¿Ñobätä Holocausto judío namani bare? ¿Ñobätä Ngöbökwe ñan ketaninbätä?
Nitre kwati kän mräkä mürie ketani ye tä kukwe ye ngwentari jai, ñobätä kukwe ye namani bare ye ñan aibe tö mikai gare jai, ñakare aune töi mikadre jäme ye ribeta kwetre jai. Holocausto o nitre kämikani ye abokän kukwe bäri tare nuainbare nütüta nitre madakwe yebätä Ngöbö tärä ye ñan tä nemen nuäre kräketre mikakäre era jai.
Kukwe ngwarbe nieta Ngöbö aune Holocausto yebätä
Kukwe ngwarbe: Ñobätä Ngöbökwe Holocausto tuanimetre nemen bare ngwandretari yebiti ja mikata ngite.
Kukwe metre: Ñobätä Ngöböta kukwe blo tuanmetre nemen bare ye nitre brare aune merire tödekaka käkwe ngwanintarira jai. Ñodre, Habacuc käkwe ngwanintari Ngöböi: “¿Kukwe käme nuainta ye ñobätä mäta ti mike tuen? ¿Nitre ngwanta ja tare nike ye ñobätä mäta tuanmetre nakainkä?” (Habacuc 1:3). Ni Ngöbö kukwei niekä ye Ngöbökwe ñaka olo jäkäni ñakare aune kukwe ye tuanimetre kwe Bibliabätä ni jökrä dimikakäre.
Kukwe ngwarbe: Nita ja tare nike ye Ngöbö ñan töibikaire.
Kukwe metre: Kukwe käme aune ye köböite ja tare nikata ye tuin käme Ngöböi (Proverbios 6:16-19). Noé näire kukwe käme nuain nämäne krubäte kä tibienbätä, ye ngwane, “Ngöbö brukwä namani ulire” nieta Bibliakwe (Génesis 6:5, 6). Aisete, Holocausto nuain nämäne ngwane, kukwe käme nuain nämäne ye nämäne Ngöbö brukwä mike ulire arato (Malaquías 3:6).
Kukwe ngwarbe: Holocausto yebiti Ngöbökwe nitre judío mikani ja ngie nuin.
Kukwe metre: Siklo kena ye ngwane, Ngöbökwe nitre romano tuanimetre juta Jerusalén ye juen ngwarbe (Mateo 23:37-24:2). Akwa, ye bitikäre Ngöbö ñaka juta keteiti mike bäri ütiäte jai o mike ja ngie nuin. “Ni israelita ya o ni ñakare israelitare” ni ye ja erebe Ngöbö kräke (Romanos 10:12).
Kukwe ngwarbe: Ngöbö dite krubäte, ni tarekä tärä ngwane, Holocausto ye ketadrebätä kwe.
Kukwe metre: Ngöbö ñaka ni mike ja tare nike, akwa ruäre ngwane, tä tuanmetre nakainkä kä ruäre te (Santiago 1:13; 5:11).
¿Ñobätä Ngöbökwe Holocausto tuanimetre nemen bare?
Kukwe medenbätä Ngöböta ja tare nika tuanmetre nakainkä mekera nükebe kä nengwane ye arabebätä: kukwe niebare mekera ye metre o ñakare ye mikakäre gare metre ta. Ngöbö ñan tä kä tibien ne gobraine, ñakare aune Satana tä kä tibien ne gobraine mikata gare metre ta Bibliakwe (Lucas 4:1, 2, 6; Juan 12:31). Ñobätä Ngöbökwe ñaka Holocausto ketaninbätä ye kukwe ketebu tä Bibliabätä raba ni dimike mike nüke gare jai.
Ngöbökwe libre albedrío biani ni kena ie. Adán aune Eva käkwe dre nuaindre ye Ngöbökwe mikani gare ietre; akwa ñan mikani ja dibiti kwe ja kukwei mike täte. Kukwe meden kwin aune kukwe meden käme ye niaratre ara käkwe ja töi mikani nuainne. Aune kukwe ñaka kwin diani nuaindre kwetre jai ye köböite kukwe kri namani bare (Génesis 2:17; 3:6; Romanos 5:12). Yete ja käne, ni kä tibienbätä ñan tä kukwe kwin den nuaindre jai ye köböite tä ja tare nike. Ñodre, täräkwata Declaración de principios del judaísmo conservador (Statement of Principles of Conservative Judaism) tä niere: “Ja tare nikata kä jökräbiti tibien ye tä nakainkä libre albedrío biani ni kä tibienbätä ie ñan mikani ütiäte kwe jai yebätä”. Akwa Ngöbö ñaka ni ketebätä libre albedrío yebätä, ñakare aune tä kä bien nie ni törbadre dre nuainbiti ye erere nikwe nuaindre yekäre.
Holocausto köböite ja tare nikani ye Ngöbö raba ükete aune tö ükatebätä. Nitre kwati krütanina aune nitre murie ketani Holocausto köböite ye Ngöbökwe gaikröta käbämikata kwe. Nitre kän mräkä murie ketani Holocausto köböite, kukwe tare ye tä mike ulire täbe törö ietre ye Ngöbökwe denkä töite käbämikata kwe (Isaías 65:17; Hechos 24:15). Ngöböta ni kä tibienbätä tarere yebätä kukwe meden käbämikata kwe ye mikai nemen bare kwe nemen gare metre nie (Juan 3:16).
Nitre kwati krubäte ja tare nikani Holocausto ye köböite, akwa nitre ye ie kukwe kwin kwanina aune täbe tödeke jankunu. ¿Dre käkwe niaratre dimikani? Ñobätä Ngöböta ja tare nika tuanmetre nakainkä aune dre nuaindi kwe ükatekäre nükanina gare ietre yebätä.