Nitre tä kukwe ngwentari
¿“Angele dianinkä” bätä blitata 1 Timoteo 5:21 yete ye abokän nire?
Timoteo nämäne sribire ni umbrere konkrekasionte Pablo erere. Apóstol Pablo käkwe kukwe ne tikani ie: “Ngöbö btä Kristo Jesu amne angele dianinkä jakrä Ngöbökwe, ye ngwärekri ti bike kukwe ütiäte niere mae, ne erere makwe nuen” (1 Tim. 5:21). ¿“Angele dianinkä” ye abokän nire nire?
Angeletre meden abokän ñan ai yebätä ani blite käne. Gare metre nie, Pablo ñan nämäne blite nitre 144,000 yebätä. Nitre dianinkä ye jämi niken kä kwinbiti ngwane, Pablokwe kukwe ne tikani Timoteo ie. Nitre apóstol aune nitre mada dianinkä nänkäre kä kwinbiti ye ñaka nämäne kä kwinbiti, aisete “angele dianinkä” nieta ngwane ñan blitata niaratrebätä (1 Cor. 15:50-54; 1 Tes. 4:13-17; 1 Juan 3:2).
Arato nete ñan blitata angeletre käkwe ja mikani Ngöbö rüere Ñü Kri ye näire. Angeletre ye käkwe ja mikani Satanakri, angeletre ye kädekani mada chokali aune ja mikani kwetre Jesús rüere (Gén. 6:2; Luc. 8:30, 31; 2 Ped. 2:4). Ja känenkäre Jesús käkwe angeletre käme ne kitai kä timonbiti kä mil näre te. Biti angeletre käme aune Satana ye gaite jökrä kwe (Jud. 6; Apoc. 20:1-3, 10).
1 Timoteo 5:21 yete “angele dianinkä” ne kädekateta Ngöbö aune Kristo Jesús ye kädekateta ngwane arato. Yebiti tä nüke gare nie niaratre ye abokän angeletre ja ngwanka metre tä sribire gwairebe ben.
Angeletre ja ngwanka metre ye kwati krubäte (Heb. 12:22, 23). Jehová tä sribi bien nuaindre angeletre ie ngwane, jökrä tätre niken sribi ara nuainne ye kwrere ni ñan raba nütüre (Apoc. 14:17, 18). Bati, Jehovakwe ángel iti juani nitre rükä asirio 185,000 kämikakäre yebätä ni raba töbike (2 Rey. 19:35). Ne madakäre, Jesukwe kukwe niebare yebiti nüke gare nie angeletre ruäre “käkwe jondron jökrä tä ni ngwen ngoto ritekä aune nitre ja töi mikaka kukwe käme nuainne ye denkä Gobran kwe yete” (Mat. 13:39-41). Angeletre ruäre mada “käkwe nitre dianinkä Ngöbökwe” ye ükaikrö nänkäre kä kwinbiti (Mat. 24:31). Aune angeletre mada ie kukwe nuain mananta, abokän ni kriemikadre kä jökrä känti nita niken ngwane, Salmo 91:11 tä mike gare erere (Mat. 18:10; Mateo 4:11 aune Lucas 22:43 mikadre ñärärä).
“Angele dianinkä” yebätä 1 Timoteo 5:21 tä blite nibi gare nie, ye nämäne sribire konkrekasion kräke. Bersikulo tä känenkri yete, Pablo nämäne blite nitre umbre ji ngwanka konkrekasionte yebätä. Aune ja mräkätre konkrekasionte töi mikani kwe nitre umbre mike ütiäte jai. Ne madakäre, nitre umbre rabadre sribi tä kisete ye nuainne, ñan nitre kitete, kukwe ükete ja erebe ni jökrä kwe aune ñaka kukwe den nuainkäre jai jötrö ngwarbe. Üai demebiti Pablokwe mikani ñobätä nuaindre kwetre. Nitre umbre ji ngwanka konkrekasionte tä sribire ja mräkätre kräke “Ngöbö btä Kristo Jesu amne angele dianinkä jakrä Ngöbökwe” ye ngwärekri, niebare Pablokwe yebiti mikani gare. Ye abokän Ngöbö bätä Kristo Jesús aune “angele dianinkä” ye tä niaratre miketari ñärärä tätre konkrekasion ngübare ño aune tätre sribire ño yebätä. Aisete gare metre nie, angeletre ruäre kisete sribi ütiäte tä. Ñodre, nitre Ngöbö mikaka täte ye kriemike, kukwe drie ye jie ngwen aune dre tuata kwetre ye mikadre gare kwetre Jehovai (Mat. 18:10; Apoc. 14:6).