere nie?
1 Nitre töta nemen ñäkäi tärä o täräkwata nikwe yebätä akwa ñaka tö ja tötikai Bibliabätä ye kräke ni rikadre täräkwata Ni Mikaka Mokre bätä ¡Despertad! ngwena käre ye juta Jehovakwe tä mekerabe niere nie. ¿Ñobätä? Ñobätä ñan aune nitre tä ñäke täräkwata yebätä angwane töta nemen Kukwe Ngöbökwe mikai gare jai (1 Ped. 2:2). Aune nitre tä ñäke kukwe medenbätä ye tä mate brukwäte aune ye tä töi mike ja tötike Bibliabätä.
2. ¿Nitre kräke nita niken täräkwata ngwena käre ye ni raba töi mike ño kukwe mike gare bäri jai?
2 Kukwe metre nura kwrere yebiti nikwe ñö metadrekä. Nikwe ñaka täräkwata Ni Mikaka Mokre bätä ¡Despertad! ye biandre jerekäbe nitre ie biti ni rikadreta, ñakare aune blitadre bentre töi mikakäre blite jabe. Ye erere nikwe nuaindi angwane, tätre nüne ño, dre tuin ütiäte ietre aune kukwe meden mikata täte kwetre ye raba nemen gare nie, aune ye köböire kukwe medenbätä nikwe blitadre bentre bätä nikwe blitadre ño bentre ye rabai gare nie (Prov. 16:23). Akwa, ye kräke nikwe ja tötikadre kwin. Kukwe tä täräkwatabätä aune texto Bibliabätä tä mike gare ño ye känändre keteiti kädriekäre jötrö bentre. Ye erere nikwe nuaindi angwane, kukwe metre tä nökani niaratre brukwäte yebiti nikwe ñö metaikä (1 Cor. 3:6). Köbö medente nita niken niaratre känti, nita tärä o täräkwata meden bien ietre, kukwe medenbätä nita blite bentre aune bersikulo meden kädrieta bentre ye tikadre täräbätä jai ye nikwe ñaka käi kwitadrekä jabiti.
3. ¿Nitre kräke nita niken täräkwata Ni Mikaka Mokre bätä ¡Despertad! ngwena käre yekänti ni rikadreta ñongwane?
3 Ñongwane ni rikadreta känti. Nitre kräke nita niken täräkwata Ni Mikaka Mokre bätä ¡Despertad! ngwena käre yekänti ni rabadre niken bati sö kratire kratire. Akwa nitre ye tö kukwe mikai gare jai aune tätre nüne ño ye ererebätä ni rabadre niken jabitibe känti. Nikwe täräkwata Ni Mikaka Mokre bätä ¡Despertad! mikaninte ni yei ye käi rikadre bämän krati o krobu ta ye bitikäre ni raba nikenta känti aune niedre krörö ie: “Tikwe täräkwata mikateba mäi yebätä kukwe ütiäte krubätebätä tikwe ñäkäba ye ti törba aibe mikai gare mäi”. Ye köböire törbai kukwe ruäre tä täräkwatabätä ye mikai gare bäri jai. Ni iti käkwe ñäkäbarera kukwe yebätä niedre kwe nie angwane, namani tuin ño ie ye nikwe ngwandretari ie aune blitadre chi kukwe yebätä ben. Nire ie tärä o täräkwata nikwe tuin ütiäte, yei täräkwata o tärä meden drieta sö yebätä ye driedre.
4. ¿Nitre kräke nita niken täräkwata ngwena käre ye tötikakäre Bibliabätä nikwe dre nuaindre?
4 Nitre törbadre ja tötikai Bibliabätä ye ni ñaka rabadre ngübare niere jai. Ñakare aune, nikwe ja töi mikadre käne ja tötika Bibliabätä driere ietre. Ñaka ja tötika Bibliabätä kadre ngäbiti kenanbe kwetre nie, akwa ruäre ngwane ni raba Ni Mikaka Mokre yebätä kukwe kädrieta jatäri kädekata “Kukwe ngwantarita Biblia yebätä” yekänti kukwe nieta ye mike gare ietre aune kädriere bentre. Ye erere nikwe nuaindi angwane, nikwe ja tötika Bibliabätä kömikai bentre jukwebätä. Ye erere ñaka rabadre bare nie, akwa ni rabadre niken täräkwata Ni Mikaka Mokre bätä ¡Despertad! ye ngwena jankunu kräketre aune töi mike kukwe mike gare bäri jai.