¿Ne gare mäi?
Babilonia ganinte yete ladrillo kwani aune sribe nämäne ño namani gare, ye köböire tö ngwan raba bäri Biblia ie
NITRE arqueólogo ie ladrillo sribebare kwani krubäte juta Babilonia yekänti, ladrillo yebiti juta kri ye sribebare. Arqueólogo Robert Koldewey käkwe niebare ladrillo ye sribe nämäne horno yebiti “juta ye bäre, känti kiängätä aune kri küde” nämäne kabre kukwakäre.
Nitre funcionario Babilonio ye nämäne sribire horno yebiti akwa kukwe blo nuainkäre mikata gare tärä kira kwani yebätä. Paul-Alain Beaulieu, profesor Universidad Toronto Asiriologiabätä tä niere: “Nire ñaka nämäne kukwe mike täte o jondron mika nämä ütiäte jai ye ñaka nämäne mike tuin ütiäte jai ngwane, ni ye kukwadre […] nie nämäne reikwe mikata gare” tärä nämäne nitre Babiloniokwe yebätä. Rei Nabucodonosor nämäne gobrane ye näire tärä keteiti nämäne kukwe ükatrete ño ye mike gare: “Gainte, kukwe, rötökä ñukwäbiti, […] horno ni ukwen riakakwe yebiti […], ngübüe aibe rabadrekä yekäre. Aune riadrekä jökrä ñukwäte”.
Kukwe jökrä ne tä ni mike töbike Daniel kapitulo 3 yebätä. Känti rei Nabucodonosor käkwe jondron üaire kri krubäte sribebare juta Babilonia ye bäre mento kä kiare Dura ye känti. Sadrac, Mesac, Abednego nitre hebreo nimä ne ñaka namani ngodokwäbiti jondron üai sribebare kri ne känenkri. Yebätä rei Nabucodonosor brukwä ngadani kräkrete, aisete “horno mikadre bä kükü jire, bäri ngire niaratre kitakäre” niebare kwe, niaratre namanina gatakäre akwa ángel iti käkwe mikani kwäre (Dan. 3:1-6, 19-28).
© The Trustees of the British Museum. Licensed under CC BY-NC-SA 4.0. Source
Ladrillobätä Nabucodonosor kä tä tikani
Ladrillo kwani Babilonia ye tä mike gare metre nie Biblia ye tä kukwe mike gare metre aune tö ngwan raba kwatibe ie. Ladrillo ketakabre yebätä rei käikitaka nämäne ño ye tikani. Ruäre yebätä kukwe ne tä tikani: “Nabucodonosor rei Babilonia […]. Tikwe ju ne sribebare nünankäre aune kä bä nuäre krubäte gobrankäre nete […]. Nitre ti mräkäre jatai ja täri yekwe gobrandi kärekäre nete”. Kukwe tikani ne kwrere bäsi tä kwen nie Daniel 4:30 yebätä, yete Nabucodonosor nämäne bike kri kä nämäne niere: “¿Babilonia kri ne ñan ai tikwe sribebare ja di jeñebiti gobran tikwe ne käikitakakäre?”.