Nitre ie kä ñaka tuin ye nikwe dimikadre ja tötike Jehovabätä
1. ¿Jesús tö nämene nitre ie kä ñaka tuin ye dimikai ye bämikani ño kwe?
1 Jesús nämene Jericó namanina juto nänkäre mento. Ye ngwane, nitre nibu ie kä ñaka tuin namanintre niere ja dibiti ie: “¡Jrei David tukwe mräkä, nun ngwen ruentari tare jae!”. Jesús nämene töbike krubäte raba ruin nie, ñobätä ñan aune murie ketadre ye käi namanina ja ken ye nämene gare ie. Yebiti ta, niara namani nünaninkä, nitre ye käräbare kwe aune mikaninta kwin kwe (Mat. 20:29-34, Kukwe Kuin Ngöbökwe). ¿Jesukwe nitre mikani tuin bobre jai ye erere ni raba ja ngwen ño?
2. ¿Nitre ie kä ñaka tuin kwandre ji ngrabare nie yei ni raba kukwe driere ño?
2 Nikwe dimikadre. Nitre ie kä ñaka tuin ye kwandre nie ji ngrabare angwane, nikwe ja mikadre gare ie aune ni raba dimike nikwe niedre ie. Kenanbe nitre ye ñaka raba tö ngwen nie, ñobätä ñan aune nitre ruäre tä küdrere aune kukwe tare nuainne nitre ie kä ñaka tuin yebätä. Akwa nikwe blitadre töi kwinbiti bentre aune nikwe dimikadre bökän angwane ja raba nemen ruin jäme ietre. Ne madakäre, nitre ie kä ñaka tuin ye ruäre ngwane ñaka ja erebe, ye ererebätä ni raba dimike arato. Nikwe dimikadre ye bitikäre, nita nitre tötike Bibliabätä ye nikwe mikadre gare ie. Nikwe ñäkädre texto keteitibätä ietre, ñodre Salmo 146:8 o Isaías 35:5, 6. Arato kukwe grababare tä Internet käi jw.org yete ye niara raba denkä ño jai ye nikwe driedre ie. Ni ye raba ñäke tärä braille yebätä angwane, tärä tikani tärä okwä yebiti ye niara törba ie o ñakare ye mäkwe ngwantari ie. Ni yekwe computadora tärä ñäkäkäre tärä okwä yebätä angwane, kukwe keta kabre tä jw.org yete ye raba denkä ja kräke aune raba tärä o täräkwata ye denkä jai formato de texto enriquecido (RTF) yebiti. Suliare aune kukwe madabiti blitata bäri kä jökräbiti tibien ye aibebiti ye erere nuain raba (Recuadro “Ni ie kä ñaka tuin dimikadre ye ngwane...” ye mäkwe mika ñärärä.)
3. ¿Ñokänti nitre ie kä ñaka tuin ye raba kwen nie nita kukwe driere yekänti?
3 Nitre ie kä ñaka tuin ye nikwe känändre. Erametre, nita niken kukwe driere ju ju te ye ngwane, bäsi nitre ie kä ñaka tuin ye ñaka kwen nie, ñobätä ñan aune ñaka tö nemen blitai nitre ñaka gare ietre yebe. Ye medenbätä, nikwe ja di ngwandre känänkäre aune kukwe driekäre ietre (Mat. 10:11). ¿Nitre ie kä ñaka tuin ye tärä kwelate o sribire nibe? Ye erere ngwane, nikwe blitadre kukwe metre yebätä bentre. Nita kukwe driere yekänti kwela tärä nitre ie kä ñaka tuin ye kräke angwane, ni raba niken tärä tikani braille ye ngwena biblioteca kwe ye kräke o ñakare ye nikwe ngwandretari director ie. ¿Ni ruäre mräkä tärä abokän ie kä ñaka tuin ye tärä gare nie? ¿Nita kukwe driere yekänti nitre o ju tärä nitre bren dimikakäre abokän känti nitre ie kä ñaka tuin ye tärä nüne? Ni testiko Jehovakwe tö nitre ie kä ñaka tuin ye dimikai aune tärä bätä kukwe grababare ye tärä kräke nikwe mikadre gare mräkätre ie, ni ju ngübabitikä ie o director kwelate ye ie. Nitre ie kä ñaka tuin ye Ngöbökwe mikaita kwin kärekäre tä käbämike ye nikwe mikadre gare Biblia yebiti ie. Arato video kädekata “No sé qué haría sin ella”, jw.org yete ye nikwe mikadre tuare ietre. Video yete blitata ja mräkä iti ie kä ñaka tuin yebätä, Biblia braille ye köböire kukwe kwin namani kwe mikata gare. Drekäre nita näin ye nikwe mikadre gare kwin ietre angwane, rabai bäri nuäre ni kräke blitakäre nitre ie kä ñaka tuin yebe.
4. ¿Kukwe namani bare ja ngwai kädekata Janet yebätä ye tä dre driere nie?
4 Ju sribebare nitre ie kä ñaka tuin ye kräke yekänti ja ngwai ie kä ñaka tuin kädekata Janet janamene, aune blitabare kwe monso merire ben. Janet käkwe niebare ie: “Jesús nükani Kä tibienbätä ye ngwane, nitre ie kä ñaka tuin ye mikaninta kwin kwe, ye erere nuaindi kwe ja känenkäre ye bämikakäre”. Angwane, Apocalipsis 21:3, 4 tä dre niere ye kädriebare kwetre aune Gobran Ngöbökwe käkwe kukwe ye mikai nemen bare ño ye Janet käkwe mikani gare. Monso ye namani kwekebe, biti niebare kwe: “Krire kena ni ie kä ñaka tuin tä kukwe ne niere tie. Ni o ni mräkätre käkwe kukwe käme nuainbare ye ngie biankäre kä mikani drüne ni okwäte nitre ie kä tuin ye jökrä bäsi tätre nütüre”. Janet käkwe kukwe juani ie correo electrónico yete tärä Dre driera ye känänkäre, kä nengwane tätre ja tötike gwaire Bibliabätä bobu bämän kratire kratire te.
5. Nitre ie kä ñaka tuin ye ni ñaka raba miketa kwin, ¿akwa nikwe dimikai angwane dre kwin rabai kwetre?
5 Erametre, nitre ie kä ñaka tuin ye ni ñaka raba miketa kwin Jesukwe nuainbare ye erere. Akwa ni raba kukwe keteiti nuainne. Diablu tä nitre kwati töi gainte, aune nitre okwäte kä drüne metre yebätä tä nuainne arato. Ni raba dimike kukwe metre tä Kukwe Ngöbökwe yebätä ye mike nüke gare ietre (2 Cor. 4:4). Nitre nibu ie kä ñaka tuin nämene Jericó ken ye Jesukwe mikaninta kwin namani tuin bobre ie yebätä (Mat. 20:34). Nitre ie kä ñaka tuin ye nikwe mikai tuin bobre jai arato angwane, nikwe dimikai Jehová mike gare jai, niarakwe okwä mikaita kwin aune ja nire käre biain kwe ie.