Nikwe diridre kwin tärä Dre drieta yebiti

Nitre ben nita ja tötike yei kukwe Bibliabätä ye tä kite nüke gare aune ye erere tätre kite nuainne angwane, tätre kite nirien ja üairebiti ye tätre bämike (Sal. 1:1-3). Nikwe diridre kwin tärä Dre drieta yebiti angwane, ni raba dimike nirien ja üairebiti.

Kukwe ngwantarita kena. Kapitulo kwatire kwatire yekänti kukwe ngwantarita kena ye mikata gare kukwe ja tötikara yekänti. Ni raba kukwe ye ngwentari, akwa ni ja tötikaka käkwe mikadre gare ye ñan aikäre ñakare aune töi mikakäre bäri kukwe yebätä. Arato kukwe kwatire kwatire ngwantarita yebätä ni raba blitamana jötrö ngwarbe ie. Ruäre ngwane kukwe ñaka metre niedi kwe, akwa ñaka töi ükadrete bengwairebe, ñobätä ñan aune dre niedre kwe ye erere känti nikwe dimikadre ye rabai gare nie ja tötikai ja käne ye ngwane (Prov. 16:23; 18:13).

Apéndice. Kukwe mikata gare kapitulo yebätä ye rükadre gare ni ja tötikaka ie angwane, ni raba ñäkämana kaibe apéndice yebätä ie känti kukwe ye kädrieta bäri. Sesion mada yebätä, ni raba kukwe ruäre ngwentari ie ne kwe kukwe ruäre ñaka nüke gare kwin ie o ñakare ye rabadre gare nie. Akwa rabadre tuin debe nie angwane, nikwe ja tötikadre yekänti ni raba kä denkä chi jai kukwe ruäre kädriekäre apéndice yebätä o kädriedre täte. Ni raba ñäke párrafo yebätä aune kukwe ruärebätä nikwe ja tötikabare känenkri ye ni raba ngwentari ie.

Recuadro kukwe ngwankäre törö. Kapitulo kwatire kwatire yekänti kena kukwe ngwantarita ye abokän mikata gare mrä recuadro tä mikani kukwe ngwankäre törö yete. Nikwe kädriedreta ni ja tötikaka yebe angwane, kukwe meden bäri ütiäte ye nükani gare ie aune raba mike gare o ñakare ye rabai gare nie. Kukwe mikata gare aune texto tä yete yebätä nikwe ñäkädre gwaire, ye bitikäre ni ja tötikaka ye rabadre texto yebiti mike gare ñobätä kukwe tä recuadro yete ye abokän metre ye nikwe ribedre ie (Hech. 17:2, 3).