¿Ti tuin ño Jehovai?
1. ¿Kukwe medenbätä Biblia ye ñuai kwrere?
1 ¿Bäbe mätä ja tuin ñuai yete? Ni jökrä bäsi tä ja tuin mantre jetebe ñuai yete, ñobätä ñan aune ye tä ni dimike ja ükete bäri kwin. Ni raba Biblia ye bämike ñuai yebätä. Nikwe ñäkäibätä angwane ni brukwä tuin Jehovai abokän tä ño ye rabai gare nie (1 Sam. 16:7; Sant. 1:22-24). Ngöbö Kukwei raba “ni töi ño ño kaibe nikwe amne nita töbike ño ño [...], ye [...] mike gare jökrä nie” (Heb. 4:12, Kukwe Kuin Ngöbökwe [WBT]). Nikwe ñäkädre mantre jetebe Bibliabätä aune töbikadretaribätä yekwe ni dimikai nikwe kukwe driedre ño bäri kwin ye mike nüke gare jai. ¿Ñobätä nita ye niere? (Sal. 1:1-3.)
2. ¿Nita ja ngwen ño ye Biblia raba ni dimike mike nüke gare ño jai?
2 Mäkwe Biblia yete ja tua ñuai ye kwrere. Nitre Jehová mikani metre täte kädrieta Bibliabätä ye tä ni dimike ni töi meden meden kwin Jehová kräke ye mike nüke gare jai. Ñodre, rei David käkwe Ngöbö kä ye mikani bäri ütiäte jai (1 Sam. 17:45, 46). Kä ñaka nuäre kukwe driekäre yekänti Isaías ni Ngöbö kukwei niekä käkwe ñaka kä jürä ngwani jabätä kukwe driere (Is. 6:8, 9). Jesukwe Rün kwe kä kwinbiti tarebare yebätä kukwe drie nämene kwe yekwe dimikani, nuainbare kä jutobiti kwe aune ye ñaka namani tuin tribe doboko ye kwrere ie (Juan 4:34). Nitre kristiano siklo kena käkwe kukwe driebare kä jutobiti, tö ngwani kwetre Jehovai aune ñaka ja di ngwani nekä kwetre (Hech. 5:41, 42; 2 Cor. 4:1; 2 Tim. 4:17). Nikwe töbikaitari nitre yebätä yekwe mikai nüke gare nie nita ja ngwen ño, aune yekwe ni töi mikai kukwe driere bäri kwin.
3. ¿Ñobätä ni rabadre ja ükete biarebe?
3 Nikwe ja ükadrete. Nikwe ja tuadre ñuaite biti dre jutuadre jabätä nie ye nikwe ñaka ükadrete ye ngwane nikwe ja tuadre ngwarbe ñuaite. Nikwe ja di kärädre Jehovai ja mikakäre ñärärä bäri kwin ne kwe dre jutuadre jabätä nie ye nikwe ükadrete (Sal. 139:23, 24; Luc. 11:13). Kä niena braibe ni käne, aune nitre kwati jämi Ngöbö mike täte, yebätä ni rabadre ye nuainne biarebe (1 Cor. 7:29; 1 Tim. 4:16).
4. ¿Nire tä ja tuin kwin Ngöbö Kukwei yete biti dre tuin jabätä ie tä ükete ye töita nemen ño?
4 Ni brukwä tuin Jehovai ye bäri ütiäte ni bä ño bätärita yebiti ta (1 Ped. 3:3, 4). ¿Nire tä ja tuin kwin Ngöbö Kukwei yete biti dre tuin jabätä ie tä ükete ye töita nemen ño? Tä nemen “ñakare kukwe nuaka jerekäbe, biti käi kwitakaka jabiti; akwa niara tä kukwe sribie nuainne; ne nie abräbätä kätä nuäre jondron nuainta kwe nebätä” (Sant. 1:25, Ngöbö Täräe [NGT], tärä okwä ükaninte). Erametre, ni rabai kukwe driere bäri kwin aune kä jutobiti ñobätä ñan aune “ni abrä ñuai kwrere, trä ngitiekä Ji dokwäte kri [“Jehová”, TNM] träkwe” (2 Cor. 3:18, NGT).