“Nire nire tö Ngöbö mikai gare jai” ye dimike bengwairebe

1. ¿Nita kukwe driere ye nitre tä kai ngäbiti ño? (Hechos 13:​47, 48; 16:​14, 15).

SIKLO kena yete, nitre nämäne niken kukwe driere ye ngwane nitre tö nämä kukwe mike gare jai ye nämä ja tötike Bibliabätä ye kai ngäbiti bengwairebe (ñäkädre Hechos 13:​47, 48; 16:​14, 15 yebätä). Ye erere, nengwane kukwe kwin Gobran Ngöbökwebätä ye drieta ye nitre ruäre tä kukwe nuin ngwane, bengwairebe tä ja tötike Bibliabätä ye kai ngäbiti. Mada abokän ñaka töta nemen kukwe ye kukwe nuai akwa käta niken ta ngwane töita kite kukwe metre Ngöböbätä ye mikabätä gare jai. ¿“Nire nire tö kukwe metre Ngöböbätä” mike gare jai tä kwen nie kukwe driebätä ngwane, dre nuaindre?

2. ¿Kukwe drieta aune nüra nökata aune ötata ye ñobätä bäsi ja kwrere nie raba?

² Nita kukwe driere ye keta raba ni nüra nökaka yebätä. Ni nüra nökaka tä krire kä ükete nüra kräke akwa nüra mada niena ötare tä tuin ie ngwane bengwairebe tä ötö. Erere arato, nita kukwe driere nitre ie dimikakäre kukwe metre Bibliabätä mikakäre gare jai ye ngwane ni iti tö kukwe metre ye mikai gare jai bengwairebe tä kwen nie, ye ngwane bengwairebe ja di ngwanta dimike (Juan 4:​35, 36). Nikwe ja di ngwain ni iti töita ño ye mikakäre gare jai ye köböire nire nire tö kukwe metre mikai gare jai bökän rabai gare nie aune ye ererebätä nikwe dimikai. Ni iti tä kukwe metre drieta kena ie kai ngäbiti ye ngwane, dre nuaindre. Arato ni ye dimika raba ño jankunu nirien ja üairebiti yebätä ja kitai kukwe ja tötikara nebätä.

NITRE TÖ KUKWE MIKE GARE JAI YE NGWANE

3. Nitre tö kukwe metre kain täte kwandre nie kukwe driebätä ngwane, ¿dre nuaindre? (1 Corintios 9:26).

³ Nita kukwe driere ye ngwane, ni iti tö kukwe metre Bibliabätä mikai gare jai tä kwen nie ye ngwane bengwairebe nita dimike ne kwe rabadre näin ji metre ja nire kokwäre yebiti. Nita blita kömike kena ben ye ngwane, ja tötika Bibliabätä driere ie aune nübaidre gätäbätä bengwairebe nikwe ñaka kä juandre ta (ñäkädre 1 Corintios 9:26 yebätä).

4. ¿Ruäre ngwane blitata kena nitre ben ye ngwane bengwairebe raba ja tötike Bibliabätä kai ngäbiti kukwe namani bare meden tä mike gare?

⁴ Ja tötika Bibliabätä ye driedre. Ruäre ngwane, blitata nitre ben ye ngwane bengwairebe tä ja tötika Bibliabätä ye kai ngäbiti. Ñodre, köbö jueve juta Canadá yekänti, meri testiko nämene kukwe driere carrito yebiti ye ngwane, monso bati jatani käkwe täräkwata Mä raba nüne kä jutobiti kärekäre ye diani keteiti jai. Meri testiko ye käkwe niebare ie; täräkwata yebiti nunta nitre tötike Bibliabätä aune ñan ütiä käräta. Monso bati ye tö nämäne ja tötikai niebare kwe aune número jakwe biani kwe ie. Ñongwane ja tötikai Bibliabätä monso yekwe ngwanintari meri testiko ie köbö ye ara te dere. Bämän krütebätä raba niken ngwanintari meri testiko yekwe, monso yekwe niebare ie: “¿Mä ñan raba kite jetebe? Ti täi gwi”. Meri testiko yekwe jändrinaine ja tötika kömikani ben, aune monso ye janamane bämän krüte yebätä gätäbätä kena, ririabare jankunu ja üairebiti.

5. ¿Nikwe ja tötika Bibliabätä ye driedre ni iti ie ngwane, drebätä töbikadre? (Üai mikadre ñärärä).

⁵ Monso bati bätä blitani párrafo 4 ye erere ni jökrä ñan tä kukwe metre kai ngäbiti. Bä kabre blitadre kukwe keteiti tä nitre mike töbike krubäte yebätä nitre ben ye ngwane niaratre tö raba kite kukwe mike gare bäri jai Bibliabätä ye ngwandre törö jai. Akwa yebiti ta nikwe ja di ngwandre ja töi mike kwatibe kukwe kwin ye driebätä aune ja töi mike bökän nitrebätä, ye köböire ni iti tö raba kite ja tötikai Bibliabätä nibe. ¿Dre nie raba nitre ie, ja tötika Bibliabätä kömikakäre ben? Ja mräkätre kwatí kräke tä nemen nuäre ja tötika Bibliabätä kömikakäre nitre ben ye ie kukwe ye ngwanintari. Dre niebare kwetre ye ani mike gare jai.

6. ¿Ni gwi yekwe ni tuadremetre jankunu blite ben o niken känti yekäre dre nuaindre?

⁶ Nitre kukwe driekä ruäre aune prekursor käkwe niebare, kä ruäre känti bäri kwin nikwe ñaka niedre ti tö mä tötikai Bibliabätä o clase biain mäi. Bäri kwin nikwe niedre: blite mäbe, ja kite mäbe, kukwe mikai gare bäri Bibliabätä mäi. Ye köböire nitre töi rabai ja tötika ye kai ngäbiti. Köbö madate blitakäre bäri kukwe yebätä ni yeben ni raba niere “Käre kukwe ruäre ngwantarita jai ye Biblia tä mike gare ye kwin krubäte ñan ererea” o “Biblia ñan tä blite kukwe briasi ye aibebätä, ñakare aune tä mäträre nibätä ne kwe nikwe nünandre ño köbö kwatire kwatire yebätä”. Ne köböire nitre töi raba kukwe mika gare bäri jai aune köbö mada te ni raba nikenta känti. Arato nie raba: “Kä braibe te kukwe ütiäte mä dimikakäre raba nemen gare mäi”. Bämän kratire kratire ni näin känti niedre ye ñan ütiäte, ñobätä ñan aune kren raba nemen ie o töi raba nemen ja dibiti ja tötika Bibliabätä ye käi ngäbiti.

7. ¿Ñongwane kukwe metre tä kwen ni iti ie tä nüke gare ietre? (1 Corintios 14:​23-25).

⁷ Nübaidre gätäbätä. Siklo kena yete nitre nämä niken nitre kristiano ben gätäbätä ye ngwane, kukwe metre nämä kwen ietre ye ga nämä kwetre (ñäkädre 1 Corintios 14:​23-25 yebätä). Ye kwrere arato nengwane, nitre rikadre bäri jötrö gätäbätä nibe ye ngwane jatai nirien bäri jötrö ja üairebiti. Akwa, ¿ñongwane nitre ne nübaire? Tärä Mä raba nüne kä jutobiti kärekäre kukwe ja tötikara 10 yete blitata nitre nübaidre gätäbätä yebätä, akwa ni jämi nüke ja tötike kukwe ja tötikara 10 yete ye ngwane, nikwe nübaidrera ja töi mike niken gätäbätä. Nuaindre kenanbe nita ja tötike kömike ben ye ngwane, akwa arato drebätä blitai, kukwe kädriei yebätä ni raba niere ie o drebätä ja kitai täräkwata Ni Mikaka Mokre yebätä ye ni raba mike gare ietre.

8. Ni iti nübaita gätäbätä ngwane, ¿dre dre mika raba gare ie? (Isaías 54:13).

⁸ Ni iti nübaidre gätäbätä ye ngwane, iglesia madate dirita ño aune gätä nikwe nuainta ño ye niedre ietre. Tärä Ni Mikaka Mokre yebätä ni ja tötika kwani kena ye bitikäre, ngwanintari kwe meri testiko nämäne tötike yei: “¿Ja mräkä käkwe kukwe ngwinintari ye ie ni jökrä kä gare?”. Meri testiko ye käkwe niebare ie, konkrekasion ye abokän ni mräkä ye kwrere yebätä nunta ja di ngwen ni jökrä ye kä mike gare jai. Meri ja tötikaka ye käkwe niebare ie, iglesia kwe yete bäsi ni jökrä ie ni mada kä ñaka nämä gare jire. Nitre ie ño kräke nita gätä nuainne ye ñaka gare aisete mikadre gare ietre ye kwin krubäte (ñäkädre Isaías 54:13 yebätä).a Gätä nuainta yete ja kitata, ni dimikata aune Jehová käikitakata (Heb. 2:12; 10:​24, 25). Ye medenbätä, kukwe keta kabre nuäre nuäre nuainta gätä yete aune gätä ye tä ükaninte kwin, ñan ni töi mikata ja dibiti kukwe nuainne (1 Cor. 14:40). Gätä yebätä nita niken ja kite, ja tötike kukweta nemen gare nie yebätä kä ñaka tädre iko gwita gätä nuainta ye ngwane ye mikata gare. Ne madakäre nitre testiko ye tä ja ngwen neutral yebätä nun ñaka blite política yebätä o ngrengren jabiti gätäte. Ne madakäre, dre nuainta gätäbätä ye mikakäre gare ni ja tötikaka iti ie ngwane, video ¿Gätä nuainta ño nunkwe? ye mikadre tuare.

9, 10. Nitre nübaita gätäbätä akwa kukwe ruäre jüräta nemenbätä ye ganainkäre, ¿nikwe kukwe meden meden mikadre gare ie? (Üai mikadre ñärärä).

⁹ Nitre ruäre ñaka tö niken gätäbätä nane kädekadre testiko aune yebätä kä jüräta nemen bätätre. Yebätä, gätäte ni jökrä ka ngäbitita ye nikwe niedre ie, tä niken ngwane raba niken täke tibien aune ni kukwe nuin jerekäbe, ñan mikai ja dibiti blite gätäte o ja mike testiko ye kwrere, ñakare. Aune gätä ye nuainta keteitibe ñan dirita kaibe solotadre ie, aisete monsotre kia ye tä medente ye tuin ietre . Monsotre tärä kwe ngwane raba niken gwairebe aune ñan diridi kaibe jenena monso kia ye ie mikadre gare ietre (Deut. 31:12). Yete ñan ngwian käräta, ñobätä ñan aune Jesukwe niebare ye kwrere: “Biani ngwarbe munye aisete munkwe bian ngwarbe” (Mat. 10:8). Rikadre gätäbätä ye ngwane, ñan dängutu ütiäte kitadre jabätä ribeta, ñobätä ñan aune ni bä ño ye ai ütiäte, dreta ni brukwäte ye bäri ütiäte Jehovakrä ye niedre ie (1 Sam. 16:7).

¹⁰ Ni ye rikadre gätäbätä nibe ngwane, dimikadre ne kwe ja rabadre ruin kwin ie. Nitre umbre aune ja mräkätre mada mada ye mikadre gare ietre. Ja rabai ruin yete ie ye ngwane, tö raba niken jankunu gätäbätä. Texto kädekateta yete ye nikwe känändre gwairebe bentre Biblia ñan kwetre ye ngwane aune nita ja kite ño gätä yete ye nikwe mikadre gare ietre.

JA TÖTIKA KÖMIKADRE NI ITI BEN NGWANE

11. ¿Kätä nuäi nitre gwi ie yebätä töbikadretari ye ütiäte ya?

¹¹ Nikwe töbikadretari kukwe ruärebätä ni näin iti tötike kenanbe ngwane. Kä nuäi te ni rükai, nikwe niedre ie erere ni rikadre känti. Nitre ni käite ñaka kukwe ye töbaire akwa nita kukwe ye kwrere ükete ai ngwane, ni rükadre kä täbiti. Ja mräkätre ie nitre tötika gare kwin yekwe niebare, ja tötika kömikai kena ye ngwane, ni ñan ora kabre te ni ye tötikai, töi rabai ja tötikai jankunu yebiti ta. Arato ñan blitadre krubäte ñakare aune nitre ye tuadremetre blite bäri (Prov. 10:19).

12. ¿Ni ja tötikaka nikwe ye töi mikadre dre nuainne?

¹² Nitre ye rabadre Jehová aune Jesús mike gare jai bätä tarere ye ie ni tö nita ja tötika kömike ni yebe ngwane. Akwa Biblia yebiti nikwe kukwe jökrä ye driedre ietre, ni töi ño ye ñan ai driedre ietre (Hech. 10:​25, 26). Pablokwe kukwe driebare ngwane, blitabare bäri kwe Jesús yebätä, Jesús ye köböire Jehová raba nemen gare bäri kwin nie aune ni raba tarere (1 Cor. 2:​1, 2). Ütiäte krubäte nitre krire kukwebätä ye dimikadre töi kwin keta kabre orore, ngwiane aune jä ütiäte ye kwrere ye mike nirien ye Pablokwe niebare (1 Cor. 3:​11-15). Jondron ütiäte ütiäte ye abokän tödeka, ni töbätä, kukwe mike gare kwin jai aune Jehová jürä ngwen jabätä (Sal. 19:​9, 10; Prov. 3:​13-15; 1 Ped. 1:7). Ni raba ja ngwen Pablo erere arato, nikwe nitre ja tötikaka nikwe ye dimikadre ne kwe tödeka kwetre tädre dite aune ja ketadre Jehovaben (2 Cor. 1:24).

13. ¿Dre nuaindre ni ja tötikaka nikwe ngübakäre bätärekä aune töi mikakäre nüke gare jai? (2 Corintios 10:​4, 5; üai mikadre ñärärä).

¹³ Nikwe ja ngwandre Jesús kwrere ni ja tötikaka nikwe yeben, ngübadre bätärekä aune töi mikadre nüke gare jai. Kukwe raba mike ja gaire ye ñan ngwandretari ie ja tötikata ben ngwane. Kukwe keteiti ye ñan tä nemen nüke gare ie tuin nie ngwane, köbö madate blita raba kukwe yebätä ben. Ruäre ngwane kukwe keteiti drieta Bibliakwe ye ñan tä kai ngäbiti bengwairebe ngwane, ñan mikadre ja dibiti kukwe jökrä ye kain täte (mike täte), kä biandre ietre ne kwe kukwe metre ye rükadre brukwäte (Juan 16:12; Col. 2:​6, 7). Bibliabätä kukwe ngwarbe drieta ye ketata ki dite nitadre tibien yebätä (ñäkädre 2 Corintios 10:​4, 5 yebätä; aune nota tä Biblia de estudio yebätä kädekata “derrumbar cosas fuertemente atrincheradas” ye mikadre ñärärä). Ni ja tötikaka ie kukwe driebare käne käne ye tuin era ie akwa kukwe metre rükadre brukwäte yekäre käne dimikadre Jehová mike tuin jai, kä ja kriemikara ye kwrere (Sal. 91:9).

NI ITI TÄ NÜKE KENA GÄTÄBÄTÄ NGWANE

14. ¿Nitre tä nüke gätäbätä ye nikwe kadre ngäbiti ño?

¹⁴ Jehová ñaka tö ni tuai nitre kitete käi medente, ngwian bäkäne o ñakare o kwata bä ño yebätä, ñakare aune nikwe nitre tä nüke kena gätäbätä ye taredre aune kadre ngäbäbiti kwin (Sant. 2:​1-4, 9). Ni raba ye nuainne ño ye ari mike gare ruäre jai.

15, 16. ¿Nikwe dre nuaindre ne kwe nitre tä nüke kena gätäbätä ye ie ja rabadre ruin kwin?

¹⁵ Nitre ruäre tä niken gätäbätä jerekäbe kukwe gakäre o ni mada töi mikani niken gätäbätä yebätä tä niken. Ni ye kwrere rükadre ngwane, nikwe kadre ngäbiti kwin. Aune blitadre jäme ben gare nie ye kwrere, akwa ñan gare nie yebätä ñan kukwe ngwandretari ie töi nikakäre. Ni raba nübaire täke ja ken. Biblia o täräkwata medenbätä nita ja kite ye känändre kräke nikwe ye ni raba mike tuare ie. Akwa kukwe mada nuain raba nikwe. Ñodre, ni brare iti ñan ja ngwäkitani kwin nämä ruin ie yebätä kä jürä nämä nemenbätä rükakäre gätäbätä. Töi mikakäre jäme ja mräkä käkwe kani ngäbiti yekwe niebare ie, nun testiko Jehovakwe nun ñan dän ütiäte kite jabätä nunta ja ngwäkite ni jökrä ye erere. Ja känenkäre, ja ngökani ñöte kwe akwa ja mräkä ye käkwe ja ngwanbare ño ben kenanbe ye täbe törö ie. Ni tö nitre mikai gare kwin jai ye kwin krubäte akwa nitre tä nüke kena gätäbätä kukwe kwekwe yete ni ñaka ja mikadre krubäte (1 Ped. 4:15).

¹⁶ ¿Nitre tä nüke kena gätäbätä ye ie ja tädre ruin kwin gätäte ye kräke dre mada nuainne? Nita nüke gätäte, nita ja mräkätre ben aune blite bentre o blite gätäte o kukwe bämike ye ngwane nikwe dre niedi yebätä töbikadre kwin käne, nire nire tä nüke gätäbätä yebätä. Ni ñan testiko yebätä ni ñaka kukwe blo aibe känändre o dre mikata täte kwetre ye rüere ñan ñäkädre, kukwe ye köböire töi ñan rabaita nänbätä gätäbätä yebätä (Tito 2:8; 3:2). Ñodre, nitre ñan kukwe nikwe mike täte yebätä ñan kukwe niedre nierare o nitre ye mike tuin ngwarbe jai (2 Cor. 6:3). Ja mräkätre tädre kukwe kädriere käkwe töbikadre kwin erauto, dre niedi kwe yebätä o kukwe meden kädekateta kwe yebätä. Nitre ñan testiko Jehovakwe tä nüke gätäbätä ye ie kukwe ruäre ñan nüke gare ye medenbätä blitadre kwe kukwe nuärebiti, ne kwe rükadre gare ietre.

17. ¿Ni iti tä kukwe metre mike gare jai ye kwandre nie ngwane nikwe ja töi mike dre nuainne?

¹⁷ Nengwane, kukwe drie ye nuaindre drekebe ngwarbe ñobätä ñan aune nitre kwatí “töi nünanbätä kärekäre” ye tä kwen nie (Hech. 13:48). Yebätä, nita kukwe driere ngwane, ni iti tä juto biare kukwe metre kukwe nuabätä ngwane, bengwairebe nikwe ja tötika Bibliabätä ye driere ie aune nübaidre gätäbätä arato. Ye köböire nikwe niaratre dimikai näin ji “ja nire kokwäre” yebiti (Mat. 7:14).