Kristo ye “Ngöbö die”

1. ¿Ñobätä Pablo niebare Kristo ye “Ngöbö die”?

JESÚS nämene Kä tibienbätä ye ngwane, jondron ñan tuabare nuainbare keta kabre kwe. Jondron ñan tuabare nuainbare Jesukwe yebätä nikwe ñäkäi Bibliabätä angwane, tödeka nikwe rabai bäri dite (Mateo 9:35; Lucas 9:11). Jehovakwe ja di biani Jesús ie yebiti jondron ñan tuabare nuainbare kwe. Ye medenbätä apóstol Pablo niebare Kristo ye “Ngöbö die” (1 Corintios 1:24, Ngöbö Täräe [NGT], tärä okwä ükaninte). Akwa ¿jondron ñan tuabare nuainbare Jesukwe ye tä dre driere nie?

2. ¿Jondron ñan tuabare nuainbare Jesukwe ye tä dre driere nie?

² Jondron ñan tuabare nuainbare Jesukwe ye tä kukwe keta kabre driere nie (Hechos 2:22). Ñodre, kukwe ye köböire gare nie kä 1,000 te Jesukwe gobrandi ye ngwane jondron ñan tuabare nuaindi kwe, ye käkwe nitre jökrä nünanka Kä tibienbätä ye dimikai. Jondron ñan tuabare nuainbare Jesukwe ye tä ni dimike niara töi kwin ye mike nüke gare bäri kwin jai aune Jehová töi kwin ye mike nüke gare jai arato. Jondron ñan tuabare nuainbare ketamä Jesukwe yebätä nibike ja tötike kukwe ja tötikara nekänti aune kukwe ye raba ni dimike ño kä nengwane bätä ja känenkäre ye nibike mike gare jai arato.

JONDRON ÑAN TUABARE NUAINBARE ABOKÄN TÄ JA TÖI MIKADRE MANTIAME DRIERE NIE

3. a) ¿Juta Caná yekänti ja mäkätebare ye ngwane dre namani bare? b) ¿Ñobätä Jesukwe jondron ñan tuabare ye nuainbare?

³ Juta Caná yekänti ja mäkätebare ye ngwane Jesús jondron ñan tuabare nuainbare kena. Kukwe ruärebätä vino ye ñaka nämene krubäte mrö nämene ye kräke raba ruin nie. Kukwe ye namani gaidre nitre nämene ja mäkete ye kräke, ñobätä ñan aune niaratre rabadre nitre nübaibare kwetre ye kain ngäbiti kwin. Ye ngwane María ribebare Jesús ie niara rabadre nitre ja mäkätekä ye dimike. ¿Ñobätä? Kukwe niebare Jesubätä ye nämenena gare kwin María ie aune kädekai “Ngöbö Kri Kä Käinbti Odeire” ye nämenena gare ie arato (Lucas 1:30-32; 2:52). Aisete Jesús raba nitre ja mäkätekä ye dimike namani nütüre raba ruin nie. Akwa María aune Jesús tö namani nitre ja mäkätekä dimikai yebrä metre. Ye medenbätä, ñö 380 litro (100 galón) kwitani Jesukwe vino kwin erere (ñäkädre Juan 2:3, 6-11 yebätä). Jesús jondron ñan tuabare nuaindre ye ñaka ribebare ie, akwa nuainbare kwe ñobätä ñan aune töi nämene nitre yebätä. Jehová ja ngwen mantiame ye erere niara nämene ja ngwen.

4, 5. a) ¿Jondron ñan tuabare nuainbare ñö aune vino yebiti ye tä dre driere nie? b) ¿Jondron ñan tuabare nuainbare ye tä dre mike gare metre nie?

⁴ Jehová diebiti Jesukwe ñö ere ye kwitani vino kwin erere. Vino sribebare ere kwe nitre kwati kräke. Jondron ñan tuabare nuainbare ye tä driere nie Jehová aune Jesús ye mantiame krubäte bätä ja ruin ño nie yebätä niaratre töita bökän. Ne madakäre, kukwe ye tä mike gare metre nie Jehovakwe mrö biain krubäte nitre jökrä ie Kä Bä Nuäre yete (ñäkädre Isaías 25:6 yebätä).a

⁵ ¡Bämike ja töite! Nikwe nünain Kä Bä Nuäre yete angwane, nita dre dre ribere jai ye jökrä Jehovakwe biain nie. Ju bä nuäre aune mrö kwin rabai ni jökrä kwe. Jehovakwe jondron kwin biain nie ye jökräbätä nita nemen töbike angwane jata nemen ruin kwin nie.

6. a) ¿Jesús die yebiti nämene dre nuainne? b) ¿Ni raba ja ngwen ño Jesús erere?

⁶ Jesús ñaka jondron nuainbare ja aibe kräke die kwe yebiti. Ñodre, ¿Diablu niara nuaninte ne kwe jä kwitadre kwe banre ye ngwane dre nuainbare kwe? Ñaka nuainbare jire kwe (Mateo 4:2-4). Niara die yebiti nämene jondron kwin nuainne nitre mada kräke. ¿Ni raba ja ngwen ño niara erere? Jesús niebare nikwe käre jondron kwin nuaindre nitre mada kräke (Lucas 6:38). ¿Ni raba dre nuainne niaratre kräke? Ni raba niaratre nübaire mröre ja gwirete. Arato gätä ye bitikäre ni raba kä denkä jai, nitre ruäre tö ja kitai kukwe tä kädriedre ie gätäte yebätä ye kukwe nuakäre. Aune ni raba nitre tä krire kukwe driere ye dimike. Nikwe käre ja ngwain mantiame aune nikwe nitre mada dimikai ye ngwane, nita ja ngwen Jesús erere.

“NITRE KWATI YE KÄKWE MRÖBA[RE] TRINETRINE”

7. ¿Nitre gobrainta Satanakwe ye täi nüne ño käre?

⁷ Nitre kwati tä nüne bobre kä jökräbiti tibien kä nengwane. Kirabe nitre kwati nämene nüne bobre arato. Jehovakwe niebare nitre israelita ie: “Nitre bobre ye täi käre kä tibienbätä” (Deuteronomio 15:11). Aune kä nikani kwati krubäte ta ye bitikäre Jesukwe niebare: “Nitre bobre bobre tädi käre mun ngätäite nete” (Mateo 26:11). ¿Nitre bobre täi käre Kä tibienbätä ai gäräbare Jesukwe? Ñakare. Kukwe yebiti niarakwe mikani gare nitre gobrainta Satanakwe ye täi käre nüne bobre. Akwa Kä Bä Nuäre yete ñaka nünain jire ye erere. Kä yekänti mrö rabai nitre jökrä kräke aune ni ñaka rabai nüne jire bobre.

8, 9. a) ¿Ñobätä jondron ñan tuabare nuainbare Jesukwe ban aune gwa yebiti? b) ¿Jondron ñan tuabare nuainbare nebätä mätä töbike angwane jata nemen ruin ño mäi?

⁸ Salmo 145:16 tä niere Jehová tä kise ngiente jondron jökrä nire tö dre dre ie ye erere biankäre täte ie. Jesús nämene Kä tibienbätä ye ngwane, niarakwe ja ngwani Rün erere aune nitre kwati nämene dre ribere jai ye erere biani kwe ietre. Akwa niara ñaka kukwe ye nuainbare die krubäte ye bämikakäre jerekäbe. Nuainbare kwe ñobätä ñan aune töi nämene bökän nitre mada dimikabätä. Ñodre, Mateo 14:14-21 tä dre niere ye ani mike gare jai (ñäkädrebätä). Nitre kwati juta keta kabre te ye nikani gürere Jesús jiebiti (Mateo 14:13). Kä jatani drüne ye ngwane, nitre nämene yete ye namani nainte aune mrö namani ietre jutuabare nitre ja tötikaka yei. Aisete niebare kwetre Jesús ie niara rabadre nitre jökrä ye juenta aune niaratre rabadre niken mrö kökö jai. ¿Jesús dre nuainbare?

⁹ Jesús nitre 5,000 bukani ban krärike aune gwa krobu aibe te. ¿Ñobätä jondron ñan tuabare ye nuainbare kwe? Ñobätä ñan aune niara nämene nitre ye tarere aune töi nämene nitre yebätä. Aune mrö biani ere kwe, Biblia tä niere nitre ye jökrä käkwe mröbare nememe namani trine ye ngwane. Mrö ye käkwe nitre ye dimikani nänkäreta mente nemen ja gwirete (Lucas 9:10-17). Mrö namani ere krubäte yebätä mrö namaninte ye ükaninkrö kutuä 12 te.

10. ¿Gwäune dre rabai bare nitre nünanka bobre ye kräke?

¹⁰ Gobrantre tä kukwe blo nuainne aune töita ja aibebätä ye köböite nitre kwati krubäte tä nüne bobre. Arato nitre testiko Jehovakwe ruäre yei jondron kwetadre ye ñaka krubäte. Akwa nitre jökrä tä dre dre ribere jai nünankäre yei Ngöbö raba aune tö jondron biain. Nüna bobre ye niarakwe diainkä käbämikata kwe (ñäkädre Salmo 72:16 yebätä).b Gwäune, nitre jökrä Ngöbö mikaka täte ye nünandi kä kwin te abokän känti nitre kukwe blo nuainkä aune nitre nüne bobre ñaka rabaira.

11. a) ¿Gwäune Kristo käkwe die kwe yebiti nitre jökrä dimikai ye ñobätä metre ni kräke? b) Kristo dre nuaindi yebätä nita töbike angwane, ¿ni töta nemen dre nuain?

¹¹ Jesús nämene Kä tibienbätä ye ngwane, kä braibe känti jondron ñan tuabare nuainbare kwe kä komä biti otare te (Mateo 15:24). Akwa kä nengwane tä reire, aune gobrandi kwe kä 1,000 te ye ngwane nitre jökrä dimikai kwe (Salmo 72:8). Jesukwe jondron ñan tuabare nuainbare yebiti tä bämike nie niara tö jondron nuain die kwe yebiti ni dimikakäre. Aisete gwäune niarakwe kukwe ye nuaindi yei nita tö ngwen metre. Nita töbike kukwe yebätä angwane, ni tö kä diainkä jai aune ja nire nikwe yebiti ni mada dimikai (Salmo 45:1; 49:3). Erametre ni ñaka raba jondron ñan tuabare nuainne. Akwa ni raba blite nitre ben kukwe kwin käbämikata Bibliakwe yebätä. Metrere sribi ye tä ni kisete (Romanos 1:14, 15).

JEHOVÁ AUNE JESÚS TÄ MURIE RIBI BÄTÄ MREN RUBUN YE KETEBÄTÄ

12. ¿Kä tibien tä ükaninte ño ye gare kwin Jesús ie ye ñokänti gare metre nie?

¹² Biblia tä niere Ngöbökwe Kä tibien sribebare ye ngwane, Jesús nämene niara ken dimikakäre ni “sribikä kwin krubäte kwrere” o ni ie jondron sribe gare ye kwrere (Proverbios 8:22, 30, 31; Colosenses 1:15-17). Aisete Kä tibien tä ükaninte ño ye gare kwin Jesús ie aune murie ribi bätä mren rubun ye ketadrebätä ño ye gare ie.

13, 14. Jesús raba jondron dite ketebätä ye mä raba mike gare keteiti.

¹³ Jesús nämene Kä tibienbätä ye ngwane bämikani kwe niara die nämene jondron dite ye ketabätäkäre. Ñodre, bati “müre jatani mate ribi krübäte” ye ngwane Ngöbö diebiti ketaninbätä kwe (ñäkädre Marcos 4:37-39 yebätä). Ni ie kukwe gare tä niere kä nükani käme krubäte, murie namani mate ribi, muta namani drüne, unsuli aune ñü namani näkäin krubäte tibien. Ye abokän murie ribi krubäte tä jondron jökrä juen ngwarbe ye kwrere. Apóstol Mateo käkwe blitabare murie ribi krubäte yebätä arato (Mateo 8:24).

¹⁴ Mä raba kukwe ye bämike ja töite. Mren namani nikwitekä aune namani mate ru mrente yebätä aune namani nen bati bobu rute. Murie ribi ye namani kä ngö mike krubäte, aune ru namani nibren nibren kwäräkwärä. Akwa yebiti ta, Jesús abokän nämene kübien. Aune nitre ja tötikaka kwe yebätä kä jürä namani krubäte. Aisete nitre ja tötikaka ye käkwe niara ganinkrö aune nibike ngatain ñöte niebare kwetre ie (Mateo 8:25). ¿Jesús dre nuainbare? Nükani krö aune niebare kwe murie bätä mren ie: “Kwekbe” (Marcos 4:39). ¡Aune murie ribi ye namani kwekebe! Ye tä mike gare metre Jesús raba jondron dite krubäte ye ketebätä.

15. ¿Jehová tä jondron dite krubäte ketebätä ye ñokänti gare nie?

¹⁵ Jehovakwe ja die biani Kristo ie jondron dite krubäte ye ketabätäkäre. Aisete gare metre nie Jehová raba jondron dite ye ketebätä arato. Ñodre, Ñü Kri ye känenkri, Jehovakwe niebare: “Köbö kükü mtare angwane, tikwe ñü mikadi näkäen jobe temen köbö gre ketebu dibire rare” (Génesis 7:4, Jändrän Jökrä Namani Bare Ño Kena). Ne madakäre, Éxodo 14:21 tä niere Ngöbökwe “murie dite kädrikri” mikani mate mren ñäkäbitikäre ketebu. Aune Jonás 1:4 (Jonás/Rut) tä niere köbö mada ngwane “Ngöbökwe müre juani ribi krübäte. Ñübe mni mni”. Kukwe ye tä ni töi mike jäme ñobätä ñan aune gare nie Kä Bä Nuäre yete Ngöbökwe jondron dite krubäte ye ketaibätä.

16. ¿Jehová aune Jesús tä jondron dite krubäte ketebätä ye ñobätä tä ni töi mike jäme?

¹⁶ ¿Jehová aune Jesús tä jondron dite krubäte ketebätä ye ñobätä tä ni töi mike jäme? Ñobätä ñan aune kä 1,000 te Kristo gobrandi ye ngwane nikwe ñaka ja tare nikai jire murie kri, mren kri tä nen jate, volcán tä jutra nemenkä aune dobo kri ye kisete. Kukwe tare rakadrekä ye jürä ñaka rabai nibätä, ñobätä ñan aune Jehovakwe nitre jökrä kä tibienbätä ye kriemikai (Apocalipsis 21:3, 4). Gare metre nie Kristo käkwe Ngöbö die yebiti jondron dite ye ketaibätä.

NIKWE JA NGWANDRE NGÖBÖ AUNE KRISTO ERERE

17. ¿Ni raba ja ngwen ño Ngöbö aune Kristo erere?

¹⁷ ¿Ni raba ja ngwen ño Ngöbö aune Kristo erere? Ni ñaka raba jondron ñan tuabare nuainne, akwa kukwe nieta Proverbios 3:27 yebrä ni raba nuainne (ñäkädrebätä).c Ja mräkätre kukwebätä rabadre ja tare nike ye ngwane dre ribeta kwetre jai ye biandre ietre aune töi mikadre jäme (Proverbios 17:17). Kukwe tare tä nemen bare ye ngwane ni raba kukwe ye nuainne. Ñodre, murie ribi krubäte mata nükani ye ngwane, meri Testiko kän muko krütani jue ye nikani ngwarbe täte. Ja mräkätre käkwe niara dimikani ye ngwane niebare kwe niara nämene testiko Jehovakwe yebätä kä nämene jutobätä, aune ñaka jondron biani ie ye aibebätä ñakare aune dimikani kukwe ja üairebiti yebätä. Kukwe ye erere bäsi namani bare meri Testiko tä kaibe yebätä. Murie ribi käkwe ju juani ngwarbe kän yebätä nämene töbike krubäte. Akwa ja mräkätre nükani känti aune dimikani kwetre ju kwe ye üketeta. Ja namani ruin ño ie ye ñaka namani nuäre kräke niekäre niebare kwe. Aune niebare kwe arato: “Tä debe, Jehová”. Ja ngwaitre aune ja etebatre töita nibätä yebätä ni jökrä tä debe bien. Akwa metrere Jehová aune Jesukristo tä ni ngübare yebätä nita debe bien.

18. Ñobätä Jesús jondron ñan tuabare nuainbare yebätä mätä töbike angwane, ¿drebätä mä töi nemen ñan krütare?

¹⁸ Jesús nämene Kä tibienbätä ye ngwane, niara ye “Ngöbö die” bämikani kwe. Jondron ñan tuabare nuainbare kwe ye ñaka nuainbare kwe ja aibe kräke o ja käikitakakäre. Kukwe ye nuainbare kwe ñobätä ñan aune nämene nitre tarere bökän aune tö nämene dimikabätä. Kukwe ja tötikara ja känenkäre yebätä nikwe ja tötikai bäri kukwe yebätä.