NITA JA NGWEN ÑO
Gätä kri köbömä ye köböire nita ja tarere ye ni raba bämike jai
¿Gätä kri köbömä ye ñobätä tä nemen tuin kwin krubäte nie? Ñobätä ñan aune ni raba Jehová käikitekä ja mräkätre kwati krubäte ben, nitre israelita kirabe nämäne nuainne erere. Ne madakäre, kukwe ja üaire ye tä nemen ere nikwe aune käta nemen juto nibätä ni mräkätre ye ben. Gätä ne tä nemen ütiäte krubäte ni kräke yebätä nita ja di ngwen rikakäre köbö köbömä yete.
Nita ja ükökrö ye ngwane, dre kwin raba nemen nikwe ye ñan aibebätä nikwe töbikadre, ñakare aune ni raba ja tare bämike ño ja mräkätre ie yebätä nikwe töbikadre (Gál 6:10; Heb 10:24, 25). Aune medente nikwe täkäi ye aibe nita denkä bätä nita jukwe tike ja mräkä iti kräke ngwane, ni mräkätre tare nikwe ye nikwe bämikai (Flp 2:3, 4). Gätä kri yete ja ketamuko mada raba kwe nie. ¿Ñobätä ni ñan ja töi mike blite ja mräkätre mada ñaka gare nie yebe? Ni raba blite ja mräkätre ben gätä kri känenkri, bitikäre aune mröta ye ngwane (2Co 6:13). Aune ni raba nemen ja ketamuko kwin krubäte kärekäre. Nita ja tarere era metre ye jutuai nitre madai ngwane, tö rabai ja ketabätä Jehovabe siba (Jn 13:35).
VIDEO GÄTÄ KRI INTERNACIONAL “JA TARE YE ÑAKA NEKÄ” YE MÄKWE TUA, BITI KUKWE NGWANTARITA NE MÄKWE MIKA GARE:
¿Gätä kri 2019 känti nitre juta madate nübaibare yete ja mräkätre käkwe dre dre nuainbare ja tare bämikakäre?
Juta Ngöbökwe yete ni tä keteitibe aune ja tarere, ¿ye ñobätä tä nitre töi mike niä?
¿Nitre braibe konkrekasion jökrä ngübabitikä käkwe dre ütiäte mikani gare ja tare yebätä?
¿Gätä kri yete ni raba ja tare bämike ño?
¿Ja tare ye köböire dre namani bare Alemania aune Corea del Sur?
¿Ni tö ja töi mikai kwatibe dre nuainbätä?