Mekerabe nükebe nengwane kukwe namanina gare nunye Ni Dirikä Bäri Kri yebätä

TI RÜNTRE KUKWE BÄMIKANI TI KÄNE

Ti rüntre nämä nüne Italia, kä cincuenta ye köböi niken ta ngwane, nikanintre nüne juta Kindersley, Saskatchewan (Canadá). Yete kukwe metre Bibliabätä nükani gare ietre, ti nämä chi ngwane, ti nämä kukwe driere ora kabre te ti rünbe, aisete jadaraka kwärä tita niere, kä nämä krä kwä tibiti ngwane, ti nämänena sribi prekursor auxiliar nuainne.

Ti rünkwe ngwian ñan nämäne krubäte akwa ye ñan niara ketaninbätä Jehová mikakäre käne aune rikakäre gätä kri internacional nuainba kä 1963 juta Pasadena (California, Estados Unidos) yete. Ti rün ja töi mikaba niken, yebätä jondron kwe bäsi jökrä rürübäinbare kwe rikakäre gätä krite. Kä 1972 nun rikaba nüne Trail yekänti, dirikäre nitre blitaka Italianio ie, ye nemenkä 1,000 kilómetro nükebe Columbia Británica (Canadá) yete, ti rün nämä sribire mantenimiento limpieza aune tö rababa ja töi mikai kwatibe kukwe ja üaire yebätä, yebätä sribi drieba ie ngwian ganainkäre bäri ie ye ñan ka ngäbitiba kwe.

Ti rün kukwe bämikani nun nibokä ye käne yebätä nunta debe niere ie. Nun dimikani nirien dite ja üairebiti aune kukwe ye mike nuaindre käne jai. Kukwe drieba kwe tie ye abokän, käre tikwe Jehová mikai käne ngwane, Jehovakwe ti ngübai (Mat. 6:33).

TIKWE SRIBI KÖBÖ TÄTE KÖMIKABA

Kä 1980 ti ja mäkäteba Debbie ben, niara bä nuäre krubäte aune kukwe ja üaire nämä bäri ütiäte kräke. Nun tö nämä sribi köbö täte kömikai, yebätä nun ja mäkäteba bitikäre, sö rikaba krämä ta ngwane, Debbie ja mikaba prekursora aune kä rikaba kwati ta bitikäre nun ja kwitaba konkrekasion ni ribe nämä bäri kukwe driekäre känti, ye ngwane ti ja mikaba prekursor arato.

Kä rikaba ta ngwane nun jataba nainte yete, yebätä nun tö rababa rikai kä mada känti. Käne nunkwe blitaba ni circuito tuabitikä ben, ye ngwane töi kwinbiti blitaba kwe nunbe ngwane, nieba kwe metre ta nunye: “Mun ara ngite kukwe yebätä, munta ja töi mike kukwe blo tä nemen bare munbätä yebätä, mun ja töi mikai kukwe kwin känene ngwane kwandi munye nieba kwe nuen” kukwe nieba nunye kwe ye ara nun nämä ribere jai ye ngwane (Sal. 141:5). Kukwe nieba kwe nunye ye metre rükaba gare nunye ngwane nun ja töi mikaba ja mräkätre monsore, meritre ruäre muko ñan testiko nämä sribire ja dibiti yebätä. Yete kukwe ütiäte rababa gare nun aune nun jataba ja töi mike kukwe kwin yebätä. Jehová nämä nun dimike kukwe ño ererebiti ta ye nunkwe tuaba (Miq. 7:7). Yete ja käne kä jatabata juto nunbätä aune nun ñan jatabara töbike käne ye erere.

Kwela nitre Ngöbö kukwei driekä kräke yebätä nun janama kena ngwane, instructor nämä nibokä, nimä ye käkwe kukwe driebare juta madate, kukwe kwin namani bare bätätre aune kukwe ruäre ben ja tuani kwetre ye üai mikaba tuare kwe nunye, ye käkwe nun töi mikaba ja mike misionero arato yebätä nunkwe ye mikaba nuaindre jai ja käne.

Nun tö rababa rabai misionero, yebätä kä 1984 ngwane nun nämä Columbia Británica nunkwe ja kwitaba Quebec, ye nemenkä 4,000 kilómetro näre aune yete blitata kukwe francebiti, yebätä nun rabadre blite kukwe jenebiti, nüne nitre ye erere. Arato bä kabre nun nämä nemen ngwian ñakare, bati ja mräkä iti kwe tire nämä känti nun rikaba jurite aune nun tuametreba kwe papa ükekrö jai, ye ngwane, Debbie rababa balente papa rien, sribeba bätäkä ngwarbe kwe erametre nunkwe ja tuaba kukwe tare keta kabre ben akwa käre nun nämä ja di ngwen kä ngwen juto jabätä ye ngwane Jehová nun dimikaba ye nun tuaba ja okwä jeñebiti (Sal. 64:10).

Bati nun nämä jäme angwane nun käräba kökräte ta yete nun nübaiba sribire Betel Canadá, nunkwe ka ngäbitiba akwa nunkwe solicitud juanba rikakäre kwela Galaad te, nunkwe ja nuaindre ñan rababa gare nunye. Nun rababara Betelte ngwane nunkwe blitaba ja eteba iti kädeka nämä Kenneth Little yebe niara sribikä miembro Comité Sucursalte, nunkwe ngwantariba ie: “¿Nunkwe solicitud juanba Galaad kräke yebätä dre rabai bare?” Nieba kwe nun käre: “Biti kä rükai nie töbikatarikäre kukwe yebätä”.

Bämän rikaba krati ta ngwane, kukwebätä nun jababa blite ye köböi rükaba, nun nübaiba Kwela Galaad. Yebätä nun rabadre kukwe keteiti den nuaindre jai, ja eteba Little nieba: “Munkwe dre diain nuaindre jai akwa yebiti ta ja känenkäre ruäre ngwane, mun raba nemen nütüre tikwe asignación keteiti kadre ngäbiti mada ye täte rabadre bäri kwin, akwa Jehová kräke ja erebe, nita dre nuainne ye Jehová raba mike nemen bare kwin”. Nun nübaiba Kwela Galaad ye nunkwe ka ngäbitiba, ye ngwane nükebe nengwane ja eteba Little kukwe nieba nunye ye metre nunta tuin, yebätä ja mräkätre ruäre ie kukwe tä nemen diandre jai ngwane, ja eteba Little kukwe nieba ye erere nunta niere ietre, töta nemen sribibätä bäri Jehovakrä ye ngwane.

NUN NÄMÄ SRIBIRE MISIONERO NGWANE

Sö abril kä 1987 ngwane, ja mräkä 22 bätä nun nübaiba kwela 83 Galaad, Brooklyn (Nueva York) yete käi rababa juto nunbätä. Ye ngwane instructor nämä nibu metrere, Ulysses Glass aune Jack Redford. Sö krärike nun nämä kwelate ye rikaba jötrö ta. Nun graduaba 6 septiembre kä 1987. Ye bitikäre nun juanba juta Haití aune ja mräkätre John aune Marie Goode juanba siba juta yete.

Ja mräkätre misionero nämä juta Haití dianinkä yete kä 1962 ye ngwane, bitikäre nun rikabata kena bobukäre yete. Nun graduaba kwelate bämän rikaba krämä ta ye bitikäre nun rikaba sribire konkrekasion keteiti nemenkä kä tokwäre te, ja mräkätre nämä 35 aibe. Nun nämä bati yebätä kukwe keta kabrebätä nämä ja kitadre nunye, ne madakäre ju nitre misionero kräke yete nun aibe nämä nüne. Nitre yete bobre, ñäkä ñan nämä gare täräbätä ietre, ye ngwane nitre político nämä rüre, gobran dianka nämä gräbiti, protesta nuain nämä, ñü muriebe minimini nämä mate.

Ja mräkätre Haití nämä kä ngwen nüke jai aune kä ngwen juto jabätä kukwe tare yebiti ta, nämä Jehová tarere yebätä tö nämä kukwe driebätä, yebätä kukwe ütiäte krubäte rababa gare nunye. Ja ngwai iti umbre ñäka ñäkä gare ie täräbätä akwa texto Bibliabätä 150 nämä gare ja töbiti ie. Köbö kwatire kwatire nun nämä kukwe jene jene tuin ye nämä nun töi mike blite nitre ben gobran Ngöbökwebätä aune aibe raba kukwe jökrä kä nebätä ükete. Nitre ruäre ja tötika kömikaba ye niena prekursor regular, prekursor especial o nitre umbre ji ngwanka konkrekasionte, yeta kämike juto nunbätä.

Ti nämä juta Haití ngwane ni iti nämä kukwe mormon bätä rababa gare tie niara kä Trevor, bä kabre tikwe blitaba Bibliabätä ben, kä rikaba ta ngwane carta juanba kwe tie aune yete nämä niere “!gätä kri köböra nemen bare yete tikwe ja ngökai ñöte¡ ti nämä ni mormon erere juta Haiti yekänti ti tö näinta akwa nengwane prekursor especial erere”. Ye erere namani bare aune kä kwatí te namani yete muko kwe ben.

NUN NÄMÄ EUROPA BITI JUTA ÁFRICA

Kä rikaba ta ngwane nun juanba Europa ye ngwane krire nun tuametreba kukwe driere, 1992 nun rababa Liubliana (Eslovenia), ti rün nämä nüne jämi niken nüne Italia ye känenkri ye ngwane kä ye kädeka namani Yugoslavia aune rü jataba nakainkä yete. Ye näire kukwe drie ye sucursal Viena (Austria) bätä oficina Zagreb (Croacia) Belgrado (Serbia) nämä tuinbiti. Ja känenkäre kukwe ükatebare ne kwe Betel rabadre juta keteitire keteitire yete.

Nun jataba ja kite blite kukwe madabiti, nitre ja ngwen ño ye erere nüne. Nitre esloveno nämä niere nunye “Jezik je težek”, ye abokän “Kukwe ne ñan nuäre blitakäre” gäräta. ¡Ye erere rababa bare nunbätä! Ñan rababa nuäre nunkrä. Ja mräkätre nämä ja ngwen metre aune juta Ngöbökwe nämäne kukwe ükete ye nämäne kain ngäbiti töi kwinbiti ye nämä kä mike juto nunbätä. Jehová nämä kukwe kwin mike nemen bare ye nunkwe tuaba. Jehovata kukwe ükete ja tare yebiti aune kä debe näre te ye nunkwe tuaba, nun nämä nüne Eslovenia ye ngwane, kukwe keta kabre nämänena gare nunye ngwanbata kwe törö nunye aune kukwe mada mrä rababa gare nunye.

Kä 2000 ngwane, nun juanba Costa de Marfil (juta África Occidental) yete. Akwa bätärabe rü jataba nakainkä juta yete yebätä noviembre 2002 nun juanba Sierra Leona, yete krire rü rikaba ta ye käkwe nuabare kä 11 te. Yebätä, ñan rababa nuäre nun kräke kä mikakakäre Costa Marfil yete. Akwa ye känenkri kukwe keta kabre nämä gare nunye ye nun dimikaba kä ngwen juto jankunu jabätä.

Nitre yete nämä nun kukwe nuin kwin, ja mräkätre nämä nun tarere yebätä nun nämä ja töi mike, jondron ñaka krubäte kwetre akwa käre töi nämä jondron kwetre ye bianbätä ni madai. Ja ngwai iti tö rababa dän biain Debbie törö tie, Debbie ñan tö raba dän ye kain ngäbiti akwa ja ngwai ye ñan rababa kwekebe, nieba kwe: “Rü nämä ngwane ja mräkä juta madate nun dimikaba aisete nengwane nunkwe mun dimikadre mada”. Nunkwe ja di ngwanba ja töi mike ja mräkätre ye erere.

Ye bitikäre nun rikabata Costa Marfil, akwa bobukäreta nitre politico jataba rü kainkä, nitre nämä ja nuainne tare yebätä noviembre 2004 nun diankabata kä yekänti helicópterote, nun nämä niken tribe ngwena 22 libra jabätä aibe. Kä ruäre deu nun rababa nitre rükä frances ken, jändrinane nun rikaba avionte nemen Suiza. Nun rikaba mate yete kä ruäre deu. Ja mräkätre Comité Sucursal bätä instructor kwela känti nitre tötikata sribi Ngöbökwe jie ngwankäre aune muko kwe nun ka ngäbitiba kwin, mrö sribebare kwetre nun bukakäre, chocolate suizo bianba kwe nunye arato.

Nun juanba kukwe driere Ghana kä ruäre te, akwa kä rikabata kwekebe ngwane nun rikabata Costa de Marfil. Ja mräkätre nämäne ja töi mike kwin nun kräke kukwe keta kabre ben nun ja tuaba ye ngwane. Kä te nun juan nämä nekwäre sekwäre asignacion mrä mrä yebätä akwa ye ñan ribeta juta Ngöbökwe te aibe yebätä nämäntre nuainne ñakare aune nun nämä tare kwetre yebätä ye nuainbare kwetre ye kwrere nunkwe ja töi mikai tuin jai. Bäkänä kukwe keta kabre tare ben nunkwe ja tuaba akwa yebiti kukwe ütiäte rükaba gare nunye, ni kristiano raba nüne ño yebätä.

ASIGNACIÓN MADA MRÄ

Kä 2006, central mundial käkwe carta juanba nunye yete nun juanba Asia occidental, ye abokän asignación mrä nun kräke. Nun rabadre blite kukwe madabiti, nüne jene aune kukwe keta kabre ñaka nuäre ben nunkwe ja tuadre arato politica bätä iglesia ngwarbe nämä keta kabre konkrekasionte nun rikaba yete ja mräkätre nämäne blite kukwe jene jenebiti akwa nämä ja kete kwin krubäte juta Ngöbökwe köböire. Ja mräkätre yete mräkätre kwe nämäne ja mike rüere, sribi känti aune nitre nünanka bäre arato, akwa nämä kä ngwen nüke jai. Kukwe kwin bämika nämä kwetre.

Kä 2012 gätä kri especial nuainba Tel Aviv juta Israel. Kä ye känti ja mräkätre ñan ja ükakröbare jire kwatí krubäte kä Pentecostés 33 nükebe kä 2012 ye ngwane yebätä köbö ye rababa ütiäte krubäte

Nun nämä Asia Occidental ngwane nun juanba kä ruäre känti kukwe drie ñäkäi nämä yete, nun rikaba tärä ruäre ngwena jai kukwe driekäre aune nun rikaba gätä krikri nuainba kia kia yebätä, guardia nämä kä jene jene känti ja ükaninkrö akwa ja rababa ruin kriemikani nunye ñobätä ñan aune ja mräkätre kukwe driekä braibe nämä kä yekänti ye nämä näin nun mukore aune ja kriemike ye nämä nun dimike ja ngwen mokre.

NUN RIKABATA JA TÄTE ÁFRICA

Kä 2013 ngwane asignación jene mikaba nun kisete: ye ngwane nun nubaiba sucursal Kinsasa (República Democrática del Congo). Juta ye kri aune jondron keta kabre bä nuäre tä yete, juta yete rüta krubäte aune nitre nüne bobre. Nun rababa nütüre: “nikwe nünanbarera Africa aisete dre ben nikwe ja tuai niena gare nie”. Akwa kukwe keta kabre bätä nämä ja kitadre nunye, ñodre carretera ñaka, puente ñaka akwa yebiti ta nun ja töi mikaba kukwe kwin bätä, ngwian ñaka ja mräkätrekwe akwa nämä kukwe driere, nämä kwen gätäbätä aune gätä kri yebätä ye nun dimikaba krubäte. Ja okwä jeñebiti juta Ngöbökwe nämä nirien nunkwe tuaba ye jökrä nämä nemen bare Jehová köböire, kä jökrä te nunkwe nuaba juta Congo-Kinsasa yete ye ngwane, kukwe ütiäte rababa gare nunye. Jehovakwe ja ketamuko kwin bianba nunye ye rababa nun mräkätre kwrere.

Kä 2017 jatabara niken ta ngwane nun juanba Betel Sudáfrica, ye abokän Sucursal bäri kri te nunkwe sribibare nun rababa yete ngwane, sribi nun ñan nuainbare jire mikaba nuaindre nunye mada bati rababa ja kitadre kukwe keta kabre bätä nunye akwa kukwe keta kabre ben nunkwe ja tuani ye nun dimikaba krubäte. Sucursal yete ja mräkätre tä kä kwatí te Jehová mike täte, niaratre rababa tare nunkwe, ja mräkätre kwata bä jene jene kukwe jene jene Betelte ye tä nüne keteitibe, ja mräkätre tä Jehová mike täte ye tä ja ngwä bitin kite ni kristiano rabadre nuainne erere ye ie Jehovata kä jäme bien.

Kä te nunta sribire Jehová kräke yete Debbie aune ti kisete asignación keta kabre namanina ye ngwane nunkwe ja kitani nüne nitre juta madate erere aune blite kukwe madabiti. Kukwe ñan nuäre ben nunkwe ja tuanina akwa Jehovakwe ja tare metre bämikani nunye, juta kwe aune ja mräkätre köböire (Sal. 144:2). Kukwe kabre namanina gare nunye Jehová mikabätä täte yeta nun dimike nemen ni Ngöbö mikaka täte bäri kwin.

Ti meye ti rün kukwe ütiäte driebare tie, ti muko Debbie tä ti dimike krubäte aune ja mräkätre tä kukwe kwin bämike nun käne, tita debe bien krubäte ietre. Arato ye tä nun dimike nikren kä ja känenkäre yebätä aune ja kite jankunu ni dirikä bäri kri Jehovábätä.