Nitre tä kukwe ngwentari
¿Jehová köböra Gobrantre “töite” mike ño?
Ja tare nikai kri kömikai bätä Apocalipsis 17:16, 17 tä niere krörö: “Angwane jändrän nire krubäre krotu kräjätä mäkwe turi; angwane krotu kräjätä ne käkwe kä ngwarobo meri biti mikai tuin ngwarobo jae; angwane ngwain ja tare nike krubäte kwetre; aune biti tikaite kwetre; aune meri ngätä kwetai kwetre; aune meri ne kukwai ngise kwetre ñukwä jutra bití; ñobätä ñakare angwane Ngöbökwe niaratre töe mikani kore brukwäte, abokän kwe dre dre ie Ngöbö tö, erere nuaindre kwetre gäre. Ngöbökwe mikani töbiketre ja érebe, abokän kwe niaratrekwe jändrän nire krubäre mikadre gobrane ja täte gäre”. Täräkwata juta Ngöbökwe yete mikanina gare Jehovakwe juta keta kabre ye töi mikai kukwe ngwarbe keta kabre ye gainte.
Akwa kukwe nieta mada ne ükadrete ye täte. Ngöbökwe niaratre “töe” mikani kore brukwäte ye abokän, metrere juta keteitire keteitire die tärä gobrankäre ye käkwe gobran jakwe ye biandi jökrä “jondron nire krubäre” ie meden gäräta. ¿Ye rabai bare ño? Rükadre gare nie yekäre brän kukwe ruäre mike nüke gare jai.
¿Profecías ne tä blite nire nire bätä? Meri biti “kä ngwarobo” ye abokän kädekata “Babilonia kri” ye kwrere, ye abokän kukwe jene jene ngwarbe drieta (kukwe briasi) käbiti tibien gärätä. “Jändrän nire krubäre tain bití” ye abokän organización kri ükaninte kädekabare Sociedad de Naciones kä 1919 ne kwe kä jäme tädre kä jökräbiti tibien aune nengwane kädekata Organización de las Naciones Unidas (Apoc. 17:3-5). Aune “krotu kräjätä” ye abokän gobrantre kä jökräbiti tibien gärätä aune tätre jondron nire krubäre ye die mike.
¿Meribiti “kä ngwarobo aune jändrän nire krubäre tain” ye ñobätä kädekateta gwaire? Meribiti “kä ngwarobo ye näma täkänintbe jändrän nire krübäre” yebiti ye abokän tä mike gare meri ye tä jondron nire tain ye dimike, töi denkä jakri aune gobraine.
¿Meri biti kä ngwarobo yebätä dre rabai bare? Jondron nire krubäre ye aune krotu kräjätä ye käkwe ja mikai meri biti kä ngwarobo ye rüere. Ye medenbätä jondron ütiäte kwe ye diainkä kä aune kukwe käme nuainta kwe ye mikai gare nitre jökrä okwäbiti. Aune Jehová töi ño ye mikai nemen bare kwetre: Kukwe ngwarbe ye gaite täte (Apoc. 17:1; 18:8). Kukwe ngwarbe briasi drieta jökrä ye mikai krüte ye ngwane. Akwa ye jämi nemen bare känenkri Jehovakwe kukwe ñan namanina bare jire ye nuaindi juta käbiti tibien yebe, niaratre ye töi mikai kukwe nuainne.
¿Gobrantre ye töi mikai dre nuainne Jehovakwe? Nikwe mirira gare jai erere krotu kräjatä ye brukwäte Jehovakwe ja töi mikai nekwe gobran aune die jökrä ye bian kwe jondron nire kri krubäre tain ye ie, ye abokän Naciones Unidas garata (Apoc. 17:13). Kukwe ne abokän dre gärätä yebätä töbike. ¿Gobrantre käkwe kukwe ye diandi ja töbiti jai? Ñakare jire, profecía tä niere Jehová ara käkwe niaratre töi mikai kukwe ye den jai (Prov. 21:1; Isaías 44:28 mikadre ñärärä arato). ¿Aune bätärekä bätärekä juta keteitire jökrä käkwe gobran kwetre ye bian jondron nire krubäre yei? Metrere ye nuaindi drekebe kwetre. Jondron nire krubäre di rabai jökrä aune kukwe ngwarbe briasi drieta ye juandi ngwarbe täte kärekäre.
Aisete ¿nikwe dre ngübadre ja känenkäre? Noticiate gobrantre jatai ño bätärekä bätärekä Naciones Unidas ye dimike bäri ye ñan ngübadre. Ñakare aune Jehovakwe juta brukwä aune töi mikai gobran kwetre ye bien drekebe jondron nire krubäre ye ngübadre. Kukwe ne rakadikä ye ngwane rükai gare nie ja tare nikadi kri rabaira chitani kömikakäre. Akwa köbö ye jämi nüke ye känenkri “ni tädre ngwäte niara ngibiare ngäbiti amne nikwe ja ngibiadre kukwe kämekäme ngäniene” ¡ñobätä ñan aune kukwe jene jene rakaikä drekebe! (1 Tes. 5:6).