Munta konkrekasion blite kukwe madabiti dimike angwane, munkwe ja ngübabiti kukwe ja üairebiti

1-3. a) ¿Ni Ngöbö mikaka täte ye jökrä kräke dre rabadre bäri ütiäte? b) ¿Ja mräkätre aune ja ngwaitre tätre ja kite blite kukwe madabiti ye kräke dre abokän ñaka nuäre? c) ¿Kukwe meden meden ngwantarita abokän nibike mike gare kukwe ja tötikara nekänti? (Üai bämikani kena mikadre ñärärä).

KÄ NENGWANE, nitre testiko Jehovakwe kwati krubäte tä ja di ngwen kukwe nieta Apocalipsis 14:6 yekänti ye mikakäre nemen bare. Kukwe niebare yekänti mikata gare kukwe Gobran Ngöbökwe yebätä driedi nitre “kä jökräbti temen amne ni bätäkä ngwarbe amne ni kukwe bätäkä ngwarbe amne ni nünanka juta kwatirekwatire te” yei. Nitre testiko ye kwati krubäte tätre ja kite blite kukwe madabiti. Niaratre ye ruäre tä sribi misionero nuainne o nitre kukwe driekä ribeta yekänti nikaninantre nüne. Niaratre ye mada abokän tätre niken konkrekasion blite kukwe madabiti ye dimike juta kwetre yekänti.

² Ni Ngöbö mikaka täte ye jökrä kräke, ja ngübadre kukwe ja üairebiti aune ni mräkätre ngübare kukwe ja üairebiti ye rabadre bäri ütiäte (Mateo 5:3, TNM) (recuadro “¿Dre gärätä?” mikadre ñärärä). Ruäre ngwane sribi tä nemen krubäte ni kisete yebätä ñaka tä nemen nuäre ni kräke kä diankakäre jai ja tötikakäre kwin kaibe Bibliabätä. Akwa ja mräkätre aune ja ngwaitre tätre konkrekasion blite kukwe madabiti dimike ye tä ja tuin kukwe madabe arato.

³ Ja kitadre blite kukwe madabiti ye ñaka nuäre ja mräkätre aune ja ngwaitre kräke, akwa käre ja tötikadre kwetre Kukwe kaibe tiebe Ngöbökwe yebätä ye ñaka rabadre käi kwitekä jabiti (1 Corintios 2:10). Dre nieta konkrekasionte ye ñaka nüke gare kwin nitre kristiano yei angwane, ¿rabadre dre nuainne ja tötikakäre Kukwe kaibe tiebe Ngöbökwe yebätä? Nitre rüne aune meyere kukwebätä tätre konkrekasion blite kukwe madabiti dimike ye ngwane, kukwe metre Bibliabätä ye tä nemen monsotre kwetre brukwäte o ñakare, ¿ye ñobätä rabadre mike gare kwin jai? Ani mike gare jai.

¿DRE RABA NI MIKE ÑAKA JA KETE KWIN JEHOVABE?

4. ¿Dre raba ni mike ñaka ja kete kwin Jehovabe? Mä raba mike gare keteiti.

⁴ Kukwe drieta Bibliabätä kukwe madabiti ñaka nüke gare nie ye raba ni mike ñaka ja kete kwin Jehovabe. Kukwe namani bare kira ye ani mike gare jai. Nehemías namaninta Jerusalén ye ngwane, monsotre kia judío ñaka nämene blite nitre judío kukweibiti (ñäkädre Nehemías 13:23, 24 yebätä).a Ye medenbätä, monsotre kia yei Kukwe Ngöbökwe ñaka nämene nüke gare. Ye köböite, niaratre ñaka namani ja kete kwin Jehovabe (Nehemías 8:2, 8).

5, 6. Nitre rüne aune meyere ruäre kukwebätä tä konkrekasion blite kukwe madabiti dimike, ¿yei dre nüke gare monsotre kwe yebätä aune dre köböite kukwe ye tä nemen bare?

⁵ Nitre rüne aune meyere ruäre kukwebätä tä konkrekasion blite kukwe madabiti dimike yei nüke gare monsotre kwe ñaka niena ja kete kwin Jehovabe. ¿Dre köböite kukwe ye tä nemen bare? Kukwe kädrieta gätäte ye ñaka tä nüke gare kwin monsotre ie yebätä. Ye medenbätä, kukwe kädrieta gätäte ye ñaka tä nemen niaratre brukwäte aune ñaka tä töi mike kukwe ye nuainne. Ni kristiano kädekata Pedro käi Sudamérica abokän nikani nüne mräkätre kwe yebe juta Australia yekänti tä dre niere ye ani mike gare jai: “Ni tädre blite kukwe ja üairebätä ye ngwane nikwe nuaindre ni brukwä aune ni töi yebiti kä jutobiti”^[1] (kukwe ja tötikara nekänti nota tä mikani mrä ngösöri mikadre ñärärä) (Lucas 24:32).

⁶ Kukwe madabe ja tuata ye abokän, nita ñäke täräbätä ja kukweibiti abokän tä mate kwin nibätä akwa ye erere ñaka tä nemen bare nita ñäke täräbätä kukwe madabiti ye ngwane raba nemen ruin nie. Ne madakäre, blitadre kukwe madabiti ye ñaka nuäre. Ye raba ni mike nainte aune ni ngwen di nekä sribikäre kwin Jehová kräke. Ye medenbätä, ni töi tädre kwatibe konkrekasion blite kukwe madabiti dimikakäre angwane, nita ja kete Jehovabe ye nikwe ngübadrebiti (Mateo 4:4).

NITRE NGÖBÖ MIKAKA TÄTE KÄKWE JA KETA JEHOVABE YE KRIEMIKANI

7. ¿Nitre Babilonia dre nuainbare Daniel töi mikakäre nämenentre nüne ño aune kukwe mika nämene täte kwetre ye ka ngäbitikäre?

⁷ Daniel aune ja ketamuko kwe jänikani ngite Babilonia ye ngwane, nitre Babilonia tö namani niaratre tuai nämenentre nüne ño aune kukwe mika nämene täte kwetre ye kain ngäbiti. ¿Nuainbare ño kwetre? Kukwebiti niaratre nämene blite ye driebare kwe ietre aune nitre Babilonia kädeka nämene ño ye erere niaratre kädekani kwetre (Daniel 1:3-7). Bel ngöbö bäri ütiäte nitre Babilonia yekwe yebiti Daniel kädekani. Rei Babilonia tö namani Daniel tuai nütüre, ngöbö kwe ye bäri dite Ngöbö Jehová mika nämene täte Danielkwe ye ngwä (Daniel 4:8).

8. ¿Daniel dre nuainbare ja ketakäre bäri kwin Jehovabe?

⁸ Kä Babilonia yekänti, mrö bänänte reikwe ye driebare Daniel ie. Akwa niara ja töi mikani kwatibe Ngöbö kukwei mike täte (Daniel 1:8). Daniel nämene nüne juta madate akwa nämene ja kete kwin Jehovabe. ¿Dre köböire namani bare ie? Niara nämene ja tötike kukwe Ngöbökwe nämene tikani hebreore yebätä (Daniel 9:2). Daniel namani Babilonia ye bitikäre kä nikani 70 biti bäri ta ye ngwane, niara kädeka nämene Daniel kukwe hebreo yebiti ye nämene gare nitre ie (Daniel 5:13).

9. ¿Ni Salmo 119 tikaka ye töi nämene ño Kukwe Ngöbökwe yebätä?

⁹ Ni Salmo 119 tikaka yebätä ni raba kukwe mike gare jai arato. Nitre sribikä ju gobrankwe yete ye ruäre nämene niara kädriere blo yebätä kä ngwani nüke kwe jai. Akwa niara ja di känänbare Kukwe Ngöbökwe yebätä aune ye käkwe niara dimikani ñaka ja ngwen nitre mada ye erere (Salmo 119:23, 61). Ngöbö nämene dre driere ye niarakwe tuanimetre nemen ja brukwäte (ñäkädre Salmo 119:11, 46 yebätä).b

NITA JA KETE JEHOVABE YE NIKWE NGÜBADREBITI

10, 11. a) ¿Nikwe ja tötikadre Kukwe Ngöbökwe yebätä angwane nikwe ja töi mikadre ño? b) ¿Dre köböire kukwe ye raba nemen bare nie? Mä raba bämike keteiti.

¹⁰ Jondron tä nuaindre krubäte nie konkrekasionte aune sribikänti, akwa ni jökrä raba kä denkä jai ja tötikakäre kaibe aune Ngöbö mikadre täte ni mräkäbe ye nuainkäre (Efesios 5:15, 16). Nikwe ja tötikadre o ja ükadrete blitakäre gätäte ye ngwane, nikwe ñaka ja töi mikadre ñäke täte Bibliabätä o tärä bätä täräkwata yebätä. Ñakare aune Kukwe Ngöbökwe ye matadre ni brukwäte aune nikwe tödekadre bäri yekäre nikwe ja tötikadre.

¹¹ Nita ja tötike ye ngwane, nikwe töbikadre kwin käne aune drebätä nikwe ja töi ükadrete yebätä nikwe töbikadre, akwa nikwe ñan töbikadre nitre mada ye aibebätä (Filipenses 1:9, 10). ¿Ñobätä nita ye niere? Ñobätä ñan aune nita ja ükete kukwe driekäre, gätä kräke, kukwe kädriekäre o kukwe bämikakäre ye ngwane, kukwe medenbätä nita ñäke ye raba ni dimike ño yebätä ni ñaka töbike käre. Ani töbike ni mrö riaka yebätä. Niara tä mrö rien ye jämi döräire ye känenkri tä bänä nuin käne, akwa ñaka raba ja buke mrö bänä nuata kwe ye aibebiti. Tö ja tuai kwin angwane, rabadre käre mrö kwin sribere ja kräke. Ye erere arato, ni tö ja ketai kwin Jehovabe angwane, nikwe ja tötikadre mantre jetebe Bibliabätä ne kwe nita dre dre ribere jai kukwe ja üairebiti ye rabadre nikwe.

12, 13. ¿Ñobätä nitre kristiano kwati krubäte tä niere ja tötikadre käre Bibliabätä ni kukweibiti ye kwin krubäte?

¹² Nitre kristiano kwati krubäte tä konkrekasion blite kukwe madabiti dimike yei nüke gare ja tötikadre käre Bibliabätä ni kukweibiti ye kwin krubäte (Hechos 2:8). Nitre misionero tä kukwe ye erere niere arato, niaratre rabadre sribi Ngöbökwe tä kisete ye nuainne jankunu, yekäre ñaka rabadre kukwe nieta gätäte ye aibe kukwe nuin ñakare aune rabadre ja tötike käre ja kukwei yebiti.

¹³ Ja mräkä kädekata Alain ye niena kä kwä kwä te ja kite kukwe persa yebätä. Niara tä niere: “Tita ja tötike gätä kräke kukwe persa yebiti angwane, tita ja töi mike kwatibe blitata ño yebätä. Tita ja kite jerekäbe ja töite blitakäre kukwe yebiti, aisete kukwe ja üairebätä tita ñäke ye käre ñaka tä nemen ti brukwäte. Ye medenbätä, käre tita ja tötike Biblia aune tärä bätä täräkwata tä ti kukweibiti yebätä”.

NITRE RÜNE, MUNKWE KUKWE METRE MIKA NEMEN MONSOTRE MUNKWE BRUKWÄTE

14. ¿Nitre rüne aune meyere kukwebätä ye rabadre dre mike gare kwin jai aune ñobätä?

¹⁴ Monsotre ie kukwe metre ye nüke gare aune tä tarere ye nitre rüne aune meyere kukwebätä rabadre mike gare kwin jai. ¿Ñobätä? Serge aune muko kwe Muriel yebätä ani blite. Kä komä biti bäri niaratre nämene konkrekasion blite kukwe madabiti ye dimike. Monso kwetre kä 17 biti ye ñaka tö jatani kukwe driei aune näin gätäbätä jatani tuin ietre. Muriel tä niere: “Ñaka tö nämene kukwe driei kukwe madabiti, akwa käne abokän tö nämene kukwe driei krubäte kukwei francés yebiti”. Serge tä mike gare niaratre nämene konkrekasion blite kukwe madabiti dimike ye köböite monso kwe ñaka namani nirien kukwe ja üairebiti. Ye medenbätä, ja töi mikani kwetre nikenta konkrekasion käne kwetre yete.

15. a) Kukwebiti blitata konkrekasionte abokän nüke gare bäri kwin monsotre ie yekänti nitre rüne aune meyere ja töi mikadre nikenta angwane, ¿kukwe meden meden ngwandre törö kwetre jai? b) ¿Deuteronomio 6:5-7 yekänti dre nieta mäträkäre nitre rüne aune meyere yebätä?

¹⁵ Kukwebiti blitata konkrekasionte abokän nüke gare bäri kwin monsotre ie yekänti nitre rüne aune meyere ruäre tä töbike nänkäreta raba ruin nie. Kukwebiti blitata konkrekasionte abokän nüke gare bäri kwin monsotre ie yekänti nitre rüne aune meyere ja töi mikadre nikenta angwane, ¿kukwe meden meden ngwandre törö kwetre jai? Kena, kä tärä ietre aune die tärä debe näre monsotre kwetre tötikakäre Jehová tarere aune tötikakäre blite kukwe madabiti o ñakare yebätä rabadre töbike. Aune ketebukäre, monsotre kwetre ye tö kukwe driei kukwe madabiti, tö näin gätäte kukwe madabiti o tö näin konkrekasion blite kukwe madabiti dimikakäre o ñakare ye rabadre mike ñärärä. Nitre rüne aune meyere kukwe ye ngwandre törö jai, ye bitikäre raba ja töi mike nikenta kukwebiti blitata konkrekasionte abokän nüke gare bäri kwin monsotre ie yekänti raba ruin nie. Aune monsotre rabadrera ja kete kwin Jehovabe ye ngwane, nitre rüne aune meyere raba ja töi mike nikenta konkrekasion blite kukwe madabiti ye dimikakäre raba ruin nie (ñäkädre Deuteronomio 6:5-7 yebätä).c

16, 17. ¿Nitre rüne aune meyere ruäre tä dre nuainne dirikäre monsotre kwetre ie Jehovabätä?

¹⁶ Nitre rüne aune meyere ruäre ye tä konkrekasion o nitre braibe tä ja ükökrö blite kukwe madabiti ye dimike, akwa niaratre diridre ño monsotre kwe ie Jehovabätä kukwe kwetre yebiti ye namanina gare ietre. Ni rüne kädekata Charles yebätä ani blite. Monsotre merire tä nimä kwe ye ruärebiti kä kwä ökän aune kä 13. Nitre blite kukwe lingala yebiti abokän braibe tä ja ükökrö yekänti niara mräkätre ye jökrä tä ja ükökrö. Charles tä niere: “Nunkwe ja töi mikaba monsotre kia merire ye tötike Bibliabätä aune Ngöbö mikadre täte ni mräkäbe ye nuainne nun kukwei yebiti”. Niaratre tä ja kite aune ja denkä kukwe lingala yebiti ne kwe blita rabadre gare monsotre kia yei kukwe yebiti nieta kwetre arato.

¹⁷ Ani blite Kevin yebätä mada. Monsotre merire tä nibu kwe ye itibiti kä kwärike aune iti abokänbiti kä kwä kwä. Kevin tä ja di ngwen kukwe metre Bibliabätä ye driekäre monsotre kia merire kwe yei kukwei francés yebiti, ñobätä ñan aune monsotre kia yei kukwebiti konkrekasion tä blite ye jämi nüke gare. Niara tä niere: “Ti muko aune ti nunta ja tötike Bibliabätä monsotre kia merire nunkwe yebe nun kukwei francés yebiti. Gätä nuainta kukwe francés yebiti yete nunkwe ja töi mikani niken sö kratire kratire arato. Aune nunta köbö denkä jai nänkäre gätä kri nuainta nun kukweibiti yete”.

18. a) ¿Romanos 15:1, 2 ye raba nitre rüne aune meyere dimike ño kukwe meden bäri kwin monsotre kwetre kräke ye den nuaindre jai? b) ¿Nitre rüne aune meyere ruäre käkwe kukwe meden mikanina gare? (Kukwe ja tötikara nekänti nota tä mikani mrä ngösöri mikadre ñärärä).

¹⁸ Monsotre käkwe ja ketadre Jehovabe yekäre nitre ja mräkäre rabadre kukwe bäri kwin den nuaindre jai^[2] (kukwe ja tötikara nekänti nota tä mikani mrä ngösöri mikadre ñärärä) (Gálatas 6:5). Párrafo 14 yekänti nikwe blitani Muriel aune Serge yebätä. Konkrekasion blite kukwe madabiti yete Muriel aune muko kwe nämene ye niaratre töi nämene jankunu dimikabätä nieta kwe. Akwa yebiti ta, ja töi mikani kwetre nikenta kukwebiti blitata konkrekasionte abokän nüke gare bäri kwin monso kwe ie yekänti dimikakäre Jehová tarere bäri (ñäkädre Romanos 15:1, 2 yebätä). Serge kukwe kwin diani nuaindre jai ruin ie kä nengwane. Niara tä niere, niaratre nükaninta konkrekasion blite kukwe francés yebiti yekänti angwane, monso kwe namani ja kete bäri kwin Jehovabe aune ja ngökani ñöte kwe. Kä nengwane monso kwe ye tä sribi prekursor regular nuainne aune tä töbike nänkäreta nitre braibe tä ja ükökrö blite kukwe madabiti ye dimikakäre.

NIKWE NGÖBÖ KUKWEI YE MIKADRE NEMEN JA BRUKWÄTE

19, 20. ¿Ngöbö Kukwei tare nikwe ye ni raba bämike ño?

¹⁹ Ni jökrä tare Jehovakwe. Niara köböire Kukwe kwe ye tä kwitani kukwe keta kabrebiti ne kwe nitre “jökrä” ie kukwe metre ye rabadre gare (1 Timoteo 2:4, NGT). Biblia tä ni kukweibiti abokän nüke gare bäri kwin nie yebätä nita ñäke angwane, nita ja kete bäri kwin Jehovabe.

²⁰ Ni jökrä käkwe ja di ngwandre ja kete kwin Jehovabe. Rabadre bare nie yekäre, käre nikwe ja tötikadre Biblia tä ni kukweibiti abokän nüke gare bäri kwin nie yebätä. Ye köböire nikwe ni mräkä ngübai kwin kukwe ja üairebiti aune nikwe bämikai erametre Ngöbö Kukwei ye tare nikwe (Salmo 119:11).