Orata ye ngwane ni mada ngwandre törö jai

1. ¿Nita orasion nuainne ye tuin ütiäte Jehovai ye ñokänti gare nie?

KUKWE ñan nuain bä ni kräke ye abokän orasion ye biani nie. Ani töbike kukwe nebätä: Jehovakwe sribi ütiäte mikani angeletre kötärä aune monso mubai kwe ye kisete arato (Sal. 91:11; Mat. 28:18). Akwa, Jehová “ara tä orasion nikwe kukwe nuin” (Sal. 65:2). Aune tö ni kukwe nuin.

2. ¿Kukwe meden kwin bämikani Pablokwe ni käne?

² Kukwe meden tä ni kisete ye ni raba niere jökrä Jehovai, akwa ni raba orare ni mada kräke arato. Ye erere apóstol Pablo käkwe nuainbare. Ñodre, nitre kristiano Éfeso ye ie niebare kwe: “Tita blite Ngöböbe angwane, käre tita kuin niere ie munbtä” (Efes. 1:16). Akwa nitre ruäre kädekaninte kwe orasionte. Ñodre, kukwe ne tikabare kwe Timoteo ie: “Käre tita debe bien krubäte Ngöböi [ . . . ] tita blite dibire rare Ngöböbe ngwane, mätä nüketa törö tie” (2 Tim. 1:3). Kukwe keta kabre nämene Pablo kisete yebätä nämäne oradre ie, akwa yebiti ta kä dianinkä kwe jai orakäre ni mada kräke (2 Cor. 11:23; 12:​7, 8).

3. ¿Orata ngwane ñobätä nitre mada käita nikwitekä nibiti?

³ Nita orare ye ngwane, ruäre ngwane ni mada ñan nüke törö nie. ¿Ñobätä? Meri testiko kädekata Sabrinaa tä niere: “Nita nain nekwäre sekwäre. Aisete kukwe keta kabre ni kisete yebätä nita nemen orare ja aibe kräke”. Kukwe ne erere nakaninkä nibätä ye nikwe gai jabätä ngwane, kukwe ja tötikara ne käkwe ni dimikai krubäte. Ñodre, kukwe ketebu nebätä ni bike ja kite, ñobätä mä raba orare ni mada kräke. Aune, dre raba mä dimike nuainne bäri kwin.

¿ORADRE NI MADAKRÄ YE ÑOBÄTÄ ÜTIÄTE?

4, 5. ¿Nita orare yebiti “jondron kri nuain raba” ni mada kräke? (Santiago 5:16).

⁴ Oradre ni mada kräke ye köböire Ngöböta “jondron kri” nuainne (ñäkädre Santiago 5:16 yebätä). ¿Nita kukwe ribere orasionte ni mada kräke ye erere raba nemen bare kräketre? Jän. Ñobätä ñan aune Pedro ie Jesús ñaka gare niedi kwe ye nämänena gare Jesús ie yebätä ribebare kwe kräke orasionte krörö: “Tödeka mäkwe ñan rikadre tibien ye tita ribere kisere mä kräke” (Luc. 22:32). Orasion ye raba ni mada dimike ye nämene gare metre Pablo ie. Aisete, kukwe ngwarbe niebarebätä yebätä kitani ngite ja gwirete juta Roma yete ye ngwane, tikani krörö kwe Filemón ie: “Munta orare ye köböire ti mikaita kwäre ngübata” tikwe (Filem. 22). Ye erere namani bare: kä nikani braibe ta ngwane niara mikaninta kwäre aune kukwe drie ye kömikaninta kwe.

⁵ Metrere nita orare yebiti ni ñaka raba Jehová mike ja dibiti dre ribeta ie orasionte ye nuainne ni kräke. Akwa dreta ni töi nike ye tuin ie aune ye tä ngwen törö jai, aisete ruäre ngwane, tä ja töi mike yebätä aune tä mike nemen bare ni kräke. Kukwe ne nemen gare nie yebätä dre tä ni töi nike ye ni raba niere jankunu ie orasionte aune niarakwe kukwe ye ükaite bäri kwin ni kräke yebiti tö ngwan ie kwatibe (Sal. 37:5; aune 2 Corintios 1:11 ye mikadre ñärärä bätä nota de estudio).

6. ¿Nita orare ni mada kräke ye tä ni töi mike dre nuaindre? (1 Pedro 3:8).

⁶ Oradre ni mada kräke ye tä ni töi mike “ja brukwä mike kwin” ni mada kräke (ñäkädre 1 Pedro 3:8 yebätä). Ni iti tä ja brukwä mike kwin ni mada tä ja tuin kukwe tare ben ngwane tä ja töi mike dimike (Mar. 1:​40, 41). Ja mräkä umbre konkrekasionte Michael tä niere: “Tita orare ni mada kräke tädre jondron ribere jai ye kräke ngwane, niaratre tä ja tuin drebe nüke gare tie, ye tä ti töi mike tarere bäri. Ñan gare ietre, akwa jata nemen ruin ken ie”. Kukwe mada kwin tä nemen bare orasion köböire ni umbre konkrekasionte Richard, tä mike gare: “Nita orare ni mada kräke ye tä ni töi mike bäri ni ye dimikabätä”. “Nikwe dre käräbare ye nita ja di ngwen nuainne ni ye kräke ngwane, Jehovakwe orasion ye kukwe nuani ye kwrere tä nemen bare”.

7. ¿Ja töi mikata orare ni mada kräke ye ngwane kukwe ben nita ja tuin ye tä nemen tuin ño nie? (Filipenses 2:​3, 4; üai mikadre ñärärä).

⁷ Nita orare ni mada kräke ye tä ni dimike kukwe tä ni kisete ye ñan mike tuin kri krubäte jai (ñäkädre Filipenses 2:​3, 4 yebätä). Kä gobrainta Satanakwe nete nita nüne yebätä ni jökrä tä ja tuin kukwe tare ben (1 Juan 5:19; Apoc. 12:12). Nikwe ja di ngwain orare käre ja mräkätre mada mada kräke ngwane, ni “mräkä tödekaka Jesubti kä jökräbti temen tä ja tare nike arato” ye raba nüke törö nie (1 Ped. 5:9). Meri prekursora kädekata Katherine tä niere: “Ti ñan aibe tä ja tuin kukwe tare ben ye tä nüke törö tie tita orare ni mada kräke ye ngwane. Aune kukwe meden tä nemen ti kisete yebätä ti ñan tä ja töi mike krubäte”.

¿NIRE KRÄKE ORADRE?

8. ¿Nire nire kräke ni raba orare?

⁸ Ni raba oradre nitre kwati kräke. Ñodre, nitre ruäre tä ja tuin bren tare ben ye kräke, monsotre bati tä kwelate mika töta nemen ja dibiti kukwe käme nuainne o kötaita nemen ye kräke, nitre kite umbre jakän ye kräke. O ja mräkätre kwati mräkätre ara tä ja mike rüere o gobrantre (Mat. 10:​18, 36; Hech. 12:5). Nitre gobranka ñaka tä sribire kwin yebätä ja mräkätre kwati käkwe ju kwetre tuanimetre aune tädre niken sribikäre nünankäre bäri kwin aune kukwe tare tä nemen bare ñodre ñü murie minimini tä nakainkä o kukwe mada mada köböire tädre ja tare nike ye kräke oradre. Ja mräkätre ye ñan gare nie gwärere, akwa nikwe oradre kräketre ngwane, Juan 13:34 ye ni täi mike täte, känti nieta: “nikwe ja taredre kwärikwäri” niebare Jesukwe ye erere tä nemen bare.

9. ¿Ja mräkätre kisete sribi tä konkrekasionte aune muko kwe kräke oradre ye ñobätä kwin?

⁹ Ja mräkätre kisete sribi tä mikani juta Ngöbökwe te ye kräke ni raba orare, ñodre: Nitre Braibe Konkrekasion Jökrä Ngübabitikä aune ja mräkätre tä niaratre dimike ye kräke, Comité de Sucursal yekrä, aune departamento keteitire keteitire te ja mräkätre tä sribire ye kräke, nitre konkrekasion tuabitikä kräke, nitre umbre konkrekasion yekrä aune siervo ministerial. Niaratre tädre ja tuin kwe keta kabre ben arato, akwa yebiti ta tädre juto biare sribikäre ja mräkätre jökrä kräke (2 Cor. 12:15). Ñodre, Mark, ni circuito tuabitikä käkwe mikani gare: “Ti ñaka nüne ti rüntre ken ye tä ti mike ulire. Niaratre ye niena umbre aune tädre bren. Ti ngwai aune muko kwe tä niaratre ngübare kwin gare tie, akwa ti ñaka tä bentre yebätä tita nemen ulire krubäte”. Dre dre ben ja mräkätre ne tä ja tuin ñaka gare metre ta nie, akwa ni raba orare kräketre (1 Tes. 5:​12, 13). Aune niaratre muko tä ja di ngwen dimike jankunu ne kwe niaratre sribidre ja mräkätre kräke ye kräke oradre.

10, 11. ¿Ja mräkätre kwati kräke orata ye tuin kwin Jehovai?

¹⁰ Nibira gare nie erere nita orasion nuainne ye ngwane, nita ja di kärere nitre kwati kräke. Aune ni ñan tä töbike ni itibe bätä, ñakare aune nita ja di kärere Jehová ie nitre tä kitani ngite ye kräke aune nitre tä ja tuin kukwe tare ben ñodre mräkätre kwe tä krüte kän yekrä. Donald ye abokän ja mräkä konkrekasion jie ngwanka tä niere: “Ja mräkätre kwati tä ja tuin kukwe tare ben yebätä ni töta nemen orai jökrä kräke ne kwe dre ribeta kwe jai ye tädre kwetre”.

¹¹ ¿Orata ye kwrere ye Jehová tä kain ngäbiti? ¡Jän! Tä kain ngäbiti, ñobätä ñan aune metrere dre dre ben ja mräkätre tä ja tuin ye ñaka gare metre ta nie. Aisete, orata ja mräkätre jökrä kräke ye ñaka blo (Juan 17:20; Efes. 6:18). Nita orasion nuainne ye kwrere yebiti bämikata nita “ja mräkätre jökrä ye tarere” (1 Ped. 2:17).

¿NI RABA DRE NUAINNE ORASION NUAINKÄRE BÄRI KWIN JA MRÄKÄTRE KRÄKE?

12. ¿Nikwe ja mräkätre mikadretari ñärärä käin ye ño raba ni dimike orare bäri metre ta niaratre kräke?

¹² Nitre mikadretari ñärärä kwin. Nita orare ja mräkätre jökrä kräke aune nikwe ni iti kädekadrete ye ütiäte krubäte. ¿Ni iti tärä konkrekasion mäkwe ye känti abokän tä ja tuin bren tare yebe? ¿Monso bati iti tä kwelate di ñaka niena ñobätä ñan aune mikata ja dibiti nekwe ja mikadre ngite kwe? ¿Nitre rüne aune meyere tä monso kwe töi ükete bätä tötike jankunu Jehová kukweibätä ye tärä konkrekasionte? (Efes. 6:4). Nikwe nitre mikaitari ñärärä kwin ngwane, ye köböire tä ja tuin drebe ye raba nüke gare nie, ye käkwe ni dimikai orare bäri kräketre (Rom. 12:15).b

13. ¿Ja mräkätre ñan gare nie ye kräke ni raba orare?

¹³ Nikwe niaratre kädekadrete kä kwetre yebiti. Ja mräkatre ruäre ñan gare nie gwärere yebiti ta ni raba orare kräketre aune niaratre kädeke kä kwetre yebiti. Ñodre, ni raba töbike ja mräkätre tä ngite juta Crimea, Eritrea, Rusia aune Singapur yete yebätä. Niaratre kä tä mikani jw.org yekänti.c Brian ni circuito tuabitikä tä mike gare: “Ja mräkä iti tä kitani ngite ye tita kä kwe tike jai aune biti ñäke ja kukwe kribiti ngwane, tä nemen bäri nuäre ti kräke ngwankäre törö jai bätä kädekatekäre, orata tikwe ngwane”.

14, 15. ¿Dre käkwe ni dimikai kukwe niere metre ta orasionte?

¹⁴ Dre ribeta ye niedre metre ta. Michael, kädrite párrafo 6, tä ni töi mike kukwe ne nuainne: “Ja mräkätre tä ngite yebätä kukwe mikata gare tä jw.org yete yebätä tita ñäke ngwane ti tädre yete ngwane ja rabadre ruin ño tie ye tita bämike ja töite. Ti tädre ti muko töbikaire krubäte aune tädre ngübiabare kwin o ñakare ye ti tö rabadre gai. Kukwe ne tä ti dimike orare metre ta ja mräkätre tä ngite ye kräke aune muko kwe tä gwi ye kräke” (Heb. 13:3).

¹⁵ Köbö kwatire kwatire ja mräkätre tä ngite käi ngite känti yete tä ja tuin kukwe ño ben yebätä nita töbike ngwane kukwe raba kwen bäri nie kädekatekäre niaratre kräke orasionte. Ñodre, ja mräkätre tä ngite yebe guardiatre käkwe ja töi mikadre jäme aune nitre ngite käi jie ngwanka ye käkwe ja mräkätre ye tuadremetre Ngöbö mike täte ye ribedre Jehovai orasionte (1 Tim. 2:​1, 2). Arato ja mräkätre tädre ja ngwen kwin ye köböire konkrekasion dimikadre kwetre aune nitre ñan kukwebätä ye dimikadre kwetre kukwe metre ye mike gare jai ye ribedre kräketre orasionte (1 Ped. 2:12). Ja mräkätre tä ja tuin drebe ye mikadretari ñärärä kwin, aune kä kwe ño yebiti kädekadrete orasionte ne madakäre kukwe ribedre metre ta kräketre ye kukwe ruäre nikwe nuaindre mikata gare nie akwa kukwe ne ye ñan nuaindre ja mräkätre tä ngite ye aibe kräke ñakare aune ja mräkätre jökrä ye kräke kukwe ne erere nuain raba. Yebiti ja mräkätre jökrä tare nikwe ye nikwe bämikai (1 Tes. 3:12).

KUKWE METREBÄTÄ ORADRE

16. ¿Dre ngwandre törö jai ni näin orare ye ngwane? (Mateo 6:8).

¹⁶ Nibira gare nie erere, orasion ye die tärä kukwe mikakäre nemen bare nitre mada kräke. Ye medenbätä, nita orare Jehovai ye ngwane kukwe metrebätä ja die ribedre ie. Ñobätä ñan aune, kukwe nieta ie ye ñan kukwe mrä ye kwrere kräke ñobätä ñan aune kukwe ye garera ie, akwa nita miketa gare ie. Aisete dre nuaindre kwe o kukwe nuaindre ño kwe ye ñaka niedre ie. Aune nitre niara mikaka täte ye tä dre ribere jai ye gare käne ie (ñäkädre Mateo 6:8 yebätä). Kukwe ruäre bätä nita orare ja mräkätre kräke ye nibira gare nie. Akwa ye ñan ngörä nita orare kräketre ñobätä ñan aune tare nikwe aune ni töita bätä yebätä. Aisete Jehovabätä käta nemen juto krubäte nita ja tare metre bämike niara kwrere yebätä.

17, 18. Nita orare ja mräkätre kräke ye Jehovata kukwe nuin ye ñobätä gare nie mä raba bämike kukwe keteitibiti.

¹⁷ Nita orare ni mada kräke ye Jehová ñan tä kukwe nuin tä nemen tuin nie ñobätä ñan aune ñaka tä ja mräkä ye dimike, akwa orasion nuainta nikwe yebiti nita ja mräkä nikwe ye tarere ye bämikata. Ñodre ni rün iti kwe monso chi brare aune merire tärä. Aune ngobo kwe ye tä nemen bren yebätä ngängän chi ye tä ribere ie: “Ti ngwai miketa räre. Tä bren yebätä”. Dre tä nemen bare ye nüke gare monso rün ye ie, akwa ngängän chi tä dre ribere ngwai chi kräke ye tä kä mike juto bätä ñobätä ñan aune tä tarere ye tä bämike yebätä.

¹⁸ Ye erere arato, ni töita ja mräkätre bätä yebätä nita orare kräke ye nikwe bämikadre ie Jehová tö. Yebiti nita bämike ñan ni töita ja aibe bätä ñakare aune ni töita ja mräkätre mada yebätä aune ye Jehovakwe ngwen törö jai (2 Tes. 1:3; Heb. 6:10). Aune orasion ye köböire kukwe kwin raba nemen bare ja mräkätre kräke ye nibira gare nie ye ara bätä. ¡Nikwe ñan ja mräkätre ye käi kwitadrekä jabiti nita orasion nuainne ye ngwane!