Dö kwaka tuin ño Jehovai ye erere mä mika tuin jai

METRERE Jehová regalo keta kabre bianina nie, aune käi ngwandre juto ño jabätä ye tä ni tuenmetre den jai. Regalo keteiti ye abokän vino. Metrere texto tä niere: “Ban ye sribeta kä ngwankäre juto jabätä aune vino yebätä jata nemen ruin kwin nie” (Ecl. 10:19; Sal. 104:15). O ni ruäre tä dö ñain krubäte ye ni tärä tuin. Ne madakäre, nünanta ño kwe kä medenkänti tä nüne yebätä niaratre tä töbike jene dö kwaka ñata yebätä. ¿Akwa ni kristiano rabadre kukwe ne mike tuin ño jai?

Ni nünanbare medente o ni ngübabare ño ye ñan aibätä kukwe dian nuaindre jai dö kwaka yebätä, ñakare aune Jehová töita ño dö kwaka yebätä, yebätä töbikadre. Ne erere nuaindi ngwane, kä täi bäri juto nibätä.

Nitre kwati tä dö kwaka ñain aune krubäte ye ni tärä tuin. Ruäre tä dö ñain ja rabadre ruin kwin ie yekäre, o mada tä dö ñain kukwe kri tä kisete ye käi kwitakakäre jabiti. Kä ruäre känti nitre tä dö ñain krubäte niena ünä o dite ye bämikakäre.

Ni kristiano abokän jie ngwanta Ngöbö kri Jehová yekwe. Niara kukwe yebätä nikwe dö kwaka ñadre krubäte ngwane, dre raba nemen bare ye tä mike gare nie. Ñodre, Proverbios 23:​29-35 yete ni iti tä dröba nike aune kukwe tare medente tä ja mike yebätä blitata.a Ni umbre ji ngwanka konkrekasionte nünanka Europa kädekata Daniel, ye nämäne ja ngwen ño jämi ja mike testiko ye ngwane, tä niere: “Dö ñabätä krubäte tikwe kukwe käme diani nuaindre jai. Ye köböite kukwe kri namani ti kisete aune kukwe tare namani bare tibätä ye törö kwekebe tie”.

¿Dö kwaka ñadre krubäte ye köböire kukwe tare tä nemen bare yebätä nikwe ja ngübadrebiti yekäre dre raba ni dimike? Kukwe tuin ño Jehovai ye erere mikare tuin jai ye ütiäte krubäte.

Biblia tä dre mike gare dö kwaka ñabätä aune ñobätä nitre ruäre tä dö kwaka ñain ye ani mike gare jai.

BIBLIA TÄ NE MIKE GARE

Dö ñadre chi ye Kukwe Ngöbökwe ñan ñäkäire. Dö ñata ye abokän jata nemen ruin kwin nie, ñobätä ñan aune Eclesiastés 9:7 tä niere: “mäkwe mrö kweta kä jutobiti aune mäkwe vino ña ja brukwä kwinbiti”. Ne madakäre, Biblia tä niere Jesús aune nitre ja tötikaka mada ye käkwe vino ñabare (Mat. 26:​27-29; Luc. 7:34; 1 Tim. 5:23).

Ne madakäre, dö ñadre chi aune dröba nikadre ye ñan ja erebe. Biblia tä niere: “Munkwe ñan dö kwaka ña dröbakäre” (Efes. 5:18). Arato tä niere nitre dröba nikaka […] yekwe Gobran Ngöbökwe ye ñaka rabai (1 Cor. 6:10). Nibira gare nie erere, Jehová brukwä tä nitre tä dröba nike aune dö ñain krubäte ye kräke. Ye medenbätä, ñaka ja töi mikadre nitre ni käbiti tä ja ngwen ño yebätä, ñakare aune Jehovata töbike ño döbätä, yebätä töbikadre.

Nitre ruäre tä niere: “Ti raba dö ñain krubäte aune ñaka nemen dröbare”. Akwa töbikadre kore ye ñaka kwin. Biblia tä mike gare mrebe. Nitre tä ene dö kisete yebätä raba nemen ja mike ngite krubäte, merire o brare, akwa raba nuainne, ye köböite raba ja mike ngite krubäte tä ja kite Jehovabe ye raba nete kän (Tito 2:3; Prov. 20:1). Nitre tä dö ñain krubäte ye ñaka nünain kä mrä yete niebare Jesukwe (Luc. 21:​34-36). Nitre dö ñaka krubäte yekwe Gobran kä kwinbiti ñaka rabai. Nane ni kristiano käkwe ja tuadre kukwe ne kwrere ben, ¿yekäre dre nuaindre kwe?

ÑOBÄTÄ BÄBE AUNE MÄTA DÖ ÑAIN NUÄI YEBÄTÄ MÄKWE TÖBIKA

Nibira gare nie erere, ni nünanbare ño o ni ngübabare ño yebätä ni raba nemen kukwe den nuaindre jai dö ñata ye ngwane. Akwa, mrö meden kwin aune dö meden ñadre yebätä nitre kristiano tä töbike kwin aune Jehová käikitadrekä ye bäri kwin kräke. Biblia tä mräträre ne kwrere nibätä: “Munkwe mrö ya, munkwe tomna ña ya, munkwe dre dre nuen, erere munkwe nuen jökrä Ngöbö rabadre käikitaninkä abkokäre” (1 Cor. 10:31). Kukwe ruäre ngwantarita aune kukwe ja jie ngwankäre meden Bibliabätä raba ni dimike kukwe dian nuaindre jai yebätä ani töbike.

¿Tita dö ñain ne kwe ni mada ti kadre ngäbiti kwin? Éxodo 23:2 tä niere: “Mä ñan ja töi mikani nitre kwati ye erere”. Bersikulo nekänti, Jehovakwe niebare nitre israelita ie ñaka rabadre ja ngwen nitre käme ye erere. Kukwe niebare Jehovakwe ne täbe ütiäte nitre kristiano kä nengwane ye kräke. Nikwe ja ngwain nitre mada erere o tä töbike ño ye erere ngwane, kukwe bianta Jehovakwe nie ja jie ngwankäre ye ni ñaka jataira mike ütiäte jai (Rom. 12:2).

¿Ti dite bämikakäre tita dö ñain? Kä ruäre känti dö ñadre aune dröba nikadre krubäte ye ñan tuin blo (1 Ped. 4:3). Akwa 1 Corinitios 16:13 tä mräträre ño nibätä ye ani mike ñärärä. Tä niere: “Angwane mun abko käkwe ñan dikaka okwä kware amne munkwe nünanka dite tödekabtä ni Dänkienbti. Erere arato, munkwe ja die mika kri nünenkä dite Satana rüere”. Nibira gare nie Biblia ye tä mike gare mrebe dö ñata ye ñan tä ni mike dite, ñakare aune kä ta nemen ngwarbe ni dökwäbiti. Ye köböite kukwe käme dianta nuaindre jai. Aune dö ye ñaka tä ni mike dite, ñakare aune tä ni mike di ñakare. Isaías 28:7 tä niere nire tä dö ñain ye ñan tä töbike kwin aune tä kukwe käme nuainne.

Ni tö ja tuai dite kukwe kwin diankäre nuaindre jai yekäre, nikwe ja di kärädre Jehovai aune ni tädre mökre aune tödeka nikwe tädre dite (Sal. 18:32). Akwa yekäre ni tädre ngwäte aune kukwe meden raba ja keta Jehovabe ye juen ngwarbe yebätä ja ngübadrebiti. Jesús nuainbare ye erere, yebätä niara ye dite aune ñaka kä jurä ngwani jabätä kwe kukwe diankäre nuaindre kwe jai ye niebarebätä.

¿Kukweta mä kisete ye käi kwitakakäre jabiti mätä dö ñain? Ni salmo tikaka käkwe kukwe ne niebare Jehovai ie: “Töbika nämä nemen ti nike krubäte ngwane, mä nämä ti töi mike jäme aune ti mike kwekebe” (Sal. 94:19). Kukwe ruäre tä mä mike töbike krubäte ye ngwane, mä ñan ja kriemika dö yebätä, ñakare aune mäkwe ja dimikamana Jehovai. Kukwe keteiti mä raba nuainne ye abokän mäkwe oradre bäri. Nitre kwati tä mräträmana jabätä nitre niena umbre ja üairebiti ye ie yekwe dimikanina. Metrere kukwe tä nemen ni kisete ye ngwane dö ñadre ye ñaka raba ni dimike kukwe kwin den nuaindre jai, ñakare aune tä ni mike di ñakare aune ni ñaka töbike kwin (Os. 4:11). Daniel, kädrite käne ye tä niere: “Ti nämä dö ñain töbikakwe nämä kri ti kisete yebätä aune ja nämäne ruin ngite tie yebätä arato. Akwa ye köböite kukwe kri jataba nemen ti kisete. Ti ñan jatabara ja kete kwin ja ketamuko tikwe ben aune ja nämäne nemen ruin käme tie”. Akwa, ¿dre käkwe niara dimikani ye bitikäre? Niara tä niere: “Ti rabadre ja di kärere Jehovai ye rükaba gare tie aune ñaka dö ñain kukwe ye käi kwitakakäre jabiti. Jehová diebiti kukwe ben ti nämä ja tuin yebe tikwe kä ngwain nüke jai”. Kukwe kri ben nita ja tuin ye ñaka nuäre ükatekäre raba tuin nie, akwa Jehovata juto biare yete kise ngökakäre nie ni ketakäre krörö ye ñaka käi kwitadrekä jabiti. (Filip. 4:​6, 7; 1 Ped. 5:7).

Mä tä dö ñain ruäre ngwane, ütiäte krubäte mä rabadre kukwe ne ngwentari jai. “¿Ja ketamuko tikwe o ti mräkätre ye tä ti töibikaire dö ñata nuäi tikwe yebätä?”. Kukwe ne erere niedre nie ngwane ni mokredre jabiti ñobätä ñan aune ni tö kitra do ñabätä krübäte akwa ni ñan gai jabätä. “¿Tita dö kwaka ñain bäri käne kräke?”. Ne tä mike gare dö ñata nuäi mäkwe ye aibätä mä töita krübate dö yebätä akwa mä töi raba kite ye erere. “¿Kä ñaka tä niken köböiti ta o raire ta ngwane ti tö törö kite mada ñainta?”. Ne erere tä nemen bare nibätä ngwane, ne tä mike gare nie dö ye niena tuin kwin nie aune tuadremetre ye ñan nuäre mä kräke . Yebätä ütiäte krubäte mäkwe ja di kärädre nitre tä ni mada dimike dö yebätä ye ie.

Ja mräkätre ñaka rabadre kukwe kri te yekäre ñaka ja töi mike dö ñain. O mada abokän dö ñaka bä no tä nemen kwin kadate yebätä ñan ñain. Ja mräkä kukwe ne erere diani nuaindre jai ye gare nie ngwane, nikwe kukwe diani kwe jai ye mikadre ütiäte jai aune ñaka ñäkädrebätä.

Ja mräkätre ruäre tä kukwe ükete jai dö ñain nuäi kwe o bäbe ñai kwe yebätä. Ruäre tä kukwe ükete jai dö ñain batibe bämän kratire kratire kwe yebätä tä kukwe ükete jai o mrö ye bitikäre ñain nuäi kwe. Ruäre abokän dö meden ñadi kwe o meden ñan ñadi kwe yebätä ta ja töi mike. Ñodre, mada abokän tä ja töi mike vino o cerveza ye ñain chitani, akwa tä ja töi mike ñaka dö bäri kwaka ye ñain aune mritani jondron madabe ye ñaka tä ñain arato. Ni kristiano ünä ja üairebiti käkwe kukwe dian nuaindre jai aune mikadi ütiäte kwe jai dö yebätä ngwane, ñaka rabai ja gaire kukwe ükaninte kwe jai yebätä.

Ne madakäre, nikwe ja töi mikadre ni madabätä. Ja mräkätre töi mikadre nüke gare jai. Romanos 14:21 tä niere: “Ne aisete nikwe ngri kwetadre amne nikwe uba döi ñadre, köböite ni mräkä käkwe ja mikadre ngite Ngöbö rüere ne ngwane, nikwe ñan ngri kwetadre amne nikwe ñan uba döi kwaka ñadre, ye abko rabadre bäri kuin. Erere arato, jändrän mden mden nikwe nuendre käkwe ni mräkä mikadre ja mike ngite Ngöbö rüere, ye abko nikwe ñan nuendre jire chi mda”. Ja mräkätre töi mikadre nüke gare jai tare nikwe yebätä aune ja ruin ño ietre o ni raba ja mike ngoto ritete ye ngwane kä ruäre te nikwe ñaka dö ñai okwäbiti. Ne erere nuaindi nikwe ngwane ni ñaka tä töbike jai aibebätä, ñakare aune ni tä ni mada ja ruin ño ietre aune nita mike ütiäte jai ye nikwe bämikadi (1 Cor. 10:24).

Ne madakäre, gobrantre tä kukwe ükete dö ñadre nuäi yebätä ye mikadre ütiäte jai. Ñodre, monsotre jämi ünä ye ñaka rabadre dö ñain o ñaka dö ñadre carro ngwandre ngwane o camion kri ngwandre kwetre ye ngwane (Rom. 13:​1-5).

Jehovakwe regalo keta kabre bianina nie aune käi ngwandre ño juto jabätä ye tä gare nie. Aune dre kwetadi nikwe o dre ñadi nikwe ye tä gare nie. Nikwe kukwe kwin bien nuaindre jai ja ngwanta ño nikwe yebiti, yebiti nikwe bämikai ni tö kä mikai jutobätä.