Nitre Braibe Konkrekasion Jökrä Ngübabitikä nibu mada
5 OCTUBRE kä 2024 ye ngwane kukwe ütiäte mikaba gare gätä nuainta kä kwatire kwatire yete: ja mräkätre Jody Jedele aune Jacob Rumph kädekani Nitre Braibe Konkrekasion Jökrä Ngübabitikä erere. Kä kwatí te niaratre nibu ye tä sribire Jehová kräke.
Jody Jedele, tä muko kwe Dámaris ben
Ja mräkä Jedele därebare Misuri (Estados Unidos). Rün kwe kukwe metre driebare ie, kä känti nämänentre nüne yekänti nitre testiko Jehovakwe ñaka nämäne krubäte. Ye medenbätä ja mräkätre kä jökräbiti tibien nämäne niken kukwe driere yete ye namani gare ie. Ja mräkätre nämäne ja tarere aune keteitibe ye namani tuin kwin krubäte ie. Ja ngökabare ñöte kwe kä 1983, 15 octubre aune tö nämäne kukwe driei krubäte. Ye medenbätä ngedianinkä kwelate ngwane ja töi mikani kwe sribire precursor regular erere, septiembre kä 1989.
Niara aune ngwai kwe nämäne chi ngwane rün nämäne niken ngwena Betel. Niaratre nämäne nike basare ye käkwe töi mikani ja töi mike sribire betelte. Ye erere namani bare ietre. Septiembre kä 1990, sribi Betel Wallkill kömikani yete kwe. Akwa käne sribibare kwe Departamento de Limpieza yete biti Servicios Médico yete.
Kä ye näire konkrekasion suliare nämä abokän jataba nirien aune nitre brare ribe nämä sribikäre yete. Jä mräkä Jedele jatani ja ükekrö konkrekasion suliare yete ja kitakäre blite kukwe suliare yebiti. Kä nikani braibe ta ngwane precursora iti nämäne circuito kwe yete kädekani Dámaris namani gare ie. Kä nikani ta ngwane ja mäkäninte kwetre aune sribi kömikani ngwaire kwetre Betelte.
Kä 2005 ye ngwane nikaninta niara meye ye ngübare aune muko merire ye rüntre ngübare. Kä ye ngwane, sribi precursor regular ye nuainbare kwetre aune bä kabre Kwela Nitre Sribikä Prekursor kräke ye jie ngwani kwe. Arato sribibare kwe Comité de Enlace con los Hospitales ben bätä Comité Regional de Construcción nämäne sribire niara nämä nüne yekänti.
Kä 2013 ye ngwane, nubaibareta sribikäreta Betelte akwa nengwane sribikäre ju sribe nämäne Warwick yekänti. Yete ja käne sribibare kwe Patterson aune Wallkill. Aune sribibare kwe Departamento Local de Diseño y Construcción aune Servicios de Información sobre Hospitales ben. Sö marzo 2023 kädekani Comité de Servicio dimikaka. Blitata sribi nuainbare kwe yebätä ngwane, niara tä niere: “Ruäre ngwane, sribi mrä mikata ni kisete ye käne nita nemen nainte. Akwa ye ngwane, ngwandre toro jai bäri ütiäte tö ngwandre Jehovai. Ñobätä ñan aune niara tö dre nuain ye erere tä mike nemen bare”.
Jacob Rumph, tä muko kwe Inga ben
Ja mräkä Rumph därebare California (Estados Unidos). Niara nämäne chi ngwane meye kwe nämäne tibo kukwe ja üairebiti. Akwa yebiti ta meye ja di ngwanbare kukwe metre bibliabätä driekäre ie. Kärera nierare nämäne niken moloi kwe tuinbiti, moloi ye nämä dite ja üairebiti, ye käkwe dimikani ye köböire tö namani kukwe metre ye mikai gare jai. Ye medenbätä kä nämäne 13 biti ngwane ja tötika bibliabätä käräbare kwe. Sö 27 septiembre kä 1992 ye ngwane, ja ngökabare ñöte kwe nämäne bati ngwane. Ne madakäre meye kwe aune mräkätre jökrä jatani nirien kukwe ja uairebiti aune ja ngökani ñöte kwe arato.
Ja mräkä Rumph nämä bati ngwane, nitre prekursor ye nämäne sribire kä jutobiti ye nämäne mike ñärärä. Ye medenbätä ngedianinkä kwelate ngwane ja töi mikani kwe sribi prekursor ye nuainne Septiembre kä 1995 ye ngwane. Kä 2000 ye ngwane nikani kä keteiti Ecuador känti ni ribe nämä kukwe driekäre yekänti. Yete precursora kä Inga nünanka Canadá namani gare ie, kä nikani ruäre tä ngwane ja mäkäninte kwetre. Ja mäkäninte kwe ye käi nikani braibe ta ngwane, nämäne sribire juta chi Ecuador känti, yete ja mräkätre kukwe driekä nämäne braibe. Nengwane konkrekasion dite ja üairebiti ta yete.
Kä nikani ta ye bitikäre niaratre kädekani precursores especiale erere, ye bitikäre nämäne circuito tuinbiti. Kä 2011 nübaibare kwela 132 Galaad yete. Ngedianinkä kwela Galaad ye bitikäre juani juta jene jene känti, ye ngwane sribibare kwe ni betelita, misionero aune ni tuabitikä erere. Ye köböire niarakwe Kwela Nitre Gobran Ngöbökwe Kukwei Driekä kräke ye jie ngwani.
Pandemia COVID-19 ye köböite nikaninta Estados Unidos. Betel Wallkill yete niaratre nübaibare, ja mräkä Rumph tötikabare Departamento de Servicio yete. Ye bitikäre juani sucursal Ecuador yekänti aune ye bitikäre niarakwe sribibare Comité de Sucursal yete. Kä 2023 ye ngwane juani Warwick, aune enero kä 2024 kädekani Comité de Servicio dimikaka. Kä jene jene känti yebätä blitabare kwe ngwane niebare kwe: “Medente nita sribire Jehová kräke ye ñan ai bäri ütiäte, nirebe nita sribire yebrä ütiäte: ja mräkätre yebe”.
Ja mräkätre tä sribire ne ütiäte krubäte nun kräke aune ‘niaratre ye ütiäte kri nun kräke’ (Filip. 2:29).