Mätä ni tötike Bibliabätä ye ngwane ñaka ne nuain

Ñaka blita krubäte. Mäkwe kukwe jökrä mikadre gare ye mä ñan nütü. Jesús nämene kukwe ngwentari ye ngwane kukwe nämene nüke gare metre nitre ie (Mt 17:24-27). Kukwe ngwantarita ye ngwane ja tötikata bäri kwin, ni ja tötikaka mäbe tä kukwe meden mike täte ye rabai gare mäi aune munta ja tötike kukwe medenbätä ye nüke gare ie o ñakare ye rabai gare mäi (be pág. 253 párr. 3, 4). Mäkwe kukwe ngwantari ni ja tötikaka ie ngwane, mäkwe ngüba bätärekä aune dre niei kwe ye mäkwe ngüba. Kukwe ye ñaka gare ie, akwa ñaka nie ie; ñakare aune mäkwe kukwe ngwantari bä jene ie ne kwe kukwe ye mikadre gare kwe (be pág. 238 párr. 1, 2). Mäkwe blita bäterekä ne kwe kukwe mrä ye rükadre gare ni ja tötikaka yei (be pág. 230 párr. 4).

Ñaka ni ja tötikaka ye gate. Munta ja tötike kukwe medenbätä ye gare kwin mäi, akwa ñaka kukwe kiakia ye jökrä nie (Jn 16:12). Kukwe meden mikata gare metrere párrafo yekänti yebätä mäkwe blita (be pág. 226 párr. 4, pág 227 párr. 1). Kukwe ruäre kwin krubäte yebätä ni töta nemen kädriei jökrä, akwa kukwe bäri ütiäte ye abokän ñaka tä nüke gare kwin (be pág. 235 párr. 3). Kukwe medenbätä munta ja tötike ye rükadrera gare ni ja tötikaka yei angwane, munkwe ja tötika párrafo ja käne yebätä.

Ñaka kukwe mika gare jerekäbe. Nikwe ñaka ñäkädre jerekäbe täräbätä, ñakare aune nikwe kukwe Ngöbökwe mikadre nemen nitre brukwäte (Lu 24:32). Texto medenbätä ñäkädre metrere yebätä mäkwe ñäkä (2Co 10:4; Heb 4:12; be pág. 144 párr. 1-3). Kukwe nuäre rükadre gare ye mäkwe bämika (be pág. 245 párr. 2-4). Ni ja tötikaka tä ja tuin kukwe meden ben aune tä kukwe meden mike täte yebätä mäkwe töbika. Töita ño ye ererebätä mäkwe tötika. Mäkwe kukwe ne erere ngwantari ie: “¿Kukwe nibi gare matare mäi ye nibi tuin ño mäi? ¿Kukwe ye tä dre driere Jehovabätä mäi? ¿Mäkwe kukwe ne mikai täte ngwane dre kwin rabai mäkwe raba ruin mäi?” (be  pág. 238 párr. 3-5; pág. 259 párr. 1).