Monso bati tä ni mrusaire niken Ju Ja Ükarakrö te

MONSOTRE BATI TÄ KUKWE NGWENTARI

¿Ñobätä ni rikadre gätäbätä Ju Ja Ükarakrö yete?

Nitre testiko Jehovakwe tä ja ükekrö bobu bämän kratire kratire Ju Ja Ükarakrö yete. ¿Tätre dre nuainne yete? ¿Ñokäre mä rikadre gätäbätä?

¿Dre nuainta Ju Ja Ükarakrö yete?

Ju Ja Ükarakrö yete metrere ni tötikata Bibliabätä. Gätä nuainta yete mä dimikai ne nuainne:

Kukwe metre mike gare Ngöböbätä jai.
Dre nakainkä kä nengwane ye mikata nüke gare jai.
Ja ngwen bäri kwin.
Ja ketamuko erametre känene.

¿Ne gare mäi? Nitre testiko Jehovakwe tä gätä nuainne ye käi kädekata, Ju Ja Ükarakrö nitre testiko Jehovakwe ie, ñobätä ñan aune yete blitata bäri gobran Ngöbökwe yebätä (Mateo 6:9,10; 24:14; Lucas 4:43).

¿Mä rikadre yete ye ñobätä kwin?

Dre kädrieta yete ye käkwe mä dimikai. Kukwe ja jie ngwankäre kädrieta gätä nuainta nitre testiko Jehovakwe yete ye käkwe mä dimikai nemen töbätä (Proverbios 4:5). Kukwe ne tä mike gare Biblia raba mä dimike kukwe kwin den nuaindre jai. Aune kukwe ütiäte ngwantarita jai ye tä mike gare, ñodre:

Kukwe ne ruäre kädrieta gätäte bämä kratire kratire:

¿Ñobätä nikwe ja jie ngwan manandre Biblia ie?
¿Nita ja tare nike ngwane ni raba ja di kärere nirei?
¿Gobran Ngöbökwe ye tä dre nuainne ni kräke?

“Ja ketaka iti kwelate tibe janama gätäbätä. Täkäba kwe ti mräkätre ben aune nunkwe ñäkäba gwairebe täräbätä. Biti, nieba kwe tie kukwe ngwantari nämä gätäte ye nitre nämä mike gare ye rababa tuin kwin ie. Arato nieba kwe, iglesia kwetre yete jondron ñaka nämä nitre tötikakäre nun kwrere” (Brenda ).

¿Ne gare mäi? Ju Ja ükarakrö ütiä kärä ñaka aune ngwian ükakrö ñaka.

Ni rabai gare mäi yete ye käkwe mä dimikai. Nitre kristiano rabadre ja ükekrö ja di mikakäre kwärikwäri nieta Bibliakwe (Hebreos 10:24, 25). Kä ne näire nitre töi ja aibebätä, yebätä nire töita Ngöböbätä aune ni töi ni madabätä ye ben ni tädre keteitibe ye käkwe ni dimikai.

“Kä köböiti tä nemen nga ti kräke, yebätä ruäre ngwane tita nemen ulire aune nainte, akwa tita niken Ju Ja Ükarakrö yete ngwane ja tä nemen ruin kwin tie. Gätä bitikäre tita nikenta ja gwirete ngwane, kä tä nemen juto tibätä aune tita juto biare köbö mada kräke” (Elisa).

¿Ne gare mäi? Kä jökräbiti tibien konkrekasion nitre testiko Jehovakwe niena 120 mil biti bäri aune kä gätära 60 mil tärä. Kä kwatire kwatire te Ju Ja Ükarakrö sribeta mil 500 näre ni nänkä gätäbätä kite nirien bäri yebätä.a

Monsotre mada tä ne niere

“Ti rababara krone ngwane, ni iti ja ketaka tibe rikaba gätä ruärebätä aune töi rababa ñan krütare nitre biti kä ñan ja näre nämä ja tötike gwairebe tuaba kwe ye ngwane. Kä ñan rikaba krubäte tä ngwane jepe tikwe rükaba arato aune Bibliabätä ja tötika nämä yebätä töi rababa ñan krütare. Rababa tuin kwin krubäte ie jutuaba tie ngwane bäri gätä rababa tuin ütiäte tie” (Jessica).

“Gätä ye tä ti dimike ñaka töbike kukweta ti kisete yebätä jutuen tie. Ja nire ye ütiäte, ja ngwandre bäri kwin aune kukwe mada mikata gare yete. Gätä nuainta Ju Ja Ükarakrö yete ye bitikäre ti ta nikenta ngwane käre jata nementa ruin kwin aune dite tie” (Timothy).

“Tikwe ni iti nübaiba gätäte ngwane nieba kwe tie: ‘dre dre ñaka metre nuainta nete ye aibe ti ki mike ñärärä. ¡Akwa nibi gare tie kukwe mikata täte tikwe ye ara ñaka metre!’. Arato nitre testiko tä ja tarere ye käkwe ti töi mikaba niä. Niebare kwe: ‘krire ti rababa gare ietre akwa mekerabe ja gare nie ye kwrere ti ka ngäbitiba kwetre’” (Jacob).

“Ruäre ngwane tita töbike: matare gätä krütai bätärabe ti näinta. ‘Akwa gätäte kätä nikwitekä tibiti. Aune ye bitikäre tita blite ja mräkätre ben ngwane töbikata ño kena tikwe ye ñaka törö tie. Gätä ñan akräke ja ketamuko kwin ñaka tikwe” (Madison).

a Medente Ju Ja Ükarakrö gätä kräke mä törba mikai gare jai ngwane mä rika página “Gätä nitre testiko Jehovakwe” yete, aune “Medente mä raba niken” yete mäkwe clic mika.