KUKWE JA TÖTIKARA 21
Nita orare Jehovai ye tä mike nemen bare ño ni kräke
“Ngöböta ni kukwei kaen ngäbti ja moto kuinbti abko garera nie, ye kwrere arato jändrän käräta ie nikwe, ye biandi kwe nie abko gare kuin nie arato” (1 JUAN 5:15).
KANTIKO 41 Ti kukwe nuin Jehová
KUKWE NEBÄTÄ JA TÖTIKAIa
1, 2. ¿Ni raba nemen dre ngwentari jai?
MÄTA kukwe ribere Jehovai orasionte ye ta mike nemen bare ya, ¿ye mä tärä ngwentari jai? Mä tärä ngwentari jai ngwane mä ñan aibe tä kukwe ye ngwentari jai. Ja mräkätre kwati tä ja tuin kukwe tare ben ngwane tätre kukwe ye ngwentari jai. Nita ja tuin kukwe tare ben ngwane, ñan raba nemen nuäre ni kräke kukwe ribeta Jehovai orasionte ye tä mike nemen bare o ño ye gakäre.
2 Nire tä Jehová mika täte ye ta dre ribere ie ye niara tä mike nemen bare kräke ye tädre gare metre nie ye nikwe ngwainta törö jai kukwe ja tötikara nekänti (1 Juan 5:15). Bä kabre nita orare ye Jehová ñan tä kukwe nuin akwa niara tä ni kukwe nuin ye rabai gare nie.
JEHOVAKWE NI KUKWE KAI NGÄBITI ÑO ÑAN GARE NIE
3. ¿Ñobätä Jehová töta ni tuai orare jai?
3 Ni tare krubäte Jehovakwe aune ni ütiäte kräke mikata gare Bibliakwe nie (Ageo 2:7; 1 Juan 4:10;TNM). Ye medenbätä, tä ni nübaire ja driere ie orasionte aune ja di ribere ie (1 Ped. 5:6, 7). Niara tö ni dimikabätä ne kwe ni tädre käre niara ken aune nikwe ja tuadre kukwe tare ben ngwane nikwe kä ngwandre nüke jai yekäre.
Jehovakwe orasion Davidkwe mikani nemen bare mikani kwäre kwe rüe yebätä ngwane (Párrafo 4 mikadre ñärärä)
4. ¿Ni Jehová mikaka täte tä kukwe ribere orasionte ye kräke Jehovata kukwe mike nemen bare ye ñokänti gare nie? (Üai mikadre ñärärä).
4 Nitre kirabe kädekateta kabre Bibliabätä abokän käkwe kukwe ribebare Jehovai orasionte ye Jehovakwe mikani nemen bare kräketre ye mikata gare metre. Ñodre ni raba töbike David yebätä. Niarakwe ja tuani rüe keta kabre käme krubäte yebe ngwane, orabare kwe Jehovai aune ja di ribebare kwe ie. Niebare kwe: “Oh, Jehová, tita orare mäi ye kukwe nuin aune tita ja di ribere kisere mäi ye kukwe nuin. Mä ja ngwanka metre aune kukwe ükatekä kwin yebätä, ti kukwei käi ngäbiti” (Sal. 143:1). David kukwe ribe bare Jehovai ye Jehovakwe mikani nemen bare aune kriemikani kwe (1 Sam. 19:10, 18-20; 2 Sam. 5:17-25). Ye medenbätä niarakwe niebare töi kwatibebiti: “Nitre jökrä tä Jehová kärere ye ken Jehová tä”. Ye erere nikwe tö ngwandre arato (Sal. 145:18).
Jehovakwe orasion Pablo mikani kwe dite ja tuakäre kukwe tare ben yebätä ngwane (Párrafo 5 mikadre ñärärä)
5. ¿Kukwe ribe nämäne nitre Jehová mikaka tätekwe ngwane Jehová nämäne nuainne? Mä raba mike gare (üai mikadre ñärärä).
5 Nita dre ribere Jehovai ye niara tä mike nemen bare akwa ni ñan ngübare erere. Ye erere namani bare apóstol Pablo yebätä. ‘Kri tukwä ye kwrere jire nämäne ruin ngritekä ngrabare ie’, bämä jire ribebare kwe Jehovai rabadre kri tukwä ye denkäbätä. ¿Dre ribebare kwe ye Jehovakwe mikani nemen bare kräke? Jän, akwa niara nämäne ngübare erere ñan nuainbare kwe. kukwe tare ben nämäne ja tuin ye Jehovakwe ñaka dianinkäbätä ñakare aune ja di biani kwe ie ja tuakäre kukwe yebe ne kwe ja ngwandre metre kwe aune sribidre jankunu kwe yekäre (2 Cor. 12:7-10).
6. ¿Nita kukwe ribere Jehovai ye ñaka mikai nemen bare kwe ye ñobätä ni raba kite nütüre?
6 Kukwe käräta Jehovai ye erere ñan tä mike nemen bare ye erere tärä nemen bare nibätä. Akwa dre bäri kwin ni kräke ye gare kwin Jehovai yei nikwe tö ngwandre kwatibe. Ñobätä ñan aune “nita jändrän kärere Ngöböye amne, jändrän btä ni töita ñakare, yebti ta abko Ngöböta jändrän bien bäri kri krübäte” ye gare nie (Efes. 3:20). Ye medenbätä, nita dre ribere orasionte Jehovai ye mikai nemen bare ni kräke ni ñan ngübare ye ngwane akwa nita ribere jai ye ngwane nemen bare kwe.
7. ¿Ñobätä ruäre ngwane nita kukwe ribere Jehovai orasionte ye ni rabadre kwite? Mä raba bämike keteitibe.
7 Ruäre ngwane nita dre ribere orasionte ye ni raba kwite ñobätä ñan aune Jehová töita ño ye tä nüke gare nie. Ñodre ani blite ja mräkä Martin Poetzinger yebätä. Niarakwe ja mäkäninte ye bitikäre kitani ngite campo de concentración nazi. Kenanbe niarakwe ribebare Jehovai, Jehovakwe mikadre kwäre ne kwe tädre muko kwe ye ben aune rabadreta kukwe driere yekäre. Akwa bämä nikani krobu ta ye bitikäre Jehovakwe ñaka niara mikani kwäre namani tuin ie ngwane. Eteba Poetzinger käkwe niebare Jehovai: “Jehová tikwe dre nuaindre ie mä tö ye mike gare tie”. Ye ngwane niara ja töi mikani mräkätre nämäne ja tare nike campo de concentración nazi yebätä. Ja mräkätre ye nämäne töbike krubäte muko aune monsotre kwetre yebätä. Eteba Poetzinger nämäne kitani ngite yebätä niebare kwe Jehovai: “Tä debe krubäte Jehová mäkwe asignación mrä bini tie. Ye köböire tita ja mräkätre dimike aune tödeka kwetre ye mike dite”. Niarakwe ye erere nuainbare kä kwä okän te nämäne ngite ye ngwane.
8. ¿Nita orare ye ngwane dre ütiäte ngwandre törö jai?
8 Jehová tä kukwe käbämike ye mikai nemen bare kwe kä debe näre te ye nikwe ngwandre törö jai. kukwe tare tä nemen bare käbiti tibien, bren nikata aune gata ye niarakwe dianka käbämikata kwe. Gobran kwe ye köböire kukwe käbämikata kwe ye rabai bare (Dan. 2:44; Apoc. 21:3, 4). Akwa köbö ye rükadre ye känenkri niarata Satana tuenmetre kä tibien ne gobraine (Juan 12:31; Apoc. 12:9).b Jehovakwe kukwe jökrä ye ükadrete jötrö ngwarbe ngwane Satana tä gobrane kwin bä rabadre. Aisete kukwe käbämikata kwe ye tä ngübadre nie akwa ye ñan aibätä Jehová ñan ni dimike ai gärätä. Jehová ta kukwe ruäre nuainne ni niara mikaka täte kräke ye ani mike gare jai.
NITA ORARE YE JEHOVATA MIKE NEMEN BARE ÑO
9. ¿Jehová tä ni dimike ño kukwe kwin diankäre nuaindre jai? Mä raba mike gare keteiti.
9 Tä ni mike töbätä. Jehovakwe ni mikai töbätä kukwe kwin diankäre nuaindre jai tä käbämike nie. nita kukwe den nuaindre jai kärekäre kräke ye kräke ni mikadre töbätä nita ribere jai ye ngwane ñodre nikwe ja mäkäite o ñakare yebätä (Sant. 1:5). María ye abokän meri kaibe, kukwe namani barebätä ye ani mike gare jai.c Niara nämäne sribire prekursora regular erere kä jutobiti Jehová kräke ye ngwane ja mräkä iti namani gare ie. Niara tä mike gare: “Kä rikaba ta ngwane nun rababa ja kete kwin, biti nun jataba okwä mike jabätä. Tikwe kukwe ütiäte diandre nuaindre jai ye nämä gare tie. Yebätä tikwe oraba raire Jehovai aune tikwe ja jie ngwan mananba ie akwa tikwe dre nuaindre ye niarakwe ñan niedi tie ye nämä gare tie”. Mariakwe orabare ye Jehová kukwe kani ngäbiti namani gare ie. ¿Ñokänti namani gare ie? Niarakwe kukwe känänbare täräkwata bianta juta Ngöbökwe yebätä, yete kukwe ngwantari nämäne kwe jai ye kwani ie. Ne madakäre ja nämäne nemen ruin ño ie yebätä meye testiko käkwe mäträbare kwinbätä. Ye köböire María kukwe kwin diani nuaindre jai.
¿Jehová ta ja di bien ño nie kä ngwankäre nüke jai? (Párrafo 10 mikadre ñärärä)
10. Filipenses 4:13 tä mike gare erere, ¿Jehovakwe nitre niara mikaka täte dimikai ño? Mä raba bämike keteiti.(Üai mikadre ñärärä).
10 Tä ja di bien nie kä ngwankäre nüke jai. Jehovakwe apóstol Pablo dimikani ye erere tä ni dimike ja tuin kukwe tare yebe (ñäkädre Filipenses 4:13 yebätä). Ja mräkä iti testiko kädekata Benjaminbätä kukwe namani bare ye ani mike gare jai. Niara nämäne bati ye ngwane, nünanbare kwe kä raire te mräkätre kwe yebe campo de refugiado kä África yekänti. Niara tä niere: “Ti nämä orare gwä gwä Jehovai aune ja di biandre kwe tie kukwe metre ti nämä ribere ie. Tikwe oraba ie ye kukwe nuaba kwe, ti töi mikaba jäme kwe, ja di bianba kwe tie kukwe driekäre aune täräkwata ja tötikakäre yebiti ti dimikaba kwe ne kwe ti tädre dite ja üairebiti”. Tä niere arato: “Nitre testiko mada bätä kukwe mikata gare ye dimikani ño Jehovakwe kä ngwankäre nüke jai yebätä ti nämä ñäke ye nämä ti dimike ja ngwen metre aune kä ngwen nüke jai”.
¿Ja mräkätre yebiti Jehovakwe mä dimikanina ño ye mä tärä tuin? (Párrafo 11 aune 12 mikadre ñärärä)e
11, 12. ¿Ni mräkätre ja üaire yebiti Jehová raba orasion nikwe ye mike nemen bare ño? (Üai mikadre ñärärä).
11 Ni mräkätre ja üaire yebiti tä ni dimike. Jesús murie ketadre ye känenkri deu niarakwe orabare ja brukwä tätebiti Jehovai. Nitre nämäne kukwe ngwarbe niere niarabätä aune ñäkebätä yebätä niara mikadre kwäre Jehovakwe ribebare kwe ie. Akwa Jehovakwe ñaka ye erere nuainbare ñakare aune ángel iti Jesús eteba ja üairebiti ye juani kwe dimike (Luc. 22:42, 43). Ye erere arato, Jehová raba ni dimike ja mräkätre tä ni kärere celularete ta o tä nüke basare nie yebiti. Ni jökrä raba kä jai o kä denkä “kukwe kwin niekäre” ni mräkätre üairebiti ye dimikakäre (Prov. 12:25).
12 Kukwe namani bare meri testiko iti kädekata Miriambätä ye ani mike gare jai. Bämä nikani ruäre ta muko kwe krütani ye ngwane, niara nämäne kaibe gwi brukwä namani ulire krubäte. Nämäne orare muare kwärä ye ngwane, niara käräbare celularete ta. Ye abokän ni umbre iti ji ngwanka konkrekasionte ja ketamuko kwe. Ni umbre aune muko kwe ye käkwe Míriam töi mikani jäme aune dimikani. Jehová ara käkwe niaratre juani nüke gare Míriam ie mikata gare kwe.
¿Nitre ñan Testiko yebiti Jehová raba ni dimike ño? (párrafo 13 aune 14 mikadre ñärärä)
13. Nitre ñaka Jehová mike täte yebiti tä ni dimike ño ye mä raba mike gare.
13 Nitre ñaka niara mike täte yebiti tä ni dimike (Prov. 21:1). Ruäre ngwane orasion nitre Jehová mikaka täte yekwe ye mikata nemen bare kwe nitre ñaka niara mike täte ye köböire. Ñodre, rey Artajerjes käkwe Nehemías tuanimetre nikenta Jerusalén juta ye ükatekäreta (Neh. 2:3-6). Kä nengwane arato Jehová raba nitre ñaka testiko yebiti ni dimike nita ribere jai ye ngwane.
14. ¿Kukwe namani bare Soo Hingbätä ye tä mä dimike ño? (Üai mikadre ñärärä).
14 Nitre médico ye köböire meri testiko iti kädekata Soo Hing dimikani Jehovakwe ye ruin ie mikata gare kwe. Monso kwebätä bren keta kabre tä ye juruainbare tare krubäte. Ye medenbätä, Soo Hing aune muko kwe käkwe sribi tuanimetre. Yebätä ngwian ñan namani ietre yebe ja tuani kwe. Ñan namani nuäre kräketre ja tuakäre kukwe yebe mikata gare kwe. Yebätä ja nämäne nemen ruin ño ie ye mikani gare kwe Jehovai aune ja di ribebare kwe ie. Kukwe ben niaratre namani ja tuin yebätä doctor käkwe ja töi mikani aune niaratre dimikani kwe ye köböire gobrankwe dimikani aune ju ütiä bräi ye kwani ietre. Ye bitikäre Soo Hing tä niere: “Erametre kukwe jökrä yebätä Jehovakwe nun dimikaba ye jutuaba nunye. Erametre Jehovakwe orasion nunkwe kukwe nuaka” (Sal. 65:2).
JEHOVA TA NI DIMIKE JUTUADRE NIE AUNE RABADRE ERA NI KRÄKE YEKÄRE TÖDEKA RIBETA JAI
15. ¿Meri iti testiko nämäne kukwe ribere Jehovai ye Jehová nämäne mike nemen bare ye nükani gare ño ie?
15 Bäsi käre, Jehovata orasion nikwe kukwe nuin ngwane ñan tä nuainne kukwe ñan tuabare yebiti. Akwa nita dre ribere jai ja ngwankäre metre ie ye erere tä bien nie. Aisete ni tädre juto biare ni Rün kri kä kwinbiti tä orasion nikwe kukwe nuin ño ye mikakäre gare jai. Bä kabre Yoko nämäne orare ye Jehová ñaka nämäne kukwe nuin ruin ie. Ye bitikäre niarakwe dre ribebare Jehovai ye jökrä tikani kwe jai. Kä nikani ruäre ta ngwane niarakwe kukwe tikani ye tuaninteta kwe ngwane kukwe bäsi jökrä ye Jehovakwe mikanina nemen bare aune ruäre ñan namanina törö ie ye arato mikata gare kwe. Nikwe kä diandrekä jai töbikatarikäre Jehová ta orasion nikwe kukwe nuin aune tä mike nemen bare ño ye mikakäre gare jai ye kwin krubäte (Sal. 66:19, 20).
16. ¿Nita orare ye ngwane tödeka ye tä ni dimike ño? (Hebreos 11:6).
16 Tödeka ye ñan aibe ribeta jai orakäre Jehovai ñakare aune niara tä orasion nikwe kukwe nuin aune mike nemen bare ño ye ni tädre juto biare ka ngäbitikäre (ñäkädre Hebreos 11:6 yebätä). Kukwe namani bare Mike aune Chrissybätä, ye ani mike gare jai, niaratre ye abokän ja mäkäninte töi nämenentre sribibätä Betelte. Mike tä niere: “Nunkwe solicitud juanba bä kabre aune nunkwe käre oraba kukwe yebätä akwa ñaka nun nübaiba jire”. Mike aune Chrissy raba sribire medente kwin Jehová kräke ye nämäne gare Jehovai yei tö ngwanbare jankunu kwe. Aisete niaratrekwe sribibare jankunu Jehová kräke prekursor regular erere aune sribebare kwetre proyecto construcción yebätä. Nengwane niaratre tä sribire obra de circuito yebe. Mike tä niere: “Jehovakwe orasion nunkwe kukwe nuani aune mikani nemen bare bäri kwin nun nämä ngübare ye kräke”.
17, 18. Salmo 86:6, 7 tä mike gare erere, ¿dre gare metre nie?
17 (Ñäkädre Salmo 86:6, 7).d Jehová nämäne orasion Davidkwe kukwe nuin aune mike nemen bare yei David nämene tö ngwen kwatibe. David ye erere mä raba tö ngwen kwatibe. Kukwe namani barebätä nikwe ja kiti kukwe ja tötikara nekänti ye tä bämike metre Jehová raba ni mike töbätä aune ja di bien nie kä ngwankäre nüke jai kukwe tare yebätä. Ni mräkätre ja üaire aune nitre ñaka Jehová mike täte yebiti raba ni dimike nibi gare nie.
18 Nita orare Jehovai aune mikadre nemen bare ño kwe ie ni tö ye erere ñan tä mike nemen bare käre akwa mikai nemen bare kwe yebrä gare metre nie. Ne madakäre, ñongwane nita ribere bäri jai ye ngwane tä bien nie. Aisete nita orare ngwane nikwe tö ngwandre ie aune kä bä nuäre yete niarakwe “jondron nire jökrä tö dre dre ie” ye erere bian ie ngwandre törö jai (Sal. 145:16).
KANTIKO 46 Tä debe Jehová
a Jehová töi ye ererebätä nikwe ja di ribei ie ngwane, ni kukwe nuai kwe tä käbämike nie. Nita ja tuin kukwe tare ben ye ngwane ni dimike kwe ja ngwen metre ie yei nikwe tö ngwandre kwatibe. Kukwe ribeta Jehovai orasionte ye tä mike nemen bare ño ye rabai gare nie kukwe ja tötikara ne känti.
b Kukwe ja tötikara kädekata “Kukwe ütiäte krubäte ye nikwe ñaka käi kwitadrekä jabiti” tä Ni Mikaka Mokre junio 2017, känti ñobätä Jehová tä Satana tuenmetre kä ne gobraine ye mikata gare.
c Nitre ruäre kä kwitani.
d Salmo 86:6, 7: “oh, Jehová, tita orare ye kukwe nuin; tita bike tidrä mäbätä ja di ribekäre mäi ye ie olo ketete kwekebe. Tita ja tuin kukwe tare ben ngwane tita mä kärere ñobätä ñan aune mäkwe ti kukwe käi ngäbiti”.
e KUKWE MIKATA GARE ÜAIBÄTÄ: Ni meyere iti aune ngängän kwe tä ngitie juta madate ja kriemikakäre. Ja mräkätre tä kain ngäbiti aune dimike kukwe ruärebätä.