Carta tikani ye raba ni dimike ja ngwen metre nememe kä krüte näire

1, 2. a) ¿Nitre judío nämäne nüne ño apóstol Pablo Tärä Hebreos ye tikani ngwane? b) ¿Tärä tikani ye ñobätä namani ütiäte krubäte kräketre?

JESÚS murie ketani ye bitikäre, nitre kristiano hebreo ja tuani kukwe tare krubäte ben. Kä nikani braibe ta, konkrekasion kömikani juta Jerusalén ngwane, nitre ja mikani ja mräkätre ye rüere (Hech. 8:1). Aune kä nikani 20 ta mada, nitre nänkä Kristobe o ja tötikaka ben Judea ye ja tuani kukwe mada tare ben arato, ngwian ñan namani krubäte kwetre, ye medenbätä kä ye näire juta yete mrö nika namani krubäte (Hech. 11:​27-30). Akwa kä 61, ye ngwane niaratre nämäne nüne jäme ni raba niere, ñobätä ñan aune kukwe bäri tare rakadrekä ye köböi namanina ja ken. Akwa Pablo, carta tikani üai deme köböire niaratre dimikakäre ye käkwe dimikadre krubäte ja tuakäre kukwe bäri tare rakadrekä ye näire.

² Nitre hebreo nämäne kukwe ribere jai ye ara Pablokwe mikani gare ietre Tärä Hebreos yebiti, ñobätä ñan aune niaratre nämä nüne jäme ye ñan nuadi raire krubäte. Apóstol Pablo kukwe tikani nitre kristiano ie aune kukwe ruäre niebare ie ye käkwe dimikadre ja tuin kukwe bäri tare yebe. Nitre judío kukwe ükaninte abokän gaite bätä blitabare Jesukwe ye namanina känime (Luc. 21:20). Metrere, nüke gare nie Pablo bätä nitre judío ye ie ñan nämäne gare ñongwane kukwe ye rakaikä. Akwa kä jökrä ye ngwane, niaratre nämäne tödeka jakwe mike bäri dite kä ngwankäre nüke jai ne kwe tädre juto kukwe rakadrekä ye kräke (Heb. 10:25; 12:​1, 2).

3. ¿Tärä Hebreos yebätä ja kitadre ye ñobätä kwin krubäte ni kräke kä nengwane?

³ Nitre kristiano hebreo ja tuani kukwe tare krubäte ben akwa ni köböi ja tuin ja tare nikadi bäri kri yebe nengwane (Mat. 24:21; Apoc. 16:​14, 16). Jehovakwe mäträbare nitre kristianobätä ye raba ni dimike kä nengwane arato. Ruäre ye ani mike gare jai.

“BRÄN JANKUNU MENTOKWÄRE RABAKÄRE ÜNÄN NGÖBÖ NGWÄREKRI”

4. ¿Nitre kristiano judío yekwe ja tuani drebe? (Üai mikadre ñärärä).

⁴ Nitre hebreo ie Pablo kukwe tikani yekwe kukwe judío mika nämäne täte kwetre ye tuanimetre aune ja mikani kwetre kristiano aune ye ñan namani nuäre kräketre. Ne madakäre, nitre judío ye abokän juta dianinkä Jehovakwe ja kräke. Kä kwati krubäte te juta Jerusalén ye abokän nämäne juta ütiäte krubäte, ñobätä ñan aune yete nire dianka nämäne Jehovakwe reire ye nämäne gobrane aune templo nämäne yete arato. Nitre judío ja ngwanka metre ye nämäne Kukwe Biani Moisés ie ye mike täte aune nitre kukwe madabätä nämäne kukwe bien mikakäre täte ye nämäne mike täte. Kukwe nämäne ükaninte mrö yebätä, ni brare tarei kwata tikadrekä yebätä aune nitre juta madate mikadre tuin ño jai yebätä. Ne madakäre, Jesús murie ketani ye ngwane, jondron kukwadre templote ye Jehová ñan namanina kai ngäbiti mada. Kukwe jökrä kwitani jene ye ñan namani nuäre nitre judío kräke ka ngäbitikäre, ñobätä ñan aune nämäne käre Kukwe Biani Moisés ie ye mike täte (Heb. 10:​1, 4, 10). Nitre kristiano namanina ünä ja üairebiti, akwa yebiti ta ñan namani nuäre kräketre, ñodre apóstol Pedro kräke ñan namani nuäre (Hech. 10:​9-14; Gál. 2:​11-14). Yete mada, nitre ji ngwanka kukwe judiobätä ye namani ja mike ja mräkätre kristiano ye rüere kukwe mrä mika nämäne täte kwetre yebätä.

5. ¿Grupo ketebu meden ben nitre kristiano ja tuani?

⁵ Grupo ketebu ja mikani ja mräkätre kristiano ye rüere. Grupo keteiti ye abokän nitre ji ngwanka kukwe judiobätä ye namani ja mräkätre kristiano ye bien apóstata. Arato, grupo mada ye abokän nitre ruäre namani ja bien kristiano akwa namani ja mräkätre töi mike jankunu Kukwe Biani Moisés ie ye mike täte ñaka ja mikadre rüere yekäre (Gál. 6:12). Akwa, ¿dre ja mräkätre kristiano ye dimikani ja ngwen metre jankunu?

6. ¿Pablokwe nitre hebreo ye töi mikani dre nuainne? (Hebreos 5:​14–6:1).

⁶ Apóstol Pablo Tärä Hebreos tikani ngwane, nitre hebreo töi mikani kwe ja tötike bäri nguseta Ngöbö Kukweibätä (ñäkädre Hebreos 5:​14–6:1 yebätä). Escrituras Hebreas yebiti apóstol Pablo mikani gare nitre kristiano ie, niaratre nämäne kukwe mike täte ye bäri kwin kukwe mika nämäne täte nitre judiokwe yebätä.a Niaratrekwe ja tötikadre bäri Escrituras Hebreabätä aune kukwe mikadre gare bäri jai ye käkwe dimikai krubäte nämäne gare Pablo ie. ¿Dimikai ño kwe? Rabadre bäri nuäre kräketre kukwe meden ngwarbe ye mikakäre gare jai aune ñaka ka ngäbitikäre, arato niaratre ñaka diandrekä mento kukwe metre yebätä.

7. ¿Kukwe meden ñan nuäre ben ja tuata nikwe?

⁷ Nitre ruäre tä niere ni testiko Jehovakwe ye ie kukwe ñaka nüke gare jire, ñobätä ñan aune kukwe ja jie ngwankäre Bibliabätä ja mika gurebätä ye jökrä nita mike täte. Ne madakäre, ni testiko tä ñäke ngwarbe ni madabätä nietabätä. Niaratre tä töbike aune kukwe nuainne köbö kwatire kwatire yebiti ñaka kukwe Jehovakwe ye mike ütiäte jai (Prov. 17:15). Ye medenbätä, nikwe ja di ngwandre kukwe meden metre aune kukwe meden ngwarbe ye mikakäre gare jai, ñaka kukwe ngwarbe ka ngäbitikäre aune ñaka ja di ngwandre nekä ne kwe ni ñan diandrekä kwe kukwe metre yebätä (Heb. 13:9).

8. ¿Dre ni dimikai nemen ünä ja üairebiti?

⁸ Nitre kristiano rabadre nirien jankunu ja üairebiti rabakäre ünä niebare Pablokwe ietre. Ye erere arato ni rabadre nuainne. ¿Raba nemen bare ño nie? Ja tötikadre nguseta Ngöbö kukwei yebätä aune ja di ngwandre töbikakäre Jehová erere. Kukwe ne nikwe nuaindre jankunu nita ja ngökö ñöte aune ja denkä mento ye bitikäre. Yebiti nüke gare nie, ni jökrä rabadre ñäke aune ja tötike Ngöbö kukwei yebätä, krire nita kukwebätä o mekera kukwebätä akwa yebiti ta (Sal. 1:2). Kukwe tädre ükaninte kwin nikwe jai ja tötikakäre Bibliabätä ngwane, töi kwin keteiti rabai bäri dite mikani gare Pablokwe kukwe tikani kwe ye ngwane, ye abokän: tödeka (Heb. 11:​1, 6).

“NI ABOKÄN TÖDEKAKA AUNE NI RABAI DIANINTARI NÜNANKÄRE KÄREKÄRE”

9. ¿Tödeka tädre dite nitre kristiano yekwe ye ñobätä nämäne ribere jai?

⁹ Tödeka nitre kristianokwe tädre dite krubäte rabatekäre nire kukwe rakaikä Judea ye ngwane (Heb. 10:​37-39). Nitre nänkä Jesube ye ie kukwe ne niebare kwe: juta Jerusalén ye ketaka mä rüekwe ngwane mun gitia kä tokwäte. Jesukwe kukwe niebare ye abokän nämäne blite nire nämäne juta Jerusalén yete aune nire nämäne juta Jerusalén bäre ye kräke arato (Luc. 21:​20-24). Kukwe ye kwrere nämäne nakainkä ngwane, käre nitre nämäne ja kriemike juta ye teri, ñodre nämä nemen bare juta Jerusalén yete ye erere. Ye medenbätä Jesukwe niebare niaratre rabadre ngitie kä tokwäte ye ñan namani tuin bä ietre, aisete kukwe ye mikakäre täte niaratre nämäne tödeka ribere krubäte jai.

10. ¿Nitre kristiano kwe tödeka nämäne dite yekwe dre nuaindre? (Hebreos 13:17).

¹⁰ Ja mräkätrebiti Jesús nämäne konkrekasion jie ngwen, yei ja mräkätre kristiano rabadre tö ngwen. Ja mräkätre nämäne jie ngwen ye nämäne kukwe bien mikakäre täte metre ta, ñodre ñongwane ja mräkätre rabadre ngitie aune nuaindre ño kwetre (ñäkädre Hebreos 13:17 yebätä). Kukwe griegore ‘ja mikata täte’ kädekaninte Hebreos 13:17 ye tä mike gare, ni iti tä kukwe mike täte ngwane, tä tö ngwen ni iti tä kukwe bien mikakäre täte yei aune tö ngwan raba ie yebätä aune ñan raba kukwe mada nuainne ye ñan aibätä tä nuainne. Nitre kristiano ye rabadre ja di ngwen tö ngwankäre nitre umbre ji ngwanka yei ja tare nikadre kri ye känenkri. Niaratre ja mikadre täte kukwe tä jäme ye ngwane ye köböire rabai bäri nuäre kräketre ja tuakäre kukwe tare rakadrekä ye ngwane.

11. ¿Ñobätä tödeka nikwe ye tädre dite?

¹¹ Nitre kristiano ie Pablokwe carta tikani ngwane, niaratrekwe tödeke nämäne dite ye erere arato nikwe tödekadre. Kä nengwane, nitre tä nütüre kä krüte ye ñaka rükai jire chi aune kä krüte rükai nita mike era jai yebätä niaratre tä nemen ni kötaire (2 Ped. 3:​3, 4). Ne madakäre, Bibliabätä kukwe ruäre mikata gare ja tare nikadi kri yebätä akwa kukwe mada keta kabre abokän ñaka gare jire nie. Ñongwane kä krüte rükai köböi kitani Jehovakwe ye erere rabai bare aune ye näire tödeka nikwe tädre dite, arato niarakwe ni kriemikai yei tö ngwandre kwatibe (Hab. 2:3).

12. ¿Dre ni dimikai nemente nire ja tare nikadi kri ye näire?

¹² “Ni klabore ja ngwanka metre aune töbikaka kwin käne” yebiti Jehovata ni jie ngwen kä nengwane yebiti tödekadre bäri (Mat. 24:​45, TNM). Nitre kristiano hebreo ye ie kukwe biani ja jie ngwankäre nitre romano nükani ye ngwane. Ye erere arato kukwe biandi nie mikakäre täte nengwane köböire ni raba nemente nire ja tare nikadi kri ye näire. Ye medenbätä, kä nengwane nirebiti Jehovata juta kwe jie ngwen yei tö ngwandre kwatibe. Ñobätä ñan aune, ñaka mikadre täte aune ñan tö ngwandrebiti ngwane, rabai bäri tare ni kräke mikakäre täte ja tare nikadi kri ye näire.

13. ¿Kukwe nieta Hebreos 13:5 ye ñobätä namani ütiäte krubäte?

¹³ Nitre kristiano hebreo gitiadre niedre ie ye nämäne ngübare ngäbiti ngwane, rabadre nüne jondron braibebiti aune ñaka ‘ngwian tarere krubäte’ (ñäkädre Hebreos 13:5 yebätä). Niaratre ruäre ye abokän käkwe ja tuani kukwe tare ben, ñodre nämäne mrö nike aune jondron ñan nämäne krubäte kwetre (Heb. 10:​32-34). Niaratre ruäre nämäne juto biare kä ngwankäre nüke jai kukwe tare ye näire kukwe kwin ie nämäne tö ngwen yebätä. Akwa ruäre jatani ja töi mike ngwian ganainne bäri jai, ja kriemikakäre jondron medei nikadre ye näire kräke. Akwa Jerusalén gadrete ye ngwane, ngwian ye ñan raba ni iti jire mikete kwäre (Sant. 5:3). Bärira jire ni iti tädre ngwian tarere, ye köböite ñan rabadre nuäre kräketre jondron nämäne kwe aune ju kwe ye tuanmetrekäre.

14. ¿Tödeka tädre dite nikwe ye ngwane, dre diain nuaindre jai?

¹⁴ Kä krüte köböi nebera känime yebiti nita tödeke aisete nikwe ñaka ja töi mikai jondron kä nebätä ye jiebiti. Ja tare nikadi kri ye ngwane, ngwian ye ñaka rabai ütiäte jire. Biblia tä mike gare “Jehová rabai rubun ye ngwane nitre ie rükai gare ngwian aune oro ye ñaka raba niaratre mikete nire ngwane, kitai kwetre ji ngrabare” (Ezeq. 7:19). Ñaka ja töi mikadre ngwian ganainne bäri jai, kukwe bäri kwin nuain raba ye abokän ja di ngwandre kukwe kwin diankäre nuaindre jai töbikakäre debe näre jondron tä nikwe yebätä yekäre kö okwä Satanakwe yebätä ja ngübadrebiti. Ñodre, rürübän ütiä mikata nierare jabiti. Nita nemen jondron kä nebätä tarere ye köböire kä ñan ta nemente nie jire chi (Mat. 6:​19, 24). Kä krüte kitera bäri ja ken yebätä, nita Jehová tarere bäri o jondron nikwe ye nita tarere bäri ye tä bämikadre nie.

“MUNKWE NÜNANDREKÄ DITE”

15. ¿Nitre kristiano rabadre kä ngwen nüke jai ye ñobätä namani ütiäte krubäte?

¹⁵ Köbö kwatire kwatire jatai niken ta ngwane, kä Judea yete kukwe jatai nakainkä bäri tare, bäri käme krubäte ye medenbätä nitre kristiano rabadre kä ngwen nüke jai nämäne tödeke ye bämikakäre (Heb. 10:36). Käne ja mikani niaratre rüere yebe ja tuani kwetre akwa ja mräkätre ye jökrä bäsi käkwe kukwe metre kani ngäbiti nüna nämäne jäme ye näire. Ye medenbätä, Pablokwe niaratre mikanina mokre aune niebare kwe ie ja mikai rüere ja känenkäre ngwane rabai bare bäri tare krubäte, yebätä niaratre rabadre tödeke kwatibe nememe niaratre mürie ketadre ye ngwane, Jesukwe nuainbare ye erere (Heb. 12:4). Kä nämäne niken ta ngwane, nitre kristiano jatani bäri kwati, ye medenbätä nitre ja mikaka kukwe judío kiri ye jatani rubun krubäte. Kä nikani kwati ta kukwe ye rakadrekä känenkri Pablo nämäne kukwe driere Jerusalén ngwane, nitre ja ükaninkrö niara rüere. “Nitre israelita ni gre ketebu jire käkwe ja töi mikani gwaire Pablo kämikakäre, käkwe ja kukwei biani krörö ja rüere Ngöböye: Ni ngämi Pablo kämike, känenkri nikwe ñan mrödre amne nikwe ñan tomna ñadre” (Hech. 22:22; 23:​12-14). Nitre kwati nämäne ja mike nitre kristiano ye rüere akwa rabadre ja ükökrö jankunu, kukwe driere aune tödeka jakwe mike dite.

16. Kukwe tare tä nemen bare nibätä ngwane, ¿yebätä ni kitata ye kwrere mikadre tuin jai ye mikata gare ño Tärä Hebreos yebätä? (Hebreos 12:7).

¹⁶ ¿Dre nitre kristiano ye dimikadre kä ngwen nüke jai ja mika nämäne rüere ye ngwane? Kukwe tare ben nämäne ja tuin ye raba tödeka niaratrekwe mike dite, ye kwrere rabadre mike tuin jai ye nämäne gare Pablo ie. Ye medenbätä niebare kwe nitre kristiano yei, Ngöbö raba ni kristiano tuenmetre ja tuin kukwe tare ben köböire raba nemen ni kristiano bäri dite ja üairebiti (ñäkädre Hebreos 12:7 yebätä). Kukwe tare ben niaratre nämäne ja tuin ye niaratre raba mike tuin jai ni kitata ye kwrere. Ye köböire rabadre bäri nuäre kräke ja tuakäre kukwe tare yebe, ja töi mikadre kwetre kore yekwe dimikadre nemen ni kristiano bäri dite ja üairebiti (Heb. 12:11).

17. ¿Ja mikata ni rüere ngwane kä ngwandre nüke jai yebätä dre nämäne gare Pablo ie?

¹⁷ Pablokwe ja mräkätre kristiano ye töi mikani ja ngwen dite aune kä ngwen nüke jai. Pablo nämäne kukwe niere ngwane, ñan ni ngwarbe nämäne blite, ye medenbätä kukwei mika nämäne ütiäte jai. ¿Ñobätä? Ñobätä ñan aune, niara jämi ja mike kristiano ye känenkri, nämäne ja mike ja mräkätre kristiano rüere. Aune ja mikani kwe kristiano ye bitikäre nämäne ja tuin kukwe tare yebe ngwane, ja nämäne nemen ruin ño ietre ye nämäne nüke gare kwin Pablo ie, ja mikani niara rüere arato aune kukwe tare keta kabre nuainbarebätä (2 Cor. 11:​23-25). Ye medenbätä, dre ribe nämäne kä ngwankäre nüke jai ye nämäne gare Pablo ie. Aisete, mäträbare krörö ja mräkätrebätä, niaratre ñan rabadre tö ngwen akwle jai, ñakare aune Jehovabiti aune niedre kwetre: “Ti Dänkien Ngöbö abko ti die mikaka” (Heb. 13:6).

18. ¿Dre tädre mrebe ni töibätä aune ja töi mikadre dre nuainne gwäune?

¹⁸ Kä nengwane ja mräkätre kristiano ye rüere ja mikata. Akwa niaratre tare nikwe aune ni tö dimikai ye ni raba bämike ietre, nuaindre nita orare kräketre aune kukwe ruäre nuain raba kräketre erere nita nuainne yebiti (Heb. 10:33). Biblia ye ñan tä kukwe mike gare bäre bäre, ñakare aune tä niere metre ta: “Nire nire tö nünai kuin deme Kristo Jesukrä abko käkwe ja tare nikadi rüe kisete” (2 Tim. 3:12). Kukwe mikata gare yebiti nüke gare nie ni jökrä rabadre ja di ngwen kä ngwankäre nüke jai. Aune kukwe tare rabai bare ye näire Jehovakwe ni dimikai yei tö ngwandre kwatibe. Jehovakwe ni niara mikaka täte metre ye töi mikai jäme täi ribere jai ye ngwane (2 Tes. 1:​7, 8).

19. ¿Ni raba dre nuainne ja mikakäre juto ja tare nikadi kri ye kräke? (Üai mikadre ñärärä).

¹⁹ Pablo carta tikani ja mräkätre hebreo ie ye raba niaratre dimike ja tuakäre kukwe rabai bare ja känenkäre niaratrebätä yebe. Pablokwe niaratre dimikani kukwe mike gare bäri jai Ngöbö kukweibätä aune mike nüke gare jai. Ye köböire, niaratre tädre juto biare kukwe ngwarbe ye mikakäre gare jai aune ñaka kai ngäbiti jire chi, ñobätä ñan aune raba tödeka kwetre ngwen di nekä. Arato Pablokwe niebare ietre, niaratre rabadre tödeke bäri Jesús tä ni jie ngwen aune konkrekasion yebiti tä ni jie ngwen ye ie. Aune Pablokwe bämikani ietre niaratrekwe töbike kwin kukwe tare nämäne bare bätätre o ye mikadre tuin kwetre jai ja kitakäre ngwane, yebiti Jehová nämäne tödeka kwetre mike bäri dite ye rükadre gare ietre. Ye erere arato, kukwe Ngöbökwe tä Bibliabätä ye nikwe mikai täte ngwane, nikwe käi ngwan nüke jai nememe kä krüte näire (Heb. 3:14).