Kukwe kwin ja töikrä aune bä nuäre krubäte tä nemen bare sribibätä Jehová kräke

Rüba kri bobukäre ye ngwane, ti rünkwe kä mikakaba Estonia aune rikaba nüne Alemania. Yete ti däreba, biti nun ja mikaba juto rikakäre Canadá. Nun jue kena ye abokän nämä Ottawa (Canadá). Ni iti nämä kwi ngubare ye ken nun nämä nüne, nun abokän nämä nüne bobre, akwa kwi mrüke abrä nun nämä kwete dekä dekä.

Bati nitre testiko ñäkäba Apocalipsis 21:3, 4 yebätä ti meye ie, kukwe rababa gare ie ye mataba brukwäte, yebätä gedeama muare ie. Kukwe rababa gare ie ye käkwe dimikaba krubäte ñobätä ñan aune kä rikaba braibe ta aune ti rün bätä ti meye ja ngökaba ñote.

Ti rün aune ti meye ie kukwe inglere ñan nämä gare krubäte akwa kukwe rababa gare ie ye ja töi mikaba kwatibe kwe mike täte. Ti rün nämä sribire krubäte hierro Niquel ye dükatebätä kä Sudbury (Ontario) yebiti ta, bäsi käre nämä niken ti aune ti ngwai chi Silvia ngwena kukwe driere, käre bämän kratire kratire nun nämä ja tötike gwaire Ni Mikaka Mokre yebätä. Ti meye aune ti rün ti dimikaba Ngöbö tarere, ye köböire kä nämä 10 tibiti kä 1956 ye ngwane, ti ja diankaba mento Jehovakrä. Ti rün aune ti meye tä Jehová tarere ye tä ti dimike Jehová tarere jankunu arato.

Ti graduaba colegiote ngwane, ti ñan jatabara kukwe ja üaire mike käne jai. Tikwe ja mikai prekursor ngwane, ngwian ñan rabai tie rikakäre juta madate, ti tö nämä ie erere nämä nemen ruin tie, yebätä ti nämä sribire música mika nämä radiote ta yebe aune sribi ye käi nämä juto tibätä. Ti nämä sribire nemen kä raire deu yebätä bäsi käre ti nämä gätä juen ja bäre, ne madakäre käre ti nämä nitre ñan Ngöbö mike täte yebe akwa kukwe namani gare Bibliabätä tie yekwe ti dimikaba ja töi kwite.

Yete Ray Norman aune ngwai kwe Lesli bätä precursor mada rababa gare tie, kä nämä juto bätätre yekwe ti dimikaba ja töi kwite ti nämä kukwe mike nuaindre jai yebätä. Niaratre ti dimikaba ja mike prekursor. Ye erere tikwe nuainba septiembre kä 1966. Kä nämä juto krubäte tibätä aune kukwe bä nüäre krubäte ti ñan nämä ngubare ye rababa bare.

JEHOVATA MÄ JUEN NGWANE, MÄKWE MIKA TÄTE

Ti nämä colegiote ngwane tikwe solicitud juanba rikakäre Betelte Toronto (Canadá). Ja käne mada ti nämä prekursor nuainne ngwane, ti nübaiba kä kobäkä Betelte. Akwa kukwe keteite nämä nemen bare, Lesli nämä tuin nuäre tie yebätä ti nübaiba ye tikwe kadre ngäbiti ngwane, tikwe ñan niara tuaita ye jürä rababa tibätä, akwa tikwe oraba krubäte biti ti nübaiba ye tikwe ka ngäbitiba. Ti ñan ja tuaita ben ye rababa tare tie akwa ti rikaba.

Tikwe sribiba dän bätätebätä aune dän planchabätä Betelte, biti secretario. Lesli kädekaba prekursora especial Gatineau (Quebec). Niara nämä dre nuainne ye käre ti nämä bämike ja töite aune tikwe kukwe kwin diandi nuaindre jai o ño, ti nämä ngwentari jai. Batibe kukwe nguba ñan nämä tikwe rababa bare Ray, Lesli ngwai nübaiba Betelte aune nun nämä cuarto kwatibe te nüne, aisete ti jataba bliteta bäri Lesliben. Köbö 27 febrero 1971 ye ngwane, ti ja mäkäteba Lesli ben köbö ye ngwane, asignación tikwe krutaba Betelte.

Nun juanba konkrekasion nämä blite kukwe francerebiti yete, kä Quebec. Kä rikaba ruäre ta ngwane, nun kädekaba circuito tuabitikä. Kä nämä 28 tibiti ti nämä bati krubäte aune kukwe ñan nämä gare krubäte tie nämä nemen ruin tie, akwa kukwe nieta Jeremías 1:7, 8 yekwe ti dimikaba krubäte. Lesli abokän juruainbare bä kabre carrobiti aune ñan nämä nemen nuäre kräke jadükakäre, ye medenbätä ti nämä töbike krubäte sribi bianba nunye ye raba nemen bare nunye o ñakare yebätä. Akwa niara nieba tie: “Jehová tä ni nubaire se ñobätä ni ñan rikadre”. Mrä mada nunkwe ka ngäbitiba. Nunkwe nuaba kä 17 jire ni ni tuabitikä erere.

Circuito yete sribi nämä nuaindre krubäte tie yebätä kä ñan nämä nemente tie Lesli kräke. Kukwe ütiäte rababa gare tie ja töikrä. Bati luninte dekä jukwe metaba, ti rikaba küken ngwane ni ñaka nämä jire, jondron nämä mikaninte ngwäte jukwebätä ye aibebätä ti okwä rababa: sabana metadrete mesabiti, kri ngokwä, queso, pan, vino aune copa nämä mikani te, arato täräkwata nämä te yebätä kukwe ne kwrere nämä tikani: “Mä rika mä muko ngwena basare kä madakänti basare kwärä”. Ye ngwane ñäna trä rababa bälen dekä, akwa rababa ja kitadre tie kukwe kädriekäre yebätä tikwe nieba ti muko ie: ni ñan raba niken. Rükaba gare ie akwa rababa ulire. Ti rababara ja kite ye ngwane ti töi rababa ti nike, kukwe nieta Efesios 5:25, 28 ye rükaba törö tie, ti muko nämä dre ribere jai ye ti rabadre ngwen törö jai ye Jehová nämä ngwen törö tie rababa ruin tie. Tikwe oraba biti tikwe nieba Lesli ie: “Brän”, kä rababa juto niarabätä. Nun rankwaba carrote nun rikaba ñö ken kä kwin krubäte yekänti yete nunkwe sabana nunye ye metateba temen biti kwin nun rababa täkäni köbö ye ngwane nunkwe kä ngwanba juto krubäte jabätä aune kä rabateba tie ja kitakäre arato.

Nunkwe circuito kabre tuabitiba Columbia Británica nememe Terranova aune jökrä ye käi rababa juto nunbätä. ¡Ti tö nämä näin juta madate ye jatabara nemen bare! Ruäre ngwane tikwe ja töi mikaba niken kwela Galaad yete akwa ti töi ñan nämä sribibätä misionero erere juta madate. Nitre misionero ye nämä ütiäte tikrä aune ye ñan tikrä nämä ruin tie, ne madakäre ti juandre África, bren gätäite, rü gätäite ye jürä nämä nemen tibätä. Ti nämä yekänti ja nämä ruin kwin tie.

TI NÜBAIBA SRIBIRE ESTONIA AUNE JUTA MADA BÁLTICOS YETE

Juta ruäre nämä nekete Unión Soviética ben yete kukwe drie jatabata kä 1992 ye ngwane. Aisete nun raba niken Estonia sribire misionero erere ngwantariba nunye, drekebe ngwarbe kukwe nieba nunye. Yebätä nunkwe oraba Jehovai, bobukäreta nunkwe nieba: “Jehová tä ni nübaire se ñobätä ni ñan rikadre”. Nun nübaiba ye nunkwe ka ngäbitiba. “Bäri kwin ñan ni juni África nunkwe nieba jai” ye törö tie.

Ben gwairebe nunkwe ja kitaba blite kukwe Estonio yebiti. Kä rikaba ruäre ta ngwane, nun rababa sribire ni circuito tuabitikä erere. Konkrekasion 46 aune grupo ruäre rababa tuadrebiti nunye juta ketamä bálticos yekänti Kaliningrado (Rusia). Ye medenbätä nunkwe ja kitaba blite kukwe letón, lituano aune ruso yebiti. Ñan rababa nuäre nunkrä akwa ja mräkätre nämä nun dimike krubäte aune debe bien nunye. Kä 1999 ye ngwane sukursal rababa Estonia. Ti kädekaba sribikäre comité, Toomas Edur, Lembit Reile aune Tommi Kauko yebe.

Ja mräkätre kabre jän janamane ngite Siberia ye rababa gare nunye. Niaratre ja tuani kukwe tare ben aune nämäne mente mräkätre kwetre yebätä, akwa ñaka namanintre ulire. Käre kä nämäne juto bätätre aune nämäne kukwe driere kä jutobiti. Niaratre erere kukwe tarebiti ta nun raba ja ngwen dite aune kä ngwen juto jabätä rababa gare nunye.

Kä nämä niken ta yete nun ñaka nämä köbö denkä ngwarbe jai, yebätä ja jataba ruin nainte krubäte Lesli ie. Ye ngwane bren kädekata fibromialgia nämäbätä nunkwe gaba. Aisete nunkwe ja töi mikaba nikenta Canadá. Ye bätärabe nun nübaiba kwela nitre sribikä sukursalbe yebätä, Patterson (Nueva York). Nun ñan raba niken rababa ruin nunye akwa nunkwe oraba Jehovai aune nun nübaiba ye nunkwe ka ngäbitiba. Ye köböire Jehovakwe kukwe kwin nuainba nunkrä nun tötika nämä ye ngwane Lesli nämä dre ribere jai ja kräkäi mikakäre ye bianba ie. Ye köböire nun nämä sribire ye nunkwe nuainbata.

KUKWE KWIN MADA: CONTINENTE MADA

Nun rababarata Estonia 2008 ye ngwane, bati deu ja mräkätre central mundial, ti käräba ja rüka törö nunye rikakäre República Democrática del Congo ngwantarikäre nunye, ti ñan kukwe gitiaba käre. Metrere kä ngwenbiti dekä nun näin o ñakäre nunkwe niedre ribeba kwe nunye. Yebätä tikwe ñan krörö nieba jire Lesli ie ne kwe niara rabadre jadüke kwin. Akwa tikwe ñaka jadukaba jire, kukwe nämä ti mike töbike nun rikadre África ngwane, ye ti nämä niere Jehovai.

Kä ngwen dekä ngwane tikwe nieba Lesli ie aune nunkwe nieba: “Jehovata ni juen África aisete brän. Ni ñan näin se ñokänti dre rabai bare rabai gare nie”. Kä 16 te nun nämä Estonia, bitikäre nun rikaba Kinsasa juta ye bäri kri Congo. Sukursal yete kriblü bä nuäre krubäte nämä jubäre ye jutuaba nunye aune ja rababa ruin kwin bätä jäme nunye yete. Nun rababa krire yete ngwane, carta biani Lesli ie Canadá ye ketakaba käne kwin kwe. “Kriblü tä medente erere känti tä blü nemenkä”. Ye erere arato munta medente yekänti mun riria jankunu ja üairebiti. Nitre tötika Bibliabätä aune nun nämä sribire misionero ye nun nämä käi ngwen juto jabätä aune sribi ye nämä kä mike juto krubäte nunbätä. Bitikäre nunkwe sukursal 13 jire kä África ye tuabitiba, ye köböire nitre ja ngwen jene jene ye bä nuäre krubäte rababa gare nunye ye ngwane, kä jurä ñan rababara tibätä. Jehovakwe nun juani África yebätä nunkwe debe bianba krubäte ie.

Nun rababa Congo Kinsasa ngwane, nun bukaba mrö keta kabre te nun ñan kwetabare jire yete. Kenanbe ñan rababa tuin kweta bä nunye akwa ja mräkätre nämä kwete bänänte aune kä jutobiti yebätä nunkwe kwetaba. Nunkwe kwetaba ngwane rababa bänänte nunye.

Nun rikaba nitre dimike mröbiti aune kukwe ja üairebiti juta yekänti. Yete nitre rükä nämä nitre merire aune monsotre nuainne tare. Ja mräkätre bäsi jökrä yekwe jondron ñaka nämä krubäte, akwa nämä tö ngwen kwatibe nitre gaikröta yei, nämä Jehová tarere aune ja ngwen metre Jehovai yekwe nun töi mikaba niä. Niaratre nämä ja ngwen ño yekwe nun dimikaba kukwe mike tuin jene jai aune nun mikaba dite kwe. Ja mräkätre kwati kän ju aune jondron nökani kwetre nianinte. Yebiti jondron kä nebätä ye abokän jötrö aune aune kukwe ja üaire yebrä kärekäre rükaba gare nuen. Kukwe tare krubäte nämä nemen bare ja mräkätrebätä akwa ñaka nämäne ja muaire. Niaratre nämä ja ngwen ño yekwe nun dimikaba ja tuin kukwe nämä nemen bare nunbätä yebe aune nun nämä bren yebe arato.

KUKWE RABABA GARE NUNYE ASIA

Batibe kukwe mrä mikaba gare nunye. Nun nübaiba sukursal Hong Kong. Nunkwe nünain oriente ye nunkwe ñan bämikabare jire ja töite. Asignación jökräbätä Jehovakwe nun dimikaba, yebätä nengwane nunkwe ñaka töbikaba bati bobu rikakäre. Kä 2013 ye ngwane muare kwärä nunkwe kä mikakaba África ja mräkätre tare nunkwe yebätä aune kä ño känti nun rabai ñaka nämä gare nuen.

Juta kri aune nitre kwati känti nunkwe ja kwitadre Hong Kong ye kukwe mrä nuainba nunkwe. Ja kitadre chino cantonés ye ñan rababa nuäre nunkrä. Akwa ja mräkätre nun kä ngäbitiba kä jutobiti aune mrö kweta nämä yete ye bänänte krubäte. Kukwe drie ye jataba nirien jötrö ngwarbe yete. Akwa kä aune ju ye ütiä nämä kabre krubäte yebätä Cuerpo Gobernante ja töi mikaba sukursal ye kwite kä madakänti aune jondron bätäkä ye rürübäinba bäsi jökrä kwetre. Bitikäre kä 2015 nunkwe ja kwitaba Corea del Sur känti nun täbe sribire. Blitadre kukwe nebiti ye ñan nuäre akwa nunta ja kite jankunu, nun kitra blite bäri nieta ja mräkätrekwe nunye

KUKWE RABABA GARE NUNYE

Ñan nuäre ja ketamuko mrä mrä känänkäre. Ja töi mikadre käne kukwe nuainne ngwane, bäri nuäre rükaba gare nunye. Ja mräkätre jökrä ye brukwä kwin ye nunkwe tuanina. Jehovakwe ni sribebare kwin krubäte ne kwe ni rabadre ja ketamuko mrä känene aune jökrä tarere (2 Cor. 6:11).

Ni jökrä taredre Jehovata nuainne erere aune kukwe keta kabrebiti Jehovata ni tarere bätä ni jie ngwen ye mikadre gare jai. Nun nämä nemen di nekä o nun nämä tuin ño ja mräkätre ie nun nämä ngwentari jai ngwane, ja ketamuko nunkwe tärä biani nunye yebätä nun nämä ñäketa ye nämä nun miketa dite. Jehová nämä orasion nunkwe kukwe nuin, nämä nun töi mike jäme aune nämä ja di bien nunye, nunkwe tuanina.

Kä nikanina kwati yete nükani gare nunye nunkwe sribidre krubäte, akwa yebiti ta nunkwe kä diandrekä jai jakrä kwärikwäri nükanina gare nunye. Ja kitata kukwe madabiti ngwane nikwe ja kötaidre au ye ütiäte niena gare nuen. Käre deu nunta blite dre namani tuin kwin nunye yebätä biti nunta debe bien Jehovai.

Ti rikadre nüne juta madate aune sribire misionero ye ti ñan nütübare jire. Jehová köböire kukwe jökrä raba nemen bare, niena gare tie aune tä kä mike juto tibätä. Profeta Jeremías erere tita niere: “Mäkwe ti ngökani, oh, Jehová” (Jer. 20:7). Kukwe kwin nun ñan ngübare mikani nemen bare kwe nunkrä aune ti nämä näin avionte ye mikani nemen bare kwe arato nun nikani juta keta känti. Sukursal continente ketarike känti nun jananbarera. Ti nämä chi ti ñan kukwe bämikabare jire ja töite yekänti. Asignación jökrä känti Lesli nämä ja ngwen kwin aune nämä ti dimike krubäte yebätä tita debe bien krubäte ie.

Nire kräke nunta sribi nuainne aune ñobätä ye käre nunta ngwen törö jai. Kä bä nuäre yete Jehovakwe kukwe kwin keta kabre nuaindi ni jökrä kräke ye nunta krire käi ngwen juto chi jabätä ka nengwane (Sal. 145:16).