MONSOTRE BATI TÄ KUKWE NGWENTARI
¿Tikwe dre mikadre gare jai dö yebätä?
Biblia ñaka niere dö ñadre ye käme, akwa ñaka ñadre krubäte aune gobrantre ñaka ñäkäire ngwane, nuain raba. Akwa dröba nika yebrä Biblia tä ñäkäire (Salmo 104:15; 1 Corintios 6:10).
Akwa ja ketamuko mäkwe tö rabadre mä tuai dö ñain, akwa gobrantre o mä rün aune mä meye ta ñäkäire mäi, ¿ye ngwane mäkwe dre nuain?
Dre raba nemen bare yebätä mäkwe töbika
Kä ngwankäre juto jabätä yekäre dö ñadre ye ja ketamuko ruäre mäkwe raba nemen nütüre. Akwa mäkwe dö ñadre ngwane, ¿dre raba nemen bare?
Mä raba ja mike ngite gobran rüere. Juta ruäre känti gobrantre tä kukwe ükete dö ñadre yebätä. Mäkwe ñaka mikadre täte ngwane, multa mika raba mäbiti, mä kita raba ngise, licencia caro mikakäre nen ye dianka raba mäkän, mä mika raba sribire juta bäre o mä kita raba ngite (Romanos 13:3).
Mä kädrie raba käme. Nita dö ñain ye ngwane, ni raba kite ja ngwen ñaka kwin. Nikwe dre niedre o nikwe dre nuaindre yebätä ja raba nemen ruin ngite nie (Proverbios 23:31-33). Aune kä nengwane kukwe mikata gare krubäte redes sociales yebiti, aisete mäkwe dre nuaindre ye köböite mä kädrie raba käme kä kwati krubäte te.
Mä raba ja mike kukwe tare te. Mä tädre dröbare ngwane, ni mada raba mä nuainne tare o küdrere mäbätä. Arato nitre mada raba mä töi mike kukwe ñäkäita gobrankwe o kukwe tare ye nuainne.
Mä töi raba dö ñabätä krubäte . Nitre ja tötikaka kukwe nebätä ta mike gare, mä jatadre dö ñain mä tädre bati krubäte ngwane, bäri jötrö mä töi raba nemen dö ñabätä krubäte. Mä tädre ngwarbe, ja rabadre ruin kaibe mäi o töbika tädre mä kisete ngwane mäkwe dö ñadre ye köböite mäkwe nuaindi jankunu aune ñaka rabai nuäre tuametrekäre mäi.
Mä raba krüte. Bitinkä , juta Estados Unidos yekänti mikani gare, minuto nämäne niken 52 ta yete ni iti nämäne krüte caro mikabätä nen dröbare. Arato, kä nikani krärike ta yete, monsotre bati 1,500 biti bäri abokänbiti kä jämi 21 ye krütani caro mikabätä nen dröbare. Ne madakäre, mä ñan dö ñain, akwa mä rikadre carote ni dröbare ben ye ngwane kukwe tare raba nemen bare mäbätä.
Mäkwe kukwe dian nuaindre jai
Mäkwe dre nuain ye mäkwe dian nuaindre känenkri jaiyebätäi, ye köböire kukwe kri ñan rabai bare mäbätä dö ñabätä krubäte.
Biblia tä kukwe ne niere ja jie ngwankäre: “Ni töbätä ie kukwe tare ye tuin aune tä kämikekä” (Proverbios 22:3). Mä rikadre caro mike nen o mäkwe sribi mada nuaindre ye känenkri mäkwe dö ñadre ngwane, kukwe tare krubäte raba nemen bare mäbätä.
Tikwe ne nuain: “Tikwe dö ñai ngwane, tikwe nuaindi gobrantre ta kukwe ükete ye ererebätä aune ti raba nuainne ye aibe ngwane”.
Biblia tä kukwe ne niere ja jie ngwankäre: “Mun abrä klabore niarakwe, ye abrä munta mike täte kisete” (Romanos 6:16, NGT). Mätä dö ñain ja ketamuko mäkwe tä nuainne ye aibebätä ngwane, mätä nitre mada tuenmetre ja gobraine. Mätä nuainne ne kwe mä ñan tädre ngwarbe o töbika ñan rabadre mä kisete ngwane, kukwe rabadre mä kisete ye ükadrete ño ye ñan rabai gare mäi.
Tikwe ne nuain: “Nitre madakwe ti mikadre ja dibiti dö ñain ye ti ñan tuainmetre nemen bare jabätä”.
Biblia tä kukwe niere ja jie ngwankäre: “Nitre vino ñaka krubäte [...], ye ngätäite mä ñaka tädre” (Proverbios 23:20). Mäkwe dre diani nuaindre jai ye ja ketamuko ñaka kwin käkwe ñan mä dimikai mike täte. Mätä ja kete nitre dö ñaka krubäte ben ngwane, mätä ja mike kukwe tare te.
Tikwe ne nuain: “Ti ñan tö ja ketabätä nitre dö ñaka krubäte ben”.