“¿Dre abokän Armagedón?”
Biblia tä kukwe ye mike gare
Armagedón ye abokän rü, känti gobran kä tibienbätä käkwe rü gaikä Ngöbö rüere. Gobran kä tibienbätä aune nitre tä ja mike kiri tätre ja mike Ngöbö rüere ñobätä ñan aune ñaka töta nemen Ngöbö tuai gobrane biti (Salmo 2:2). Rü Armagedón yete gobran kä tibienbätä jökrä gaite (Daniel 2:44).
Kukwe Armagedón ye ruäre ngwane tikata Har-Magedón. Kukwe ne kädekateta batibe Bibliabätä. Tärä Apocalipsis yekänti kädekateta. Yekänti profecía tä niere: “Nitre gobranka krikri kä jökräbti temen” käkwe ja ükaikrö “rükäre Ngöbö Di Kri Jändrän Jökrä Nuenkrä ye rüere”. Rü ne rakaikä “kä kädianta Armagedón hebreore ye känti” (Revelación [Apocalipsis] 16:14, 16).
¿Nire nire käkwe rüdi Armagedón? Jesukristo näin nitre rükä ja üaire ye jie ngwen, niaratre käkwe Ngöbö rüe ye gaite (Apocalipsis 19:11-16, 19-21). Nitre tä ja mike Gobran Ngöbökwe rüere aune tä Ngöbö ye mike tuin ngwarbe jai (Ezequiel 39:7).
¿Rü Armagedón ye rabai bare kä keteiti känti? Ñakare. Rü Armagedón ye rabai bare kä jökräbiti tibien, ñan rabai bare kä keteiti aibe känti (Jeremías 25:32-34; Ezequiel 39:17-20).
Kukwe Armagedón ye hebreore nieta kore, Har Meghiddóhn. aune ye abokän “Ngutuä Meguidó” meden gärätä. Juta Meguidó ye nämäne kä känti nitre Israelkwe nünanbare kira yete. Juta ye ken rü keta kabre ütiäte namani bare. Rü ruäre kädekateta Bibliabätä (Jueces 5:19, 20; 2 Reyes 9:27; 23:29). Armagedón ye ñaka tä kä juta Meguidó nämäne kira yete, ñobätä ñan aune yekänti ngutuä ñaka nämäne jire kädekani kore. Arato kä kiare kädekata Jezreel känti Meguidó tä, yete nitre rükä ñan raba jökrä yekänti. Armagedón ye abokän gobran jökrä kä tibienbätä ja töi mikai gwairebe Gobran Ngöbökwe ye rüere mrä.
¿Rü Armagedón ye ngwane dre rabai bare? Ngöbökwe dre nuaindi ja di kwe yebiti ye ñaka gare metre nie. Akwa ne abrä gare nie, kirabe niarakwe kukwe ükaninte dobo kri yebiti, ñü järe yebiti, käta niken ñöte yebiti, unsuli yebiti, bren tare yebiti aune ñukwä kä kwinbätä yebiti (Job 38:22, 23; Ezequiel 38:19, 22; Habacuc 3:10, 11; Zacarías 14:12). Nitre rabai töi niä kwäräkwärä ye medenbätä nitre Ngöbö rüere ye ja kämikai kwärikwäri. Mrä mada, Jehová ara tä rüre bentre ye rükai gare ietre (Ezequiel 38:21, 23; Zacarías 14:13).
¿Rü Armagedón ye köböite kä ne juain ngwarbe? Kä tibien ne ñaka juandi ngwarbe rü Armagedón ye köböite. Kä ne sribebare ne kwe ni nünandre kärekäre te (Salmo 37:29; 96:10; Eclesiastés 1:4). Aisete, Armagedón ye ñaka kä juandi ngwarbe täte. Ñakare aune Armagedón ye näire ni Ngöbö mikaka täte “kwatí” mikai kwäre (Revelación 7:9, 14; Salmo 37:34).
Akwa Armagedón yebiti kä ne mikai krüte ¿ye ñan ai drieta Bibliabätä? Bäkänä, bersikulo ruäre yete kä ne nieta ngwane blitata kä tibien nebätä. Akwa ni meden meden tä ja mike Ngöbö rüere yebätä Biblia tä blite ngwane kä ne nieta arato (1 Juan 2:15-17). Aisete Armagedón ye käkwe “kä ne” o ni Ngöbö rüekwe ye gaite täte ni raba niere (Mateo 24:3).
¿Ñongwane rü Armagedón kömikai? “Ja tare nikai kri krubäte” ye bitikäre kukwe mada rakaikä aune mrä rü Armagedón rabai bare. Niara nämäne blite kukwe nebätä ngwane ne niebare kwe: “Akwa köbö ñongwane aune hora nuäi ye ñan gare ni jire iti ie, ñan gare angeletre kä kwinbätä ie, aune ñan gare Ngöbö Monsoi ie, gare ti Rün aibe ie” (Mateo 24:21, 36). Armagedón rabai bare käi näire kädekata Jesús köböi no ye Biblia tä mike gare merebe nie Jesús köböi no ye kömikani kä 1914 (Mateo 24:37-39).