Nitre tä kukwe ngwentari
Däkien Jesús Mrö Biani Deu ye ngwane, ¿nitre 70 dianinkä kwe kukwe driere ye nämäne medente? ¿Niara mikaninte kaibe kwetre?
Däkien Jesús Mrö Biani Deu ye ükaninte kwe ngwane nitre ja tötikaka 70 kwe ye käkwe tuanimetre o ñan namanina kain ngäbiti ye ñan nütüdre. Ñakare aune Jesús tö namani rabai nitre apóstol kwe ye aibe ben.
Nitre 12 aune nitre 70 ye Jesús nämäne kain ngäbiti. Kena nitre kwati ngätäite nitre 12 ye dianinkä kwe aune kädekani apóstoles kwe (Luc. 6:12-16). Niara nämäne Galilea ngwane “nitre ja töitikaka ben ni jätäbti nibu ükaninkrö” kwe aune “Ngöböta gobrane ni ngätäite kädriedre kwetre amne ni bren bren mikadreta kuinta kwetre” ye juani mike gare kwe (Luc. 9:1-6). Ye bitikäre Judea yete, “ni mdara jire dianinkä gre ketamä bti ni jätä. Jesu rikadre juta mdente mdente, ye känti Jesukwe ni ye juani nibu nibu ja känenkri” (Luc. 9:51; 10:1). Aisete kä keta kabre känti kukwe drie nämene yekänti nitre ja tötikaka Jesukwe nämäne.
Nitre judío nämäne ja mike nänkä Jesube ye nämäne kä kwatire kwatire käre Pascua kä ngwen juto jabätä mräkäbe (Éx. 12:6-11, 17-20). Jesús murie keta jämi ye känenkri, nikani Jerusalén nitre apóstol ben. Akwa nitre ja tötikaka kwe Judea, Galilea, Perea ye rikadre Pascua kä ngwen juto jabätä niarabe ye ñan ribebare kwe ietre ñakare aune, köbö ye näire tö namani rabai kaibe nitre apóstol ben. Yebätä niebare kwe ietre: “Ti ngämi krüte, känenkri bäri ti tö namani mrö Pascuakrä ne kwetai munbe gwaire abko erere käi nüra mtare” (Luc. 22:15).
¿Ñobätä tö namani rabai kaibe nitre ja tötikaka kwe ben? Kukwe keteiti ütiätebätä. Kämikai “kordero Ngöbökwe [ . . . ] ni ngite kukwe kämekäme nuenbtä Ngöbö rüere diankaka nibtä” yebätä (Juan 1:29). Niara murie ketai Jerusalén, kirabe jondron nire bian nämene kukwadre Ngöböi Jerusalén ye känti Jesús murie ketai. Nitre israelita kämikaninkä Egipto ngwane obeja kwetani kwetre köböire namanintre kwäre ye kräke bäri Jesús ngwaka käkwe nitre kwati mikani kwäre (1 Cor. 5:7, 8). Jesukwe ja nire biani ye köböire, nitre 12 ye nämäne ürä kwrere konkrekasion kristiana kräke (Efes. 2:20-22). Jerusalén juta deme ye “jä näma mikani kwä jätäbti kubu gräre”, jä yebätä abokän “nitre Jesu kukwei ngwianka ni jätäbti nibu kä näma tikani” (Apoc. 21:10-14). Jän, nitre apóstol ja ngwanka metre ye rabai kukwe ütiäte nuainkäre Ngöbö töi mikakäre nemen bare. Aisete, Jesús tö namani tuai Pascua kwete mrä jabe ye nüke gare nie, ye bitikäre Däkien Jesús Mrö Biani Deu ye ükaninte kwe.
Jesukwe Pascua kwetani ngwane, nitre ja tötikaka 70 aune mada mada ye ñan nämäne. Kristokwe mröbare dere ye köböire nitre ja tötikaka jökrä käkwe ja ngwandi metre ye kräke kukwe kwin rabai bare. Däkien Jesús Mrö Biani Deu ye näire Jesukwe niebare erere nitre jökrä kristiano diainkä üai demebiti ye rabai Gobran Ngöbökwe yete (Luc. 22:29, 30).