Ja mräkätre ie kukwe gare bäri yebätä nikwe ja kitadre
Ja mräkätre ie kukwe drie gare bäri kwin ye ütiäte krubäte. Ja mräkätre ruäre ye niena Jehová mike täte kä kwati te. Ruäretre ie kukwe drie jatani gare bäri kwin bitinkä. Jesukristo tä konkrekasion jie ngwen kä krüte nete aune kukwe drieta bätä nitre tötikata ye tä mike nirien bäri ye nüke gare niaratre ye jökrä ie (Mat. 28:19, 20). Niaratre niena mekera kukwe driere yebätä “Ngöbö di kri” ye tä dimike, aune ye köböire tätre kä ngwen nüke jai kukwe tare yebätä (2 Cor. 4:7, Kukwe Kuin Ngöbökwe). Kukwe gare krubäte ietre ye töta nemen mikai gare ni madai aune ni raba ja kite bätätre (Sal. 71:18). ¿Nikwe nuaindre ño?
Nita kukwe driere ye ngwane. Nikwe kukwe driedre kwin yekäre, ja mräkätre ie kukwe gare bäri ye käkwe ni kukwe driekä mrä mrä ye tötikadre. Ja mräkätre ie kukwe drie gare kwin tädre kukwe driere ño ye nikwe mikadre ñärärä ja kitakäre bäri kukwe driekäre. (Kukwe kädekata “Kukwe driedre ño käre kä jutobiti” yekänti subtítulo “Nitre tä krire kukwe driere ye mäkwe dimika” yekänti párrafo ketamäkäre ye mäkwe mika ñärärä, tä Ni Mikaka Mokre 15 febrero 2015 yebätä.) ¿Ja mräkätre ie kukwe gare bäri yebe mäkwe kukwe driebarera ye köböire dre kwin namanina mäkwe?
Mäkwe niaratre ye ruäre nübai kukwe driere jabe. Ja mräkä ye tädre bren angwane, nane nane mä raba niken ni ja tötikaka mäbe Bibliabätä ye ngwena gwirete tötikakäre ben. Munkwe ja tötika ünä ye ngwane, mä raba ni ye tötike ño bäri kwin ye mäkwe ngwantari ja mräkä ie kukwe gare bäri yei.
Mäkwe kä dianka jai kräketre. Mäkwe ja di ngwan ja mräkätre ie kukwe gare bäri ye mike gare jai. Ngöbö mikata täte ni mräkäbe ye mäkwe nuain ngwane mäkwe nübai iti jabe aune mäkwe kukwe ngwantari ie. Kukwe metre namani gare ño ie, Jehovakwe kukwe kwin mikanina nemen bare ño kräke, ja mikani Testiko kwe ye ngwane ja käne kukwe meden meden mrä ükaninante konkrekasionte aune tä Jehová mike täte ye köböire dre kwin namanina kwe ye mäkwe ngwantari ie. Ja mräkä ye tädre bren angwane, mä raba niken gwirete Ngöbö Mikata Täte Ni Mräkäbe ye nuainkäre ben.
Mäkwe ñan kukwe ribe krubäte ietre aune mäkwe töi mika nüke gare jai. Ja mräkätre niena kukwe driere kä kwati krubäte te ye töi ngitiekä kukwe keta kabre nuainkäre ni erere (Rom. 12:6-8). Ruäretre nibira umbre krubäte, yebätä ñaka raba kä denkä krubäte jai ni kräke. Akwa yebiti ta, kukwe gare krubäte ietre aune tätre Jehová mike metre täte yebätä ni raba ja kite.