Armagedón ye kömika raba ye nitre político tä mike gare | ¿Dre nieta Bibliakwe?

Köbö Lunes 10 octubre 2022 dekäkri yete, nitre ruso misil kitani kä ruäre Ucrania yekänti. Kukwe ye namani bäre ñobätä ñan aune köbö köböbu ye känenkri bomba kitani abokän käkwe puente kri Rusia niken Crimea kokwäre ye dikaninte. Armagedón köböra nakainkä ye nitre político käkwe mikani gare ye bäsi bätäräbe kukwe ne namani bare.

• “Kennedy Gobranbäre [Estados Unidos yete] aune crisis de los misile nakaninkä Cuba yekänti, yete ja käne ni tä bäri Armagedón ye ken. [...] Bomba nuclear ye kitadre ngwane, kä krütai o (Armagedón) ye rabai bare ruin tie” (Joe Biden, Gobranka Estados Unidos, 6 octubre 2022).

• “Nita bäri Armagedón o kä krüte ye ken tita niere arato; kukwe ne tä kä tibien ne jökrä mike kukwe tare te” (Volodímir Zelenski— Gobran Ucrania— arma nuclear yebiti rü gadrekä köböite dre raba nemen bare, ngwanintari ie ngwane kukwe ye niebare kwe; BBC News, 8 octubre 2022).

¿Arma nuclear yebiti rü gadrekä ngwane kä ne mikai krüte? ¿Dre nieta Bibliakwe?

¿Arma nuclear yebiti Armagedón kömikai?

Ñakare. Kukwe Armagedón nieta ye kädekateta batibe Bibliabätä, Apocalipsis 16:16 yete. Ye abokän gobrantre käbiti tibien käkwe rüdi jabe ye ñan ai gärätä ñakare aune Ngöbökwe rüdi “nitre gobranka krikri kä jökräbti temen” ye ben (Apocalipsis 16:14). Rü kri Armagedón yebiti Ngöbökwe gobrantre kä jökräbiti tibien gaite (Daniel 2:44).

Dre rabai bare Kä Tibien nebätä rü Armagedón yete ye mä tö mikai gare jai ngwane, mäkwe ñäkä kukwe kädekata “¿Qué es el Armagedón?” yebätä.

¿Rü nuclear yebiti nitre kä tibienbätä aune Kä Tibien ye juain ngwarbe?

Ñakare. Ja känenkäre nitre gobranka ye raba rü gainkä arma nuclear yebiti akwa Ngöbökwe ñaka Kä Tibien tuainmetre gatekäre. Biblia tä mike gare:

• “Kä tibien tä kärekäre” (Eclesiastés 1:4).

• “Nitre kukwe metre nuainkä yekwe kä tibien rabai aune nünain kärekäre te kwetre” (Salmo 37:29).

Akwa profecía tä Bibliabätä aune kukwe nemen bare yebiti kukwe ñan nemen bare käbiti tibien erere köböra nemen bare, ye nemen gare metre nie (Mateo 24:3-7; 2 Timoteo 3:1-5). Dre rabai bare ja känenkäre mikata gare Bibliabätä ye mä tö mikai gare jai ngwane, nunta nitre tötike Bibliabätä abokän ütiä kärä ñaka yebiti mäkwe mika gare jai.