Ni raba nemen ño ja ketamuko kwin

¿KUKWE ñan nuäre ben mäkwe ja tuani ye ngwane mä dimika ñaka nämäne jire namani ruin mäi? Metrere nita nüne kä mrä näire aune kukwe tare tare krubäte näire ye köböire ja raba nemen ruin kaibe aune ulire nie. Akwa kukwe tare tä nakainkä yebe nikwe ñaka ja tuadre kaibe (2 Tim. 3:1). Kukwe tare tä nakainkä ngwane ja ketamuko kwin raba ni dimike ye Biblia tä mike gare (Prov. 17:17).

JA KETAMUKO ERAMETRE NIKWE YE RABA NI DIMIKE ÑO

Ja ketamuko kwin nämäne Pablokwe ye käkwe niara dimikani kukwe jene jenebätä, nämäne niken juta jene jene känti ye ngwane (Col. 4:​7-11). Pablo nämäne ngite Roma ye ngwane ja ketamukotre kwe ye käkwe dimikani kukwe ruäre ñaka nämäne nemen nuäre kräke nuain käre yebätä. Ñodre, ja mräkätre Filipos käkwe jondron juani Pablo kräke ye Epafrodito nikani ngwena ie (Filip. 4:18). Pablo käkwe tärä tikabare konkrekasion jene jene kräke ye Tíquico käkwe döräibare (Col. 4:7).a Ja ketamuko kwin Pablokwe ye köböire Pablo käkwe kukwe kwin ye driebare nämäne ngite gwi aune biti jä nikani ngite nitre kani ngite ye käi känti ngwane. ¿Ni abokän raba nemen ño ja ketamuko kwin?

Ja ketadre ni madakwe ye kwin aune ütiäte ye ja mräkätre ruäre käkwe bämikanina kukwe nuainbare kwe yebätä. Ñodre, ani töbike Elísabet yebätä. Niara ye prekursora kä España känti. Niara meye yebätä cáncer nämäne aune kä namanina braibe käne ye mikani gare ie. Ye ngwane meri testiko iti ye ja ketamuko kwin Elísabet kwe ye bämikani kwe. Ñobätä ñan aune bä kabre texto bä nuäre nämäne tike ie. Elísabet tä niere: “Kukwe bä nuäre tika nämäne kwe tie ye nämä ti dimike krubäte ja ngwankäre dite köbö kwatire kwatire aune ti ñaka nämä kaibe ye rükaba gare tie” (Prov. 18:24).

Ja mräkätre dimikai kukwe ja üaire yebätä ngwane ni raba nemen ja kete kwin. Ni raba ja töi mike ja mräkätre umbre ye ngwen gätäbätä aune kukwe drie yekänti. Ye köböire ja dimikai kwärikwäri ja üairebiti (Rom. 1:12). Akwa ja mräkätre ruäre ñaka raba dikekä mende. ¿Ye ngwane ni raba nemen ño ja ketamuko kwin kwetre?

JA MRÄKÄTRE KRÄKE ÑAN NUÄRE DIKAKAKÄRE MENDE YEBEN NI RABA NEMEN ÑO JA KETAMUKO KWIN

Ja mräkätre ruäre kräke ñan tä nemen nuäre rikakäre gätäbätä tä bren yebätä o kukwe mada keta kabre yebätä. Ye erere namani bare Davidbätä. Niara yebätä bren tare cáncer kädekata linfoma ye kwani aisete kräkä quimioterapia ye mikani ie sö krä ti jire. Köbö ye näire niara aune muko kwe Lidia ye nämäne niken gätäbätä Zoombiti.

¿Ja mräkätre konkrekasionte käkwe niaratre dimikani ño? Ja mräkätre nämäne niken gätäbätä ye nämäne kä denkä jai blitakäre bentre gätä nämäne krüte ye bitikäre Zoom yebiti. Ne madakäre Lidia aune David nämäne blite gätäte ye ngwane ja mräkätre nämäne kukwe kwin niere ie. ¿Ye köböire dre namani bare? David aune Lidia ye ie ja namani ruin kwin ja ketamukotre kwe nämäne tarere yebätä.

Ja mräkätre kräke ñan tä nemen nuäre dikakakäre mentokwäre kukwe driere o rikakäre gätäbätä yebe ni raba kukwe ükete jai. Ñodre, ni raba kä denkä chi jai ja mräkätre ye kräke ne kwe ni ñaka niara käi kwitekä jabiti ye bämikadre ietre (Prov. 3:27). Ni raba kukwe driere bentre teléfono yebiti o carta yebiti. Ne madakäre nitre umbre konkrekasion jie ngwanka ye raba kukwe ükete ne kwe ja mräkätre yekwe ja conectadre Zoombiti gätä nuainta kukwe driekäre ngwane. Kukwe ye erere namani bare David aune Lidia bätä yebätä debe biani krubäte kwe. Niara tä niere: “Nun nämä jerekäbe ja conectare Zoom yebiti, nun nämä blite chi texto ruärebätä o ti nämä orasion nuainne kukwe drie kömikakäre ye ngwane ja nämä nementa ruin dite nunye”. Ja tötikaka tärä nikwe ngwane, ¿ñobätä ni ñan ja töi mike niken ngwane ja mräkä ye gwirete tötikakäre? Metrere nikwe ja töi mikai ye nuainne ngwane käre ja ngübadrebiti kukwe tare yebätä.

Kä diankata jai ja mräkätre ñaka raba niken dikekä kwäräkwärä ye kräke. Ye ngwane töi kwin keta kabre kwetre ye raba nemen kite tuinbätä nie aune ye köböire nita ja kete ben ye rabai bäri dite. Ñodre, tädre kukwe driere ño nitre ie kukwe metre ye rabadre brukwäte ye tä tuin nie ngwane ni töita nemen niaratre mikabätä gare bäri kwin jai. Ja mräkätre dimikata ne erere ye köböire ja ketamuko kwin raba kwen kabre nie (2 Cor. 6:13).

Tito nämäne Pablo ken yekwe niara töi mikani jäme (2 Cor. 7:​5-7). Kukwe nebiti nemen gare nie nikwe ja mräkätre dimikai kukwebiti ye ñan ngöräbe, ñakare aune ni tädi ken aune nikwe kukwe nuaindi kräke käkwe niaratre dimikai aune töi mikai jäme (1 Juan 3:18).

KUKWE TARE NÄIRE NI RABA NEMEN JA KETAMUKO KWIN

Ja ngwaitre aune ja etebatre Rusia ye tä ja di mike kwärikwäri yebiti tätre kukwe kwin bämike. Serguéi aune muko kwe Tatiana, yebätä ani blite. Niaratre ye gwirete policía nükani aune ni ye nikani kä gite burere gwita tibien. Ye bitikäre jä nikani kwetre kukwe ngwantarikäre ietre. Käne Tatiana ye mikaninta kwäre. Niara ye nükaninta gwi ngwane dre namani bare ye tä mike gare. Serguéi tä niere: “Krire Tatiana nükaninta gwi ye ngwane meri testiko iti kä jürä ñakabätä nükani känti. Biti ja mräkätre mada kwatí jatani gwirete niara dimikakäre jondron üketeta gwita”.

Niara tä niere mada: “‘Ja ketamuko erametre ye tätre ja tarere kä jökrä ngwane aune kukwe tare tä nakainkä ngwane tätre nemen ja eteba ye erere’ nieta Proverbios 17:17 ye tuin kwin krubäte tie. Kukwe tare ben tita ja tuin nengwane yebätä bärira jire texto tä kukwe niere ne tuin metre ta tie. Ja ketamuko kwin ñan kä jürä ngwen jabätä aune tätre käre tibe, ye köböire tita ja tuin kukwe tare ye ben. Niaratre ye ñaka tätre akräke ñan rabadre nuäre ti kräke ja tuakäre kukwe tare yebe. Jehovakwe ja ketamuko kwin ye biani tie.”b

Ñan nuäre nünankäre kukwe tare ne näire ye medenbätä ja ketamuko kwin käkwe ni dimikadre ye ribeta jai. Ja tare nikadi kri ye näire bärira jire nikwe ja ketamuko kwin ye ribedi. Ye medenbätä nengwane dre nuain raba nikwe rabakäre ja ketamuko kwin ye erere nikwe nuaindre (1 Ped. 4:​7, 8).