Video yebiti nikwe diridre nitre ja tötikaka Bibliabätä ie

Kukwe mikata tuare ye köböire kukwe drieta nie ye tä nemen tuin ütiäte nie, raba nüke gare kwin nie aune raba nemente ni töite. Jehová abokän ni Tötikaka Bäri Kri yekwe kukwe mikani tuare kukwe ütiäte driekäre (Gé 15:5; Jer 18:1-6). Aune Jesús abokän Dirikä Kri käkwe kukwe ye erere nuainbare arato (Mt 18:2-6; 22:19-21). Video yebiti kukwe mikata tuare abokän tä ni dimike bäri kä nengwane. ¿Video yebiti nita dirire nitre ja tötikaka Bibliabätä ie?

Matare nengwane, video 10 jire sribebarera ni dimikakäre kukwe ja tötikara täräkwata Kukwe kwin yebätä ye mikakäre gare. Ruäre ngwane, kukwe ngwantarita tä jükani drüne täräkwata yebätä ye ererebiti video kädekata. Kukwe ja tötikara medenkänti nikwe video keteitire keteitire mikadre tuare ye tä ükaninte täräkwata yebätä Internet käi nikwe yete. Ne madakäre, video mada mada tä ükaninte tärä dirikäre bäri yekänti, abokän raba ni dimike arato nitre tötike Bibliabätä.

¿Kukwe ja tötikara Bibliabätä ye ñaka tä nemen nuäre rükakäre gare ni ja tötikaka mäbe ie o niara tä ja tuin kukwe tare ben? Mä raba video känene jw.org® o JW Broadcasting® yete niara dimikakäre. Mun raba tuin gwairebe aune kädriere jabe.

Sö kratire kratire te video mrä sribeta. Mäkwe video ye tuadre ngwane, mä raba dirire ñobiti ni madai yebätä mäkwe töbika.