¿Ni ririadre kukwe ja üairebiti ye tuin ütiäte nie?

1, 2. a) ¿Isaías 60:22 känti kukwe niebare ye tä nemen bare ño kä krüte nete? b) ¿Juta ükaninte Jehovakwe kä tibienbätä yete nikwe ja töi mikadre sribi meden meden nuainne ribeta?

“NI BRAIBE ye rabai mil aune ni braibe ye rabai juta dite krubäte” (Isaías 60:22). Kukwe niebare ne tä nemen bare kä krüte nete. Ñodre, kä 2015 yete nitre testiko Jehovakwe 8,220,105 namanina kukwe driere kä jökräbiti tibien. Jehovakwe kukwe ne niebare juta kwe rabai nirien yebätä: “Ti, Jehová, käkwe mikai nirien akwle kä rükai näre te”. Ye tä mike gare köbö kwatire kwatire sribi rabai nuaindre bäri nie. ¿Ni niena ja di ngwen kukwe kwin Gobran Ngöbökwe yebätä driekäre nitre ie? Ja mräkätre aune ja ngwaitre kwati krubäte tä sribi prekursor regular o ausiliar ye nuainne. Niaratre ruäre nikanina kä madakänti ja mräkätre dimikakäre kukwe driere. Aune mada abokän tä sribire krubäte Ju Ja Ükarakrö keta kabre sribekäre.

² Kä kwatire kwatire konkrekasion mada mrä mrä tä nemen 2,000 biti bäri. Konkrekasion keta kabre yete nitre umbre ji ngwanka aune nitre sribikä konkrekasionte ribeta. Ye medenbätä, kä kwatire kwatire te nitre brare Testiko mil kwati krubäte rabadre kädekani ni sribikä konkrekasionte aune nitre sribikä konkrekasionte ye mil kwati krubäte rabadre kädekani ni umbre ji ngwanka konkrekasionte ribeta. Erametre ni brare o ni merire ye jökrä käkwe “Ji dokwäte [Däkien, TNM] sribie nuain[dre] jankunu mentokwäre” (1 Corintios 15:58, Ngöbö Täräe, tärä okwä ükaninte).

¿NITA DRE RIBERE JAI RIRIAKÄRE KUKWE JA ÜAIREBITI?

3, 4. ¿Sribi ja üaire ye meden meden ni raba mike nuaindre jai?

³ (Ñäkädre 1 Timoteo 3:1 yebätä). Apóstol Pablo kwin niebare ja mräkätre “tö [nämene] ja mikai nitre tödekaka Jesubti jie ngwianka” konkrekasionte yei. Pablo kukwe niebare ye tä ni mike töbike ni iti tä ja di ngwen o tä kise ngököte jondron tä mente diankäre jai yebätä. Ñodre, ja mräkä iti tä ja töi mike rabakäre ni sribikä konkrekasionte ye ani bämike ja töite. Niara rabadre ja di ngwen ja töi mike kukwe ruärebätä ja ngwankäre ni kristiano erere raba ruin nie. Rabadre bare ie aune kädekadre ni sribikä konkrekasionte ye ngwane, rabadre ja di ngwen jankunu kukwe ruäre nuainkäre ne kwe kädekadre ni umbre ji ngwanka konkrekasionte.

⁴ Ja mräkätre aune ja ngwaitre ruäre tätre jondron kwetre tuenmetre sribikäre bäri Jehová kräke. Ñodre, niaratre tö sribi prekursor nuain, sribidi Betel o Ju Ja Ükarakrö ye sribei raba ruin nie. Biblia raba ni dimike ño nirien jankunu kukwe ja üairebiti ye ani mike gare jai.

NI RABADRE NIRIEN JANKUNU KUKWE JA ÜAIREBITI

5. ¿Monsotre bati tä dite yebiti raba dre dre nuainne sribikäre Gobran Ngöbökwe kräke?

⁵ Monsotre bati ye dite, ye medenbätä raba sribi keta kabre nuainne Jehová kräke (ñäkädre Proverbios 20:29 yebätä).a Monsotre bati ruäre tä sribire Betel ye tä tärä aune täräkwata sribere aune imprimire. Niaratre mada ye kwati krubäte tä ja mräkätre aune ja ngwaitre ye dimike Ju Ja Ükarakrö sribere o ükete. Mada abokän tä niken ja töi jeñebiti nitre tä ja tuin kukwe tare ben ye dimikakäre. Aune niaratre kwati krubäte tä sribi prekursor nuainne ye tä ja kite blite kukwe madabiti o tä niken nüne kä madakänti kukwe driekäre.

6-8. a) ¿Monso bati nämene sribi Ngöbökwe krein mike jai ye dre käkwe dimikani ja töi kwite aune ye köböire dre kwin namani kwe? b) ¿“Jehová töi kwin” ye ñokänti raba nemen gare nie?

⁶ Jehová tare nikwe aune ni tö sribidi bäri kwin kräke, akwa ja raba nemen ruin nie ni Testiko kädekata Aarón ye erere. Niara nämene sribire Jehová kräke ye tö nämene käi ngwain juto jabätä, akwa kä ñaka nämene jutobätä. Nämene chi ye ngwane nämene niken gätäbätä aune kukwe driere, akwa käre krein nämene nemen ie. ¿Dre nuainbare kwe?

⁷ Ja di ngwani kwe ñäke Bibliabätä mantre jetebe, ja tötike gätä kräke aune blite gätäte. Ne madakäre, jatani orare käre. Kukwe ye jökrä käkwe dimikani nirien kukwe ja üairebiti. Jehová namani gare bäri kwin ie aune jatani tarere bäri. Ye ngwane kä jatani bäri jutobätä. Jatani sribi prekursor nuainne, kukwe tare nämene nakainkä ben nitre nämene ja tuin ye dimikani kwe aune nikani kukwe driere juta madate. Kä nengwane niara tä ni umbre ji ngwanka konkrekasionte aune tä sribire Betel. ¿Ja ruin ño ie? “Jehová töi kwin” ye niena gare ie nieta kwe. Ne madakäre, niara rabadre sribire bäri Jehová kräke ruin ie aune tö sribidi bäri kräke. Ye köböire kukwe kwin keta kabre tä nemen kwe ye gare ie.

⁸ Ni salmo tikaka käkwe niebare: “Jehová töi kwin ye gain aune mike ñärärä”. Aune niebare kwe arato: “Nire nire tä niara jürä ngwen jabätä yekwe ñaka jondron täi nikai jire” (ñäkädre Salmo 34:8-10 yebätä).b Nita sribire bäri kwin Jehová kräke angwane, kätä nemen juto nibätä ñobätä ñan aune ye nemen kwin niara kräke gare nie. Aune niarakwe ni ngübai käbämikata kwe nie ye erere nuaindi kwe.

NIKWE ÑAKA JA DI NGWANDRE NEKÄ

9, 10. ¿Ñobätä ütiäte krubäte nikwe ja töi mikadre kukwe “ngüba[re] ngäbiti” bätärekä?

⁹ Ni törba sribidi bäri Jehová kräke raba ruin nie. Akwa, sribi biandre konkrekasionte nie o kukweta ni kisete yebe ni ñaka rabadrera ja tuin ye nita ngübare mekerabe ye ngwane, ¿nikwe dre nuaindre? Ye erere rabadre bare nibätä angwane, nikwe kukwe ye ngübadre bätärekä (Miqueas 7:7). Jehová raba dreta nakainkä ye tuenmetre nemen bare jankunu. Akwa käre niarakwe ni dimikai yei nikwe tö ngwandre. Abrahán kukwe kwin bämikani yebätä ani töbike. Jehovakwe monso biain iti ie käbämikani kwe ie akwa kä nikani kwati krubäte ta angwane Isaac därebare. Ye jämi nemen bare känenkri Abrahán nämene ngübare bätärekä aune käre tö ngwani kwe Jehovai (Génesis 15:3, 4; 21:5; Hebreos 6:12-15).

¹⁰ Erametre, kukwe ngübadre bätärekä ye ñaka nuäre (Proverbios 13:12). Akwa kukweta ni kisete yebätä ni tädre rubun aune töbike krubäte angwane ni raba di nekä. Bäri kwin nikwe kä diandrekä jai ja töi mikakäre kwin sribi konkrekasionte nuainkäre. Nita kukwe ngübare bätärekä ye ngwane ni raba kukwe ketamä nuainne ye ani mike gare jai.

11. a) ¿Ni töi meden meden kwin abokän rabadre nikwe? b) ¿Ñobätä ütiäte krubäte nikwe nuaindre?

¹¹ Nikwe ja töi mikadre bäri kwin. Nikwe ñäkäi Bibliabätä aune drebätä nita ñäke yebätä nikwe töbikai angwane, ni rabai ja ngwen töbätä, töbike kwin bätä kukwe kwin den nuaindre jai. Ütiäte krubäte ja mräkätre rabadre ja töi mike kwin ne erere konkrekasion ngübakäre (Proverbios 1:1-4; Tito 1:7-9). Nikwe ja tötikai Bibliabätä angwane, Jehová töita ño kukwe keta kabrebätä ye rabai gare nie. Aune kukwe rabai gare nie yebiti nikwe mantre jetebe dre dre kwin niara kräke ye diain nuaindre jai. Ñodre, nikwe ni mada mikadre tuin ño jai, ngwian yebiti ni raba dre kwin nuainne, ni raba dän ño den kitadre jabätä aune jadaka meden ni raba den jai ye rabai gare nie.

12. ¿Nitre konkrekasionte yei tö ngwan raba ye raba bämike ño?

¹² Sribi meden bianta nie ye nikwe ja di ngwandre nuainne kwin. Juta Ngöbökwe nämene templo üketeta ye ngwane, Nehemías namani nitre brare ribere ja di mikakäre sribi keta kabre nuainne. ¿Nire nire dianinkä kwe? Nitre nämene ja ngwen kwin ye dianinkä kwe. Nitre ye nämene Ngöbö tarere aune sribi meden mikadre kisete ye nuaindre kwin kwetre nämene gare ie (Nehemías 7:2; 13:12, 13). Ye erere nemen bare kä nengwane. Ja mräkä tä ja ngwen metre aune tä sribire krubäte ye ngwane blitai kwinbätä. Ye ngwane sribi bian raba bäri ie raba ruin nie (1 Corintios 4:2). Ni brare o ni merire, akwa sribi meden mikadre ni kisete ye käre nikwe ja di ngwandre nuainne bäri kwin (ñäkädre 1 Timoteo 5:25 yebätä).

13. ¿Ñaka kukwe kwin nuaindre nibätä ye ngwane ni raba ja ngwen ño José erere?

¹³ Nikwe ja di kärädre Jehovai. Ni mada ñaka kukwe kwin nuaindre nibätä ye ngwane, ¿ni raba dre nuainne? Ja ruin ño nie ye ni raba mike gare ie. Akwa ni abokän tä kukwe metre niere ye ni rabai jankunu niere angwane, bäri ni raba kukwe kri mike nemen bare. José kukwe kwin bämikani yebätä ani töbike. Etebatre kwe kukwe tare krubäte nuainbarebätä, ye bitikäre niara ñaka kukwe nuainne abokänbätä kitani ngise aune kitani ngite. Akwa niara ja di käräbare Jehovai. Ngöbökwe kukwe käbämikani yebätä töbikabare kwe aune ja ngwani metre kwe (Salmo 105:19). Kukwe kri ben ja tuani kwe ye ngwane, niarakwe ja töi mikani kwin ye käkwe dimikani sribi ütiäte mikani kisete ye nuainkäre (Génesis 41:37-44; 45:4-8). Ni mada ñaka kukwe kwin nuaindre nibätä ye ngwane, Jehovakwe ni mikadre töbätä ye nikwe ribedre ie. Niarakwe ni dimikai ñaka nemen rubun aune ja töi mike jäme nikwe blitadre ni madabe ye ngwane (ñäkädre 1 Pedro 5:10 yebätä).

NIKWE KUKWE DRIEDRE BÄRI KWIN

14, 15. a) ¿Ñobätä nikwe “töbika[dre] kuin ja käne” nita kukwe driere ño yebätä? b) Kukwe mrä ben nikwe ja tuadre ye ngwane, ¿ni raba dre nuainne? (Üai bämikani kena mikadre ñärärä aune recuadro “¿Ni raba kukwe mada ükete jai kukwe driekäre?” mikadre ñärärä arato).

¹⁴ Pablo niebare Timoteo ie niara rabadre Kukwe Ngöbökwe ye mike gare bäri kwin. Arato niebare kwe ie: “Mata nüne ño, yebtä makwe töbika kuin ja käne amne, kukwe diri makwe, yebtä makwe töbika kuin ja käne arato” (1 Timoteo 4:13, 16). Kä kwati krubäte te Timoteo nämene kukwe driere yebätä kukwe nämene gare krubäte ie. Akwa, ¿ñobätä niara rabadre kukwe driere bäri kwin? Ñobätä ñan aune nitre ñaka nüne jankunu ja erebe bätä kä ñaka tä jankunu ja erebe. Timoteo törbadre nitre tuai ja kukwe nuin jankunu angwane, rabadre jankunu kukwe driere bäri kwin aune kukwe ükete bä jene jai dirikäre. Nita kukwe driere ye ngwane nikwe ye erere nuaindre arato.

¹⁵ Nita niken kukwe driere ye ngwane, kä ruäre känti nitre ñaka tä kwen kwati krubäte gwi nie. Kä madakänti abokän nitre tärä gwi, akwa ni mika ñaka niken gwä raba ruin nie. Ye erere nemen bare nibätä angwane, ni raba kukwe ükete bä jene jai blitakäre nitre ben.

16. ¿Nitre kwati tä nüke yekänti ni raba kukwe driere ño bäri kwin?

¹⁶ Ja mräkätre aune ja ngwaitre kwati tä kukwe driere nitre kwati tä nüke yekänti ye nemen tuin kwin ietre, ñodre nitre tä tren ngübare, bus ngübare, jondron rürübäin käi aune parque yekänti. ¿Niaratre tä blita kömike ño? Niaratre ruäre tä blite noticia mrä yebätä nitre ben. Niaratre mada abokän tä kukwe kwin niere nitre rüne ie monsotre kwe yebätä o sribi kwetre yebätä tätre kukwe ngwentari ietre. Nitre ye töta nemen blitai tä nemen tuin ietre ye ngwane, Biblia tä dre niere ye tätre mike gare ietre aune niaratre tä töbike ño kukwe yebätä ye tätre ngwentari ietre. Ye köböire tätre blite kwin krubäte Biblia yebätä nitre ben.

17, 18. a) ¿Dre ni dimikai ñaka kä jürä ngwen jabätä kukwe driekäre nitre kwati tä nüke yekänti? b) David nämene Jehová käikitekä ye ngwane töi nämene ño ye erere mäkwe ja töi mikadre ye raba mä dimike kukwe driere, ¿ye ñobätä era mä kräke?

¹⁷ Ji ngrabare ni ñaka gare nie yebe nikwe blita kömikadre ye ñaka raba nemen nuäre ni kräke raba ruin nie. Ye erere nämene nemen bare Eddie, ni prekursor nünanka Nueva York yebätä. ¿Dre niara dimikanina ñaka kä jürä ngwen jabätä? Niara tä niere Ngöbö mika täte ni mräkäbe ye nuainta kwetre ye ngwane, niara aune muko kwe tä kukwe känene ja dimikakäre ne kwe ñäkädre kukwe drieta kwetre ye rüere aune nitre dre niedre ye kukwei gäre dre niedre kwe ye rabadre gare ie. Ne madakäre, niaratre dre nuaindre ye tä ngwentari nitre Testiko madai. Kä nengwane Eddie töta nemen kukwe driei krubäte nitre kwati tä nüke yekänti.

¹⁸ Kätä bäri juto nibätä aune nita kukwe driere jankunu bäri kwin angwane, nita nirien kukwe ja üairebiti ye jutuai nitre madai (ñäkädre 1 Timoteo 4:15 yebätä).c Aune ni raba ni iti dimike ja mike testiko Jehovakwe raba ruin nie. David niebare: “Tikwe Jehová käikitaikä kä jökrä ngwane; käre ti täi niara käikitekä ja kadabiti. Jehová käi rabai juto tibätä; nitre töi jäme yekwe kukwe nuai aune käi rabai juto bätätre” (Salmo 34:1, 2).

NI RIRIADRE JANKUNU KUKWE JA ÜAIREBITI JEHOVÁ MIKAKÄRE ÜTIÄTE JAI

19. Ni Jehová mikaka täte metre tä ja tuin kukwe tare ben ye ñaka tä mike sribi jökrä tö nuaindi Jehová kräke ye nuainne, ¿akwa ñobätä kä raba nemen jutobätä?

¹⁹ David niebare arato: “Mäkwe jondron jökrä sribebare ye käkwe mä käikitaikä Jehová aune nitre tä ja ngwen metre mäi yekwe mä käikitaikä. Niaratre käkwe gobran metre mäkwe ütiäte krubäte ye käikitaikä aune blitai kwetre mä die yebätä, mä die yebiti mätä jondron nuainne aune gobran metre mäkwe ütiäte krubäte ye mikakäre gare nitre ie” (Salmo 145:10-12). Nire nire tä Jehová tarere aune tä ja ngwen metre ye tö ja brukwä tätebiti blitai niarabätä nitre ben. Akwa ni niena umbre krubäte o nita bren angwane, ni ñaka raba kukwe driere krubäte ju ju te ni tö nuaindi ye erere raba ruin nie. ¿Ni raba dre nuainne? Batire batire nita blite nitre tä ni bäre yebe, ñodre nitre doctor o meritre nitre bren ngübaka yebe angwane, nita Jehová käikitekä ye käre nikwe ngwandre törö jai. Aune kukwe mikata täte nikwe yebätä nita ngite angwane, ¿nikwe dre nuaindre? Yebiti ta, nikwe blitadre Jehová yebätä nitre madabe. Ye tä kä mike juto krubäte niarabätä (Proverbios 27:11). Ni mräkätre ñaka niara mike täte akwa ni abokän tä nuainne ye tä kä mike juto niarabätä arato (1 Pedro 3:1-4). Kukwe bäri tare ben nikwe ja tuadre akwa ni raba Jehová käikitekä, ni raba nemen ja ketamuko kwin kwe aune ni raba nirien kukwe ja üairebiti.

20, 21. ¿Ni ririai kukwe ja üairebiti ye matai ño nitre madabätä?

²⁰ Nikwe ja ketai jankunu Jehovabe aune nikwe sribidi bäri kwin kräke angwane, erametre niarakwe kukwe kwin mikai nemen bare ni kräke. Nikwe kukwe ükaite ora ükatekäre jai o nita nüne ño yebätä ja töi kwitakäre angwane, kä rabai bäri nie nitre dimikakäre kukwe kwin krubäte käbämikata Ngöbökwe ye mike gare jai. Aune nikwe ja mräkätre bätä ja ngwaitre ye dimikai bäri arato raba ruin nie. Nita ja di ngwen sribikäre konkrekasionte ye jutuai ietre angwane, niaratre rabai ni tarere bäri raba ruin nie.

²¹ Ni niena mekerabe Jehová mike täte o krire nita mike täte, akwa ni jökrä raba jankunu ja kete bäri kwin ben aune nirien kukwe ja üairebiti. Ni raba nitre mada dimike ño nirien kukwe ja üairebiti ye nikwe mikai gare jai kukwe ja tötikaka ja känenkäre yekänti.