Jesús tä Jehová kä ye mike tuin ño jai

1, 2. a) ¿Deu Jesús murie keta jämi ye känenkri dre nuainbare kwe? b) ¿Drebätä ja kitai kukwe ja tötikara nebätä?

DEU KÖBÖ jueve, 14 nisán kä 33 ye ngwane Jesús tä mröre mrä nitre ja tötikaka kwe yebe, niaratre tä kuarto chi te kwininkri ja ükaninkrö. Kwetrekwe mröbarera ünä ye ngwane, Jesús kukwe niebare ietre töi mikakäre jäme. Jämintre nikenta ye ngwane, Jesukwe ja driebare ja brukwä ngäbiti Jehovai. Aune kukwe niebare kwe ye jökrä apóstol Juan tikani Juan kapitulo 17 yete. Ye bitikäre kä nikani braibe ta Jesús kitani ngite, ja mikani rüere, nuainbare tare aune metani kribätä.

² Dre raba nemen gare nie Jesukwe orabare yebätä aune: ¿ye ngwane dre nämäne ngwen töbike?, ne madakäre ¿dre namani bäri ütiäte kräke nämäne kä tibienbätä ye ngwane? Rabai gare nie kukwe ja tötikara nebätä.

“TIKWE MÄ MIKANI GARE”

3. ¿Jesukwe dre nuainbare Ngöbö kä yebätä, aune dre gärä tä nämä kwe? (Juan 17:​6, 26).

³ Jesukwe orabare Jehovai ye ngwane niebare kwe: “Tikwe mä kä mikani gare”. Kukwe ne niebare kwe bobu jire yebiti mikani gare kwe Jehová kä ye nämäne ütiäte krubäte kräke (ñäkädre Juan 17:​6, 26 yebätä). Akwa, Ngöbö kä mikani gare kwe niebare kwe ye ngwane, Ngöbö kä ño ye ña ai tö namani mikai gare, ñobätä ñan aune Ngöbö kä ño ye mika nämänena gare bä kabre kukwe Hebreos yebätä ne madakäre nitre ja tötikaka kwe ye Judío yebätä kukwe ye nämänena gare kwin ietre. Aisete, Ngöbö kä mikani gare kwe ye ngwane Jehová ye abokän ño, aune töita ño kä ja känenkäre kräke, tä ja ngwen ño aune töi kwin keta kabre meden tä bätä ye tö namani mikai gare metrere. Jesukwe nünanbare Jehovabe ye medenbätä kukwe keta kabre Jehovabätä ye niara aibe raba mike gare.

4, 5. a) ¿Dre köböire ni iti kä raba nemen ütiäte? Mä raba bämike keteiti. b) ¿Ñokänti Ngöbö kä namani ütiäte nitre ja tötikaka Jesukwe ye kräke?

⁴ Kä kwatí te ja eteba iti kädekata David gare mai konkrekasion mäkwe yete aune niara ye ni operaka. Aune batibe käre mä rabadre bren. Aune mä jänrikadre ngitiekä hospital känti niara tä sribire, yete niara mä operadre ye köböire mä ñan krütadre yete ja käne ¿mä raba kite niara tarere bäri ya ererea? David ye ñan rabaira tuin ni umbre konkrekasion aibe mäi ñakare aune ni iti mä mikaninta räre ye kwrere rabai tuin mäi arato. Niara kä kädekadrete ngwane, dre nuainbare mä kräke kwe rükaita törö mäi. Aisete, niara rabai bäri ütiäte mä kräke.

⁵ Ye erere arato, Ngöbö kä ye nämä gare kwin nitre ja tötikaka Jesukwe ie, akwa niara ye nire nükani gare bäri kwin ietre. Yete ja käne niara kä ye namani ütiäte kräketre. ¿Ñokänti ye namani bare? Jesús nünanbare kä tibienbätä ye ngwane kukwe niebare aune kukwe nuainbare kwe yebiti niara Rün Jehová ño ye mikani gare metre kwe. Jesús nämäne dirire aune niaratre mike tuin ño jai ye köböire Jehová nükani gare bäri kwin nitre ja tötikaka kwe ye ie (Juan 14:9; 17:3).

“MÄ KÄ JEÑE MÄKWE BIANI TIE YEBÄTÄ”

6. ¿Mäkwe ja kä biani tie niebare Jesukwe Jehovai yebiti dre gärä tä nämäne kwe? (Juan 17:​11, 12).

⁶ Jesús orabare nitre ja tötikaka kwe ye kräke ngwane niebare kwe: “Ma kä ütiäte kri, ye mden mäkwe biani tie, yebiti mäkwe niaratre ngibia” (ñäkädre Juan 17:​11, 12 yebätä). Kukwe ütiäte niebare Jesukwe Ngöbö kä yebätä “mä kä jeñe” niebare kwe meden mäkwe biani tie orasion nekänti yete ja käne niara ja kädekai Jehová ye ñan ai gärä nämäne kwe. Ñakare aune mäkwe ja kä biani tie niebare kwe yebiti niara abokän blitaka Jehová diäre, arato jondron keta kabre ñan tuabare nuainbare kwe Jehová kä yebiti, aisete Jesús ñan ja kä kwitani aune ñan ja kädekani kwe “Jehová” (Juan 5:43; 10:25). Jesús nämäne Jehová kä ngwen jabätä ñobätä ñan aune Jesús nieta ngwane “Jehová ni mikaka kwäre” mikata gare.

7. Ñobätä Jesús kukwei ye nämäne ütiäte Jehová kukwe ye kwrere, mä raba bämike keteiti.

⁷ Ani bämike kukwe nebiti. Ni gobranka ye tä ni iti denkä nekwe rikadre blite kräke juta madate. Ni gobranka kukwei ütiäte krubäte ye kwrere ni dianinkä kwe blitakäre ja ütiäre ye kukwe tä nemen ütiäte arato. Ye erere, Jehovakwe Jesús dianinkä blitakäre ja ütiäre aune Jesús kukwei ye mikadre tuin ütiäte krubäte jai Jehová kukwei ye kwrere (Mat. 21:9; Luc. 13:35).

8. ¿Ño Jehová kä “nämäne Jesubätä” nämäne kä kwinbiti ye ngwane? (Éxodo 23:​20, 21).

⁸ ehovakwe Jesús kädekani Kukwe ñobätä ñan aune niarakwe Jesús dianinkä kukwe mikakäre gare angeletre aune ni kä tibienbätä ie (Juan 1:​1-3). Angel iti käkwe nitre israelita jie ngwani aune kriemikani kä nötare yete ta, ye Jesús ara nie raba. ¿Ñobätä ángel ye kukwei mikadre täte? Jehovakwe niebare ángel nebätä: “Munkwe niara mika täte, ñobätä ñan aune ti kä ye niara tä ngwen jabätä” a (ñäkädre Éxodo 23:​20, 21 yebätä).b ¿Akwa ño Jehová kä ngwan nämäne jabätä Jesukwe? Metrere niara blitaka Jehová dokwäre, Jehová kä mikaka deme aune käikitaka yebiti.

“TI RÜN, JA KÄ MIKE BÄRI KRI”

9. ¿Jesús kräke Jehová kä ye nämäne ütiäte ye ñokänti gare nie?

⁹ Jehová kä ye nämänena ütiäte Jesús kräke nämäne nüne kä kwinbiti sete ye ngwane. Jesús nükani kä tibienbätä ngwane Jehová kä ye nämänena ütiäte niara kräke aune bämikani kwe nünanbare ño kwe yebiti. Aisete, nünanbare kwe mrä kä tibienbätä ngwane ne niebare kwe Rün ie: “Ti Rün, ja kä ye mike deme”. Aune ye bätärabe Rünkwe ñäkäbare niara käre: “Tikwe ja kä mikabarera deme aune tikwe nuain jankunu” (Juan 12:28).

10, 11. a) ¿Jesús käkwe Rün kwe kä ye mikani ño ütiäte? (Üai mikadre ñärärä). b) ¿Ñobätä Jehová kä ye mikadre deme aune merebe nikwe?

¹⁰ Jesús Rün kä mikani ütiäte. Akwa, ¿ye nuainbare ño kwe? Niarakwe Jehová töi kwin keta kabre, jondron sribebare kwe yebätä blitabare kwe. Arato Jehová kä ye tädre deme aune tädre merebe ie tö namani.c Jesús ora mananbare krörö nitre ja tötikaka kwe ie: “Nun Rün tä kä kwinbiti mä kä mikadre deme jai”. Jehová kä tädre deme ye nämäne ütiäte Jesús kräke ye bämikani kwe orasion nebiti (Mat. 6:9).

¹¹ ¿Ñobätä ütiäte Jehová kä ye mikadre merebe aune deme? Ñobätä ñan aune Satana kukwe ngwarbe niebare Jehovabätä jardín Edén yete bätä Adan aune Eva ie Jehová nämäne kukwe kwin ye ñäkäire niebare kwe ie (Gén. 3:​1-5). Dre dianta nuaindre jai Jehovakwe ye abokän ñaka kwin niebare kwe. Yebiti Jehová kä aune töi ño ye mikani tuin blo kwe nitre okwäbiti. Ne madakäre, Job nämäne Jehová mike täte jondrontäri niebare kwe. Aisete ni rabai trä kwite Jehovai kukwe tare näire niebare kwe (Job 1:​9-11; 2:4). Akwa, nire tä kukwe metre niere ye rabadre gare yekäre kä rikadre kabre ta: ¿Jehová o Satana?

‘TI BIKE JA NIRE BIEN MURIE KETAKÄRE’

12. ¿Jesús nämäne Rün kwe tarere ye bämikani ño kwe?

¹² Jesús nämäne Rün kwe tarere krubäte yebätä ja di ngwani kwe ne kwe Rün kä tädre deme aune merebe. Yebätä niebare kwe: ‘Tita ja nire bien murie ketakäre’ (Juan 10:​17, 18). Jän, Jehová kä tädre deme yekäre Jesús nämäne juto krütakäre. Ngite ñan nämäned Adán aune Evabätä akwa yebiti ta trö kwitani kwe Jehovai aune ja mikani kwetre Satana yekri. Akwa Jesús abokän nämäne Rün kwe tarere ye bämikani kwe nünanbare kä tibienbätä kwe ye ngwane, käre Jehová mikani täte kwe aune nünanbare ño kwe yebiti ja mikani Jehová yekri kwe (Heb. 4:15; 5:​7-10). Ja ngwani metre kwe ie nememe murie ketani kribätä ye ngwane (Heb. 12:2). Yebiti Jehová nämäne tare kwe ye bämikani metre kwe.

13. ¿Satana abrä kukwe ngwarbe niekä ye ñobätä Jesús aibe raba mike gare? (Üai mikadre ñärärä).

¹³ Jesús ja ngwani ño yebiti bämikabare kwe Jehová abokän kukwe metre niekä aune Satana ye abokän kukwe ngwarbe niekä (Juan 8:44). Niara ie Jehová ye gare bäri kwin. Satanakwe kukwe ngwarbe niebare yete nane, kukwe chitani metre niedre kwe akräke rabadre gare Jesús ie. Akwa ye erere ñan namani bare yebätä käre Jesukwe Ngöbö kä ye mikani merebe aune ütiäte. Jehovakwe tuanimetre kaibe kebe krüte ye känenkri raba nemen tuin nie akwa yebiti ta ja ngwani metre kwe Jehovai aune ñaka trö kwitani kwe Jehovai (Mat. 27:46).e

“MAKWE SRIBI BIANI NUAINDRE TIE YE ERERE NAMANI BARE TÄTE JÖKRÄ TIE”

14. ¿Jesukwe ja ngwanbare metre ye köböire Jehovakwe dre nuainbare kräke?

¹⁴ Köbö te Jesús murie ketai ye känenkri orabare ne kwrere kwe: “Mäkwe sribi biani nuaindre tie ye erere namani bare täte jökrä tie”. Jesukwe ja ngwani metre ye köböire Jehovakwe kukwe kwin mikai nemen bare kräke yei nämäne tö ngwen (Juan 17:​4, 5). Aune ñan tö ngwanbare ngwarbe kwe. Krütani akwa Ngöbökwe ñan niara tuanimetre raire dobote (Hech. 2:​23, 24). Ngöbökwe ganinkröta aune mikani ni kri kä kwinbiti (Filip. 2:​8, 9). Kä nikani ruäre ta aune Jesús namani gobrane Gobran Ngöbökwe yete. ¿Akwa Gobran yebiti dre rabai nemen bare? Jesús ara käkwe kukwe keteiti ribemana nie: “Gobran mäkwe jatadre. Mä tö dre ie ye erere, rabadre bare kä kwinbiti arato kä tibienbätä” (Mat. 6:10).

15. ¿Dre mada rabadi bare ja känenkäre Jesús ie?

¹⁵ Kä kebera no ja käne, aune Jesukwe rüdi nitre ja mikaka Jehová rüere yebe aune nitre käme ye mikai krüte kwe Armagedón yebiti (Apoc. 16:​14, 16; 19:​11-16). Jesukwe Satana kitai “kä mäkäte” kä ikote ye kwrere yete täi ketaninkä aune ñaka raba krörö nuainne jire chi (Apoc. 20:​1-3). Jesukwe Gobrandi kä mil te yete, kä jäme rabai aune nitre dimikai kwe nemen töi metre. Aune nitre krütani ye gaikröta kwe, kä tibien ne rabai bä nuäre krubäte. ¡Jän, batibe Ngöbö tö namani dre dre ie kenanbe ye rabadi bare! (Apoc. 21:​1-4).

16. ¿Gobran Kä Mil te ye rikaira ta ngwane nünandi ño?

¹⁶ ¿Jesús Gobrandi Kä Mil te ye bitikäre nünandi ño? Nierare ni därebare ngite yebätä ja mikata ngite aune ni töi ngite ye ñaka rabaira jire. Ni ñan rabaira ngite kitamana ta jabiti Jehovai Jesús käbiti. Ja ketakäre Jehovabe ni ñan täi sacerdote o ni iti ribere jai blitakäre jakrä Jehovabe. Aune “ni rüe mrä, gata”, ye ñan täira. Ngäbetre krütani ye jökrä rabairata nire. Nire nire täi nüne kä tibienbätä ye töi tädi metre (1 Cor. 15:​25, 26).

17, 18. a) ¿Kä mil krütaira ye bitikäre dre rabai bare? b) ¿Kä biani Jesús ie gobrankäre ye näina ta ngwane dre nuaindi kwe? (1 Corintios 15:​24, 28; üai mikadre ñärärä).

¹⁷ ¿Kä Mil rikaira ta ye bitikäre dre rabadi bare? Metrere kä ye näire: kukwe niebare Jehovabätä ye era o ñan era ye rabadi gare. Jehová kukwe ngwarbe niekä, ñaka gobrane kwin, ni ñaka tare kwe niebare Satanakwe bätä jardín Eden yete ye ngwandreta törö jai. Akwa metrere gare nie kirabe nükebe kä nengwane nitre Jehová mikaka täte ye tä ja ngwen metre Jehovai kä ye mikakäre deme. Kä mil krütaira ye bitikäre Jehová kä ye mikadi bäri kri aune ni tare Jehovakwe ye jutuai metre ta tie.

¹⁸ Ye bitikäre Satana ye kukwe ngwarbe niekä ye rabadi gare. ¿Gobran Jesukwe ye krütaira ye bitikäre dre nuaindi kwe? ¿Ja mikadi kwe Jehová rüere Satana ye erere? ¡Ñakare jire! (Ñäkädre 1 Corintios 15:​24, 28 yebätä). Jesús ye abokän töi jene, Gobran ye biainta kwe Jehovai aune mikadi täte kwe tare kwe yebätä.

19. ¿Jesús kräke Jehová kä ye ütiäte ye ñobätä gare nie?

¹⁹ Metrere Jehová ñan töbikabare ja kä biankäre Jesús ie ne kwe Jesukwe blitadre niara ütiäre. Ne madakäre sribi mikani kwe Jesús kisete ye Jesukwe nuainbare täte. Aune, Jesús kräke Jehová ye abokän ütiäte krubäte. Ye medenbätä nämänena juto biare ja nire kwe ye biankäre Rün kwe ye kä ütiäre Gobrandi Mil kwe ye bitikäre gobran ye bianta jökrä kwe Rün ie. ¿Jesús erere ni raba ja ngwen ño? Kukwe ye rabai gare nie kukwe ja tötikara ja känenkäre yebätä.