Jehová ye “kä ngwanka juto erametre tibätä”

1, 2. a) ¿Ja ruin ño nitre kwati ie kä nengwane? b) ¿Dre rabai gare nie kukwe ja tötikara nekänti?

NENGWANE nitre kwati ye tä näin kisere kä juto ye jiebiti. Tädre ja di ngwen ne kwe kätä nemen jutobätä, akwa ñan tä nuin raire. Ye medenbätä, nitre kwati ie ja ruin ulire krubäte aune dita nekä bätä jata nemen ruin ngwarbe ie. Nitre kristiano ye tä ja tuin kukwe ne kwrere ben siba. Metrere, nita nüne “kä krüte näire” ye medenbätä, kukwe tare tä nemen ni kisete o tä nüke ni töite ye ben tä ja tuadre nie (2 Tim. 3:1).

² Kukwe ruäre raba kä juto goire nikän aune kä ngwankäreta juto jabätä dre raba ni dimike ye nibike mike gare jai kukwe ja tötikara nekänti. Akwa känenkri nire raba kä juto erametre bien nie yebätä nibike blite.

NIRE RABA KÄ JUTO ERAMETRE BIEN NIE

3. ¿Dre nemen gare nie Jehovabätä jondron dätebare kwe yebätä? (Üai mikadre ñärärä).

³ Jehová yebätä käre kätä juto aune yebätä nikwe kä ngwandre juto jabätä yei niara tö. Ye medenbätä, niarakwe kä bä nuäre sribebare ni kräke, jondron bä jene jene sribebare kwe, mrö bänänte, arato jondron nire tä jadenkä abokän tä kä ngwen juto nibätä. Bokänä, ni tare Jehovakwe aune tö kä tuai juto nibätä.

Cría de elefante: Image © Romi Gamit/Shutterstock; polluelos de pingüino: Vladimir Seliverstov/500px via Getty Images; chivitos: Rita Kochmarjova/stock.adobe.com; dos delfines: georgeclerk/E+ via Getty Images

4. a) ¿Kukwe tare tare nemen bare käbiti tibien tuin Jehovai akwa ñobätä kä juto kärebätä? b) ¿Dre nuainta Jehovakwe ni kräke? (Salmo 16:11).

⁴ Kukwe tare ben ni jökrä tä ja tuin kä jökräbiti tibien ye nüke gare kwin Jehovai aune yebätä tä nemen ulire, akwa Biblia tä kädeke “Ngöbö kä juto Bokänkä” (1 Tim. 1:11). Kukwe keteiti tä kä mike jutobätä ye abokän, kukwe tare tä ni mike ulire ye diankakäre köbö kitanina kwe aune ye ngübata bätärekä kwe. Nengwane, ja ruin ño nie yebätä töita aune tä ni dimike kä ngwen juto jabätä (ñäkädre Salmo 16:11 yebätä).a Monso kwe Jesús ye dimikani ño kwe ye ani mike gare jai.

5, 6. ¿Ñobätä kä juto Jesubätä?

⁵ Jesús ye tä kä ngwen juto käre jabätä Jehová ye erere. Ñobätä ñan aune, Ngöbö “ñaka tuin nie ye abokän erere niara bä” aune Rün kwe töi ño ye erere tä ja ngwen (Col. 1:15; 1 Tim. 6:15). Kukwe madabätä niarabätä kä juto ye abokän, kä kwati te niara aibe nünanbarera Jehová kä juto bäkänkä yebe yebätä.

⁶ Dre dre ribeta Jehovakwe Jesuye, ye tä nuainne jökrä yebätä käre kä jutobätä (Prov. 8:​30, 31; Juan 8:29). Aune tä ja mike täte ye medenbätä, Rün kwe tä niara kai ngäbiti aune dimike (Mat. 3:17).

7. ¿Dre dre raba kä ngwen juto nibätä?

⁷ Nita nökrö Jehová ken ye ngwane, kä juto erametre ye raba nemen nikwe arato. Ni raba Jehová mike gare jai aune ja ngwen niara erere ngwane, kä täi juto käre nibätä. Ne madakäre, nita niara töi mike gare yebätä niara tä ni kain ngäbiti ye tä kä ngwen juto nibätä (Sal. 33:12).b Ruäre ngwane, kä juto ye tä nete nikän tä nemen ruin nie. ¿Yebätä Jehová ñan niena ni kain ngäbiti? Ñakare, metrere ni töi ngite ye medenbätä ruäre ngwane nita nemen ja tare nike, nita nemen ulire aune töbike krubäte ye nüke gare kwin ie (Sal. 103:14). Dre raba kä juto ye goire nikän aune kä juto ye rabadreta nikwe yekäre dre nuaindre yebätä ani blite jankunu.

DRE RABA KÄ JUTO GOIRE MÄKÄN YEBÄTÄ MÄ JA NGÜBABITI

8. ¿Kukwe tä nemen ni kisete ye köböire ni raba ja tare nike ño?

⁸ Kukwe kena: kukwe ben tä nemen ja tuadre nie. Ja mikata ni rüere, nierare kukwe tare tä nemen bare käbiti tibien o ngwian ñakare nikwe yebätä, aune bren kisete ja tare nikata o ni niena umbre yebätä. Kukwe ne kwrere raba kä juto ye goire nikän aune ni di ñaka tä nemen kukwe tare ye kwitakäre ye ngwane bärira jire. Biblia tä niere “ni brukwä ulire ye ngwane, ni töi ñaka rabai kukwe nuainbätä” (Prov. 15:13). Kä köbökä aibe te ni umbre konkrekasion jie ngwanka kän eteba umbre ngöra aune meye bätä rün krütani kän, yebätä namani uli. Akwa niara mräkätre nämäne nire ngwane, ja nämä nemen ruin ño ie ye tä mike gare: “Kukwe keta kabre nämä nuaindre tie yebätä kä ñaka nämä nemente tie ti mräkätre kräke. Yebätä ja nämä nemen ruin ulire, kaibe tie, ti dimikai ñaka raba jire nämä ruin tie”. Nita nemen ja tare nike krubäte nemen gare metre nie.

9. ¿Kukwe tare nemen bare nibätä yebiti ta ja töi mikadre ño? (Jeremías 29:​4-7, 10).

⁹ ¿Kä juto rabadreta nikwe yekäre dre nuaindre? Kukwe ño ño yebiti ta nikwe käre kä ngwandre juto jabätä nieta Bibliakwe. Ye erere, nitre ñaka töbike nengwane. Nitre israelita nämäne ngite kä Babilonia yete ngwane nämenentre nüne ño yebiti ta niaratre käkwe kä ngwandre juto jabätä Jehovakwe niebare ietre (ñäkädre Jeremías 29:​4-7, 10 yebätä).c ¿Dre nemen gare ja töi kräke nie? Ja töi mikadre kukwe kwin tä nemen bare nibätä yebätä aune ye käi ngwandre juto jabätä. Jehovakwe ñan mä mikaite kaibe, mä dimikadi kwe, ngwen törö jai (Sal. 63:7; 146:5). Meri testiko iti kädekata Efi, jurüainbare tare yebätä ñan namani dikekä, niara tä niere: “Jehová, ti mräkätre aune ja mräkätre konkrekasionte, niaratre nämä ti dimike yebätä ti nämä debe bien ietre. Aisete ti nämä ja di ngwen kä ngwankäre juto jabätä”.

10. ¿Nikwe dre ngwandre törö jai ne kwe kä juto ye ñaka riadrete nikän?

¹⁰ Kukwe tare raba nemen bare nibätä o ni mräkäbätä yebiti ta ni raba nüne kä jutobiti (Sal. 126:5).d ¿Ñobätä? Ñobätä ñan aune, kukwe kwin tä nemen bare nibätä ye ñan aibe ngwane nikwe kä ngwain juto jabätä, ñakare aune kukwe tare yete ta. Ye erere precursora iti kädekata María tä mike gare: “Kukwe tare tä nemen bare nibätä, ye ngwane ni raba kä ngwen juto jabätä nikwe töbikai kukwe käbämikata Jehovakwe nie yebätä ngwane. Akwa ye ñan aibätä ni ñaka raba nemen ja müaire o ulire ye ñan ai gärätä, jata nemen ruin ño nie ye ni raba niere. Jehovakwe ni dimikai kä ngwen juto jabätä”. Matare kukwe keta kabre tare tä nemen bare ye ñaka täi raire ñodre, dikakata ümanbiti aune ñö tä nen jate ye ngwane, ni täta nekä. Ye kwrere arato, kukwe tare tä nemen bare ye Jehovakwe diainkä aune ñaka rabai tuin nie jire mada.

11. ¿Apóstol Pablo kukwe nuainbare ye tä mä dimike ño?

¹¹ ¿Bäri ni kite ja tuin kukwe tare ye ben ñobätä ñan aune Jehová ñaka ni kai ngäbiti yebätä nie raba? Nitre kirabe Ngöbö mikaka täte käkwe ja tuabare kukwe keta kabre tare ben yebätä nikwe töbikadre ngwane ni dimikai kwe. Ñodre, töbike Pablobätä. Jesukwe sribi mikani niara kisete: kukwe kwin Gobran Ngöbökwe ye niara rikadre ngwena “nitre ñan judiore kändi, gobrantre krikri känti, aunen nitre Israele känti” (Hech. 9:15). Kukwe tare ben Pablokwe ja tuani arato (2 Cor. 11:​23-27). ¿Kukwe tare nämäne nemen barebätä Jehová ñan nämä niara kai ngäbiti yebätä? ¡Ñakare jire! Niarakwe kä ngwani nüke jai Jehová nämä niara ben yebätä aune nämä kain ngäbiti (Rom. 5:​3-5). Akwa mä kisete kukwe tare tä, ben mata ja tuin aune mäta ja di ngwen ye ganainkäre ngwane, Jehovakwe mä kai ngäbiti käre.

12. ¿Ñobätä kukwe ngübata nikwe ñaka nemen bare ye raba kä juto ye goire nikän?

¹² Kukwe ketebu: kukwe ngübata krubäte ye ñan tä nemen bare jötrö ngwane (Prov. 13:12). Ni Ngöbö mikaka täte yekwe Jehová tare aune tö debe bien ie ye tä ja di ngwen bämike. Akwa, ni di nuäi ye kwrere nikwe kukwe diain nuaindre jai. Nikwe ñaka töbikai kwin ngwane, ni raba nemen di nekä (Prov. 17:22). Precursora iti kädekata Holly tä niere: “Ti tö nämä rikabätä Kwela Nitre Gobran Ngöbökwe Kukwe Driekä ye kräke, niken juta madate aune sribire sribi nuain nämäne kä Ramapo yete. Akwa kukwe bä jene rababa ti kisete ye ngwane ti di räkänteba jökrä. Ti tö nämä dre nuainbätä ye ñaka rababa bare tie ye käkwe kä mikaba ulire tibätä. Ni töta nemen kukwe keteiti nuainne akwa ye ñan nemen bare nie ngwane, jata nemen ruin ngwarbe nie”. Ja mräkätre kwati ie ja tärä ruin kore.

13. Kukwe jökrä ñan raba nemen bare nie ye ngwane, ¿nikwe ja töi mikadre dre nuainne?

¹³ ¿Kä juto rabadreta nikwe yekäre dre nuaindre? Sribi meden raba nemen bare nie erere Jehová tä bien nie, ñan sribi mike bäri ni kisete. Sribi nuainta nikwe ye ñan ai ütiäte, ñakare aune nita ja ngwen ño ye bäri ütiäte Jehová kräke. Nikwe töbikadre debe näre jabätä aune ja ngwandre metre Jehová ie tö (Miq. 6:8; 1 Cor. 4:2). Aisete, ¿ni raba sribi mike bäri ja kisete ye kwin?e Ñakare jire. Kukwe tärä mä kisete yebätä mä di ñan nüke kukwe keta kabre nuainkäre ye ngwane, dre raba nemen bare mäi yebätä ja töi mike. Ñodre, ¿monsotre bati konkrekasion mäkwe yete ririadre ja üairebiti yekäre mä raba ja kete ben dimikakäre? ¿Nitre niena umbre konkrekasion mäkwe yete ye mäta juto biare dimikakäre? ¿Ni iti töi mikadre jäme gare mäi yebätä mäta juto dimikakäre, llamada yebiti, mensaje juen ie o gwärere? Mäkwe ja töi mikai ni mada dimike ye köböire Jehová kukwe kwin mikai nemen bare mä kräke. Arato, kukwe bämikai ñaka ja töite abokän ni rabai nuainne kä bä nuäre yete yebätä töbikadretari. Holly kädrite párrafo käne yete ye tä niere: “Ruäre ngwane, tita nemen ulire aune di ñakare ye ngwane kukwe keta kabre ti rabai nuainne kä bä nuäre yete yebätä tita töbike. Aune Jehovakwe ti dimikai mike nemen bare”.

14. ¿Kukwe meden mada raba kä juto ye goire nikän?

¹⁴ Kukwe ketamä: töbike ja aibebätä aune drei ni tö yebätä. Ni rikadre basare, ni rikadre ja denkä, jondron kökö jakrä o kukwe keta kabre nuainne ye käkwe kä mikai juto nibätä ye nitre kwati tä mike gare redes sociales yebiti. Ni tö kä ngwain juto jabätä ye ñaka blo. Ñobätä ñan aune, Jehovakwe ni sribebare ye erere. Akwa kukwe keta kabre raba kä ngwen juto nitrebätä tä niken känene akwa bitikäre ye tä kä juto ye goire kän ye tä gain. Ñodre, ni precursora kä Eva tä niere: “Mä töita nemen jondron tuabätä bäri jakwe aune ñaka tä nemen debe mä kräke”. Mä töita nemen ye kwrere ye tä mä mike ulire aune tä mä di gainkä.

15. ¿Kukwe namani bare rei Salomón yebätä ye tä dre driere nie?

¹⁵ Ani töbike rei Salomón yebätä. Dre raba kä mike jutobätä ye nikani känene ja käne. Yebätä ja töi mikani kwe mröre kwin, nüne kwin aune jondron ütiäte ütiäte kökö jakrä. ¿Ye bitikäre dre namani bare? Metrere kukwe jökrä ye käkwe kä juto ye goibare kän, yebätä niara käkwe tikabare: ‘Ni ökwä ye jondron ñan tä nemen debe aune ni olo ye töta nemen kukwe kukwe nuen bäri’ (Ecl. 1:8; 2:​1-11). Aisete nitre tä kä juto känene kä nete ye abokän ngwian ngwarbe ñan metre ye kwrere: ütiäte raba tuin akwa ñan ütiäte.

16. ¿Nikwe kukwe nuaindre ni madakrä ye ñobätä tä kä mike juto nibätä? (Üai mikadre ñärärä).

¹⁶ ¿Kä juto rabadreta nikwe yekäre dre nuaindre? Jesukwe kukwe ne niebare, “ni jondron bianka yebätä kätä nuäre bäri, ni jondron ka ngäbitikä ye ngwä” (Hech. 20:35). Ja mräkä iti kädekata Alekos tä niere: “Tita ja töi mike jondron kiakia nuainne ni mada kräke, ye ngwane ti töita bäri ni madabätä aune ñan ja aibätä ye tä kä mike juto tibätä”. ¿Ni raba dre nuainne ni mada kräke? Ni iti kisete kukwe kri tä ye nikwe ja töi mikadre kukwe kwin niere ie dimikakäre. Mä ñan raba kukwe kwe ükete akwa mä raba töi mike nüke gare jai, kukwe nuadre, mike tuin bobre jai raba ja driere Jehová ie ye mäkwe ngwan törö ie (Sal. 55:22; 68:19). Jehová ñaka tä mente niarabätä ye niedre ie (Sal. 37:28; Is. 59:1). Kukwe mada ye abokän ni raba mrö sribere kräke, niken basare ben o nübaire jabe kukwe driere. Nita ja töi mike bäri ni mada dimike ye ngwane, Jehovakwe kukwe kwin mikai nemen bare niaratre kräke ni köböire, ye käkwe kä mikai juto nibätä (Prov. 11:25).

17. Ni tö kä juto erametre tuai jabätä ngwane, ¿ja töi mikadre dre nuainne? (Salmo 43:4).

¹⁷ Kä täi juto nibätä ni täi krötö bäri Jehová ken ye ngwane. Jehová ye abokän “Ngöbö kä ngwanka juto erametre” nieta Bibliakwe (ñäkädre Salmo 43:4 yebätä).f Ye medenbätä, kukwe keta kabre ben ni raba ja tuin, akwa ja täi ruin jäme nie. Nikwe ja ketadrete dime Jehovabätä aune niarakwe kä juto erametre biain nie kärekäre (Sal. 144:15).