Rü bomba krikribiti | ¿Dre nieta Bibliakwe?

Kä ne rö otata krübäte rü bomba krikribiti ñobätä ñan aune juta krikri yekwe jondron rükrake bomba krikri ya tä krübätekwe aune tä mada den bäri jai. Ye medenbätä ni jökra raba nemen töbike, bomba krikri rü krakte ye bäri ngwane, rü ye kömikadre ye raba nemen bäri. Aune ye tä nitre kwati ngwen nikenkä, juta kwatibe kwe bomba krikri ne tä aune rü kadrekä kwe, ye koboire rü raba nirien ja käne juta mada mada te. Bulletin of the Atomic Scientists (Boletín de Científicos Atómicos) tä mike gare, “Nita nüne ne rö otata käre rü bomba krikri yebiti”.

¿Rü bomba krikri biti ye raba nemen bare? ¿Kä tibien ye raba nemente kwäre? ¿Rü bomba krikri bití ye tä kä jurä mike nibätä ngwane ni raba dre nuainne? ¿Dre nieta Bibliakwe?

Artículo nebätä, kukwe ngwantarita ne mikai gare:

¿Rü di bomba krikribiti ye mikani gare Bibliakwe?

Biblia ñan blite metre rü ne kwrere bätä, akwa ni töi, ja ngwain ño aune dre dre rabai bare käkwe rü kwrere mikai nökrö ki ken ye mikani gare kwe.

Kukwe tä tikani Bibliabätä ye mike ñörörö aune kukwe tä näkainkä ne ngwane yebe:

Texto Bibliabätä: Discipulotre Jesukwe käkwe ribeba niara ie: “mä köböi no bätä kä ne krüte ye dre käkwe bämikai? Ye niere nunye”. Aune Jesukwe mikaba gare ietre: “Ñobätä ñan aune nitre käkwe rüdi nitre mada rüere aune juta käkwe rüdi juta mada rüere” (Mateo 24:3, 7).

Kukwe tä näkenkä kä bití tibien: Juta kwatí, ye ngätäite juta raba jondron rükäre ye sribere, ye tä ja rüere bäri.

“Kä bitinkä te, jä nuianta bäri tare krübäte, aune ja rüeta bäri” (Proyecto de Datos de Localización y Eventos de Conflictos Armados).

Texto Bibliabätä: “Kä krüte näire, rei mötörikri käkwe rüdi niara rüere [rei ngwitärikri]” (Daniel 11:40).

Kukwe tä näkenkä kä bití tibien: Biblia tä mike gare ye erere, juta kwati tä ja rüere aune ja kete, ye abokän ñan tä rüre jabe kworikwori mikakäre gare nire abokän bäri dite. Juta dite ye ñan ai tä rüre jabe kworikwori, akwa tä krü rügäre ye sribere bäri.

“Kä kräjäta mrä nete, juta kwatí tä ja rüere kwärikwäri, ye nita tuin, ye ngätäite juta dite dite ye tä juta mada tä ja rüere ye dimike” (Programa de Datos sobre Conflictos de la Universidad de Uppsala).

Texto Bibliabätä: “Kä krüte yete kukwe tare krubäte jatai nakainkä aune ñaka rabai nuäre kä ngwankrä nüke jai”. Nitre nünankä yei “kukwe ñan rabai nükebiti ie, rabaitre kukwe ngwarbe niere ni madabätä, ñaka rabaitre ja gobraine, rabaitre nitre mada nuainne tare” (2 Timoteo 3:1-3).

Kukwe tä näkenkä käbiti tibien: Nitre kwatí kä ne näire ye erere, nitre ji ngwanka käbití tibien ye kräke ñan nemen nüäre kukwe ükate käre jabe. Aune, kukwe tä jabe kwetre ye ükadrete töi jämen bití näre, tätre jerekäbe ja käbömike aune ja dibiti kukwe nüainne. Ye koboite rü bomba krikribití ye tä nirien bäri.

“Kukwe ñan ngwain sribikäre kwairebe nie ngwane, ja rüeta ye käkwe ni mikai bäri ja tare nike” (Samir Saran y Jane Harman, Foro Económico Mundial).

¿Rü bomba krikribiti ye Ngöbokwe tuain metre näkenkä?

Biblia ñan kukwe ye niere, akwa tä kukwe mike gare “jondron jürä ngwan bä jabätä tuai” o kukwe kwe ni ngwain nikenkä (Lucas 21:11). Kukwe ye erere nämani bare keteite, ye abokän bomba krikri kitani rü Ketebu käre ye näire ngwane. Biblia tä mike gare merebe, ñobätä Ngöbö tä rü ye tuen metre nakenkä. Mä tä mikai gare ja bäri ngwane, video mike ñärärä ¿Ñöbätä Ngöbö tä ja tare nika tuenmetre nakainkä?

¿Kä ne rabaite kwäre?

Jän. Jondron rükäre mada biti rüre jabe, Akwa, kä tibien ne niandre ngwarbe ye Jehová ñan raba tuenmetre nakäinkä. Biblia tä mike gare kä tibien ne nian ñan raba ngwarbe aune nitre nire nire käkwe nünandi käre kä tibienbätä.

“Kä tibien täi kärekäre” (Eclesiastés 1:4).

“Ngöbö metre, kä tibien Ükatekä, Sribebare kwe kärekäre, ñaka sribebare ngwarbekäre kwe, ñakare aune ükaninte kwe nünankäre” (Isaías 45:18).

Nitre rüäre tä nemen nütüre nitre rabaite rüäre rüäre abokän täi ja tuin nünankäre kä nianina ngwarbe aune ngire krübäte yete. Akwa Biblia tä mike gare kä tibien nian raba ngwarbe rükwe Akwa rabaita kwin ta täte.

“Kä ngwarbe nötare aune dobo nötare ye rabai kä ngwen juto jabätä, kä kiare nötare yebätä kä rabai juto aune blü rabaikä azafrán ye kwrere” (Isaías 35:1).

Kä bänüäre te, ni kwatí sribire kwairebe aune kä jutobiti. — Nikwe nünandre kä jutobití kä bänüäre te ye ie Ngöbö tö.

Ni Ní dätekä yekwe kä tibien ne sribabare kwin nekwe rabadre nemen ta täte kwin bobukäre. Gare nie arato, Ngöbökwe ja di kri ye bití käne ükaiteta kwin aune raba kärekäre ju nikwe ye erere (Salmo 37:11, 29; Apocalipsis 21:5).

¿Rü bomba krikribiti ye jurö tä nemen nibätä yebe ni raba ja tuin ño?

Nitre rüäre abokän bätä kä jurä tä krübäte, ye abokän mikata gare “kä jurä tä nemen krübäte bomba krikri aune kukwe meden raba nemen bare yebätä”. ¿Kukwe käbämikata aune kukwe ja jie ngwankäre tä Bibliabätä ye raba di dimike ño ja tuäre kä jurä tä nibätä yebe aune nüne kwekebe?

Biblia tä blite kä jä känenkäre kwin tä kä tibien ne kräke aune ni nire kräke yebätä. Kukwe käbämikata ye tä nemen “ancla ja nire nikwe kräke ye erere aune tä ni dimike ñan kä jurä ngwen jäbätä (Hebreos 6:19, nota). Bäri kwin nikwe nünandre kä kwatire kwatire te aune nikwe ñan töbikäre kä ja känenkäre yebätä. Jesuskwe nieba erere, “Kukwe niena kabre töbikakäre köbö kwatire kwatire te” (Mateo 6:34).

Erametre ni jökrä rabadre ja töi aune ja ruin ño nie ye ngöbare biti. Ye ni raba nüaine, ñodre ni ñan rabadre kukwe ñan ütiäte tä kä jurä mike nibätä ye ken ja mike, ni raba bämike blitata, kukwe mikata gare aune nitre tä töbike ño kukwe mrä nakenkä yebätä tä niere yebiti. Ne ñan tä Mike gare kukwe ye ñan tuin nie, ñakare aune kukwe ye ni ñan raba ükete o ñan raba nüke yebätä nita ye nuaine.

“Ni tä töbike krubäte ye brukwä tä nemen ulire, akwa kukwe kwin nieta ye tä kä miketa jutobätä” (Proverbios 12:25).

Kukwe blo tä nakainkä yebätä ñan ja töimike ñakare aune töbike kukwe kwin tä mäkwe yebätä.

“Angwane Ngöbö tödekakrä nikwe ye käkwe kä mika bäri nuäre munbtä amne mun mika nüne jäme kwe” (Romanos 15:13).

Uai te ni brari iti tä kä ja käne käre ye ie tödeke. 1. Niara trökri rü ta ye bämikata: ru käinta rü käre, krü rü käre käinta aune bomba tä ngidiente kä keteiti känti. 2. Niara känenkri kä tibien merebe aune jäme te nükwo, ngütuä, kä kiare tibien aune ñö tä. — Kukwe kwin käbämikata kä ja känenkäre yebätä, rabai yei ni raba tö ngwen.

Kukwe käbämikata Ngöbökwe ye mikadre gare jai ye koboire ni raba tö ngwen, kä raba nemen juto nibätä aune tö nemen jäme.

¿Armagedon bomba krikribiti yebätä Biblia tä kukwe mke gare?

Nitre rüäre tä nütüre Armagedon ye abokan rü bomba krikri bití kä ngöibiti tibien aune rü nekwrere ye raba ni mike ja tare nike krübate ye tätre bämike ja töite.

Akwa Biblia tä kukwe Armagedón niere ye ngwane tä blite rüdi nitre “gobrantre krikri kä jökräbiti tibienkwe”, ye abokän, gobrantre känebätä, aune Ngöböa (Apocalipsis 16:14, 16). Ne abokan ñan tä blite nitre murieketata bomba krikri bití jerekäbe yebätä. Armagedón yete, Ngöbökwe ñaka nitre murie ketai jerekäbe kwatí, ñakare aune nitre blo ye mikai krütekwe. Ye köböire kä jäme erametre ye rabai aune ñan nünandi kä jüräbe jäbätä (Salmo 37:9, 10; Isaías 32:17, 18; Mateo 6:10).

Biblia tä mike gare, ¿rü ye mikai krüte ño?

“Tä rü ye mike krüte kä jökräbiti tibien. Tä tukwen ötöbätä aune tä buko ye tikekä ötöbu ta; karo rükäre ye tä kukwe ngise ñukwäte” (Salmo 46:9).

Jehovakweb di kwe ye mikai tuäre kä ngöi bití tibien aune nitre tä ja rüere kworikwori bätä krübiti rüta ye dikainte kwe. Ye mikai nemen barekwe gobrankwe yebiti, ye ngwane gobran kä kwinbiti yekwe kä tibien ne gobrandi (Daniel 2:44).

Gobran Ngöbökwe yekwe ni tötikäi nünankäre jäme aune keteitibe jäbe. Gobran keteitibe käkwe gobrandi kä ngöibití tibien ye koboire nitre ñan rabai jä rüere kworikwori. ¡Aune nitre ñan rabai itibe ja kite rükäre! (Miqueas 4:1-3). ¿Dre rabai bare? “Niaratre itire itire rabai täkäni vid bätä higuera kwe ye täni aune ñaka kä jürä ngwain jire bätätre” (Miqueas 4:4, Nueva Traducción Viviente).

a artículo ye mike ñärärä “¿Armagedón ye abokän dre?”.

b Jehová ye abokän Ngöbö kä (Salmo 83:18). Artículo mike närärä “¿Nire abokän Jehová?”.

¿Rü bomba krikribiti yebätä tärä Apocalipsis ye tä blite?

Tärä Apocalipsis tä blite jondron jökrä mikai krüte jerekäbe ngwarbe bomba krikribití, ye nütüta nitre kwatí kwe (Apocalipsis 6:14; 8:7-12; 16:1-21). Nodre, nieta jondron “kä rababa ñukwä kä käinbti mike kite timonkwäre” (Apocalipsis 13:11-13). Akwa, nun testiko Jehovakwe ie nüke gare, ñan rüdi bomba krikri biti ja täri nieta, ñakare aune bomba krikri bití rübare Rü Kri käninkä Bobükäre ye näire yebätä.

Tärä Apocalipsis tä blite jondron rükäre yebätä, akwa ñan tä kukwe mike gare ni ngwan käre nikenkä. Mä ñäkä tärä Apocalipsis bätä ngwane, mäkwe ngwan törö:

Tärä netä kukwe bämike, ye ñan tä blite kukwe tä nüke gare jeñe ie yekwrere (Apocalipsis 1:1).
Tärä ne ñan tikani nitre ngwankäre nikenkä, ñakare aune kä ngwankäre juto nirekwe kukwe ye mikai nüke gare jai aune mikai täte kwe yebätä (Apocalipsis 1:3).

Kukwe mikakäre gare bäre jai, ñäke articulo “¿Kukwe meden mikata gare tärä Apocalipsis yebätä?”.