Jehovata ngite kite ta nibiti: ñobätä ütiäte ni kräke

1, 2. ¿Kukwe miri gare párrafo kenabätä ye erere ben ni jökrä tä ja tuin ye ñobätä nieta?

MONSO iti rün ngwian bäkäne aune kä bäkäne krubäte. Akwa batibe niedre monso ye ie rün kwe krütani kän. Akwa ye ñan ngöräbe, rün nämäne ja ngwen käme krubäte aune rürübäin ütiä nämäne kabre krubätebiti niedre ngobo yei. Ye medenbätä, kä aune ngwian rabadre ngobo kwe yei näre resolución käbätä ye tä nete kän. Aune rürübäin ütiä aibe tä niken ngobo kisete aune niara rabadre jondron ye ütiä bien nieta ie. Akwa niara di ñan raba nüke kaibe jondron jökrä ye ütiä biankäre.

² Ye erere tä nemen bare ni jökräbätä. Ni rün kena, Adán bätä Eva nämäne ja ngwen metre, niaratrebätä ngite ñan nämäne jire chi, nämäne nüne jardín Edén yete ngwane (Gén. 1:27; 2:​7-9). Niaratre rabadre nüne kä jutobiti kärekäre. Akwa ye erere ñan namani bare. Niaratre nämene nüne kä bä nuäre te ye nianinte jökrä kän. Aisete, ¿dre mikaninte kwetre monsotre kwe ye kräke? Biblia tä kukwe ne mike gare: “Kena ni itibe kädian nämane Adán abko käkwe ja mikani ngite Ngöbö rüere angwane, kukwe käme Ngöbö rüere nükani kä nebtä amne kukwe käme köböite ni jökrä nikani krüte, ñobtä ñan angwane ni jökrä käkwe ja mikani ngite Ngöbö rüere” (Rom. 5:12). Herencia mikaninte Adankwe nie ye abokän ngite, ye meden köböite nita krüte. Nita ngite ye abokän, ni ñaka iti jire raba ja ütiä bien (Sal. 49:8).

3. ¿Ni ngite ye ñobätä ketata jondron ütiä tä niken nibiti ye kwrerebätä?

³ Ni ngite ye abokän Jesukwe ketani “jondron ütiä tä niken nibiti” yebätä (Mat. 6:12; Luc. 11:4). Nita ja mike ngite ye ngwane, jondron ütiä tä niken nibiti ye kwrere nita nemen Jehová okwäkänti. Niarakwe ñaka kukwe nuaindre jire chi kukwe ye ükatekäre nibe akräke, ni krütadre ye aibebiti ni rabadre ja ütiä bien (Rom. 6:​7, 23).

4. a) Ni ñan dimikadre akräke, ¿ni tädre ño jakän? (Salmo 49:​7-9). b) ¿Ngite nieta Bibliakwe ngwane, dre gärätä kwe? (Recuadro kädekata “Ngite” ye mikadre ñärärä).

⁴ Kukwe kwin nämäne Adankwe bätä Evakwe ye ni ñan jire iti raba kökatarita (ñäkädre Salmo 49:​7-9 yebätä).a Ñan ni dimikadre akräke jondron nire tä krüte aune tödekara ñan kwetre ye erere rabadre bare nibätä, ni gaikröta yebiti ni ñan tädre tö ngwen (Ecl. 3:19; 2 Ped. 2:12).

5. ¿Ni ngite ye ütiä biankäre Jehovakwe dre nuainbare? (Üai kena).

⁵ Kukwe bämiri párrafo 1 yebätä töbike. Ni iti kän, kä aune ngwian riadrete ngwane, ni iti töi mantiame käkwe ja töi mikadre kä kwe, ngwian aune jondron nianinte kän ye bienta ie yebätä ni yekwe debe biandre aune kä rabadre jutobätä. Ye erere arato Jehová, tä ni tarere krubäte ye medenbätä Adán ja mikani ngite ngie nikani biti, ye Jehovakwe ja töi mikani ütiä bienta nikrä. Jesukwe kukwe ye mikani gare krörö: “Ngöbö ara käkwe ni jökrä tarebare kri krübäte, käkwe ja Odei itibe biani müre ketadre, ni jökrä käkwe tödekadre Ngöbö Odei yebti angwane, ñan rabadre ganinte kärekäre Ngöbö okwä bäre mento abkokäre” (Juan 3:16). Ye ara köböire ni raba ja kete kwin Jehovabe.

6. ¿Kukwe meden mikata gare Bibliabätä abokän nikwe mikai gare jai aune ñobätä?

⁶ ¿Dre nuaindre ne kwe Ngöbökwe ngite kitadreta nibiti? Kukwe ngwantarita ne mikakäre gare jai, kukwe kädekata Bibliabätä ne ani mike gare jai: kukwe nuainta ja ketakäre kwin Ngöböbe, jondron bian nämäne ngite ütiäre, ngite kitata ta nibiti, ni kökanintari, ni mikani kwäre aune ni mikata tuin jai ni ja ngwanka metre erere. Nita töbiketari kukwe nebätä ngwane, nita debe bien bäri krubäte Jehovai, kukwe ükaninte kwe ngite kitakäre ta nibiti yebätä.

ÑOKÄRE KUKWE NUAINBARE: JA KETAKÄRETA BEN

7. a) ¿Dre mada nianinte Adán bätä Evakän? b) ¿Nita dre ribere jai? (Romanos 5:​10, 11).

⁷ Adán bätä Eva jämi ja mike ngite ye ngwane nämä Jehová mräkä ye ngätäite, akwa ja mikani ngite kwetre Jehová rüere ye ngwane, niaratre juanintari mento, nämäne ja kete Jehovabe ye nianinte kän aune nüna kärekäre ye nianinte kän arato (Luc. 3:38). Kukwe jökrä ye namani bare ngäbäkre jämi nemen kwetre ye känenkri (Gén. 3:​23, 24; 4:1). Ye medenbätä, ni niara monsoi jökrä ne rabadre kukwe nuainne ja ketakäreta Jehovabe (ñäkädre Romanos 5:​10, 11 yebätä). Kukwe nebiti nüke gare nie ja ketadreta Jehovabe ye ütiäte krubäte. Tärä keteiti kukwe känänkäre yete ja ketadre Jehovabe bätä blitata ngwane, tä kukwe griegore kädekete. Kukwe griegore nieta ye tä nüke gare ne kwrere, “ni iti tä ja mike ni rüere akwa biti tä nementa ja ketamuko nikwe”. Kukwe ütiäte krubäte tuin nete nie ye abokän Jehová ara käkwe käne ja töi mikani kukwe ükete ne kwe ni rabadre ja keteta ben. Akwa ye rabadre bare yekäre ¿dre nuainbare kwe?

KUKWE ÜKANINTE ÑO: JONDRON BIAN NÄMÄNE NGITE JAKWE YE ÜTIÄRE

8. a) ¿Jehovakwe kukwe ükaninte ño ngite kitakäre ta?

⁸ Jondron bianta ngite jakwe ütiäre ye köböire ni ngite akwa ni rabadreta ja keteta kwin Jehovabe, kukwe ye Jehovakwe ükaninte, ye abokän jondron nämäne nete nikän ye näre ütiä bian nämäne ne kwe rabadreta nikwe yekäre. Ngöbö kukwei tikani kukwe griegorebiti yete kukwe ye arabebätä blitata arato (Rom. 3:​25, nota). Jondron bian nämäne ngite jakwe ütiäre ye köböire ja keta nämänenta kwin aune jäme Ngöböbe.

9. ¿Jehovakwe dre ükaninte ken nitre israelita ben ngite juankäre tabiti?

⁹ Nitre israelita ye näire, Jehovakwe kukwe ükaninte jene ngite kitakäre ta niaratrebiti rabadreta ja kete kwin ben yekäre. Akwa jondron nire bian nämäne ngite ütiäre ye nuain nämäne batibe kä kwatire kwatire, akwa nitre sacerdote bäri kri ye aibe nämäne jondron nire bian nämäne ye kukwe nitre israelita ye kräke. Bäkänä jondron bian nämäne ye ñan nämäne ngite nitre israelitakwe jökrä ye kite tabiti, ñobätä ñan aune ni nire ye bäri ütiäte jondron nire kräke ye medenbätä jondron nire bian nämäne ye ñan nämäne ngite nikwe ye ütiä bian täte. Nitre israelita nämäne ja töi kwite aune Jehová nämäne jondron ribere ie ye nämäne juto biare biankäre ngwane, Jehová nämäne ngite kite ta bititre (Heb. 10:​1-4). Köbö ngite ütiä biankäre te nitre israelita nämäne ngite ütiä bien aune köbö mada näire, yebiti niaratre töi ngite nämäne ngwenta törö ietre. Ne madakäre, kukwe ükadrete kwin kräketre aune kärekäre ye ribe nämäne.

10. ¿Jehovakwe kukwe ükaninte ño ngite kitakäre batibe ta nibiti?

¹⁰ ¿Jehovakwe kukwe ükaninte ño ngite kitakäre batibe ta nibiti? Ngobo tare kwe juani kwe ja nire bien “müre ketadre batibe ni kwati ngite ye ütiäre” (Heb. 9:28). Jesús ja biani “müre ketadre ni kwati kökatarikäre” (Mat. 20:28). ¿Ni kökanintari ye dre gärätä?

DRE BIANI JEHOVAKWE: NI KÖKANINTARI

11. a) ¿Ni kökanintari ye abokän dre gärätä Bibliakwe? b) ¿Kukwe meden ketamä ribe nämäne?

¹¹ Adán bätä Eva yekän ja nire metre aune nüna kärekäre nianinte ye ngwandre törö jai aune ni kökatarikäre jondron nianinte nikän ye ütiä biandre näre jato ja ketakäreta kwin Jehovabe ye mikata gare Bibliakwe. Ye erere rabadre bare aibe ngwane, ja nire nianinte nikän ye rabadrete nikwe ye ngibiata Jehovakwe. Aisete ja nire nianinte nikän ütiä nuäi ye erere biandreta (1 Tim. 2:6). Kukwe ketamä ne ribe nämäne ni itibätä ne kwe rabadre ni kökötari: töi tädre metre, ja nire käre tädre kwe aune tädre juto biare ja nire biankäre ni ütiäre. Ye aibe köböire ja nire käre rabadreta nikwe aune ngite ye diandrekä nibätä.

12. ¿Ñobätä Jesús aibe raba ngite ye ütiä bien?

¹² Kukwe ketamäbätä, Jesús raba ni ütiä bien ye abokän ne ani mike ñärärä: kena, niara töi nämäne metre, “ñan ja mikani ngite kwe”, ketebu raba nüne kärekäre kä tibienbätä aune ketamä nämäne juto biare ja nire kwe ye biankäre ni ütiäre (1 Ped. 2:22; Heb. 10:​9, 10). Adán töi nämäne metre jämi ja mike ngite ye känenkri, ye erere Jesús töi nämäne metre arato (1 Cor. 15:45). Aisete, Adankwe ja mikani ngite aune ja nire nianinte kän ye Jesukwe ja nire biani köböire dianka raba ta nibiti (Rom. 5:19). Ye medenbätä, Jesús ye abokän “Adán mrä” nieta. Jesukwe ngite ütiä biani “batibe amne ütiäte kärekäre” ye medenbätä ni kökadretari ye ribe ñan niena (Heb. 7:27; 10:12).

13. ¿Jondron bian nämäne aune ni kökanintari ye ñobätä ñaka ja erebe?

¹³ Jondron bian nämäne aune ni kökanintari ¿ye ñobätä ñaka ja erebe? Käne, jondron bian nämäne ngite ütiäre ye abokän bian nämäne ne kwe ni rabadreta ja keteta kwin Ngöböbe. Aune ni kökanintari, ye abokän ngite nikwe ütiä biani Jesukwe. Ye abokän Jesús därie ütiäte ye ianinte kwe ni jökrä ütiäre (Efes. 1:7; Heb. 9:14).

DRETA NIKWE: NI RABA NEMEN KWÄRE AUNE JA NGWENTA METRE NGÖBÖ OKWÄKÄNTI

14. ¿Dre mikai gare jai kukwe ja tötikara nebätä aune ñobätä?

¹⁴ ¿Ngite nikwe ütiä biani ye köböire dre kwin tä nemen nikwe? kukwe yebätä kukwe keta kabre mikata gare Bibliabätä. Akwa kukwe kädekateta ye ngwane, kukwe jene jene nuain nämäne ye mikata gare abokän Jehová nämäne ribere nitre ie ngite kitakäre ta biti. Kukwe ruäre mikata gare yebätä ani ja kite mada. Aune ye köböire Jehovata ngite kite ta nibiti ye ñobätä ütiäte krubäte ye rükai gare nie.

15, 16. a) ¿Ni mikani kwäre bätä Biblia tä blite ye ngwane dre gärätä metrere kwe? b) ¿Ni raba nemen kwäre ngite aune gata yebätä tä nemen gare nie ye ngwane jata nemen ruin ño nie?

¹⁵ Ni mikani kwäre blitata Bibliakwe ngwane, tä blite ni nämäne ngite ye ngie ñan niena nibiti yebätä. Apóstol Pedrokwe mikani gare ne kwrere: “Mun mräkä kirakira nämane nüne ngwarbe amne kukwe ütiäte ñakare, btä nämane ja kite, ye kwrere mun jatani nüne siba niaratre täbti, akwa Ngöbökwe mun kökanintarita jakrä. Mun kökanintarita kwe, ye abko ñan oro amne ngwianbti mun kökanintarita kwe. Oro amne ngwian ye abko tä niken ngwarbe. Akwa kordero kuin deme, bren ñakare bian nämane Ngöböye ja ngite ütiäre, ye kwrere Kristo käkwe ja biani müre ketadre abko däriebti Ngöbökwe mun kökanintarita, ye nena gare kuin munye” (1 Ped. 1:​18, 19; nota).

¹⁶ Ni kökanintari ye köböire ni raba nemen kwäre ngite aune gata tä ni ngwen ja tare nike krubäte yebätä (Rom. 5:21). Jehová bätä Jesús ie nita debe bien krubäte, ñobätä ñan aune Jesús ja därie ianinte ni kökatarikäre (1 Cor. 15:22).

17, 18. a) ¿Ni ja ngwanka metre ye abokän ño? b) ¿Ni mikata tuin jai ni ja ngwanka metre erere ye ñobätä kwin ni kräke?

¹⁷ Ni mikata tuin jai ni ja ngwanka metre erere ye abokän ja mikata ngite o kukwe ruäre nuainta ye käikwitakata jökrä jabiti. Akwa ye ñan aibätä ni raba niere kukwe nuainta Jehovakwe o kukwe ükateta kwe ye niara arabe ñan tä mike täte. Nita kukwe nuainne ye ñan aibätä Jehovata ni mike tuin jai ja ngwanka metre erere o ngite kite ta nibiti, ñakare aune jondron bian nämäne ngite kitakakäre ta aune ni kökanintari ie nita tö ngwen ye köböire niarata ngite kite ta nibiti (Rom. 3:24; Gál. 2:16).

¹⁸ ¿Ni mikata tuin jai ni ja ngwanka metre erere ye ñobätä kwin ni kräke? Nitre kristiano ruäre dianinkä nänkäre kä kwinbätä gobrankäre Jesube, ye tä nemen Ngöbö monsoi erere (Tito 3:7; 1 Juan 3:1). Niaratre ja mikani ngite ye kitani ta bititre aune mikani tuin jai ñan ja mikabare ngite jire kwetre ye kwrere. Aisete raba gobrane Gobran Ngöbökwe yete siba (Rom. 8:​1, 2, 30). Ye erere arato, ja mräkätre kristiano mada yebiti ngite kitani ta, tä ja kete Ngöböbe aune tä tö ngwen nüna kärekäre kä tibienbätä yei (Sant. 2:​21-23). Nitre kwati rabaite nire rü Armagedón ye bitikäre, yekwe nünandi kärekäre, ñaka krütai jire chi (Juan 11:26). Nitre “ja ngwanka metre” aune nitre “ie Ngöbö ñan namani gare” krütani ye gaikröta (Hech. 24:15; Juan 5:​28, 29). Kä näin ta ngwane, ni Jehová mikaka täte metre täi nüne kä tibienbätä ye rabai kwäre ngite yebätä aune ja ketai kwin krubäte kwe Ngöböbe (Rom. 8:21). Nibi gare nie erere, Jehovakwe kukwe ükaninte ngite kitakäre ta nibiti ye köböire ni raba nemen ja keteta kwin krubäte ben. ¡Kukwe ye bä nuäre krubäte!

19. ¿Jehová aune Jesús käkwe kukwe ükaninte ye köböire dre raba nemen nikwe? (Recuadro “Jehovata ngite kite ta nibiti” ye mikadre ñärärä).

¹⁹ Monso bati kän kä nianinte aune ngite rünkwe ütiä nikani biti aune ñan namani ütiä bian bare jire chi ie ye erere tä nemen bare nibätä. Akwa Jehovakwe ni dimikani kukwe ükaninte kwe ngite kitakäre ta nibiti, ni kökanintari kwe yebiti. Nita tödeke Jesubiti köböire nita nemen kwäre ngite aune gata yebätä. Ngite nikwe ye Jehovata kite ta nibiti aune tä käi kwitekä jabiti. Kukwe bäri ütiäte ye abokän nita nemen ja kete kwin krubäte ni Rün Jehová yebe.

20. ¿Drebätä nikwe ja tötikai kukwe ja tötikara mada yebätä?

²⁰ Jehová aune Jesús kukwe nuainbare ni kräke yebätä nita töbiketari ngwane, tä nemen ütiäte ni kräke aune nita debe bien ie (2 Cor. 5:15). Jehovakwe ñan ni dimikadre akräke tödekara ñan tädre jire chi nikwe. Kukwe ja tötikara ja känenkäre yete kukwe ruäre bämikata Bibliabätä yebätä ni ja tötikai, köböire rükai gare nie Jehovata ngite kite ta nibiti ye dre gärätä metrere.