Mä raba mä mräkätre dimike nüne kä jutobiti

Nitre ja mräkäre tädre nüne kä jutobiti ie Jehová tö (Sl 127:3-5; Ec 9:9; 11:9). Akwa ruäre ngwane, nita nemen töbike krubäte o kukwe ruäre tä nainte nie ye köböite kä juto raba nete ni mräkätre yekän. ¿Ni ja mräkäre itire itire raba dre nuainne ne kwe tädre nüne kä jutobiti jabe?

Ni brare ja mäkäninte tä muko mike tuin ütiäte jai (1Pe 3:7). Tä kä denkä jai muko kräke, tä muko ngübare bätärekä aune dre nuainta kwe niara kräke bätä mräkätre kwe kräke yebätä tä debe bien ie (Col 3:15). Tare kwe tä niere ie aune kukwe nuainta kwe yebätä tä kwin niere ie (Pr 31:28, 31).

Meri gure ja ngwanka kwin ye käre tä ja di ngwen muko kwe dimikakäre (Pr 31:12). Tä käre muko kwe kukwei mike täte aune tä dimike kukwe nuainta kwe yebätä (Col 3:18). Tä blite ja moto kwinbiti muko kwe ben aune tä blite kwinbätä ni madabe (Pr 31:26).

Nitre rüne ja ngwen kwin ye tä kä denkä jai monsotre kwe kräke (Dt 6:6, 7). Monsotre tare kwe tä niere ie (Mt 3:17). Ñongwane mäträdre kwetre aune nuaindre ño kwetre ye gare ietre akwa ñaka tä nuainne rubune kwärä (Ef 6:4).

Monsotre ja ngwen kwin ye tä rün mike ütiäte jai aune tä kukwei mike täte (Pr 23:22). Ja ruin ño ietre aune töita drebätä ye tä niere rün ie. Mäträtabätä ye tä kain ngäbiti aune tä mike ütiäte jai (Pr 19:20).

VIDEO ÑOKÄNTI NI RABA NÜNE KÄ JUTOBITI NI MRÄKÄTRE YEBE YE MÄKWE TUA, BITI KUKWE NGWANTARITA NE MÄKWE MIKA GARE:

¿Nitre ja mräkäre itire itire ye käkwe dre nuainbare nünankäre kä jutobiti jabe?