Ja ngwen metre angeletre erere

1, 2. a) ¿Drebätä ni ñan ja erebe angeletre ben? b) ¿Kukwe meden nita nuainne ja erebe angeletre ben?

KUKWE metre namani gare nie ye Jehová ara köböire, ye ngwane ni namani niara mräkätre niara mikaka täte ye ngätäite, yete nitre ja tarekä aune nitre kwati jene jene kä jökrä biti tibien tä, akwa ye ñan ngöräbe ñakare aune angeletre kwati krubäte tä arato (Dan. 7:​9, 10). Angeletrebätä nita töbike ngwane kukwe keta kabrebätä niaratre ñan ja erebe nibe ye tä nüke ni töite. Ñodre niaratre ye sribebare ni nire sribe jämi ye känenkri (Job 38:​4, 7). Niaratre bäri dite krubäte ni ngwä, deme kukwe jökrä nuainne kwin ni ñan raba ja ngwen niaratre erere jire chi, ñobätä ñan aune ni abokän ngite (Luc. 9:26).

² Ni ñan ja erebe angeletre ben yebiti ta kukwe keta kabre nita nuainne bäsi ja erebe niaratre ben. Ñodre, Jehová töi kwin ye erere ni aune angeletre raba ja ngwen, arato ni raba kukwe den nuaindre au jai, ni kä tärä, nita ja ngwen jene aune sribi jene jene nita nuainne Jehová mikabätä täte. Ne madakäre, angeletre erere, ni Ni Sribekä ye nikwe mikadre täte ye nita ribere jai (1 Ped. 1:12).

3. ¿Angeletre ja ngwanka metre yebätä dre raba nemen gare nie?

³ Nita kukwe keta kabre nuainne ja erebe angeletre ben, ye medenbätä niaratre tä kukwe kwin bämike ye tä ni dimike aune kukwe kwin keta kabre tä nemen gare nie ja töi kräke niaratrebätä. Angeletre tä ja töi mike bobre, nitre tarere, tä kä ngwen nüke jai aune tä sribire ja dibiti ne kwe konkrekasion tädre mrebe, ye erere ni raba ja ngwen ño ye rabai gare nie kukwe ja tötikara nebätä.

ANGELETRE TÖI BOBRE

4. a) ¿Angeletre tä ja töi mike bobre ye tä bämike ño? b) ¿Ñobätä angeletre tä ja töi mike bobre? (Salmo 89:7).

⁴ Angeletre ja ngwanka metre ye tä ja töi mike bobre. Niaratre töbätä, kukwe gare krubäte ietre aune dite krubäte, akwa Jehovata dre niere ietre ye erere tätre nuainne (Sal. 103:20). Jehovata sribi mike niaratre kisete ye tä nuainne kwin krubäte, niaratre ñaka bike kri aune dite krubäte ni kräke yebätä ñaka ja käikitekä. Ne madakäre tätre Jehová töi mike nemen bare kä jutobiti, niaratre kä ño ñan gare nie yebiti ta (Gén. 32:​24, 29; 2 Rey. 19:35).a Niaratre käikitadrekä ye ñaka kai ngäbiti, ñobätä ñan aune gare ietre Jehová ye aibe käikitadrekä. ¿Ñobätä angeletre tä ja töi mike bobre? Ñobätä ñan aune niaratre tä Jehová tarere aune tä mike ütiäte jai (ñäkädre Salmo 89:7 yebätä).b

5. ¿Ángel iti käkwe mäträbare Juanbätä töi bobrebiti ye bämikani ño kwe? (Üai mikadre ñärärä).

⁵ Angeletre tä ja töi mike bobre ye nemen gare nie kukwe nebiti. Kä 96 ye ngwane, ángel iti kä ñan gare nie käkwe kukwe ñan tuabare mikani tuare Juan ie (Apoc. 1:1). ¿Kukwe ñan tuabare tuani Juankwe ye käkwe töi mikani dre nuainne? Bengwairebe ja mikani ngukodokwäbiti ángel ye ngwärekri kwe mikakäre ütiäte jai. Akwa ye bätäräbe ángel käkwe niebare ie: ¡Ja ngwen mokre! “¡Ma amne ma mräkä mda mda käta nünenkä dite jabtä kukwe era metre Jesukwe btä, käta sribire Jesukrä, ye kwrere tita sribire arato, aisete makwe Ngöbö aibe mika ütiäte jae!” (Apoc. 19:10). ¡Kukwe niebare angelekwe yebiti niara töi bobre bämikani kwe! niara ñan tö namani ja käikitakamana. Juan töi mikani kwe Jehová käikitekä aune ja ñan namani ruin bäri ütiäte ie Juanbätä. Nämänena sribire kä kwatí te Jehovakrä aune niara dite krubäte, akwa töi bobrebiti niebare kwe apóstol Juan ie: “Ti abokän ni sribikä mä erere”. Juan umbre yebätä mäträbare kwe akwa ñaka ñäkäbare ja dibiti kwe ie. Blitabare kwe töi jämebiti ben. Kukwe ñan tuabare tuani Juankwe yebätä namani ngukodokwäbiti ángel ye ngwärekri ye nükani gare ángel ie.

6. ¿Angeletre tä ja töi mike bobre ye erere ni raba ja ngwen ño?

⁶ ¿Angeletre erere ja ngwan raba ño? Sribi ño mikata ni kisete ye erere nuaindre aune ñaka ja käikitadrekä, aune kukwe nuain gare nie ye kwrere nikwe ñaka ja bämikadre nitre okwäbiti (1 Cor. 4:7). Kä kwati krubäte te nita Jehová mike täte o sribi ruäre tä ni kisete yebätä ni bäri ütiäte ni madabätä ye nikwe ñaka nütüdre. Sribi bianta bäri nie ye ngwane, bäri ja töi mikadre bobre (Luc. 9:48). Angeletre tä ja ngwen ño ye erere ni tö ja ngwain, sribire ni mada kräke; aune ni abokän bäri ütiäte niaratre kräke ye kwrere ni ñaka mikadre tuin kwe jai.

7. ¿Ja töi mika raba ño bobre mäträkäre ni itibätä?

⁷ Nita mäträre ye ngwane ni raba ja töi mike bobre, ñodre nita mäträre monso nikwebätä o ni mräkätrebätä ngwane. Ruäre ngwane ni raba mäträre ja dibiti aune metre ta. Ángel iti käkwe mäträbare töi kwinbiti apóstol Juanbätä ye erere, ni raba mäträre ngwane nikwe kukwe niedre metre ta, akwa ñan ngwankäre di nekä. Ja ñan rabai ruin ütiäte nie nitre madabätä ngwane, nikwe mäträi bätä Bibliabiti töi jämebiti aune nikwe mikai tuin ütiäte jai (Col. 4:6).

ANGELETRE TÄ NITRE TARERE

8. a) ¿Angeletre tä nitre tarere ye tä bämike ño mikata gare Lucas 15:10 yete? b) ¿Nita kukwe driere ngwane angeletre raba ni dimike ño? ( mikadre ñärärä).

⁸ Dreta nemen bare nibätä yebätä angeletre töita aune ni tare kwe. Ni iti tä ja töi kwite aune tä Jehová miketa täte ye käita nemen juto krubätebätä. Ne madakäre, kukwe metre tä nemen gare ni iti ie aune kukwe blo nuain nämene kwetre ye tä tuenmetre, ta töi mike sribire Jehová kräke ye tä kä mike jutobätä (ñäkädre Lucas 15:10 yebätä). Nita kukwe driere ye ngwane angeletre tä ni dimike (Apoc. 14:6). Angeletre ye ñaka kukwe driere ngwärere nitre ie, akwa niaratre die tärä ne kwe ni jie ngwandre kwe nire tö kukwe metre mikai gare jai yekänti. Kukwe ne ngwen törö jai, angeletre ye ñan aibebiti Jehová tä ni dimike, ñakare aune üai demebiti arato. Yebätä ni ñaka raba niere metre ta, matare ángel iti niki ti ngwena ni yekänti (Hech. 16:​6, 7). Sribi keta kabre Jehová tä bien angeletre ie. Ye medenbätä nita kukwe driere ye ngwane niaratre tä juto biarebe ni dimikakäre gare nie. (Recuadro “Dre ribebare kwe orasionte ye Jehovakwe mikani nemen bare kräke” mikadre ñärärä).c

9. ¿Angeletre tä nitre tarere ye erere ni raba ja ngwen ño?

⁹ ¿Angeletrekwe nitre tare ye erere ni raba ja ngwen ño? Konkrekasionte ni iti tä kiteta Jehová kokwäre mikata gare ye ngwane, käi ngwandre juto jabätä angeletre erere. Ja mräkä ye nikwe kadre ngäbiti kä jutobiti aune tare nikwe ye nikwe bämikadre ietre (Luc. 15:​4-7; 2 Cor. 2:​6-8). Nita ja ngwen angeletre erere ye ni raba bämike nita ja di ngwen kukwe driere yebiti (Ecl. 11:6). Angeletre tä ni dimike kukwe driebätä ye erere arato, ni rabadre ja mräkätre dimike kukwe driere. Ñodre, nitre tä ja mike krire kukwe driekä yebe ni rikadre kukwe driere. Arato ja mräkätre umbre o tä bren ye dimika raba kukwe driere.

10. ¿Kukwe namani bare Sarabätä yebätä dre raba nemen gare nie?

¹⁰ Ni tö kukwe drie bäri akwa ñan nemen bare nie ngwane ¿dre nuaindre? Nikwe kukwe mada ükadrete jai kukwe driedre jankunu angeletre tä nuainne ye erere. Meri nünanka juta India kä Sarad bätä kukwe namani bare ye ani mike gare jai. Niarabiti kä nämäne 20 jire prekursora erere, akwa batibe niara namani bren aune ñan namani nuäre kräke rükakäre krö. Yebätä namani ulire krubäte, tä nemen bare ni jökräbätä ye erere. Akwa, ja mräkätre nämäne tarere aune dimike ye käkwe niara töi mikani jäme, arato nämäne ñäke Bibliabätä ye köböire bätärekä bätärekä kä namaninta jutobätä. Niara raba dre nuainne kukwe driekäre ye erere ja töi mikani kwe nuainne. Akwa ñan namani nuäre kräke täkäkäre tibien yebätä rabadre kukwe driere telefononte aibe. Aisete, niara nämäne nire tuinbiti ye ja töi mikani kwe llamare telefonbiti ye köböire nitre tuabiti nämä kwe ye nämä niere ie, nire mada tö nämäne ja tötikai Bibliabätä. ¿Ye köböire dre namani bare? Sö nikani ruäre ta ngwane ja tötika namani 70 jire Sarakwe. ¡Nitre ja tötikaka nämäni krubäte kwe yebätä ñan namani nuäre kräke tötikakäre jökrä! Aisete, nitre ja tötikaka ruäre kwe ye mikani kwe ja mräkätre mada konkrekasionte ye kisete. Nengwane nitre ja tötikaka ruäre ye tätre kwen gätäbätä.

ANGELETRE TÄ KÄ NGWEN NÜKE JAI

11. ¿Angeletre ja ngwanka metre tä kä ngwen nüke jai ye tä bämike ño?

¹¹ Kä ngwandre nüke jai ye angeletre ja ngwanka metre tä bämike kwin krubäte ni käne. Kä nikanina kwati ta nitre ja ngwanka käme aune kukwe blo nuainkä ye niaratre tä tuin. Yebätä tä kä ngwen nüke jai. Ne madakäre Satana bätä angeletre ja ngwanka käme ye nämäne Jehová mike täte akwa, ja mikani kwe Jehová rüere ye tuani angeletre ja ngwanka metre yekwe (Gén. 3:1; 6:​1, 2; Jud. 6). Ángel iti ja ngwanka metre käkwe ja tuani ángel iti ja ngwanka käme yebe ye mikata gare Bibliabätä (Dan. 10:13). Kirabe nükebe nengwane nitre braibe tä ja mike Jehovakri ye tuin angeletre ie. Akwa, yebiti ta niaratre tä sribire jankunu Jehová kräke kä jutobiti aune töi kwatibebiti. Kukwe tare tä nemen bare ye Jehovakwe diainkä kä debe näre te ye gare kwin ietre.

12. ¿Dre ni dimikai kä ngwen nüke jai?

¹² ¿Angeletre ja ngwanka metre tä kä ngwen nüke jai ye erere ni raba ja ngwen ño? Kukwe blo nuainta ye tuin nie aune ja mikata ni rüere yebe nita ja tuin, akwa kä debe näre te Jehovakwe kukwe blo ye ükaite ye ie nita tö ngwen kwatibe angeletre erere. Aisete, ni ñan rabadre dräre jire “jändrän kuin nuene ni mda mdakrä” (Gál. 6:9). Jehovakwe ni dimikai kä ngwen nüke jai ye tä käbämike nie (1 Cor. 10:13). Ni raba üai deme ribere Jehovai, abokän käkwe ni dimikadre kukwe ngübare bätärekä aune kä ngwen juto jabätä (Gál. 5:22; Col. 1:11). ¿Ja mikata mä rüere ye ngwane mäkwe dre nuaindre? Tö ngwen kwatibe Jehovabiti aune ñaka kä jürä ngwan jabätä. Jehová käre tädi mä ken aune ja di biain kwe mäi (Heb. 13:6).

ANGELETRE TÄ JA DI NGWEN KONKREKASION MIKAKÄRE MREBE

13. ¿Sribi meden ütiäte nuainta angeletrekwe kä krüte ne näire? (Mateo 13:​47-49).

¹³ Kä krüte ne näire, Jehovakwe sribi ütiäte mikani angeletre kisete (ñäkädre Mateo 13:​47-49 yebätä). Kukwe drie ye köböire nitre kwati jene jene ie kukwe metre ye tä nemen gare. Niaratre ruäre tätre kukwe metre ye kai ngäbiti aune tätre ja mike kristiano, ruäre abokän ñaka nuainne jire. “Nire ja ngwen metre aune nire ñaka ja ngwen metre” ye angeletre tä denkä jene jene. Angeletre tä ja di ngwen ne kwe konkrekasion tädre deme käre. Akwa ni iti tä kämikekä konkrekasionbätä aune ñan niena ja ükekrö ye ñan jataita konkrekasionte ye nikwe ñan nütüdre, ne madakäre kukwe ñaka konkrekasionte ye ñan ai gärätä. Kukwe jökrä yebiti ta, angeletre tä ja di ngwen krubäte ne kwe konkrekasion tädre käre deme yebrä gare nie.

14, 15. ¿Angeletre tä ja di ngwen ne kwe konkrekasion tädre käre deme ye erere ni raba nuainne ño? (Üai mikadre ñärärä).

¹⁴ ¿Angeletre tä ja di ngwen konkrekasion ngübabitikäre deme ye erere ni raba ja ngwen ño? Nikwe ja di ngwandre käre ja kete kwin Jehovabe, ja brukwä kriemikadre ne kwe nikwe ñaka kukwe blo nuaindre. Yekäre nikwe ja ketamuko kwin känändre aune kukwe raba ni töi mike kämikekä Jehovabätä ye nikwe ñaka kadre ngäbiti jire chi. Ye köböire konkrekasion tädi käre deme (Sal. 101:3). Ni raba ja mräkätre konkrekasionte ye dimike ja ngwen metre Jehovai. Ñodre, ja mräkä iti käkwe kukwe blo nuainbare gare nie ye ngwane ¿nikwe dre nuaindre? Niaratre tare nikwe ye medenbätä nikwe töi mikadre blite ni umbre ji ngwanka konkrekasionte ben. Ñan nuaindre kwe ngwane ni ara käkwe ja töi mikadre kukwe namani bare ye mike gare ni umbre ji ngwanka konkrekasionte ie. Ja mräkätre tä di ñakare ja üairebiti ye tare nikwe, ye medenbätä dimikadre jötrö ie ni tö yebätä nikwe mikai gare (Sant. 5:​14, 15).

¹⁵ Ni iti tä ja mike ngite krubäte ye ngwane kitakata kukwebätä, ye ta nemen tare krubäte nie. Ye ngwane ni ñan tärä nemen ja kete ben arato (1 Cor. 5:​9-13).e Kukwe ne nuainta konkrekasion tädre käre deme yekäre. Ni ñan tä nemen ja kete nitre kitaninkä kukwebätä yebe ye köböire niaratre dimikata aune tareta bämikata ietre. Nikwe ja töi mikai kwatibe ñaka blite ben ye raba niaratre töi mike ja töi kwite. Niaratre ja töi kwitai ngwane kä rabai juto krubäte Jehová, angeletre aune nibätä (Luc. 15:7).

16. ¿Ni raba dre nuainne ja ngwankäre angeletre erere?

¹⁶ Angeletre tä sribire ño ye Jehová tä ni tuenmetre ja kitebätä aune sribire gwaire ben ye käi juto krubäte nibätä. Angeletre tä ja töi mike bobre, nitre tarere, kä ngwen nüke jai aune tä ja di ngwen ne kwe konkrekasion tädre deme ye erere arato nikwe ja di ngwandre ja ngwen. Nikwe ja di ngwain niaratre erere ye ngwane, ni rabai Jehová mräkätre ja ngwanka metre ye ngätäite kärekäre.