¿Jondron braibe nikwe ye käi ngwan raba ño juto jabätä?

1. Jondron braibe nikwe ye käi tädre juto nibätä aune ni töi tädre jäme nieta ye ngwane, ¿dre nie tö akwa dre abokän nie ñaka tö?

¿MÄTÄ nüne ño ye käi juto mäbätä? Ye erere ngwane dre dre kwin tä mäkwe yebätä mätä ja töi mike. Ye medenbätä mä töita jäme aune ñaka ja töibikare jondron ñaka mäkwe yebätä. Akwa ni töita jäme ye abokän nita kwekebe kise mriani jabätä ye ñan ai gärätä. Metrere Kukwe Ngöbökwe tä niere “ñan nünandre okwä kware” ni mada tä nuainne ye erere, “akwa ni tädre ngwäte niara ngibiare” ni tädre tödeka jakwe ye mika jankunu dite (1 Tes. 5:​6-11; Sal. 1:​2, 3). Ye medenbätä nikwe ja di ngwandre jankunu sribikäre Jehová kräke (Rom. 12:1; 1 Tim. 3:1). Sribi mrä o asignación mrä mikai ni kisete o ñakare akwa yebiti ta ni tädre kä ngwan juto jankunu jabätä.

2. ¿Jondron nikwe käi ñan juto nibätä ye ño raba ni mike kukwe kri te?

² Jondron tärä nikwe ye käi ñaka juto nibätä ngwane, ni raba kite kukwe blo nuainne ja känenkäre. Ñodre, ja mräkätre ruäre raba ja töi mike sribire hora kabre te jondron tuakäre bäri jakwe. Metrere ja mräkätre ruäre käkwe ja töi mikanina ngwian goire aune jondron mada tö namani tuai jakwe ye diankäre jai. Nütübare kwe: “Jondron ne tädre tikwe”, “Ti ñan tä kä juain ngwarbe ta” o “Ti raba ngwian ne den jai aune bitikäre bianta täte”. Kukwe mika raba jabiti akwa Jehová kräke gota ye blo krubäte (Prov. 30:9). Ja mräkätre mada ie sribi konkrekasion ye ñaka ye medenbätä ja raba kite ruin ngwarbe ie aune raba kite kämikekä Jehovabätä (Gál. 6:9). ¿Se ñobätä ja mräkätre Jehová mikaka täte käkwe ja töi mikanina kore? Metrere jondron nämäne kwe ye käi ñaka jatani jutobätä.

3. ¿Filipenses 4:​11, 12 ye tä ni töi mike ño jäme?

³ Ruäre ngwane jondron tärä nikwe ye kä ñaka raba nemen juto nibätä akwa nikwe ja kitadre kukwe ye nuainne. Pablo ara käkwe niebare dreta tikwe ye käi ngwandre ño juto jabätä tikwe ye niena gare tie (ñäkädre Filipenses 4:​11, 12 yebätä). Pablokwe kukwe ne tikabare nämäne ngite ye ngwane akwa yebiti ta kä juto ye ñaka nianinte kän. Nita nüne ño ye kä ñaka juto nibätä. Pablo erere ni raba nüne kä jutobiti ni tö jondron tuai jakwe ñaka nikwe yebiti ta. ¿Aune kä juto tädre nikwe yekäre dre nuaindre? Kukwe ketamä kukwe ja tötikara nekänti yekwe ni dimikai mike gare jai.

DEBE BIANDRE

4. ¿Ñobätä kä tä nemen juto nibätä nita debe bien ye ngwane? (1 Tesalonicenses 5:18).

⁴ Ni täi debe bien käre ye ngwane kä täi juto käre nibätä (ñäkädre 1 Tesalonicenses 5:18 yebätä). Ñodre, jondron tärä nikwe ye ni täi käi ngwen juto jabätä ye ngwane, ni ñan ja di ngwain krubäte jondron ñan nikwe yebätä. Nita sribire Jehová kräke ye nikwe mikadi ütiäte jai ngwane, ni töi rabai sribire jankunu niara kräke aune sribi bien ñaka nie yebätä ni ñan töi ja dokwä mike bren. ¡Ye arabätä nikwe oradre ye ngwane debe biandre Jehovai nieta Bibliakwe! Aisete nita debe bien ye ngwane, ‘kä jäme Ngöbökwe ñaka nüke gare ni kä nebätä ye rabai nikwe’ (Filip. 4:​6, 7).

5. ¿Ñobätä nitre israelita rabadre debe bien Jehová ie? (Üai mikadre ñärärä).

⁵ Ani töbike nitre israelitabätä, töi nämäne mrö bian nämäne Egipto ñaka nämäne kwetre yebätä, bä kabre ñäkäbare Jehová rüere kwetre (Núm. 11:​4-6). Metrere kä nötare yete ta ñan nämäne nuäre kräketre. Akwa dre nuainbare Jehovakwe kräketre ye ngwandre törö kwe jai näre. Ñodre, nitre egipcio nämäne mike klabore jai aune nuainne tare ye ngwane Jehovakwe bren tare krä jätä juani nitre Egipto yebätä niaratre mikakäre kwäre. Akwa ye ñan ngörä namanintre kwäre nitre Egipto yebätä ngwane, nikanintre oro, ngwian aune dän ngwena jai (Éx. 12:​35, 36). Ye ñan ngörä niaratre rabadre kwäre nitre Egipto yebätä yekäre Jehovakwe ja die yebiti mren tain ye ñäkäninbiti ye tuani kwetre. Arato kä nötare yete köbö kwatire kwatire Jehovakwe bukani maná yebiti. Akwa, ¿se ñobätä kä ñan namanina juto bätätre? Mrö ñaka nämäne kwe ye ñan aibätä, ñakare aune ñaka namanina debe bien Jehová ie yebätä.

6. ¿Kukwe meden raba ni dimike debe bien?

⁶ ¿Drekwe ni dimikai debe bien? Kena köbö kwatire kwatire dre kwin tä nikwe yebätä nikwe töbikadre o ni raba kukwebätä nita debe bien ye tike jai (Lam. 3:​22, 23). Ketebu, mantre jetebe ni rabadre debe bien nitre ie aune bäri ütiäte Jehová ie kukwe kwin nuainta kwe ni kräke yebätä (Sal. 75:1). Ketamä, ja ketamuko töita debe bianbätä yebe nikwe ja ketadre. Ye käkwe ni dimikai debe bien aune kä juto ye täi käre nikwe (Deut. 1:​26-28; 2 Tim. 3:​1, 2, 5). Ñongwane ni raba debe bien ye ngwane debe biandre ye käkwe ni dimikai ñaka ja töi mike rubun jondron ñaka nikwe yebätä.

7. ¿Dre käkwe Aci dimikani kä ngwenta juto jabätä?

⁷ Aci nünanka Indonesia yebätä ani kukwe mike gare jai. Niara tä niere: “Pandemia COVID-19, ye näire ti jataba ja ñäkä ja mräkätre madabe yebätä kä ñan jatabare juto tibätä” (Gál. 6:4). ¿Dre käkwe niara dimikani ja töi kwite? Niara tä niere: “Dre kwin nämä nemen tikwe köbö kwatire kwatire aune ti nämä juta Ngöbökwe yete yebätä kä nämä juto tibätä yebätä ti ja töi mikaba. Tikwe debe bianba krubäte Jehovai ye köböire kä jatabata juto tibätä”. Nikwe ja ngwain Aci erere kukwe tare näire ye ngwane, kä juto ye ñaka riaikä nikän.

JA TÖI MIKADRE BOBRE

8. ¿Dre nakaninkä Barucbätä?

⁸ Ruäre ngwane Baruc sribikä Jeremías ben yebätä kä ñaka namani juto kukwe nämäne nemen barebätä yebätä. Nitre israelita ye ñaka ja mikai täte ngwane Jehovakwe gaite ye niara ye rabadre niere aune kukwe ye ñaka nuäre. Kä ruäre te sribi ütiäte mikani kisete Jehovakwe ye käi kwitaninkä kwe jabiti aune jatani töbike ja aibebätä aune dre ie tö nämäne ye aibebätä. Akwa Jeremías Ngöbö kukwe niekä yebiti Jehovakwe niebare ie: “Mä abokän, tä jondron bäri ütiäte känene ja kräke. Mäkwe ñaka känä jankunu” (Jer. 45:​3-5). Kukwe ne erere niebare ie raba ruin nie: “Mätä nüne ño ye käi ngwen juto jabätä”. Baruc käkwe kukwe ye kani ngäbiti aune ye köböire Jehovakwe kukwe kwin mikani nemen bare kräke.

9. ¿1 Corintios 4:​6, 7 ye tä dre driere nie? (Üai mikadre ñärärä).

⁹ Ja mräkätre ruäre sribi ruäre biandre o asignación ruäre mikadre kisete tö nemen nütüre ñobätä ñan aune kukwe gare ie, tä ja di ngwen sribikäre kwin o kä kwatí te tä sribire Jehová kräke yebätä. Kukwe ketamä ne tä nuain jökrä raba ruin nie, yebätä raba nemen töbike kore. Akwa metrere ye ngwane ja mräkätre mada kisete asignación mikata aune ñaka mikata niara kisete. Akwa, ¿dre käkwe dimikai kä ngwankäre juto jankunu jabätä? Pablokwe dre tikabare 1 Corintios 4:​6, 7 (ñäkädrebätä) ye ngwaninta törö kwe jai. Dre nuain gare nie ye ñan aibätä sribi mikata ni kisete, ñakare aune ye jondron ütiäte bianta Jehovakwe nie ñobätä ñan aune tä ja moto mike mantiame ni kräke yebätä (Rom. 12:​3, 6; Efes. 2:​8, 9).

10. ¿Drekwe ni dimikai ja töi mike bobre?

¹⁰ Jesús ja töi mikani bobre yebätä töbikadretari ye käkwe ni dimikai. Niara ye abokän Ngöbö Monsoi aune Jehovakwe niara kädekani bäri kri akwa yebiti ta nitre ja tötikaka kwe ye ngoto bätäninte kwe ye ngwandre törö jai. Apóstol Juan tikabare: “Rünkwe jändrän jökrä mikanina gare nämänena gare ie amne, niara jatani Ngöbökri amne rikadita Rün känti, ye abko nämanena gare ie, […] rikaba nun ja tötikaka ben ye ngoto bätete ni klabore käkwe nuendre ye kwrere” (Juan 13:​3-5). Niara ye ngoto bätädrete nütüdre kwe akwa ñan nuainbare kwe aune nünan kwin ye ñan känänbare kwe (Luc. 9:58). Töi bobre aune dre nämä kwe ye käi nämä jutobätä. Kukwe kwin bämikani kwe ni käne (Juan 13:15).

11. ¿Dre käkwe Dennis dimikani kä ngwenta bäri juto jabätä?

¹¹ “Tita ja di ngwen ja töi mikakäre bobre Jesús kwrere akwa ñan nuäre ti kräke”, nieta Dennis nünanka Países Bajos yekwe. “Sribi ie ti töta nemen bianta ja mräkä mada ie ye ngwane tie biandre tita nemen nütüre sribi ye nuain gare bäri kwin tie yebätä. Akwa ti töita nemen ye kwrere ngwane tita ja tötike ja töi mikadre bobre yebätä. JW Library®, yete texto keta kabre tita tike kukwe ye ngwankäreta törö jai. Ne madakäre discurso tä blite kukwe yebätä ye tita denkä jai celular yete.aSribi jökrä bianta nie juta Ngöbökwe yete ye Jehová käi kitakakäre aune ñan ni ai käi kitakakäre ye nemen gare tie. Ñobätä ñan aune sribi ye Jehovakwe aune niarata sribi bien nie”. Ja rabadre ruin ja mräkä ne erere nie ngwane ja di ngwen ja töi mike bobre. Arato ja ketata Jehovabe ye mikadre bäri dite aune ye köböire kä ngwen juto nibätä (Sant. 4:​6, 8).

KUKWE KÄBÄMIKATA JA KÄNENKÄRE NIE YEBÄTÄ TÖBIKADRETARI

12. ¿Kukwe meden meden käbämikani nie kätä ni dimike nüne kä jutobiti aune ja tuin kukwe tare ye ben nengwane? (Isaías 65:​21-25).

¹² Jehovata kukwe kwin käbämike ja känenkäre nie bätä nikwe töbikadretari ngwane kä ngwain juto kwe nibätä kukwe tare te nita nüne nengwane ye ben. Kä te nita nüne gwäune ye ñan nuäre gare kwin Jehovai akwa kukwe tare ye denkä kwe ja känenkäre ye tä käbämike nie tärä Isaías yebätä (ñäkädre Isaías 65:​21-25 yebätä).b Kä bä nuäre yete jondron rabai nikwe nünain kwin, sribi kwin rabai nikwe, mrö bänänte aune kwin tädi. Kukwe tare rakaikä nibätä o monso nikwe bätä ya, yebätä ñaka töbikai jire (Is. 32:​17, 18; Ezeq. 34:25). Kukwe kwin käbämikata ja känenkäre ne rabadi bare.

13. ¿Drebe nita ja tuin nengwane aune kukwe käbämikani ja känenkäre nie yebätä töbikadretari ye tä ni dimike ño?

¹³ ¿Ñobätä ütiäte kä nengwane töbikadre bäri kukwe käbämikata ja känenkäre nie yebätä? Ñobätä ñan aune nita nüne “kä mrä” näire aune ni jökrä tä ja tuin kukwe “tare nain nuäre” ye ben (2 Tim. 3:1). Akwa Jehová tä ni dimike köbö kwatire kwatire aune tä ni jie ngwen bätä nita dre ribere jai ye tä bien nie ja tuakäre kukwe tare ben (Sal. 145:14). Ne madakäre ruäre ngwane nita sribire ja dibiti mrö ngwankäre ni mräkä kräke sö kratire kratire. Akwa ruäre ngwane ñan tä nemen nuäre akwa ni ñaka täi nüne kärekäre, ñakare aune Jehovata kukwe kwin käbämike nie känti nikwe nünandi kwin kä bä nuäre te aune jondron keta kabre mada biandi kwe nie (Sal. 9:18; 72:​12-14). Bren tare tä nibätä, nita nemen bren gwä gwä o bren depresión ye tä nibätä ye ñan aibätä nikwe nünain kärekäre aune tö ngwankrä ñaka nikwe ye ñan nütüdre. Metrere Ngöbökwe kä bä nuäre yete bren tare aune nita krüte ye dianka jökrä (Apoc. 21:​3, 4). Kukwe käbämikata kwe nie ye tä ni dimike ñaka ja töibikaire nengwane aune ja töi mike rubun kukwe nemen bare kä nengwane yebätä. Aisete kukwe tare nuaindi nibätä, bren tare tä nibätä, ni mräkä tare krütani nikän o kukwe mada tä nemen bare nibätä yebiti ta kä juto ye täi käre nibätä. ¿Ñobätä? Ñobätä ñan aune dre dre rabadi bare nibätä kä nengwane akwa kä bä nuäre te kukwe tare ye diainkä kärekäre (2 Cor. 4:​17, 18).

14. ¿Ni raba tödeka jakwe ye mike ño bäri dite?

¹⁴ ¿Nünankäre kä jutobiti kä nengwane ni raba tödeka jakwe ye mike ño bäri dite? Nie raba tödeka ye abokän lente mikata ja okwäbiti ye kwrere. Ñobätä ñan aune tä ni dimike kä bä nuäre ja känenkäre ye mike tuin bäri mrebe jai. Ñodre, ngwian ñakare nikwe ye tä ni mike töbike ye ngwane, kä bä nuäre yete ngwian ñan rabaira jire ütiäte. Aune jondron ütiä ñan rabaira nibiti bätä ni ñan täira nüne bobre ye ni raba bämike ja okwäte. Nengwane sribi bian ñan nie yebätä jata nemen ruin ngwarbe nie, akwa kä bä nuäre yete ni töi täi metre aune kä kwatí te ni täi Jehová mike täte akwa yebiti ta sribi ye ñan ai rabaira ütiäte ni kräke ye bämike ja töite (1 Tim. 6:19). Nengwane kukwe keta kabre ni kisete yebätä ñan tä nemen nuäre ni kräke kukwe ja känenkäre ye bämikakäre ja okwäte. Akwa nikwe ja di ngwain nuainne ngwane bätärekä bätärekä rabai bäri nuäre ni kräke kä bä nuäre ye bämikakäre ja töite.

15. ¿Christabätä kukwe nemen bare ye tä dre driere nie?

¹⁵ Denis kädrite párrafo 11 ye muko kwe kädekata Christa tä niere: “Bren tare tä tibätä yebätä tita ja tare nike dikaro. Tita jerekäbe tibienta aune tita näin silla de rueda aibe te. Mrä känera ti ñan jataita kwin nieba doctorkwe tie. Ye bätäräbe ti nütüba: ‘Kä tuin ño ja känenkäre tie ye erere ñan tuin doctor ne ie’. Tita ja töi mike kukwe kwin ja känenkäre yebätä ye köböire ti töi tä nemen jäme. Kä nengwane ti rabadre kä ngwen nüke jai bren tare nebe, akwa ¡kä bä nuäre yete ti täi jondron jökrä nuainenta aune ti täi kä ngwen juto jabätä!”.

“NIRE NIRE TÄ NIARA JÜRÄ NGWEN JABÄTÄ YEKWE ÑAKA JONDRON TÄI NIKAI JIRE”

16. ¿Niré tä Jehová jürä ngwan jabätä yekwe ñaka jondron täi nikai ye ñobätä Davidkwe niebare?

¹⁶ Nita nüne ño ye käi juto nibätä kukwe tare ben nita ja tuin yebiti ta. Ani töbike rei David yebätä. Niara ye monso nimä kwe tuani krüte raba ruin nie. Ne madakäre niara ye rüere ñäkäbare ngwarbe, nuainbare tare aune nämäne ngitiekä kä kwatí te ja nire ye mikakäre kwäre. Akwa kukwe jökrä yebiti ta kä nämä jutobätä. Kukwe ne niebare kwe Jehovabätä: “nire tä niara jürä ngwen jabätä yekwe ñaka jondron täi nikai jire” (Sal. 34:​9, 10). ¿Ñobätä kukwe ne niebare kwe? Ñobätä ñan aune kukwe tare ye Jehová ñaka raba denkä nibätä, akwa dre ribeta jai ye tä bien nie ye nämäne gare ie (Sal. 145:16). David erere kä juto nibätä ñobätä ñan aune Jehová tä nibe kukwe ñokwä yebiti ta gare nie.

17. ¿Ñobätä mä tä ja kitai jankunu kä ngwankäre juto jabätä kukwe ñokwä yebiti ta?

¹⁷ Kukwe tare ben nita ja tuin yebiti ta kä ngwandre juto jabätä ie Jehová tö (Sal. 131:​1, 2). Ño nikwe nünandre kä jutobiti nibira gare nie. Aisete ja di ngwen jankunu debe bien aune ja töi mike bobre. Arato kukwe kwin ja känenkäre nikrä yebätä töbikadretari. Ye ngwane nikwe kukwe ne erere niedi: “Tita nüne ye käi tädre ño juto tibätä ye niena gare tie” (Filip. 4:11).