¿Ñobätä nitre testiko Jehovakwe tä kukwe mikata täte kwetre ye ruäre kwite?

Kukwe mikata täte nikwe ye jökrä tä mikani Bibliabätä. Ye medenbätä, nüke gare kwin nie ye ngwane, nita mike täte.a

Ñobätä kukwe ruäre kwitata ye tärä Proverbios 4:18 tä mike nüke gare nie: “Ni kukwe erametre nuainkä ji kwetre ye ñotra trä kwrere tä trä ngitiekä bäri ngwenbrere bätärekä bätärekä nememe kä rabadre ngwen täte”. Ñodre, kä trä tä kite diore dekä aune bätärekä bätärekä tä kite kä bä mike nuäre, ye erere Ngöbö tä kukwe metre mike gare ni niara mikaka täte yei kä debe näre te (1 Pedro 1:10-12). Aune Biblia mikani gare “kä krüte näire” Ngöbökwe kukwe ne mikai nemen bare bäri jötrö (Daniel 12:4).

Ni ñaka raba töbike krubäte kukwe ruäre kwitata nebätä. Nitre Ngöbö mikaka täte kira rabadre ja töi aune kukwe ruäre kwite ye nükani gare ietre.

• Jehovakwe nitre israelita mikadre kwäre käi jämi nüke ye känenkri Moisés tö namani ja mikai nitre ye diantarikä kä nämene 40 niarabiti ye ngwane (Hechos 7:23-25, 30, 35).

• Mesías murie ketai aune rükaita nire mikani gare ye ñaka nükani gare nitre apóstol ie (Isaías 53:8-12; Mateo 16:21-23).

• “Köbö Gobran [Jehová, TNM] krikwe” rükai kä ñongwane te ye ñaka nükani gare nitre kristiano kena ruäre ie (2 Tesalonicenses 2:1, 2, Ngöbö Täräe, tärä okwä ükaninte).

Kä nikani ta, Ngöbökwe nitre niara mikaka täte kira töi ükaninte. Ye erere arato nuaindre kwe ni kräke ye nikwe ribedre ie (Santiago 1:5).