1921 Kä Nikanina Cien Ta

TÄRÄ Ni Mikaka Mokre ne ererebätä akwa inglere 1 enero 1921 kräke yete kukwe ne ngwanintari nitre ja tötikaka Bibliabätä ie: “¿Ni raba kukwe meden mike nuaindre jai kä nete?”. Kukwe ye mikakäre gare Isaías 61:1, 2 ye mikani yete kukwe driedre ye ütiäte krubäte ye ngwankäreta törö: “Jehová ti dianinkä kukwe kwin mikakäre gare nitre töi jäme ie; [...] kä te Jehovakwe jondron kwin nuaindi aune köbö te Ngöbö nikwe käkwe ja ngie mikai ye mikakäre gare, nitre jökrä tä ulire ye töi mikakäre jäme”.

NITRE NÄMÄNE JA NGWEN DITE KUKWE DRIEKÄRE

Kukwe kwin mikakäre gare nitre töi jäme ie yekäre, nitre ja tötikaka Bibliabätä rabadre ja ngwen dite. Rabadre ‘kukwe kwin mike gare nitre töi jäme ie’ aune “Ngöbö nikwe käkwe ja ngie mikai ye mikakäre gare” nitre blo ie.

Ja mräkä kädeka nämäne John Hoskin nünanbare Canadá ye käkwe ja ngwani dite kukwe driekäre nitre nämäne ja mike rüere yebiti ta. Kä 1921 ye ngwane niarakwe blitabare ni iti ji ngwanka kukwe metodista yebätä aune kukwe ne erere niebare kwe blita kömikakäre ben: “Ni rabadre blite Bibliabätä töi jämebiti jabe aune kukwe meden ñan rabadre tuin ja erebe nie ngwane, ni raba blita mike krüte töi jämebiti jabe arato aune ni raba ja tuaita niere jai ja ketamuko erere”. Akwa kukwe ye erere ñan namani bare. Ja mräkä Hoskin käkwe mikani gare: “Krire nunkwe blita kömikaba minuto ruäre te ngwane ni ji ngwanka kukwebätä ye käkwe jukwe ye kitakaba ja dibiti aune vidrio nämä jukwebätä ye gitiainkä kwintubu rababa ruin tie”.

Ni ji ngwanka kukwebätä ye käkwe ngratebare aune niebare kwe: “¿Ñobätä mä ñan niken blite ni ñaka kristiano ben?”. Ja mräkä Hoskin käkwe ja kada ketani aune kukwe ne niebare kwe jai: “¡Ti täni kukwe ye ara nuainne nibi ruin tie!”.

Jetebe se kwrere ni ji ngwanka kukwebätä ye nämäne kukwe kädriere ngwane namani jankunu ñäke ja mräkä ye rüere. Ja mräkä Hoskin tä niere: “Nitre nänkä iglesiate ye käkwe ja ngübadrebiti tibätä nieba kwe ietre. Ti abokän ni ngökaka krubäte aune ti täkädre krübiti näre nieba kwe ietre”. Akwa kukwe ye ñaka ja mräkä ye ketaninbätä niarakwe kukwe driebare jankunu aune blitabare kwe nitre kwati ben. Ne niebare kwe arato: “Ti nämä kukwe driere ju ju te ye käi nämä juto krubäte tibätä aune ye erere ñan namani bare käne tibätä. Nitre ye ruäre käkwe nieba tie: ‘Mä ye abokän ni Ngöbökwe gare nuen’ aune nun raba mä dimike mätä dre ribere jai yebätä ye ngwantariba kwe tie”.

JA TÖTIKADRE KAIBE AUNE NI MRÄKÄTRE BEN

Ja tötikadre ño Bibliabätä ye nitre ja tötikaka Bibliabätä käkwe mikani täräkwata The Golden Age yebätä, ne kwe nire tö nämäne kukwe mikai gare bäri jai ye rabadre nirien kukwe ja üairebiti.a Kukwe ükaninte “Juvenile Bible Study” (Monsotre bati tötikakäre Bibliabätä) yete kukwe ngwantarita nämene ne kwe nitre rüne rabadre kädriere monsotre kwetre ben. Kukwe ngwantarita ne nitre rüne rabadre ngwentari monsotre bati ie aune rabadre dimike mike nüke gare jai Bibliabiti. Ñodre, “¿Tärä nuäi tä Bibliabätä?” kukwe ye nuäre. Aune mada abokän, “¿Nitre kristiano jökrä ye käkwe ja tuadre kukwe tare ben ye ngübadre kwe?” kukwe ngwantarita ne erere nämäne monsotre bati dimike ja ngwen dite kukwe driekäre.

Kukwe kädekata “Advanced Studies in the Divine Plan of the Ages” (Estudios avanzados sobre el Plan Divino de las Edades) yete kukwe ruäre ngwantari nämäne abokän nämäne dianinkä Estudios de las Escrituras yebätä. Aune ye nämäne nitre ja tötikaka Bibliabätä ünä kukwe ja üairebiti ye dimike töbiketari bäri, kukwe ükaninte ye käkwe nitre kwati ñäkäkä täräbätä ye dimikani. Akwa ye ñaka sribei jankunu mikani gare täräkwata The Golden Age 21 diciembre 1921 yebätä. ¿Ñobätä kukwe ye kwitabare jötrö ngwarbe kore?

TÄRÄ MRÄ

Tärä El Arpa de Dios inglere

Marcapágina keteiti aune drebätä ñäkädre ye täbätä

Tarjetabätä kukwe ngwantarita tä

Nitre ja tötikaka Bibliabätä ye rabadre kukwe ruäre Bibliabätä nüke gare nuäre ye mike gare jatäri jai, nükani gare nitre ji ngwanka juta Ngöbökwe ye näire yete ie. Yekäre kä noviembre 1921 yete, tärä The Harp of God ye sribebare (sribebare suliare 1925 aune kädekabare El Arpa de Dios). Nire nämäne tärä ye kain ngäbiti ye kä tika nämäne täräbätä tötikakäre tärä kädeka nämäne The Harp Bible Study Course yebätä. Nire nämäne ja töi jeñebiti ja tötike Bibliabätä ye kain ngäbiti ye köböire Ngöbö töi nämäne nitre kä jökräbiti tibien mikai nüne kärekäre ye nämäne nüke gare kwin ietre. ¿Kukwe ye nuain nämäne ño?

Nire nämäne täräkwata ye kain ngäbiti ye ie tarjeta chi bian nämäne känti página meden medenbätä ñäkädre kwe ye mika nämäne gare ietre. Bämä nämäne nike krati ta ye bitikäre, tarjeta mada bian nämäne ietre känti dre drebätä ñäkäbare kwe yebätä kukwe ngwantari nämäne ie aune mrä, drebätä ñäkädre kwe bämä madabätä ye mika nämäne gare ietre.

Bämä 12 jire te, konkrekasion nämäne ni ja tötikaka ye ken ye nämäne tarjeta juen ie bämä kratire kratire correo yete. Ja mräkätre umbre umbre o ja mräkätre meden ñan raba kukwe driere ju ju te ye nämäne tarjeta ye juen. Ñodre meri ja tötikaka Bibliabätä kädeka nämäne Anna Gardner, nünanka Millvale (Pensilvania, Estados Unidos), tä niere: “Täräkwata ye köböire ti eteba Thayle, ñan raba dikekä kwäräkwärä ye nämä kukwe driere bäri, ñobätä ñan aune nämä tarjeta ye juen bämä kratire kratire kukwe ngwantarita yebe ngöi”. Ni ja tötikaka nämäne ja tötike ünä ngwane, ja mräkätre nämäne tuinbiti dimikakäre kukwe Bibliabätä mikakäre gare bäri jai.

SRIBI NÄMÄNE NUAINDRE ERE JA KÄNENKÄRE

Kä 1921 ye jatanina krüte ngwane, ja mräkä Joseph Rutherford käkwe tärä tikani konkrekasion jökrä ie. Yete niebare kwe: “Kukwe gobran Ngöbökwe yebätä driebare bäri aune kwin kä nete nura ngwä ötata kukwe ja üairebiti kä mada mada yete ye kräke”. Dre nuaindre ja känenkäre yebätä nämäne töbike ngwane, kukwe ne niebare kwe: “Sribi tä nuaindre ere. Nitre mada töi mike sribire sribi ütiäte nebätä”. Kukwe niebare kwe ye nitre ja tötikaka käkwe kani ngäbiti kwin namani gare metre. Kä 1922 ye ngwane ja ngwani dite kwetre gobran Ngöbökwe ye mikakäre gare.

Ja ketamukotre käkwe ja ngwani dite

Nitre ja tötikaka Bibliabätä käkwe ja di mikani kwärikwäri yebiti nämäne ja tarere bökän bämikani kwetre. Niaratre namani ja ketamukotre ja ngwanka dite kukwe tare näire mikata gare kukwe keteiti namani bare ne erere (Prov. 17:17).

Martes 31 mayo 1921 ye ngwane kukwe keteiti nakaninkä Tulsa (Oklahoma, Estados Unidos) ye bitikäre kukwe ye kädekani Masacre Racial de Tulsa, ñobätä ñan aune ni iti drüne kitani ngite aune meri iti ngwen nuainbare tare kwe niebare rüere. Nitre brare ngwen 1,000 näre käkwe rübare nitre brare drüne bäri brai yebe. Aune rü nämäne jabe ye namani jötrö juta Greenwood känti nitre drüne mada mada nämäne nüne yekänti, yete ju 1,400 näre aune tienda diani jai. Nitre 36 näre nikani ngwarbe mikani gare akwa metrere nitre kwati krubäte murie ketani raba ruin nie.

Kukwe meden namani bare ye ja mräkä drüne kädekata Richard Hill ni ja tötikaka Bibliabätä tä mike gare: “Köbö te deu rü nämä ye ngwane nunkwe ja tötikaba Bibliabätä käre erere nunkwe ja tötikaba ünä ngwane, krü ngö rababa juta te ruäre aune ngö rababa jankunu nememe nun rikaba ja düke ye ngwane”. Jändrinaine 1 junio ye ngwane kukwe jatani nakainkä bäri tare: “Nun tö rabadre ja kriemikai ngwane, ju kri gätä nuainkäre nitre sribikä gobranbe yekwe, yekänti nun rikadre ye nitre ruäre rükaba nunkänti niekäre nunye”. Aisete ja mräkä Hill, muko kwe aune monsotre nirike kwe nikani ju kri gätä nuainkäre nitre sribikä gobrankwe Tulsa yekänti. Yete guardia juani gobrankwe kukwe ükatekäre kwin käkwe nitre brare aune merire drüne 3,000 näre kani ngäbiti ngübabitikäre.

Bäsi bätäräbe ja mräkä kwata ngwen Arthur Claus käkwe ja ngwani dite kukwe keteiti nuainkäre, niebare kwe: “Nitre nämä ju den jai aune kukwe, kä Greenwood ye känti ye kukwe nuaba tikwe ngwane ti rikaba ja ketamuko tikwe ja mräkä Hill ye mike ñärärä”.

Ja mräkä Arthur Claus käkwe monsotre bati 14 tötikani Bibliabätä tärä El Arpa de Dios yebiti

Nükani gwirete ngwane, ni iti kwata ngwen nünanka ja mräkä Hill ken ye kisete krü nämäne krati ni ye ja ketamuko ja mräkä Hill yekwe. Arthur nükani ju den jai namani ruin ie yebätä ngratebare kwe: “¡¿Mätä dre nuainne ni ne jue känti jubäre?!”.

Arthur tä niere: “Tikwe kukwe nieba ye ñaka rabadre kwin kräke ngwane ti täkädre kwe. Ti abokän ja ketamuko ja mräkä Hillkwe aune bä kabre ti jananbare gwirete ye tikwe mikaba gare metre ie”. Arthur aune ni nünanka ja mräkä Hill ken ye käkwe jue kwe kriemikani kräke ne kwe ñan diandre jai.

Ja mräkä Hill aune mräkätre kwe nämäne ju kri gätä nuainkäre nitre sribikä gobrankwe yekwe yekänti ye namani gare ie. General Barret nitre rükä jie ngwanka ye käkwe ñan ja kä tikadre täräbätä ngwane, nitre kwata drüne ñaka rabadre niken mentokwäre ye niebare ie. Arthur tä niere: “Ñan rababa nuäre ti kräke blitakäre general ben. Tikwe dre nuaindi ye tikwe nieba ie ngwane ngwantariba kwe tie: ‘¿Nitre ja mräkäre ye mäkwe ngübai aune tätre dre ribere jai ye mäkwe biain ietre?’. Kä jutobiti tikwe nuaindi tikwe nieba ie”.

Tärä biani ye ja mräkä Arthur nikani ngwena jötrö ngwarbe ju kri gätä nuainkäre yekänti namani yete ngwane tärä ye mikani tuare kwe guardia iti ie aune guardia ye käkwe niebare ja kukwei kribiti: “¡Tärä nebätä general käkwe ja kä tikani! ¿Ni mada jän rikadre mentokwäre ye ni mada ñaka nuainne mä erere ye gare mäi?”. Ja mräkä Hill aune mräkätre kwe ye kwani jötrö ngwarbe Arthur aune guardia ie. Niaratre jökrä nikani karo ja mräkä Arthur yekwe yete aune biti nikanintre ja mräkä Hill ye gwirete.

Ja mräkä Claus käkwe ja töi mikani ja mräkä Hill aune mräkätre kwe ngübakäre kwin. Niarakwe ja ngwani dite aune ja tare bökän bämikani ye matani kwin nitre madabätä. Arthur tä niere: “Ni nünanka ja mräkä Hill ken ye käkwe ja mräkä Hill aune mräkätre kwe jue kriemikani ye namani töbike bäri kwin, kukwe metre yebätä. Aune nitre kwati käkwe ja töi mikani gobran Ngöbökwe yebätä, ñobätä ñan aune nun ngätäite ni kwata jene jene tä ja kete kwin jabe aune juta Jehovakwe te ni jökrä ja erebe ye nükani gare ietre yebätä”.

a The Golden Age (sribebare suliare kä 1932 yete aune kädekani Luz y Verdad) biti kwitani Consolation kä 1937 (Consolación kä 1938) aune biti kwitani Awake! 1946 (¡Despertad! 1947).