Nire mika tö täte munkwe ye mike täte

1. ¿Kä juto tädre nikwe yekäre dre nuaindre? (Isaías 48:​17, 18).

NI RÜN kä kwinbiti yekwe ni tare krubäte aune tö ni tuai nüne kä jutobiti nengwane aune ja känenkäre (Ecl. 3:​12, 13). Ni sribebare kwe nekwe ni rabadre kukwe keta kabre nuainne. Nikwe ja jie ngwandre akwle bätä dre kwin aune dre käme ye nikwe diandre nuaindre jai ye ñan biani kwe nie (Ecl. 8:9; Jer. 10:23). Aune gare ie kä juto erametre rabai nikwe yekäre nikwe sribidre kräke aune mikadre täte (ñäkädre Isaías 48:​17, 18 yebätä).a

2. ¿Nikwe dre nütüdre ie Satana tö akwa Jehová tä kukwe metre meden mike gare bätä?

² Jehovakwe ni jie ngwandre ye ni ñaka tä ribere ñakare aune ni raba ja jie ngwen kaibe aune nüne kä jutobiti ye Satana tö ni mikai nütüre (Gén. 3:​4, 5). Kukwe ngwarbe niebare Satanakwe ye rabadre gare nie yekäre Jehovakwe nitre kä tibienbätä tuanimetre ja gobraine kä braibe te. Aune nitre tä ja gobraine kä tibienbätä ye köböire kukwe ñaka kwin tä nemen bare ye tuin nie. Nitre brare aune merire käkwe Jehová mikani täte ye köböire nünanbare kä jutobiti kwe ye kädekateta Bibliabätä. Akwa ni iti käkwe nünanbare bäri kä jutobiti ye abokän Jesukristo. Kena, ñobätä Jesukwe Jehová mikani täte ye rabai gare nie. Biti, Jehová mikadre ütiäte jai ye ñobätä tä ribere, rabai gare nie. Aune mrä, ñobätä nikwe ja töi mikani Jehová mike täte ye ruäre ngwainta törö jai.

ÑOBÄTÄ JESUKWE JA TÖI MIKANI JEHOVÁ MIKE TÄTE

3. ¿Dre driebare Satanakwe Jesús ie aune Jesukwe kukwe meden diani nuaindre jai?

³ Jesús nämäne kä tibienbätä ngwane, nire mikadre ütiäte kwe ye niara diani nuaindre jai. Jesús ja ngökani ñöte ye bitikäre Satana kä tibien ne driebare ie gobrainkäre akwa ye ütiäre niara mikadre ngöböre jai ribebare kwe. Akwa, Jesukwe niebare ie: “¡Nän mento Satana!, ñobätä ñan aune tä tikani: ‘Jehová Ngöbö mäkwe ye mäkwe mika täte aune niara aibe kräke mäkwe sribi’” (Mat. 4:​8-10). ¿Ñobätä Jesukwe ja töi mikani kore? Ye ani mike gare ruäre jai.

4, 5. ¿Ñobätä Jesukwe ja töi mikani Jehová mike täte käne?

⁴ Kukwe keteiti bäri ütiäte käkwe Jesús töi mikani sribire Jehová kräke ye abokän Jehová tare brukwä tätebiti kwe aune ñan jondron täri (Juan 14:31). Sribidre Jehová kräke ye abokän bäri ütiäte ye nämä gare Jesús ie (Juan 8:​28, 29; Apoc. 4:11). Jehová ja nire bianka nie, mantiame aune ni raba tö ngwen ie ye nämä gare Jesús ie (Sal. 33:4; 36:9; Sant. 1:17). Jehová käkwe kukwe jökrä metre niebare Jesús ie, aune jondron nämäne Jesukwe ye abokän Rünkwe biani ie (Juan 1:14). Kwäräkri abokän Satana jatani gata ye ngwena ni jökrä kräke niara ni ngökö aune tö jondron ie jabe kräke (Juan 8:44). Jesús ie Jehová aune Satana gare kwin, yebätä ñaka ja töi mikaba kwe jire ja ngwen Satana erere aune ja mike Jehová rüere (Filip. 2:​5-8).

⁵ Kukwe mada ütiätebätä Jesukwe ja töi mikani sribire Jehová kräke ye abokän ja ngwain metre kwe ye köböire jondron kwin rabai bare ja känenkäre ye nämä törö ie (Heb. 12:2). Jesús ja ngwain metre ye köböire Rün kwe ye kä mikai deme kwe aune ja tare nikata Satana köböite ye mikai krüte ye nämä gare ie.

ÑOBÄTÄ NIKWE JEHOVÁ MIKADRE TÄTE YE RIBETA KWE

6, 7. ¿Ñobätä nitre kwatí ñaka Jehová mike täte? ¿Jehová aibe mikadre täte ye ñobätä tä ribere?

⁶ Kä nengwane, nitre kwatí ñaka Jehová mike täte ñan ñobätä aune niara ñaka gare ietre. Ne madakäre kukwe kwinkwin Jehovabätä aune jondron kwin nuainta kwe niaratre kräke yebätä jämintre ja kite. Nitre ye erere ie apóstol Pablo käkwe kukwe drieba kä Atenas yekänti (Hech. 17:​19, 20, 30, 34).

⁷ Pablo käkwe mikaba gare ietre Ngöbö metre ye abokän “käta kä bien nünankrä nie amne tä müre bien nie amne jändrän jökrä mda mda bianta kwe nie”. Arato niebare kwe ietre “Ngöbö köböire nita nüne amne niara arabe köböire nita dikekä kwäräkwärä”. Kukwe ne mikaba gare kwe arato “ni dätebare itibe kwe, ye mdenkri abko ni nena keta kabre kä nebtä”. Niara abokän ni Dätekä yebätä niara aibe mikadre täte (Hech. 17:​25, 26, 28).

8. ¿Dre nuain ñan raba jire Jehovakwe?

⁸ Jehová ni Dätekä törbadre ngwane, raba ja dibiti ni mike ja mike täte. ¡Akwa ñaka ye nuainne gare nie! Bäri kwin niara tö ni kwatí tuai ja kete ben kärekäre (1 Tim. 2:​3, 4). Kukwe keta kabre mikaninte kwe yebiti niara tärä aune ni tare kwe raba nemen gare nie. Jehová jondron kwin nuaindi ni kä tibienbätä kräke aune rabai bare ño ie yebätä tä ni kite ne kwe nikwe driedre ni madai (Mat. 10:​11-13; 28:​19, 20). Yebätä tä konkrekasion bien nie ja mikara täte aune nitre umbre kwe ni tare ye tä juto ni dimikakäre (Hech. 20:28).

9. ¿Jehovata ja tare ye bämike ño?

⁹ Nitre ñaka Jehová mike era jai yebiti ta tä ja tare bämike ie. Kä nikanina kabre ta, nitre kwatí tä kukwe den akwle nünankäre jai. Akwa, yebiti ta, Jehová töi kwin yebätä tä jondron bien ie nünankäre aune kä ngwankäre juto jabätä (Mat. 5:​44, 45; Hech. 14:​16, 17). Niara ye köböire, ni raba nüne keteitibe, ni raba monso ngübare, ja ketamuko kwin raba nemen nikwe aune sribita ja dibiti ye köböire kukwe kwin tä nemen nikwe (Sal. 127:3; Ecl. 2:24). Erametre: ni jökrä tare Jehovakwe (Éx. 34:6). Kukwe meden meden köböire nikwe ja töi mikani sribire Jehová kräke aune kukwe meden kwin tä mike nemen bare ni kräke ye ani mike ñärärä.

ÑOBÄTÄ NIKWE JA DIANINKÄ SRIBIKRÄ JEHOVÁ KRÄKE

10. a) ¿Kukwe meden ütiätebätä nita ja töi mike sribire Jehová kräke? (Mateo 22:37). b) ¿Jehová tä juto biare ngite juankäre ta nibiti ye käkwe mä dimikanina ño? (Salmo 103:​13, 14).

¹⁰ Jesús ye erere, kukwe ütiätebätä nikwe ja töi mikani sribire Jehová kräke ye abokän niara tare nikwe brukwä tätebiti yebätä (ñäkädre Mateo 22:37 yebätä). Jehovata nemen gare nie aune töi kwin yebätä ni töta nemen rökrai bäri kokwäre. Ñodre tä juto biare ngite juankäre ta nibiti. Nitre israelita ñan nämäne niara mike täte ye ngwane, nämäne kukwe ne niere ietre: “Tita ribere muin, munkwe ji blo munkwe ye tuainmetre aune näinta ja jiebiti” (Jer. 18:11). Jehovakwe ni sribebare dobrobiti ye törö ie (ñäkädre Salmo 103:​13, 14 yebätä).b Jehová tä juto biare ngite juankäre ta mäbiti yebätä mä tä töbiketari ngwane, ¿ye ñan tä mä töi mike sribikäre kärekäre niara kräke?

11. ¿Kukwe meden meden ütiätebätä nikwe ja töi mikani sribire Jehová kräke?

¹¹ Kukwe mada tä ni töi mike sribire Jehová kräke ye abokän niara tä dre ribere nie ye kwin ni kräke yebätä (Mat. 4:10). Nita ja ngwen metre Jehovai ngwane kukwe keta kabre kwin raba nemen bare. Ñodre nita Jehová kä mike deme aune kä mike juto brukwäbätä yebiti Satana ye abokän ni ngökö nita mike gare. Nengwane nikwe sribidi Jehová kräke ngwane, ja känenkäre nikwe sribidi kärekäre kräke yei nikwe tö ngwandi (Juan 17:3).

12, 13. ¿Kukwe namani bare Jane aune Pambätä ye tä dre driere ja töi kräke nie?

¹² Nita monsore ngwane, ni raba nüke Jehová tarere krubäte, kä raba niken kwatí ta akwa Jehová tare nikwe ye ñaka raba nekä jire chi. Yebätä ani mike ñärärä ja mräkä nibu nebätä. Jane biti kä nämä 11 aune Pamc kä nämä 10 ye ngwane, ja tötika Bibliabätä ye kömikaba kwetre akwa rün aune meye kwe ñaka ja tötika ka ngäbitiba. Akwa, niaratre rabadre ja tötike jankunu ye ganainkäre, rabadre niken iglesia rünkwe yete, ye rünkwe ribebare ietre. Jane tä niere: “Nitre Testiko Jehovakwe käkwe kukwe Bibliabätä driebare tie ye käkwe ti dimikani ja tuin kwelate kukwe ruäre ben, ñaka droga duin aune ñan ja mike gure ngwarbe”.

¹³ Meritre nibu ne nämäne bati ngwane kukwe drie kömikani kwetre. Ye bitikäre, ja mikani prekursora kwetre aune nämäne rün kwetre namanina umbre ye ngübare. Kukwe kwin namanina bare Jane kräke. Niara tä niere: “Erametre Jehová ñaka tä ja ketamuko kwe ye tuenmetre kaibe 2 Timoteo 2:19 tä niere ‘Ni jen Ngöbökwe ye gare Ngöböye’”. Erametre, nire tä ja töi mike Jehová mike täte aune sribire kräke ye niara tä ngübare.

14. ¿Ño ni raba Jehová kä mike deme bätä ja mike niarakri? (Üai mike ñärärä).

¹⁴ Ni tö Jehová kä mikai deme kärekäre. Kukwe ne bämike ja töite. Ja ketamuko tärä iti mäkwe abokän ni kai ngäbiti kwin, mantiame aune tä mä töi mike nüke gare jai. Akwa, niara ye abokän blo aune ni ngökö niedre bätä ngwane, ¿Mäkwe dre nuaindre? ¿Mäkwe blitai niara ye kräke ñan ererea? Ye erere arato, nire tä kukwe ngwarbe niere Jehovabätä ngwane, nita juto biarebe kukwe metre niekäre Jehová kräke aune blite niarakri (Sal. 34:1; Is. 43:10). Nita blite aune nita ja ngwen ño yebiti nita mike gare ni tö Jehová mikai täte kärekäre.

15. Apóstol Pablo ja töi mikani sribire Jehová kräke ¿ye köböire dre kwin namani kwe? (Filipenses 3:​7, 8).

¹⁵ Jondron kä nebätä jiebiti ni tö näin ye nita juto biare tuametrekäre ne kwe Jehová ni kadre ngäbiti aune nita ja töi mike sribire bäri niara kräke. Kukwe ne bämikani kwin apóstol Pablokwe ni kräke, niara käkwe ñaka ja töi mikani jondron tuin krubäte jakwe ñakare aune ja töi mikani kwe nain Jesús ye jiebiti aune Jehová käikitekä (Gál. 1:14). Ye köböire, kä namani jutobätä aune dianinkä gobrankäre Jesube kä kwinbiti. Pablokwe jondron tuanimetre ye ñaka nämä muaireta, erere nikwe nuaindi (ñäkädre Filipenses 3:​7, 8 yebätä).

16. ¿Kukwe nuainbare Juliakwe ye tä dre driere nie? (Üai mikadre ñärärä).

¹⁶ Nikwe ja töi mikai kwatibe sribire Jehová kräke ye ngwane, kukwe kwin rabai bare nikrä kä nengwane aune ja känenkäre bäri. Kukwe namani bare ja ngwai Julia yebätä ani töbike. Niara nämä chi ye ngwane, nämä kantare iglesiate monsotre kia kwatí ye ngätäite. Ni kantaka kwin ie niara jutuaba ye ngwane, törbaba tötikai bäri. Kä rikaba braibe ta ye ngwane, rababara kantare ni kwatí ye ngwärekri. Julia nämäne kwelate ja kite bäri musika yebätä ngwane, monso brare iti käkwe blitaba Ngöböbätä ben aune Ngöbö ye abokän kä Jehová niebare kwe ie. Ye bitikäre jatani ja tötike Bibliabätä bobu bämän kratire kratire. Aune ja töi mikaba kwe sribire bäri Jehová kräke aune musika ye tuametreba kwe. Ñan rababa nuäre kräke ja töi kwitakäre kore. Yebätä niara tä niere “Ni kwatí nämä niere tie ti nämä jondron kwin jakwe ye tuenmetre ngwarbe, akwa ja nire tikwe yebiti ti törbaba Jehová käikitaikä”. Kä nikanina 30 ta Juliabiti ye ngwane, ¿niara tä töbike ño? Niara tä niere: “Kätä juto tibätä, aune ti tö drei ye Jehovakwe mikai nemen bare ti kräke kä ja känenkäre yete ye gare tie” (Sal. 145:16).

MÄKWE SRIBI JANKUNU JEHOVÁ KRÄKE

17. ¿Nünanta kä krüte näire ye abokän dre gärätä nitre Ngöbö mikaka täte aune nitre ñan ngöbö mikaka täte ye kräke?

¹⁷ Nita nüne kä krüte ye ken. Apóstol Pablo käkwe kukwe ne tikaba: “Ni juandre Ngöbökwe ye abko gwängwarbe kebera nüke. Kä ñan kitadre raire ta kwe, aisete rükadi jötrö” (Heb. 10:37). ¿Ne abokän dre gäräta? Ye abokän, nitre kwatí käkwe ja töi mikadre sribire Jehová kräke (1 Cor. 7:29). Aune, nikwe ja töi mikanina sribire Jehová kräke ye ngwane, gare nie nikwe ja tuai kukwe tare ben, akwa ye abokän “jötrö kräke”.

18. ¿Jehová aune Jesús tä ni nübaire dre nuainne?

¹⁸ Jesukwe nitre nübaibare ja tötike jabe aune näin jankunu jiebiti (Mat. 16:24). Ye medenbätä, ni niena sribire Jehová kräke kä kwatí te ngwane, nikwe ñaka ja di ngwandre nekä. Erametre nikwe ja di ngwandre köbö kwatire kwatire te ye ñaka nuäre. Akwa ¿erametre nita sribire Jehová kräke kä nengwane ye ngwane käta nemen juto nibätä ñan ererea? (Sal. 35:27).

19. ¿Kukwe namani bare Genebätä ye tä dre driere ja töi kräke nie?

¹⁹ Nitre kwatí tä nütüre sribidre Jehová kräke ye abokän tare krubäte. Mäta bati ngwane, ¿mäta ja töi mike sribire Jehová kräke ye ngwane mäta nütüre jondron kä nebätä kwin abokän mäta juen ja bäre? Monso bati iti kädekata Gene tä mike gare: “Ni testiko Jehovakwe tä kukwe ñäkäire krubäte, ti nämä nuture. Monsotre ti kwrere ye abokän nämä kukwe kwin nuainne, nämä niken bietabätä, nain meribe aune video juego känti ja nuainta tare yebätä jadenkä, ti abokän jerekäbe nämäne niken gätäbätä aune kukwe driere rababa tuin tie”. ¿Ye köböire dre namani bare Genebätä? tä niere: “Ti nämä ni Ngöbö mikaka täte aune kukwe blo nuainne arato ruäre ngwane, ti nämä niken kä ngwen juto jabätä. Akwa, ye abokän ñaka nämä kä mike juto erametre tibätä. Kukwe kwin Ngöbökwe nämä gare tie akwa ti ñaka nämä nuainne yebätä ti jataba töbike. Yebätä ja känenkäre tikwe ja töi mikaba Jehová mike täte ja brukwä tätebiti aune Jehová tä orasion tikwe ye kukwe nuin gare tie”.

20. ¿Ni töita kwatibe dre nuainbätä?

²⁰ Salmista iti käkwe kantaba Jehovai krörö: “Mäta nire den jai aune mäta mike nökrö ja ken ni yebätä kätä juto, ne kwe niara nünandre jubäre ju mäkwe yete” (Sal. 65:4). Josué erere, nikwe niedi ja töi tätebiti: “ti aune nitre ti gwirete nunkwe Jehová mikai täte” (Jos. 24:15).