¿Nitre testiko Jehovakwe tä sribire ni mada dimikakäre?

Jän. Kukwe tare keta kabre tä nakainkä angwane nun testiko Jehovakwe tä sribire nitre mada dimikakäre. Nunta nitre Testiko mada aune nitre mada dimike; kukwe nieta Bibliabätä ja jie ngwankäre Galátas 6:10: “Käre ni tädre biare ni mda mda die mike, akwa ni mräkä tödekaka Jesubti ye abko bäri die mikadre käne”, ye erere nunta nuainne. Ne madakäre, ni mada tä ja di ribere aune töi mikadre jäme Kukwe tare yebätä ye erere nunta dimike (2 Corintios 1:3, 4).

Nitre tä ükaninte

Kukwe tare tä nakainkä ye ngwane ja mräkätre mada konkrekasionte ye tätre ño aune dre ribeta kwetre jai ye nitre umbre ji ngwanka tä mike gare jai. Aune dre tä nemen bare ye niaratre tä mike gare sukursal ie aune dre dre nuainbarera kwetre ye tätre mike gare arato.

Konkrekasion kä yekänti kräke ñaka tä nemen nuäre nitre tä ja tuin kukwe tare ben ye dimikakäre angwane, Nitre Braibe Konkrekasion Jökrä Ngübabitikä Testiko Jehovakwe tätre kukwe ükete nitre tä dre ribere jai ye dimikakäre. Sukursal tä ja mräkätre ruäre denkä sribi nuainkäre aune nitre Testiko kä madakänti tätre kä denkä jai bätä ngwian kwetre yebiti tätre nitre ja tuaka kukwe tare ben ye dimike (Proverbios 17:17). Siklo kena yete ja mräkätre kwati namani mrö nike krubäte, ye ngwane kukwe ye erere nuainbare niaratre dimikakäre arato (1 Corintios 16:1-4).

Ngwian ükakröta

Nitre testiko Jehovakwe tätre ngwian bien ja töi jeñebiti ye juanta sukursal ie aune ngwian yebiti tätre nitre ja tuaka kukwe tare ben ye dimike (Hechos 11:27-30; 2 Corintios 8:13-15). Nitre ja tuaka kukwe tare ben ye dimikakäre ja mräkätre tä niken ja töi jeñebiti, aune ngwian bianta ja töi jeñebiti yebiti nitre ja tare nikaka ye dimikata. Ne madakäre, ngwian bianta ja töi jeñebiti ye ñaka kitakata ngwarbe (2 Corintios 8:20).