Nitre nibu kädekani Nitre Braibe Konkrekasion Jökrä Ngübabitikä
MIÉRCOLES 18 enero 2023 yete, kukwe ütiäte mikani gare jw.org yete: ja mräkä Gage Fleegle aune Jeffrey Winder ye kädekani Nitre Braibe Konkrekasion Jökrä Ngübabitikä. Niaratre nibu ye tä kä kwati te sribire Jehová kräke.
Gage Fleegle aune muko kwe, Nadia
Ja mräkä Fleegle ye ririabare kä Pensilvania nedrinkri (Estados Unidos). Rünkwe kukwe metre driebare ie. Niara nämäne monsore ye ngwane, nikanintre nüne juta chi känti, yete nitre ribe nämäne bäri kukwe driekäre. Niarakwe ja ngökani ñöte 20 noviembre kä 1988 ye ngwane.
Ja mräkä Gage Fleegle rün tö nämäne niara tuai sribire köbö täte Jehová kräke. Rün, nämäne ni circuito tuabitikä aune ja mräkätre Betelte nübaire ja gwirete, ye köböire ja mräkätre yebätä kä nämäne juto käre nämäne tuin ie. Ja mräkä Gage Fleegle ja ngökani ñöte, bäsi bätärabe ja mikani kwe prekursor regular, 1 septiembre kä 1989 ye ngwane. Kä nämäne 12 biti ngwane tö nämäne näin Betel ye erere namani bare, ja mikani kwe prekursor ye käi nikani kubu ta ngwane, nübaibare Betelte Brooklyn octubre kä 1991 yete.
Kä 8 te sribebare kwe taller de encuadernación yebätä, biti kwitani Departamento de Servicio yete. Kä ye ngwane niara nämäne konkrekasion blite kukwe rusobiti yete kä ruäre te. Kä 2006 yete ja mäkäninte kwe Nadia ben, yete ja käne tätre sribire gwaire Betelte. Niaratre nibu sribibare nitre blite portugués yebe aune kä nikani 10 ta biti bäri tätre konkrekasion suliare yete. Kä kabre te Fleegle sribibare Departamento de Servicio yebe, biti kwitani Oficina Comité Enseñanza, biti mada kwitani Comité de Servicio yete. Kä marzo 2022 kädekani comité de servicio, Nitre Braibe Konkrekasion Jökrä Ngübabitikä dimikaka.
Jeffrey Winder aune muko kwe, Angela
Ja mräkä Winder ye ririabare kä Murrieta yekänti (California). Niara ye rün testigo Jehovakwe aune niaratrekwe kukwe metre driebare ie. Kä 29 marzo 1986 yete Winder ja ngökani ñöte. Sö ye bitikäre ja mikani kwe prekursor auxiliar, aune ye namani tuin kwin krubäte ie ye medenbätä ñaka tuanimetre jire kwe. 1 octubre kä 1986 yete ja mikani kwe prekursor regular.
Ja mräkä Winder nikani basare eteba nibu kwe nämäne sribire Betelt yei. Ye käkwe niaratre töi mikani niken Betelte, akwa raba niken betelte ye ngwane solicitud juandre kwe yekäre. Mayo kä 1990 yete nübaibare Betel Wallkill yete.
Yete sribi keta kabre mikani kisete, ñodre sribebare kwe Departamento de Limpieza, Departamento de la Hacienda aune Oficina Betel yete. Kä 1997 yete ja mäkäninte kwe Angela ben, yete ja käne tä sribire Betelte gwaire. Kä 2014 ja mräkä Winder ye kwitani Warwick, känti sribibare kwe siba central mundial sribe nämene ngwane. 2016 yete kwitani Patterson, Centro Educativo Watchtower yete, yete sribibare kwe Audio aune Video yebätä. Kä nikani kobokä ta ye bitikäre ja mräkä Winder ye kwitaninta Warwick, bitikäre sribibare kwe Comité Personal yebe. Kä marzo 2022 yete kädekani Comité Nitre Braibe Konkrekasion Jökrä Ngübabitikä dimikaka.
Jehovakwe nitre ütiäte ne biani regalo kwrere nie (Efes. 4:8). Niaratre tä ja di ngwen sribikäre Gobran Ngöbökwe kräke. Yebätä nikwe oradre jankunu kukwe kwin rabadre bare kräke yekäre.