1922 Kä Cien Nikanina Ta

“KUKWE YE KÄKWE NUN TÖI MIKABA ÑAN KRÜTARE”

Nitre kukwe driekä jataba nirien bäri ngwane, täräkwata ñan jata nemen täte. Nitre Betel Brooklyn (Nueva York, Estados Unidos) yete ja mräkätre nämäne täräkwata sribere, akwa empresa mada ye köböire nämäne libro kwata ribi ye sribere. Libro ñan namani krubäte sö kabre nikani ta yete, yebätä kukwe dre ñan jatani krubäte, eteba Robert Martin ye kisete empresa tärä sribekäre ye nämäne ye raba libro sribere jankunu o ñakare ye eteba Rutherford käkwe ngwanintari ie.

Eteba Martin käkwe kukwe ne mikani gare: “Kukwe ye käkwe nun töi mikaba ñan krütare, ñan ñobätä aune yekäre kukwe ükadrete, galvanotipia ye ribe nämä, imprimikäre, aune tärä ye mikakäre kwatate jondron jökrä ye ribe nämä yebätä. Ja etebantre käkwe edificio Concord, número 18, kä Brooklyn yekänti ye alquilabare, aune nämäne dre dre ribere jai ye erere namani kwetre.

Kukwe mrä nuain nämäne ne nitre jökräbätä käi ñan namani juto. Ni empresa bäkänkä iti nämäne tärä imprimire ja mräkätre kräke ye janamane kä ye tuinbiti ngwane, niebare kwe: “Jondron imprimikäre mrä tä mun kisete aune dre nuaindrebiti ye ñan gare munye. Sö näin krä ti ta aune jondron jökrä ne näina ngwarbe munkän”.

“Kukwe metre niebare kwe kwrere —mikani gare eteba Martinkwe—, akwa ñan namäne Ngöbö ngwen törö jai; niara nämä käre nunbe”. Aune eteba Martin kukwe niebare ye metre, ñan ñobätä aune kä braibe te máquina tärä imprimikäre ye nämäne tärä imprimire 2.000 köbö kwatire kwatire te.

RADIO YE KÖBÖIRE KUKWE METRE TÄ NEMEN GARE NITRE KWATI KRUBÄTE IE

Tärä ruäre imprimibare ye bitikäre ja mräkätre jatani kukwe mrä nuainne kukwe driekäre. Radio yeteta nämäne kukwe driere ne kwe kukwe rabadre gare nitre kwati ie. Domingote dere 26 febrero 1922 ye ngwane eteba Rutherford käkwe kukwe kädriebare kena radio yebiti kädekata “Ni kwati krubäte tä nüne kä nengwane ye ñaka krütadi jire mada” emisora KOG de Los Ángeles (California, Estados Unidos) yebiti.

Nitre 25.000 näre käkwe kukwe kädriebare ne kukwe nuabare kwin. Ruäre käkwe carta sribebare debe biankäre ye ngätäite Willard Ashford, nünanka Santa Ana (California) käkwe kukwe tikani debe biankäre eteba Rutherford ie. Kukwe kwin krubäte niebare kwe ie kukwe kädriebare kwe yebätä aune niebare kwe arato: “Kukwe ne erere ñaka nuaindre akräke nitre nimä nämä bren gwi ye ngöi nunkwe ñaka kukwe kädriebare mäkwe ye kukwe nuadre jire, mä tädre känime nun ken akwa ñan rabadre kukwe nuabarera niera nuen”.

Kä ye arabe näire bämä ja käne yebätä kukwe mikani gare radiote ta ye namani gare nitre kwati krubäte mada ie. Kä ye krütani ngwane mikani gare täräkwata The Watch Tower yebätä nitre 300.000 käkwe kukwe kädriebare ye kukwe nuabare radioteta.

Nitre ja tötikaka ye kani ngäbiti kwin krubäte, yebätä ja töi mikani kwe emisora radiote ye sribere niaratre käite ye abokän namani nemenkä känime Betel Brooklyn yebätä, kä Staten Island yekänti. Kä mada yete Nitre Ja Tötikaka Bibliabätä emisora ye arabebiti WBBR yebiti kukwe kwin Gobran Ngöbökwe ye mikani gare bäri nitre ni madai.

“ADV”

Täräkwata The Watch Tower 15 junio 1922 yebätä mikani gare gätä kri nuaindi kä Cedar Point (Ohio) yekänti 5 nemen 13 septiembre kä 1922 ye mikani gare. Nitre Ja Tötikaka Bibliabätä jatani nüke kä Cedar Point yekänti yebätä kä namani juto krubäte.

Eteba Rutherford käkwe kukwe kädriebare ye ngwane niebare kwe: “Dänkien kri kä kwinbiti ye käkwe kukwe kwin mikai nemen bare gätä ne kräke ie tita tö ngwen kwatibe” niebare kwe. Aune nitre kukwe kädriekä mada ye käkwe batire batire ja mräkätre dimikani ne kwe rabadre kukwe driere bäri.

Vierninte 8 septiembre ye ngwane nitre 8.000 näre nikani kä teri aune tö namani kukwe kädrie eteba Rutherfordkwe ye kukwe nuai. Aune “ADV” ye dre gärä nämäne ye Rutherford käkwe mikadre gare ie niaratre tö namani. Nitre kwati nikani gwä aune lona nämäne mritaninkä kwin plataforma känti yebätä niaratre okwä namani. Arthur Claus käkwe dikakabare mente (Oklahoma, Estados Unidos), yekänti käkwe täkärä känänbare jai ne kwe rabadre gätä ye kukwe nuin kwin. Aune ye ngwane ñan nämäne nemen nuäre gätä ye kukwe nuakäre, ñan ñobätä aune micrófono ñaka blitakäre aune bosina ñaka nämäne gätä ye kukwe nuakäre kwin.

Kukwe kädriedre ye ngwane kukwe ñan rabadre nitre töi nike jire yekäre eteba gätä jie ngwanka ye käkwe mikani gare nire rükadre kä rairebiti ye ñan rabadre näin gwä kukwe kädriedre ye ngwane. Hora nueve ötare dekä ye ngwane kukwe niebare Jesukwe ye Rutherford käkwe kädekaninte abokän tä Mateo 4:17 yekänti: “Ngöbö kä kwinbiti kebera nüke gobrane nibiti” (VM, 1910). Niara nämäne blite nitrekwe kukwe kwin Gobran Ngöbökwe ye kukwe nuai ño yebätä ngwane, mikani gare kwe: “Jesús köböita no ye ngwane nitre Jehová mikaka täte aune ja ngwanka metre ie yei sribi rabai nuaindre krubäte”.

Ja mräkä Claus, nämäne täkäni plataforma känenkri ni kukwe nuin ye käkwe niebare: “Kukwe kädrie nämä yete ye nun ñaka nämä ngwen jire jabäre”. Akwa batibe ja jatani ruin bren ie, yebätä niara nikani jubäre. Ñaka tö namani näin, ñobätä ñan aune nämäne gare ie nire nire nämäne niken jubäre ye mika ñan nämäne näinta gwä, akwa nikani.

Minuto nikani chi ta ngwane ja namanina ruinta kwin ie. Niara tä niere, “Ti rikabata gätä ye kukwe nuinta ngwane, nitrekwe kise metaba ja dibiti ye kukwe juruaba tie ye käi rababa juto tibätä”. Nütübare kwe, rabai nändre kwin tie akwa ti näin. Ye ngwane kä nämäne krire 23 niarabiti. Niara tö namani gätä kwin krubäte aune kukwe kädrie ye kukwe nuai, yebätä niara ja kwakabare kwin. Ju dokwäte kwin ventana kwrere nämäne ye nämäne tikani. Aune niara nikani bäri ken ngwane, gätä ye kukwe namani ruin bäri kwin ye gani kwe.

Arthur ñan nämäne kaibe yete. Ja ketamuko mada nämäne ben ju dökwäbiti kwin. Iti ye abokän Frank Johnson. Frank niebare: “¿Navaja tärä mäkwe ya?”.

—Jän —niebare Arthurkwe.

—Nunta orare ye arabätä kukwe ye nibi bare —niebare Frankwe—. ¿Lona tuin mritaninkä kwin se tuin mäi? Yebätä tärä okwä tä aune tä ketaninte clavo nebiti. Olo mike kwin ni kukwe ükatekä ye ie.a “mike gare, mike gare …” Nie kwe ngwane, mäkwe kö kräbäkä ye tikaka.

Arthur nämäne juto biare ñäkädre ie ye kukwe ngübare ngäbiti. Kä nikani jötrö ta aune kukwe kädrie nämäne Rutherfordkwe ye käi jatanina krute. Kä namani juto krubäte niarabätä aune ngratere kwärä niebare kwe: “Munkwe ja ngwan metre ni Ngöbö mikaka täte ye erere. Jankunu ja käne ja di ngwen aune kukwe jökrä Babilonia tä nuainne ye rabadre dikaninte. Aune kukwe ne munkwe mika gare mente kä jökräbiti tibien. Ye köböire rabadre gare nitre kä jökräbiti ie Jehová ye abokän Ngöbö aune Jesús ye Rei bäri kri rei mada ye kräke.bätä gobranka bäri kri gobrantre mada ye kräke. Jesús ye tä Reire aune mun köböire niara tä kukwe mike gare. Aisete Rei ye abokän Gobran Ngöbökwe ye mike gare, mike gare, mike gare nitre ie”.

Arthur aune ja mräkätre mada käkwe kö tikaninkä ngwane, lona nikanina nebetete bädrebe mikani gare Arthur yekwe. “Rei aune Gobran kwe ye mike gare” nämäne tikanibätä. Kukwe inglere advertise abokän “mikadre gare” meden gäräta yebätä tärä okwä ketamä “ADV” ye dianinkä.

SRIBI ÜTIÄTE

Kukwe Gobran Ngöbökwe yebätä driere ye mikadre ütiäte krubäte jai namani gare ja mräkätre ie kukwe kädriebare Cedar Point yete yebiti. Aune nire nämäne juto biare aune nire tö nämäne kukwe mikai gare bäri jai yebätä kä nämäne juto krubäte sribikäre siba kukwe yebätä. Colportor iti (kä nengwane prekursor nieta ) nünanka Oklahoma ye käkwe tikabare: “Mina känti carbón nämäne yekänti nun nämäne niken kukwe driere. Yete nitre nämäne nüne bobre krubäte”. Aune mikani gare kwe arato, “Nun nämä kukwe mika nämäne gare täräkwata The Golden Age yebätä, ye mike gare nitre ie ngwane, nitre nämä niken ja muaire”. Aune kukwe mada ne niebare kwe arato: “Nunta nitre töi mike jäme ye tä kä mike juto krubäte nunbätä”.

Nitre Ja Tötikaka Bibliabätä ye ja töi mikani bäri kukwe nieta Lucas 10:2 ye nuainne: “Nura nena biare kabre ötadre, akwa sribikä ñakare bökän”. Kä ye jatani krüte ngwane, niaratre ja töi mikani bäri kukwe kwin Gobran Ngöbökwe ye driere kä jökräbiti tibien.