Ngöbö taredre ye ñaka nemen nuäre nitre ruäre kräke, ñobätä ñan aune Ngöbö ye ñaka raba nemen gare nie, tä mente krubäte o käme krubäte nemen ruin ietre. Nitre ye ruäre käkwe dre niebare ye ani mike gare jai:

• “Ti nämä ja di ribere Ngöböi, akwa nämä mente krubäte tibätä rababa ruin tie. Ñaka metre aune töi ñaka nibätä ye erere rababa tuin tie.” (Marco, Italia.)

• “Ti törbaba Ngöbö mikai täte, akwa nämä mente krubäte rababa tuin tie. Ngöbö käme krubäte aune käre tä ni mike ja ngie nuin nämä tuin tie. Töi ñaka kwin ti nämä nütüre.” (Rosa, Guatemala.)

• “Ti nämä chi ye ngwane ti nämä nütüre, nita ja mike ngite ye aibe Ngöböta mike ñärärä ni mikakäre ja ngie nuin. Biti ni tä mente ni madabätä ye kwrere niara jataba tuin tie, ni gobranka töi ñaka nemen ni mada dimikabätä ye kwrere.” (Raimunda, Canadá.)

¿Mä abokän tä töbike ño? ¿Ni ñaka raba Ngöbö tarere jire? Siklo kwati te nitre kukwebätä käkwe kukwe ye ngwaninantari jai. Kä 500 nemen 1.500 ye näire, nitre jökrä bäsi ñaka nämene orare Ngöböi. ¿Ñobätä? Jürä nämene bätätre yebätä. Will Durant ni kukwe namani bare kira tikaka käkwe mikani gare krörö: “Ni ja mikaka ngite ñaka raba orare Ngöbö tä mente aune töi käme yei”.

¿Kukwe medenbätä nitre töita ye erere Ngöböbätä? ¿Dre drieta erametre Bibliakwe? ¿Kukwe metre rabadre garebätä nie ye ngwane nikwe taredre?

NITRE TÄ NIERE

“Ngöbö kä tärä o ñakare ye jämi nemen gare jire nunye. Kä tärä niedre, akwa kä ño ye ñaka raba nemen gare nunye.”(Profesor David Cunningham, tikani tärä kwe Theological Studies yebätä.)

BIBLIA TÄ NIERE

Ngöbö arabe käkwe niebare: “Ti abokän Jehová. Ti kä ye erere” (Isaías 42:8). Ngöbö kä Jehová kukwe hebreo yebiti ye abokän “Niara Töita Ño ye erere Tä Nuainne” meden gärätä.

Nikwe Jehová kä ye kädekadrete ie tö. Biblia tä niere: “Munkwe niara kä ye kädekate. Niara töi ño ye munkwe mika gare nitre ie. Niara kä ye tä mikani bäri kri ye munkwe mika gare” (Isaías 12:4).

Jesukwe Ngöbö kä ye kädekaninte aune driebare kwe nitre ja tötikaka ben yei. Bati, orabare krörö kwe Rün ie: “Tikwe mä kä [...] mikani gare ietre”. ¿Ñobätä nuainbare kwe? Niarakwe mikani gare: “Ti tarebare kri mäkwe, ye rabadre kwetre gäre; angwane ti rabadre niaratrebätä” (Juan 17:26, Ngöbö Täräe, tärä okwä ükaninte).

ÑOBÄTÄ MÄKWE MIKADRE GARE JAI

Teólogo Walter Lowrie käkwe tikani: “Nire ie Ngöbö kä ño ñaka gare yei Ngöbö ño metre ye ñaka gare [...] aune jerekäbe tuin ie jondron dite ye kwrere angwane ñaka raba tarere”.

Ni iti kädekata Victor nämene nemen bämän kratire kratire iglesiate, akwa kukwe ñaka nämene gare jire ie Ngöböbätä. Niara tä niere: “Ngöbö kä Jehová rükaba gare tie ye ngwane, ja rababa gare metre nunye ye erere ja rababa ruin tie. Ni kädrie nämä käre ti olote ye rababa gare tie. Ngöbö ye rababa metre ti kräke, aune yete ja känenkäre tä ja ketamuko tikwe”.

Jehová, abokän tä nökrö “nitre [tä] töbike niara kä yebätä” ye ken aune tä kukwe ne käbämike: “Tikwe mun mikai tuin bobre jai, monso tä rün mike täte abokän rünta mike tuin bobre jai ye erere” (Malaquías 3:16, 17). Nire nire tä Ngöbö kädekete kä kwe yebiti ye kräke tä kukwe kwin mike nemen bare arato. Biblia tä niere: “Nire nire käkwe Jehová kädekadrete ja di käräkäre ie ye rabaite nire” (Romanos 10:13, TNM).

NITRE TÄ NIERE

Diccionario Akal crítico de Teología tä niere: “Ngöbö Nimä Ngöböre Itibe ye abokän Rün, Monsoi aune Üai Deme ye ja erebe”. Aune Diccionario abreviado del cristianismo tä mike gare arato: “Nitre católicos, ortodoxos, anglicanos aune protestantes tätre kukwe ye mike era jai”.

BIBLIA TÄ NIERE

Jesús, Ngöbö Monsoi, yekwe ñaka niebare jire niara abokän Rün erere. Ñakare aune, niebare kwe: “Ti bike nikenta kä käinbti ti Rün känti, [...] ñobtä ñan angwane ti Rün abko bäri kri tikrä” (Juan 14:28). Ne madakäre, nitre ja tötikaka ben ye iti ie niebare kwe: “Ti bike nikenta ti Rün amne mun Rün känti kä käinbti. Erere arato, Ngöbö tikwe amne Ngöbö munkwe, känti ti bike nikenta” (Juan 20:17).

Üai deme ye ñaka ni nire. Nitre kristiano kena yebätä “Ngöbö Üai Deme namani täte jökrä”, aune Jehovakwe niebare: “Ni nünanka kä ketareketare [...], btä tikwe ja Üai Deme mikadi” (Hechos 2:1-4, 17). Üai deme ye ñaka Ngöbö Nimä Ngöböre Itibe, ñakare aune ye Ngöbö die abokänbiti tä sribire.

ÑOBÄTÄ MÄKWE MIKADRE GARE JAI

Nitre católicos Karl Rahner aune Herbert Vorgrimler ja tötikaka krikri Bibliabätä tä niere, Ngöbö Nimä Ngöböre Itibe “ye mika ñaka gare angwane ñaka raba nemen gare, aune mikadre gare akwa ñaka raba nüke gare täte”. Akwa, ¿ni ñaka raba nemen gare nie aune kukwe ñaka raba nüke garebätä nie ye ni raba tarere? Ñakare. Yebätä, Ngöbö Nimä Ngöböre Itibe drieta ye ñaka tä ni mike Ngöbö tarere.

Ngöbö Nimä Ngöböre Itibe ye ñaka namani Marco kädrite käne ye mike nökrö Ngöbö ken. Tä niere: “Ngöbö ñaka tö namani ja mikai gare tie ti nämä nütüre, aune ye köböite kukwe ñaka nämä nüke gare jire niarabätä tie aune nämä mente tibätä rababa ruin tie.” Akwa, “Ngöbö abko [...] ñakare Ngöbö kä ngwiankrä nokre ni töi kwitakäre kwäräkwärä” (1 Corintios 14:33). Niara ño ye ñaka tä üke nibätä, ñakare aune tä mike gare nie. Jesukwe mikani gare metre: “Nun [...] abko käta nire käikitekä, ye gare metre nunye” (Juan 4:22).

Marco tä niere arato: “Ngöbö ye abokän ñaka Ngöbö Nimä Ngöböre Itibe rükaba gare tie angwane, ti rababa ja kete ben.” Erametre, Jehová ye metre nikwe mikai tuin jai aune nikwe ñaka mikai tuin jai ni ñaka gare nie ye erere angwane, rabai nuäre taredre ni kräke. Biblia tä niere: “Ngöbö abko ni tarekä [...], aisete nire nire ñan tä ni mda mda tarere, ni ye abko ie Ngöbö gare ñakare” (1 Juan 4:8).

NITRE TÄ NIERE

“Nitre kukwe käme krubäte nuainkä tä krüte ye ngwane bengwairebe kitata kä ñukwäre yete aune kä yekänti tä ja tare nike ‘ñukwä jutra ngitiekä kärekäreʼ yete.” (Catecismo de la Iglesia Católica.) Ne madakäre, kä ñukwäre yete nitre kitata ye ngwane tä nemen mente Ngöböbätä nieta nitre ruäre ji ngwanka iglesiate yekwe.

BIBLIA TÄ NIERE

“Ni nire ja mike ngite... niara ye arabe gatai.” (Ezequiel 18:4.) Nitre krütanina ye “töi ñaka niena jire” (Eclesiastés 9:5). Yebätä nitre tä krüte ye ngwane töi ñaka nemena, ¿se ño mada rabadre ja tare nike “ñukwä jutra ngitiekä kärekäre” yete o käre tädre mente Ngöböbätä?

Biblia tä blite “ñukwä jutra ngitiekä asufrebe mni mni” yebätä (Apocalipsis 20:10). Akwa, kukwe yebiti dre mikata gare aune dre gärätä ye Biblia tä mike gare. Tä niere krörö: “Ñukwä jutra kä Timonbti ne känti abko nita krüte bobukäre” (Apocalipsis 20:14; 21:8). Kukwe yebiti mikata gare, ye ñaka kä jutra ngitiekä metre aune ñukwä jutra metre ai gärätä. Kä ñukwäre “ye känti mikadi ja tare nike kärekäre dibire rare” nieta ye abokän nitre “krütadi bobukäre” ye bitikäre ñaka mikaita nire jire meden gärätä.

ÑOBÄTÄ MÄKWE MIKADRE GARE JAI

Nikwe Ngöbö mikadre tuin jai ni ni nuainkä tare ye kwrere angwane ñaka raba ni mike nökrö niara ken. Rocío nünanka México tä mike gare: “Ti nämä chi ye ngwane kä ñukwäre ye metre drie nämä tie. Ngöbö jürä nämä krubäte tibätä yebätä niara töi kwin ye ñaka rababa tuin era tie. Käre nämä rubun aune käme krubäte ti nämä nütüre.”

Biblia tä kukwe mike gare Ngöböbätä aune nitre krütanina yebätä yekwe Rocío töi kwitani. Niarata mike gare: “Ni mika kwäre ye erere ja rababa ruin tie, jondron doboko krubäte diankata ni kötärä ye kwrere ja rababa ruin tie. Ngöbö tö kukwe kwin tuai nemen bare ni kräke, ni tare kwe aune ti raba tarere rükaba gare tie. Ni rüne tä monsotre ngübare kwin aune tö jondron kwin tuai nemen bare kräke ye kwrere tita mike tuin matare jai” (Isaías 41:13).

Nitre kwatibätä kä ñukwäre jürä, yebätä tätre kukwebätä, akwa kä jürä rabadre nibätä yebätä nikwe Ngöbö mikadre täte yei ñaka tö. Jesús arabe käkwe niebare: “Ngöbö aibe tare[dre]” (Marcos 12:29, 30). Ne madakäre, Ngöbö ñaka kukwe käme nuainne nüke gare nie ye ngwane, kukwe ükaite töi kwinbiti kwe ja känenkäre yei nemen nuäre tö ngwandre nie. Elihú, ja ketamuko Jobkwe ye erere, ni raba niere töi kwatibebiti: “¡Ngöbö [erametre] ye ñaka raba kukwe käme ye nuainne jire chi, bätä Ngöbö Die Kri krubäte ye ñaka raba kukwe ñaka metre ye nuainne!” (Job 34:10).

Bati, Jesukwe blitabare Rün kwe, Jehová yebätä Jerusalén, aune nitre ji ngwanka iglesiate nämene ja bämike jerekäbe Ngöbö mike täte ye mikani gare kwe köbö ye näire (Juan 8:12-30). Kukwe niebare kwe ye tä mike gare nie ño ni rabadre kukwe ruäre drieta Ngöböbätä ye mike gare jai. Niarakwe niebare: “Munkwe ti kukwe ne kadi täte käre ngwane, mun rabai ni ja tötikaka metre tikwe, angwane kukwe metre rabai gare mun ie. Kukwe metrebiti mun rabai kwäre” (Juan 8:31, 32, Ngöbö Täräe, tärä okwä ükaninte).

“Munkwe ti kukwe[i] ne kadi täte käre” niebare Jesukwe yebiti kukwe ruäre drieta ye metre o ñakare ye raba nemen gare nie mikani gare metre kwe. Kukwe niedre Ngöböbätä mäi angwane, mäkwe ngwantari jai: “¿Kukwe nieta ye erere niebare o driebare Jesukwe aune kukwe mada tä Bibliabätä ye erere drieta?”. Nitre käkwe apóstol Pablo kukwe nuabare yekwe dre nuainbare ye erere mäkwe nuain: kukwe niedre mäi ye metre o ñakare rabadre gare mäi yekäre mäkwe mika gare kwin jai Biblia yebiti (Hechos 17:11).

Marco, Rosa aune Raimunda kädrite käne käkwe ye erere nuainbare: ja tötikabare kwetre Bibliabätä nitre testiko Jehovakwe ben. ¿Dre namani gare ietre?

Marco: “Ti aune ti muko nämä kukwe ngwentari jai ye ni Testiko nun tötikaka ye nämä mike gare nunye Biblia yebiti. Bätärekä jatäri nun jataba Jehová tarere aune nun jataba nüne bäri kwin jabe”.

Rosa: “Ni kä tibienbätä töi ño ye ererebätä Biblia ye jerekäbe nire abokän Ngöbö mikakäre gare jai ti nämä nütüre. Akwa ti nämä kukwe ngwentari jai ye ja känenkäre jataba nüke gare tie Biblia yebiti. Kä nengwane, Jehová ye metre ti kräke, Niara yei ti raba tö ngwen”.

Raimunda: “Ngöbö rabadre gare tie tikwe ribeba ie. Kä rikaba braibe ta ye ngwane, ti aune ti muko jataba ja tötike Bibliabätä. ¡Kukwe metre rababa gare Jehová yebätä nunye! Ngöbö ye ño rababa gare nunye ye käi rababa juto krubäte nunbätä”.

Biblia, Ngöbö Kukwei, ye ñan tä kukwe ngwarbe nieta Ngöböbätä ye aibe mike gare, ñakare aune Ngöbö töi meden meden kwin ye tä mike gare arato. Ne madakäre, “ja moto kuinbti Ngöbökwe jändrän kuin biani nie” ye mikata gare kwe nie (1 Corintios 2:12). Biblia tä dre driere Ngöböbätä, töita ño aune dre rabai bare ja känenkäre ni kräke ye mä raba mike gare akwle jai. Kukwe ütiäte nebätä mä raba ñäke bäri www.pr2711.com/es yete, sección “Enseñanzas bíblicas > Preguntas sobre la Biblia” yekänti. Yete mä raba ja tötika Bibliabätä ribere jai arato ne kwe ni testiko Jehovakwe mä tötikadre Bibliabätä. Mäkwe nuaindi angwane, erametre rabai gare mäi ni raba Ngöbö tarere.