Biblia mike tuin jai ñuai ye kwrere

Ni ja tötikaka Santiago käkwe niebare Biblia ye abokän ñuai ye kwrere, dre tä ni brukwäte ye ni raba mike gare jai (Sant. 1:​22-25). Akwa, ja tuadre kwin ñuai yete yekäre, ¿dre nuaindre?

Nikwe ñäkädre bätärekä Ngöbö Kukweibätä. Nikwe ja mikadre ñärärä jötrö ngwarbe ñuaite ngwane, dre käme tä nibätä abokän nikwe ükadrete ye ñaka raba tuin nie. Ye erere arato, ñäkäta jötrö ngwarbe Bibliabätä ngwane, drebätä nikwe ja töi kwitadre ye nikwe ñan gai jabätä. Akwa yekäre nikwe ñäkädre kwin aune bätärekä Bibliabätä.

Ja trä tuadre akwle aune ñan ni mada mikadre ñärärä. Ñuai mikata ño yebiti nitre mada raba tuin te nie aune dre ñaka kwinbätä ye raba tuin nie arato. Ye erere arato nita ñäke Bibliabätä ye ngwane, nitre mada raba dre nuainne o kwite ye raba tuin bätä nie. Akwa ni akwle rabadre dre nuainne o kwite abokän ñan raba tuin jabätä nie.

Ja töi mikadre debe näre. Nikwe ja tuai ñuaite ngwane dre dre blo o kukwe ñan kwin nibätä ye aibe mikadre ñärärä ngwane raba ni ngwen di nekä. Kukwe nieta Bibliakwe ñan ni di ngwandre nekä yekäre nikwe ja töi mikadre debe näre kukwe nieta kwe yebätä, aune ñan ja töi mikadre Jehová ñan kukwe ribere nie yebätä. (Sant. 3:17).